Read Pohnpeian Esekiel 19 Bible Online

Esekiel 19 - Pohnpeian bible

Esekiel 19

¹KAUN-O ketin mahsanihong ie I en koulki koulen nsensuwed pwoatet ong soupeidi riemen en Israel:

²Omw nohno iei laion lih men! E apwalihada wah ko nanpwungen laion ohl kommwad ekei.

³E apwalihada wah men oh padahkihong duwen eh pahn rapahki seike; e ahpw wiahla sounsaik aramas.

⁴Wehi kan ahpw rongada duwen laiono oh lidipihedi nan pwoahr ehu. Re ahpw kihong kehs oh ruwahdekilahng Isip.

⁵En laiono eh nohno ahpw awiawih lao eh esehda me solahr eh koapworopwor. E ahpw pil apwalihada emen wah ko, oh wiahla emen laion kommwad.

⁶Ni laiono eh laudlahr, e ahpw kin ieiangseli laion teiko. E ahpw pil esehla rapahki seike oh wiahla sounsaik aramas.

⁷E kin kauwehla kehl kehlail kan, oh kauwehla kisin kahnimw kan. Tohn wehio kin masepwehkada ahnsou koaros me e kin weriwer.

⁸Wehi kan eri pokonpene pwe re en mahweniong; aramas akan kohdo sang wasa koaros. Irail eri pahkpeseng ar uhk kan oh kalowehdi nan ar lidip.

⁹Irail eri kihdiong nan kehl ehu oh walahng rehn nanmwarkien Papilonia. Irail eri kin sinsile, pwe aramas en dehr pwurehng rong ngilen eh weriwer pohn dohl kan en Israel.

¹⁰Omw nohno rasehng tuhkehn wain pwoat me poad limwahn pilitik pwoat. Pwehki eh diren pihl, tuhkehn waino losolosala oh wahnla.

¹¹Rah kan me inenen kehlail oh keirda wiahla sokon en nanmwarki kan. Tuhkehn waino ahpw reireila oh leldalahng nan depwek; aramas koaros eri kilang duwen losolos oh reirei en tuhkeo.

¹²Aramas lingeringer kei ahpw usada oh kesediong nan pwehl. Kisinieng en palimese ahpw kamangala wah kan. Rah kan pil tipwasang, mengila oh mwasikala.

¹³Eri, met e poadidier nan sapwtehn, nan sahpw madekeng oh sohte pihl.

¹⁴Kahlepen tuhkeo eri luluda; kisiniei eri kamwasikahla rah oh wah kan. Rah ko solahr pahn pwurehng kehlailda, solahr pahn wia sokon en nanmwarki. Met iei koulen nsensuwed pwoat; me aramas akan kin kalap koulki.