Read Pohnpeian Seremaia 47 Bible Online

Seremaia 47 - Pohnpeian bible

Seremaia 47

¹Mwohn nanmwarkien Isip eh mahweniong Kasa, KAUN-O ketin mahsanihong ie duwen Pilisdia.

²E mahsanih: “Kilang! Pihl kan loalloalada ni paliepeng, oh pahn pwilla rasehng lapake ehu. E pahn kaduhala sahpwo oh mehkoaros loale, kahnimw kan oh towe kan. Aramas akan pahn likwer en peksawas; aramas koaros nin sampah pahn sengiseng kowahlap.

³Re pahn rong ngilen pahn nehn oahs kan, ngilen ngirisek en werennansapw en mahwen kan, ngilen tangatang en mehn kadar kan. Sahm kan sohte pahn pwuralahng neirail seri kan; pehrail kan pahn sohla angi.

⁴Ahnsoun kamwomwala Pilisdia leledohr, pwehn katokihedi sang Dair oh Saidon sawas koaros me luhwehdi. Ngehi, KAUN-O, me pahn kamwomwala mehn Pilisdia kan, koaros me kohsang ni oaroahr kan en Krihd.

⁵Nsensuwed laud lellohngehr mehn Kasa, oh mehn Askelon solahr mweseisei. Ia erein mehn Pilisdia kan me luhwehdi ar pahn wie mwahmwahiei?

⁶Kumwail weriwer oh kalelapak, ‘Kedlahs en KAUN-O! Ia erein omw pahn wie palapal? Pwurala nan deumw, mihmi oh komkommoal wasao!’

⁷Ahpw ia duwen eh pahn kommoaldi, ni ei ketikihong eh doadoahk? I koasoanediongehr en mahweniong Askelon oh aramas akan me kin kousoan ni oaroahro.”