Read Pohnpeian Koulen Kedepwidepw Kan 3 Bible Online

Koulen Kedepwidepw Kan 3 - Pohnpeian bible

Koulen Kedepwidepw Kan 3

¹Iei ngehi me patohwan ese dahkot kalokolok sang rehn Koht.

²E ketin pwakihielahng nan rotorot mosul.

³Oh ketin wokiwokih ie ni sohte kupwur mahk.

⁴E ketin kalipwelipwehda paliwereiet, oh katimpeseng tih kat.

⁵E ketin salihiehdiong nan lokolok oh pwunod.

⁶E ketin idingohng ie I en mihla nan rotorot en mehla.

⁷E ketin salihkiniehdi selmete; ngehi aramas selidi men me sohte ahneki koapworopwor en pitla.

⁸I liklikwer pekipeki sawas, ahpw Koht sohte ketin karonge ie;

⁹I kin alialu wasawasasseli; kehl takai kin pereiehla wasa koaros me I kin keidla ie.

¹⁰E ketin awiawih ie rasehng pehr men; e ketin lusdohng pohi rasehng laion men.

¹¹E ketin pwakihiehsang pohn ahl, e ahpw tehriepeseng oh keseiehla.

¹²E ketikihda sapwellime kisik ketieu, oh wiahkin ie wasa me e pahn ketin kainenehiong sapwellime arep kan.

¹³E ketin kadar sapwellime arep kan oh pwarolong nan paliwereiet.

¹⁴Aramas akan kin wie kokouruhrkin ie rahn ehu pwon; I wialahr mehn kepit pahrail.

¹⁵Lokolok mwuledek me e ketin katungoalehkin ie oh kanampilehkin ie.

¹⁶E ketin itondiong meseiet nanpwel oh kauwehkihla ngih kat takai.

¹⁷I sehselahr dahkot roson en paliwar, popohl oh nsenamwahu.

¹⁸Ei mour mwotomwotalahr; ei koapworopworki KAUN-O sohralahr.

¹⁹Medemedewen ei medek, ei saruwaru, iei pwoisin katik ehu.

²⁰I kin medemedewe mepwukat poatopoat, oh ngeni kin pwunodkihla.

²¹Ahpw iet pwe ei koapworopwor kin mihiehla ni ei kin tamanda soahngteieu:

²²Sapwelimen KAUN-O limpoak poatopoat oh kupwur mahk sohte kin tokedi,

²³E kin kansenamwahu duwehte kansenamwahu en nimenseng, oh poatopoat duwehte dakadahn ketipin.

²⁴KAUN-O kelehpw me ahi, ihme kahrehda ih me I koapworopworki.

²⁵KAUN-O kin ketin kupwuramwahu ong koaros me kin likih,

²⁶Eri, ih me mwahu kitail koaros en kin kanengamah oh awiawih-awiawih pwe en ketin kamourkitailla-%

²⁷Oh me mwahu kitail en esehla soangen kanengamah wet ni atail wie pwulopwulte.

²⁸Ni atail kin ale lokolok, kitail pahn mwohndi oh nennenla ni kanengamah;

²⁹Kitail pahn poaridi ni aktikitik, pwe ele e pahn miehte koapworopwor.

³⁰Mehnda ma kitail ale kamakam oh saroh, ahpw kitail pahn perenkihda.

³¹Kaun-o me kupwurkalahngan oh sohte pahn soingkitailla kohkohlahte.

³²Ele e pahn ketikidohng pohtail pahtou, ahpw sapwellime limpoak ong kitail me mehlel oh kehlail.

³³E sohte kin kupwurperenkihda ni eh kin ketikidohng kitail pahtou de medek.

³⁴Kaun-o mwahngih ahnsou me ngenitail kan kin pahtoula nan imweteng kan;

³⁵E mwahngih ahnsou me kitail sohte kin paieki pwung en aramas me e ketikihong kitail;

³⁶Ni ahnsou me pwuhng kin pirekla nan mwoalen kopwung, e kin mwahngih.

³⁷Kupwur en Kaun-ohte me kin pweida ahnsou koaros.

³⁸Me mwahu oh suwed kin pweida sang ni sapwellime koasoandi.

³⁹Dahme kitail kin kaulimki atail kin ale kalokepen dipatail kan?

⁴⁰Kitail en kasawih atail wiewia kan oh sohpeiong KAUN-O.

⁴¹Kitail ritingada mohngiongitail kan ong Koht nanleng oh kapakapohng, patohwan,

⁴²“Maing KAUN, se dipadahr oh kahngodiong komwi, ahpw komwi sohte kupwur mahkohng kiht.

⁴³“Komwi ketin idawehnkitodo oh kemeikitala; sapwellimomwi kupwurkalahngan rirlahr nan omwi engieng,

⁴⁴E rirlahr pahn pelien depwek mosul pali kahrehda at pekipek solahr kak lelewohng komwi.

⁴⁵Komwi wiahkinkitalahr wasahn kihd en sampah.

⁴⁶“Se wialahr mehn kepit rehn at imwintihti kan me kin kapailokei kiht.

⁴⁷Se milahr nan kahpwal oh paisuwed; se milahr nan mour keper oh kamasepwehk.

⁴⁸Pilen mesei kin pwilipwiliwei pwehki mwomwlahn nei aramas akan.

⁴⁹“Pilen mesei pahn pwilipwilwei sohte tokedi

⁵⁰Lao KAUN-O pahn mahsendihdo sang nanleng oh mahsanihkitada.

⁵¹Mohngiongi toutoula ni ei kilang dahme wiawihongehr lih akan en kahnimwo.

⁵²“Ei imwintihti kan lidipihiehdi ni sohte kahrepe rasehng menpihr men.

⁵³Re keseiehdi nan pwoahr ehu ni ei momourte oh katapwurehiong takai ehu ni ewen pwoahro.

⁵⁴Pihl ahpw tapihada loalada pohi, I ahpw mengimengloalki me ei mehla keredohngieier.

⁵⁵“Maing KAUN, I ahpw likwerih komwi sang nan kepin pwoahro,

⁵⁶Oh ni ei peki komwi en ketin karonge ie, komwi ahpw ketin karonge ei pekipek.

⁵⁷Komwi ketin sapeng ie oh mahsanihong ie I en dehr masak.

⁵⁸“Maing ei Kaun, komwi ketin doareiehla, oh kamouriehla.

⁵⁹Komwi ketin uhpalihkin ie; komwi mwahngih duwen sapwung kan me wiawihongieier.

⁶⁰Komwi mwahngih duwen ei imwintihti kan ar kailongkin ie oh wiewia koasoandi suwed en uhwong ie.

⁶¹“Maing KAUN, komwi ketin karongeier ar kepitkin ie, oh mwahngih ar koasoandi suwed kan.

⁶²Re kin ndinda ie oh wiewia ar koasoandi suwed kan rahn ehu pwon.

⁶³Re kin kokouruhrkin ie sang nimenseng lel nipwong.

⁶⁴“Maing KAUN, komwi ketin kalokehkin irail ar wiewia kan,

⁶⁵Komwi ketin kerieirailla oh kadirehkinirailla pwunod!

⁶⁶Komwi ketin koliraildi oh kamwomwirailla sang nin sampah!”