Read Pohnpeian Seremaia 46 Bible Online

Seremaia 46 - Pohnpeian bible

Seremaia 46

¹KAUN-O ketin mahsanihong ie duwen wehi kan,

²me tepida sang Isip. Iet me e mahsanih duwen sapwellimen Neko, nanmwarkien Isip karis, me Nepukadnesar, nanmwarkien Papilonia, kalowehdi nan Karkemis limwahn Pillap Iupreitis ni kapahieun sounpar me Sehoiakim wiewiahki nanmwarkien Suda:

³“Opiser kan en Isip weriwerki, ‘Kumwail kaunopada noumwail mehn sansar kan oh wonowohng nan mahwen!

⁴Kaunopada noumwail oahs kan oh doudahng pohrail! Kumwail irekla oh lisoaropda, edehda noumwail ketieu kan, oh pwuhriong nan tehtehn mahwen!’

⁵KAUN-O ahpw ketin keinemwe, “Dahme I kilikilanget?” “Re pweiengkidohr ar masepwehkadahr kowahlap. Neirail sounpei kan luhsehr oh pwurodohr; re inenen masepwehkada, re tengetengen mour kohdo oh sohte mwahn kin pirekeklahng mwurirail.

⁶Irail ko me tang marahra sohte kak pitla; sounpei ko sohte kak doarehla ar mour. Ni paliepeng, limwahn Iupreitis, re ahpw dipekelekel oh pwupwudi.

⁷Ihs met, me kohkohda likamwete Pillap Nail, likamwete pillap ehu me lapakedahr oh pwilpeseng?

⁸Isip met, me kodahr likamwete Pillap Nail, likamwete pillap ehu me lapakedahr oh pwilpeseng. Isip ahpw patohwan, ‘I pahn kohda oh kaduhala sampah; I pahn kamwomwala kahnimw kan oh towe kan.

⁹Kumwail ruwese oahs kan pwe re en tangewei oh werennansapw en mahwen kan en mwekidwei! Kumwail kadarewei sounpei kan: ohl akan en Sudan oh Lipia weuwa mehn sansar, iangahki sounkesik ketieu saman kan en Lidia.’ ”

¹⁰Rahnwet iei rahnen KAUN-O, Wasa Lapalahpie: rahnwet e pahn ketin dupukohng sapwellime imwintihti kan; rahnwet e pahn ketin kaloke sapwellime imwintihti kan. Sapwellime kedlahs pahn kadalleirailla, oh nim ntahrail kan lao e medla. Rahnwet Wasa Lapalap ketin kamakam aramas ni paliepeng, limwahn Iupreitis.

¹¹Kumwail mehn Isip, kumwail kohla Kilead oh rapahki wini! Amwail wini kan solahr katepe; solahr mehkot kak kamwahwihkumwailla.

¹²Wehi kan rongehr duwen amwail sarohdier; aramas koaros rongehr amwail sengiseng. Emen sounpei kin dipekelekel pohn emen, oh ira koaros ahpw kin pwupwudiong nanpwel.

¹³Ni ahnsou me Nepukadnesar, nanmwarkien Papilonia ketido pwehn mahweniong Isip, KAUN-O ahpw mahsanihong ie,

¹⁴“Kumwail kalohkiseli nan kahnimw kan en Isip, nan Mikdol, Mempis, oh Dapanihs: ‘Kumwail onopada oh pein doareikumwailla; mehkoaros me amwail pahn ohkihla mahwen!

¹⁵Dahme amwail koht Apis pwupwukihdi? KAUN-O me ketin kesedier!’

¹⁶Noumwail sounpei kan dipekelekelehr oh pwupwudier; re kin ndindapene nanpwungarail, ‘Mwadang! Kitail kohkohla rehn riatail ko, kitail tangasang nein imwintihti kan kedlahs kan!’

¹⁷“Kumwail kihong nanmwarkien Isip ehu mwar kapwen-me ie ‘Kakos Lemei Me Katiasang Eh Ahnsou Mwahu.’

¹⁸Ngehi, KAUN-O, Wasa Lapalap, me nanmwarki. Ngehi me Koht ieias. Nin duwen Nahna Tapor eh ileilehsang nahna kan, oh Nahna Karmel eh ileilehsang madau, iei duwen roson en ih me mahmahweniong kumwail.

¹⁹Kumwail onopada en kalipilipala, kumwail mehn Isip kan! Mempis pahn wiahla sapwtehn ehu, mohn ihmw me aramas sohla pahn kousoan ie.

²⁰Isip rasehng kou kaselel men, me loahng pwoisin men sang paliepeng pahn sok powe.

²¹Pil nah sounpei me e pwainda kan pahn pil sohla kateparail duwehte koupwul kan. Re sohte pelian ar imwintihti kan; irail koaros pweiekte oh tangdoaui. Rahnen ar mehla leledohr, rahnen ar mwomwla.

²²Isip sopolahr, sihsiek duwehte ngilen sineik men, ni karis en imwintihti kan ar leledohr. Re mahwenkihong sile, likamwete ohl akan me kin pelepelehdi tuhke kan

²³oh kamwokamwomwala welin tuhke kan. Neirail sounpei kan me nohn ngeder sohte kak wadawad; re tohtohsang pelin loukost.

²⁴Mehn Isip kan sarohdier; re lohdier pahn manaman en mehn paliepeng. Ngehi, KAUN-O, me mahmahsen.”

²⁵KAUN-O, Wasa Lapalap, Koht en Israel mahsanih, “I pahn kaloke Amon, koht en Dihpes, iangahki Isip oh eh koht kan oh nanmwarki kan. I pahn pangala nanmwarkien Isip iangahki koaros me kin koapworopworki,

²⁶rehn irail kan me men kemeirailla, ong Nepukadnesar, nanmwarkien Papilonia oh sapwellime karis. Ahpw mwurin met, aramas akan pahn pwurehng kousoanla nan Isip, duwehte mahs. Ngehi, KAUN-O, me mahmahsen.”

²⁷“Nei aramas akan, kumwail dehr masepwehk, kumwail mehn Israel kan, kumwail dehr masepwehkada. Pwe I pahn doareikumwailla sang wehi dohwo, sang wehi me kumwail sellahng ie. Kumwail pahn pwurodo nan uhdakamwail oh soandihla ni popohl; kumwail pahn saledek sang apwal, oh sohte me pahn kamasak kumwail.

²⁸I pahn ketido rehmwail oh doareikumwailla. I pahn kamwomwala wehi koaros me I kamwarak kumwail seli ie, ahpw I sohte pahn kamwomwkumwailla. I sohte pahn mweidohng kumwail en sohte ale lokolok, ahpw ni ei pahn kalokei kumwail, I uhdahn pahn wia ni me pwung. Ngehi, KAUN-O, me mahmahsen.”