Read Pohnpeian Seremaia 9 Bible Online

Seremaia 9 - Pohnpeian bible

Seremaia 9

¹I men moangeiet en wia pwarer en pihl ehu, oh pwoaren mesei kat en wia wasahn pwepwehngkdahn pilen mas ehu, pwe I en kak sengiseng pwohng oh rahn, sengisengki nei aramas akan me kamakamalahr.

²I men mie wasahn kousoan ehu nan sapwtehn wasa me I kak kohla ie pwe I en tangasang nei aramas akan. Irail koaros me soaloalopwoat, pwihn suwed kahngohdi ehu.

³Re kin onopadahr ahnsou koaros pwe re en wia lokaia likamw; kaidehn mehlel me kaunda sahpwo pwe mwersuwed. KAUN-O ketin mahsanih, “Nei aramas akan kin wiewia me suwed ahnsou koaros oh sohte kin pohnese me ngehi me ar Koht.”

⁴Aramas koaros uhdahn pahn kaparki pein ih kompoakepah, oh sohte emen me kak likih rie; pwe pirien koaros me mwersuwed duwehte Seikop, oh aramas koaros kin karaun likamw ong kompoakepahrail kan.

⁵Irail koaros kin kaweid suwedih kompoakepahrail kan, oh sohte emen me kin lokaia mehlel; lowarail kan padahngkier lokaia likamw oh sohte pahn tokedihsang wiewia dihp. Re kin wiewia tiahk eikek ahnsou koaros, oh mwekid en mwersuwed ahnsou koaros. KAUN-O ketin mahsanih me sapwellime aramas akan soikalahr.

⁶Irail koaros kin kaweid suwedih kompoakepahrail kan, oh sohte emen me kin lokaia mehlel; lowarail kan padahngkier lokaia likamw oh sohte pahn tokedihsang wiewia dihp. Re kin wiewia tiahk eikek ahnsou koaros, oh mwekid en mwersuwed ahnsou koaros. KAUN-O ketin mahsanih me sapwellime aramas akan soikalahr.

⁷Pwehki met KAUN-O, Wasa Lapalap, ketin mahsanih, “I pahn kamwakelehda nei aramas akan duwehte mete oh sohng irail. Nei aramas akan wiadahr me suwed-% eri, dahme I pil pahn kak wiahiong irail?

⁸Lowarail kan duwehte ketieu keng; re kin lokaia likamw ahnsou koaros. Koaros kin wia koasoi kadek ong mehn mpe, ahpw ni mehlel e koasoakoasone lidip ehu.

⁹Ia duwe, I seu pahn kalokehkin irail wiewia pwukat? I seu pahn dupuk wiewia suwed en soangen wehi me duwehte met? Ngehi, KAUN-O, me mahmahsen.”

¹⁰I ahpw nda, “I pahn mwahieiki nahna kan, oh sengisengki mwetin wahntuhke kan, pwehki ar mengdier, oh solahr aramas keid wasa pwuko. Solahr ngilen pelinmen kan; mehnpihr oh mahn lawalo kan pil lipasangehr wasa pwuko.”

¹¹KAUN-O ketin mahsanih, “I pahn wiahkihla Serusalem koasoakoasoak en ihmw ohla kei, wasahn kousoan en kidi en wel kan; kahnimw kan en Suda pahn wiahla sapwtehn, wasa me sohte aramas kin kousoan ie.”

¹²I ahpw patohwan kalelapak, “Maing KAUN, dahme sahpw wet ohkihla, oh mengidi duwehte sapwtehn ehu, oh sohte aramas kin keidki ie? Ihs aramas loalokong me kak dehdehki irair wet? Ihs me komwi ketin padahkihong pwe en kawehwehiong aramas teikan?”

¹³KAUN-O ketin sapeng, mahsanih, “Met wiawiher pwehki nei aramas akan keselahr padahk me I kihong irail. Re sohte peikiong ie de kapwaiada dahme I mahsanihong irail.

