Read Pohnpeian Koulen Kedepwidepw Kan 2 Bible Online

Koulen Kedepwidepw Kan 2 - Pohnpeian bible

Koulen Kedepwidepw Kan 2

¹Kaun-o nan sapwellime engieng ketin kipehkidier Saion rotorot. E ketin kauwelahr eh lingan koaros. E pil ketin kesehla sapwellime Tehnpas Sarawio ni rahn me e engiengdao.

²Kaun-o ketin kamwomwala ni sohte mahk kisin kahnimw koaros en Suda Oh ketin karangkehdi kelen mahwen kan me kin doandoare wehio. E ketin kasarowehdi wehio oh eh kaun akan.

³Nan sapwellime engieng e ketin kauwehla kehlail en Israel; E ketin soikala oh sohte kupwurki sewesei kitail ni ahnsou me imwintihtio leledo. E ketin engiengda pahtail rasehng kisiniei, me kamwomwala mehkoaros.

⁴E ketin rasehng imwintihti men me kadarodohng kitail sapwellime arep; E ketin kemehla irail koaros me kin wia atail peren oh nsenamwahu. Met nan Serusalem se kehn engin sapwellime engieng laud.

⁵Kaun-o ketin kamwomwala Israel, rasehng imwintihti men; E ketin kauwehla eh kelen mahwen kan oh tehnpesen nanmwarki kan. E ketikidohng pohn Suda pahtou ehu me sohte pahn imwisekla.

⁶E ketin kiedpeseng Tehnpas Sarawio wasa me se kin kaudokiong ih ie; E ketin katokihedi rahn sarawi kan oh rahnen Sapad kan. Nanmwarki oh pil samworo iang kehn engin sapwellime engieng.

⁷Kaun-o ketin soikalahr sapwellime pei sarawio oh kesehla sapwellime Tehnpas Sarawio; E ketin mweidohng imwintihtio en karangkehdi kele kan. Re wie kadekadekedek en powehdi wasa me se kin pereperen wiewia ie at kaudok mahs.

⁸KAUN-O ketin koasoanedier pwe kelen Saion kan en rehngkidi; E ketin sohngdier pwe en mwahngih uwen mwomwla me pahn wiawi. Wasahn iroir kan oh kehl kan wonohnehr nanpwel ohlahr.

⁹Ewen kehl kan seridier nanpwel, wenihmw mete kan mwerpesengier. Nanmwarkio oh soupeidi kan kalipilipalahr. Solahr me sukuhlki Kosonnedo, oh soukohp kan solahr ale kaudiahl sang rehn KAUN-O.

¹⁰Ohl mah kan en Serusalem mwomwohdehr nanpwel solahr mwekid, Pwelpar mi pohn moangarail kan oh re likawih likoun nsensuwed. Peinakapw akan itiekdier nanpwel.

¹¹Pwoaren mesei kat medengkilahr ei sengiseng; ngeni tihwolahr. Solahr angihki ei pahtouki mwomwlahn nei aramas akan. Seri oh seri pwelel kan lupwolupwongmas nan ahl akan en kahnimwo.

¹²Re duhpeklahr oh men nimpildahr, oh kin wie sengisengiong ar nohno kan; Re kin pwupwudi nanial akan likamwete re soahn, Re ahpw kin wie luhluwetala oh mehla nan pehn ar nohno kan.

¹³Oh Serusalem! Kompoakepahi Serusalem, dahme I kak nda? Ia duwen ei pahn kak koaloalamwahwihiukala? Saikinte me iang ale soangen lokolok wet. Omw apwal rasehng madau me sohte irepe; sohte mehkot me ke kak koapworopworki.

¹⁴Solahr me omw soukohp kan pahn kohpada pwe kokohp likamwte; Arail padahk pitihkinuk eh sohte kasalehiong uhk dipomw kan. Re soh mwahn kasalehiong uhk dipomw kan pwe ke en koluhkihla oh wiliakapwala.

¹⁵Aramas akan me kin keid limwahn kahnimwo kin kangkakil uhk ni mwamwahl. Re kin itikala moangarail kan oh kouruhrki ohlahn Serusalem: “Ih kahnimw kaselelo met? Ih kahnimwo met me sampah kin pohnmwahsohki?”

¹⁶Omw imwintihti koaros kin kouruhrkin uhk oh kangkakilkin uhk ar kailok. Re kin kepirek oh nda, “Se kamwomwalahr! Iei ih rahnwet me se kin kasikasik!”

¹⁷KAUN-O ketin kapwaiadahr dahme e kupwuredahr en ketin wia. E ketin kamwomwkitala ni sohte kupwur mahk, nin duwen e ketin kehkehlingkihong kiht mahsie. E ketin mweidohng at imwintihti kan en poweikitedi, oh re en perenkihda at pwupwudi.

¹⁸Oh Serusalem, omw kehl kan en peki sawas rehn Kaun-o! Pilen mesomw kan en kereker nin rahn nipwong rasehng pwilipwil en pillap; Ke en mwoatohtkihla omw sengiseng oh pahtou!

¹⁹Ke en kin pirida pak tohto nipwong kan, pwe ke en kin pekipeki sawas rehn Kaun-o; Nan omw mohngiong unsek ke en pekipeki pahn kupwure-% kalahngan ong noumw seri kan-% Seri kan me pahn mehkilahr ar duhduhpek wasa koaros pohn ahl akan!

²⁰Maing KAUN, komwi ketin kupwure irail kan me milahr pahn engieng en kupwuromwi! Lih akan tungutungoalehier paliweren seri kan me re kin poakohng! Samworo oh soukohp kan kamakamalahr nan Tehnpas Sarawio!

²¹Koaros me mah oh pwulopwul kan wonohnehr mehla nanial akan, Nein imwintihti kan kedlahs kemelahr mwahnakapw oh peinakapw akan, Komwi ketin kemeiraillahr ni sohte kupwur mahk ni rahnen omwi engiengo.

²²Komw ketin lukedohr ei imwintihti kan pwe re en kamasak ie sang pali koaros, rasehng omwi pahn ketin lukeiraildohng ni kamadipw ehu. Oh sohte me kak pitsang rahnen omwi engiengo. Re kemelahr nei seri kan, me I kairada oh kin poakohng.