Read Pohnpeian Esekiel 23 Bible Online

Esekiel 23 - Pohnpeian bible

Esekiel 23

²“Kowe, nein aramas, mahs mie serepein riemen me pirien.

³Ni ara pwulopwul, wie koukousoan nan Isip, ira ahpw kauwehla ara meipwon oh wiahla lihen netiki paliwere riemen.

⁴Me laudo adaneki Oh-olah (iei ih me Sameria), oh me tikitiko adaneki Oh-olipah (iei ih me Serusalem). I ahpw pwoudikihda ira koaros, oh ira wiahiong ie seri kei.

⁵Mehndahte ei pwoudiki, Oh-olah wiewiahte lihen netiki paliwere men oh kin diren ineng suwed ong eh kerir kan sang Asiria.

⁶Iei irail sounpei kei me mi nan likou pohn ntahnmwel, soupeidi oh kaunen sounpei lapalap akan; irail koaros sounpei pwulopwul masamwahu kei.

⁷Iei ih lih tiahk suwed men ong lapalap akan en Asiria, oh eh ineng suwed kahrehiong eh kasaminehkihla pein ih ni eh kin pwongih dikedik en eni kan en Asiria.

⁸E ahpw usehla wiewia tiahk en netiki paliwere me e tikikihda nan Isip, wasa me e kauwehla ie eh meipwon. Sangete ni eh kisin serepein, ohl akan kin wendi reh oh wiahki ih lihen netiki paliwere men.

⁹I ahpw pangalahng rehn eh mwohnlimpoak kan, iei mehn Asiria kan, me e kin poakohng mehlel.

¹⁰Irail eri kapwuhrasang eh likou kan, adihasang nah pwutak oh serepein kan, oh kemehkihla liho kedlahs pwoat. Lih akan wasa koaros ahpw kin koasoakoasoiaseli duwen paisuwedlahn liho.

¹¹“Mehndahte rie serepein Oh-olipah eh kilangehr duwen met, ahpw eh tiahk suwed pil uklahsang me rie Oh-ohla wiadahr.

¹²E pil iang diren ineng suwed ong soupeidi oh lapalap akan en Asiria-sounpei kan me mi nan likou melengileng-oh kaunen sounpei kan, irail koaros pil pwulopwul oh masamwahu.

¹³I kilang duwen eh mour suwed douluhl, me keriemeno pil inenen suwed duwehte me keieuo.

¹⁴“En Oh-olipah eh mour dipan ahpw ukuhkla mwowe. E ahpw mwahukihda sansal ekei en kaun lapalap akan en Papilonia me mahlenda nin dihdo oh litoapw weitahta poh marahra, me pirapir likou nan likoparail kan oh lisoarop kaselel pohn moangarail kan.

¹⁵“En Oh-olipah eh mour dipan ahpw ukuhkla mwowe. E ahpw mwahukihda sansal ekei en kaun lapalap akan en Papilonia me mahlenda nin dihdo oh litoapw weitahta poh marahra, me pirapir likou nan likoparail kan oh lisoarop kaselel pohn moangarail kan.

¹⁶Ni eh kilangada sansal ko, e ahpw ineng suwedkihda oh kadarala meninkeder kei rehrail nan Papilonia.

¹⁷Mehn Papilonia ko ahpw kohdo pwe re en wiahiong nsenen pwopwoud. Re ahpw wiahiong nsenen pwopwoud oh kasaminehkihla douluhl me kahrehda e uhd kailongkinirailla.

¹⁸E kasalehda eh suwed mwohn aramas akan oh mweidohng aramas koaros en kilang duwen eh tiahk suwed. I pil kalahdekihla duwehte ei kalahdekihla rie me laudo.

¹⁹Eh tiahk suwed uklahsang mahs, wiewia tiahk me e kin wia ni eh pwulopwulo, tiahk en netiki paliwere nan Isip.

²⁰E inenen ineng suwedih ohl akan me sengeu duwehte ahs de oahs wol kan.”

²¹(Oh-olipah, ke men pwurehng nan omw mour suwed en mahs, me ke dipikidahr ni omw kisin serepein nan Isip, wasa me ohl akan kin mwadomwadonge omw dihdi kan oh kauwehla omw meipwon.)

²²“Eri met, Oh-olipah, iet me ngehi, KAUN-O, Wasa Lapalahpie, ketin mahmahsanihong uhk. Ke pwangahkidahr omw kerir ko, ahpw I pahn kupwurehda pwe re en lingeringerda pahmw oh kohdo kapiluhkpene.

²³I pahn ketikihdo mehn Papilonia oh Kaldea kan, ohl akan sang Pekod, Soha, oh Koa, oh mehn Asiria koaros. I pahn kapokonepene soupeidi oh lapalap masamwahu pwulopwul ko, lapalap kesempwal akan oh kaunen sounpei kan.

²⁴Re pahn mahweniong uhk sang ni paliepeng. Re pahn wa kohdo lapalahn karis ehu me iangahki werennansapw en mahwen oh kuruma tohto. Re pahn perehrehki mehn sansar oh lisoarop mete, re pahn kapiluhkpene. I pahn panguhkala rehrail, re ahpw pahn kadeikuhkada ni pein ar kosonned kan.

