Read Pohnpeian Esekiel 26 Bible Online

Esekiel 26 - Pohnpeian bible

Esekiel 26

¹Ni rahn keieu en... sounpwong en sounpar kaeisek ehu en at kalipilipala, KAUN-O ketin mahseniong ie.

²E mahsanih, “Kowe, nein aramas, iet dahme mehn kahnimw Dair wie pereperenki. Re weriwer, ndinda, ‘Serusalem ohlahr! Eh kehlail en pesines sohralahr! E solahr pahn uhwong kitail!”

³“Eri met, iet dahme ngehi, KAUN-O, Wasa Lapalahpie, ketin mahmahsanih: Ngehi me omw imwintihti, kowe kahnimw Dair. I pahn ketikihdo wehi tohto pwehn mahweniong uhk, oh re pahn kohdo rasehng iloak en madau.

⁴Re pahn kamwomwala omw kelen kahnimw oh karangkehdi omw wasahn iroir kan. I ahpw pahn koakoahla pwelpar koaros oh paip kalaimwun ehu me pahn luhwehdi.

⁵Sounlaid kan ahpw pahn kin palang ar uhk kan powe, wasa me e pahn uhdahsang ie nan madau. Ngehi, KAUN-O, Wasa Lapalahpie, me mahmahsen. Wehi kan pahn kulihasang dipwisou kan en Dair,

⁶oh kemehkihla nair kedlahs kan irail kan me koukousoan nan eh kisin kahnimw kan nan werengen sahpwo. Dair eri pahn esehla me ngehi, KAUN-O.”

⁷KAUN-O, Wasa Lapalahpie, mahsanih, “I pahn ketikihdo nanmwarki me keieu lapalap-Nepukadnesar, nanmwarkien Papilonia-% pwehn mahweniong Dair. E pahn ketido sang ni paliepeng, iangahki lapalahn karis ehu, oahs, werennansapw en mahwen, oh sounpei en dak oahs.

⁸Irail kan me koukousoan nan kisin kahnimw kan nanwerengen sahpwo pahn mehla nan mahweno. Imwintihtio pahn kauwada wasahn poadoandoar, warawar, oh wiahda ehu kehl kehlail mehn pere irail sang uhk.

⁹Re pahn sukeki omw kehl kan mehn sukpeseng kehl oh karangkehkihdi omw wasahn iroir kan mehn suk mete.

¹⁰Pwelpar en neirail oahs kan pahn koadupwalihiukedi. Katairong en neirail oahs kan me tangatangahki kuruma kan oh werennansapw en mahwen kan pahn itikada omw kehl kan ni ar pahn tangolong nan ewen kehl kan en kahnimw ohlao.

¹¹Neirail sounpei en dak oahs kan pahn tang nan omw ahl akan, kemekemehkihla noumw aramas akan kedlahs. Omw uhr kehlail kan pahn pwupwudi nanpwel.

¹²Omw imwintihti kan pahn simwihasang omw kepwe kan oh dipwisoun pesines kan. Re pahn karangkehdi omw kehl kan oh kauwehla imwomw ihmw kaselel kan. Re pahn ale takai, tuhke oh kihd en mohn ihmw kan koaros oh keselahng nansed.

¹³I pahn katokihedi ngilen amwail koul kan, oh katokihedi ngilen noumwail arp kan.

¹⁴I pahn luhwehkihdi paip kalaimwun ehu wasa me sounlaid kan kak en palangada ie arail uhk kan. Kahnimwo sohte pahn onohnda sapahl. Ngehi, KAUN-O, Wasa Lapalahpie, me mahmahsen.”

¹⁵Iet mahsen me KAUN-O, Wasa Lapalahpie, pahn mahsanihong kahnimw Dair: “Ni omw pahn lohdi, aramas akan me koukousoan ni oaroahr kan pahn masakada weriwer en irail kan me wie kamakamala.

¹⁶Nanmwarki koaros en wehi kan me waranki sohp tohto pahn ketidi sang nan mwoalarail. Re pahn pwuhrsang nan sapwellimarail likou reirei oh likou deiad akan oh ketidi wie rerrer nanpwel. Re pahn inenen masakada duwen imwilahn amwail mour me kahrehda re sohla pahn kak tokedihsang ar wie rerrer.

¹⁷Re pahn wia koulen kedepwidepw wet ong kumwail: Kahnimw ndando mwomwlahr! Were sohp kan sohrasangehr nan madau. Tohn kahnimw wet me kaunda nan madau Oh kin kamasakada koaros me koukousoan ni oaroahr kan.

¹⁸Eri, ni rahn me e pwupwudio, Kisin deke kan itikekda, Oh towe kan pwuriamweikihla soangen mwomwla wet.”

¹⁹KAUN-O, Wasa Lapalahpie ahpw mahsanih: “I pahn wiahkinuhkala sapwtehn ehu duwehte mohn kahnimw kan me sohte aramas kin kousoan ie. I pahn koaduhpwalkinuhkedi pilen nan madau.

²⁰I pahn kadaruhkalahng rehn me melahr akan pwe ke en iang mihmi rehn aramas en kawa ko. I pahn kupwurehda pwe ke en mihmi pahn pwehl nanpwungen mohn kahnimw poatopoat kan, ieiang me melahr akan. Ni imwilahn met ke sohte pahn pwurehng wiahla kahnimw en me momour kan.

²¹I pahn wiahkinuhkala wasahn karasepe kamasepwehk, oh met iei pahn imwilahn omw mour. Mweinele aramas akan pahn rapahkin uhk, ahpw re sohte pahn diar uhk.” KAUN-O, Wasa Lapalahpie, me mahmahsen.