¹⁴Re ahpw keptakailahr oh kin pwongih dikedik en eni kan en Paal, duwen me samarail ko padahkihong irail.

¹⁵Eri, kumwail rong dahme ngehi, KAUN-O, Wasa Lapalahpie, Koht en Israel, pahn wia. I pahn kihong nei aramas akan kisin tuhke katik kei re en kang oh pwoisin re en nim.

¹⁶I pahn kamwarakirailpeseng nanpwungen wehi kan me irail oh samarail ko sohte mwahn kin ese de pil rong duwe; oh I pahn pil kadarodohng irail karis kan lao I pahn kamwomwirailla douluhl.”

¹⁷KAUN-O, Wasa Lapalahpie, ketin mahsanih, “Kumwail medemedewe duwen dahme wiewiawi! Kumwail ekerpene sounkoulen kedepwidepw kan, lih akan me kadek koulki koulen kedepwidepw.”

¹⁸Aramas akan ahpw patohwan, “Kumwail eri ndaiong irail re en mwadangete oh koulkihong kitail apwoat koulen kedepwidepwen, lao pilen masatail kan keredi, oh ririn masatail wisekesengkihla atail sengiseng.”

¹⁹Kumwail rong ngilen mwahiei kan nan Saion: “Se inenen paisuwedlahr! Ia uwen kanamenek me se milahr loale! Kitail pahn lipasang nan sapwatail; imwatail kan ohlahr douluhl.”

²⁰I ahpw patohwan, “Kumwail lih akan, kumwail rong dahme KAUN-O ketin mahsanih, kumwail tehk kanahieng sapwellime mahsen kan. Kumwail padahkihong noumwail serepein kan mwomwen ar pahn mwahiei, oh padahkihong kompoakepahmwail kan koulen kedepwidepw.

²¹Pwe mehla pedolongehr nan atail wenihmwtok kan, oh pedolongehr nan tehnpasatail kan; e kemelahr seri kan nanial akan, oh mwahnakapw akan ni wasahn netinet kan.

²²Kahlap en aramas akan engiengiseli wasa koaros, rasehng pwisehn mahn nan mwetuwel kan, rasehng weren pilawa me soundolung kan kin kesehla mwurirail, werentuhke me sohte aramas kin rikpene. Ih met me KAUN-O mahsanihong ie I en patohwanda.”

²³KAUN-O ketin mahsanih, “Aramas loalokong sohte pahn suweiki eh loalokong, aramas kehlail sohte pahn suweiki eh kehlail, de aramas kepwehpwe eh kepwe kan.

²⁴Ma emen men suweiki mehkot, a en suweiki me e ese oh dehdehkin ie, pwehki ei limpoak me poatopoat, oh I kin wia dahme pwung oh mehlel. Ih mepwukat me I kin kupwurperenki. Ngehi, KAUN-O, me mahmahsen.”

²⁵KAUN-O ketin mahsanih, “Ahnsowo pahn leledo, me I pahn kaloke mehn Isip, Suda, Edom, Ammon, Mohap, oh mehn nan sapwtehn kan, irail kan me sehkasangehr pitenmoangarail kan. Aramas pwukat koaros sirkumwsaislahr, ahpw sohte kapwaiada inou me doke tiahk wet. Sohte emen rehn aramas pwukat oh sohte emen mehn Israel me kapwaiada ei inou.”

²⁶KAUN-O ketin mahsanih, “Ahnsowo pahn leledo, me I pahn kaloke mehn Isip, Suda, Edom, Ammon, Mohap, oh mehn nan sapwtehn kan, irail kan me sehkasangehr pitenmoangarail kan. Aramas pwukat koaros sirkumwsaislahr, ahpw sohte kapwaiada inou me doke tiahk wet. Sohte emen rehn aramas pwukat oh sohte emen mehn Israel me kapwaiada ei inou.”