²⁵Pwehki ei engieng pahmw, I pahn mweidala pwe re en kalokeiuk nan ar engieng. Re pahn lupukasang tumwomwen oh salengomw kan oh kemehla noumw seri kan. Ei, re pahn adihasang uhk noumw pwutak oh serepein kan oh isikirailla ni ar momourte.

²⁶Re pahn tehrasang omw likou kan oh kihsang omw mehn kapwat akan.

²⁷I pahn katokihedi omw ineng suwed oh tiahk suwed kan me ke wiewia sang ni omw mihmi nan Isip. Ke solahr pahn idawehn dikedik en eni kan de medemedewe duwen Isip.”

²⁸Ih met me KAUN-O, Wasa Lapalahpie, ketin mahsanih: “I pahn panguhkala rehn aramas akan me ke kailongki oh sautiki.

²⁹Oh pwehki ar kailongkin uhk, re pahn adihasang uhk mehkoaros me ke koadoahkihada oh keseiukala nan omw kilisou, kanamenekpomw ahpw pahn sansalada duwehte lihen netiki paliwere men. Omw ineng suwed oh tiahk en netiki paliweromw

³⁰me kahredohr mepwukat pohmw. Ke wialahr lihen netiki paliwere men ong wehi kan, oh kasaminehkinuhkalahr dikedik en eni kan.

³¹Ke alasang tiahk en riomwo, iei me kahrehda I pahn ketikihong uhk soangen dahl en lokolokohte pwe ke en nim.”

³²KAUN-O, Wasa Lapalahpie, ketin mahsanih, “Ke pahn iang nim dahl me riomwo nimalahr; dahl laud oh loal. Aramas koaros pahn mwamwahlikin uhk oh kepitkin uhk; dahlo me dir mehlel.

³³E pahn kahrehda omw sakaukihla oh paisuwedkihla, iei dahl en misik oh paisuwed, dahl me iei limen riomw serepein Sameria.

³⁴Ke pahn nim lao nek, oh pil rukoahla, oh dipere kan pahn kauwehla nan mwaremwaromw. Ngehi, KAUN-O, Wasa Lapalahpie, me mahmahsen.”

³⁵Eri, iei met me KAUN-O, Wasa Lapalahpie, ketin mahmahsanih: “Pwehki omw manokeiehla oh sohpeisang ie, ke pahn ale kalokepen omw ineng suwed oh tiahk en netiki paliweromw.”

³⁶KAUN-O eri mahsanihong ie, “Kowe, nein aramas, ke onopadahr ke en kadeik Oh-olah oh Ohl-olipah? Padokehng ira soahng saut kan me ira wiadahr.

³⁷Ira wiadahr dipen kamwahl oh kamaramas-kamwahl ong dikedik en eni kan oh kamalahn seri kan me ira wiahiong ie. Ira meirongkihla nei pwutak kan ong neira dikedik en eni kan.

³⁸Oh kaidehn met kante me ira wiadahr. Ira kasaminehla Tehnpasei Sarawio oh kauwehla rahnen Sapad, me I koasoanedier.

³⁹Ni rahnohte me ira meirongkihla nei pwutak ko ong dikedik en eni ko, ira ahpw kohdo nan Tehnpasei Sarawio oh kasaminehla!

⁴⁰“Ira kin pwurupwurehng ahnsou koaros kadakadarala meninkeder kan pwe re en lukehdo ohl akan sang wasa doh, oh ohl ako ahpw kin pwarodo. Perien riemeno ahpw kin duhduhla oh kapwatada.

⁴¹Ira eri kin mwohndiong nan ara sehr mwuterek, oh kihdiong pohn tehpel mwohra soahng kaselel kan, me iangahki warpwohmwahu oh lehn olip me I ketikihong ira.

⁴²Ngilen peren ahpw kin peipeido, pwihn en ohl ehu wisikdohsang nan sapwtehn. Re kihong liwou ni pehn lih ako, oh nihn lingan pohn moangara ko.

⁴³I ahpw pein mengimengloalki me re wiewiahki lihen netiki paliwere, lih emen me solahr angihki eh kamwahl.

⁴⁴Re kin pwurupwurala rehn lihen netiki paliwarara kan pak tohto. Re kin pwuralahng rehn Oh-olah oh Oh-olipah, lih tiahk suwed ko.

⁴⁵Aramas pwung kan pahn kadeikirahda ni dipen kamwahl oh kamaramas, pwehki ara kin wiewia dipen kamwahl oh pehra kan direkilahr nta.”

⁴⁶Ih met me KAUN-O, Wasa Lapalahpie, ketin mahsanih: “Ekerodo pokon lap ehu pwe re en kamasakirahda oh pirapa ira.

⁴⁷Pokon lapo en katehkin ira takai oh mahwenkihong ira kedlahs, kemehla neira seri kan, oh isikada imwara kan.

⁴⁸I pahn katokihedi tiahk suwed wasa koaros nan sahpwo, pwehn wia karasaras ehu ong lih koaros pwe re en dehr wia dipen kamwahl duwehte me ira wiadahr.

⁴⁹Oh kumwa pirienen-I pahn kalokehkin kumwa amwa tiahk suwed oh amwa dipen pwongih dikedik en eni kan. Eri, kumwa ahpw pahn esehla me ngehi, iei KAUN-O, Wasa Lapalahpie.”