Read Pohnpeian Esekiel 27 Bible Online

Esekiel 27 - Pohnpeian bible

Esekiel 27

¹KAUN-O ketin mahsanihong ie,

²“Kowe, nein aramas, koulkihong Dair apwoat koulen kedepwidepwen,

³kahnimwo me mihte ni irepen sehdo wiewia pesines ong aramas akan me koukousoan ni oaroahr akan. Ndaiong dahme KAUN-O, Wasa Lapalahpie, ketin mahmahsanih: “Dair, ke suweiki omw inenen kaselel.

⁴Iei deumw nansed. Me wieiukada kan wieiukada rasehng sohp kaselel pwoat;

⁵Re doadoahngki tuhke pir sang nin Nahna Ermon mehn wiahda dinapw Oh tuhke sidar sang Lepanon mehn wia kehu.

⁶Re ale tuhke ohk sang Pasan mehn wia padil; Re wiahkihda omw taht tuhke pain sang Saiprus Oh kapwatki aipori.

⁷Omw serek kan wiawihkihda likou linen, Linen deiad sang Isip, Me aramas kak kilang sang wasa doh. Omw darpwolin kan wiawihkihda likou keieu kaselel, Poh ntahn mwel me kohsang ni kisin deke kan en Saiprus.

⁸Noumw sounpadil kan sang kahnimw kan en Saidon oh Arpad. Pein noumw ohl koahiek kan me sehla.

⁹Kahpinte kan en sohpo Iei ohl koahiek kei sang Piplos. Sehla kan sang pohn sohp akan koaros nan madau Wia pesines nan omw wasahn netinet kan.

¹⁰“Sounpei kan sang Persia, Lidia, oh Lipia kin uhpah noumw karis. Re kin tenekihda neirail mehn sansar oh ar lisoarop en sounpei kan ni omw wasahn sounpei kan. Iei irail me kalowehdiong uhk omw lingan.

¹¹Sounpei kan sang Arpad me kin sinsile omw kehl kan, oh ohl akan sang Kamad me kin sinsile omw imwen iroir kan. Re tenekihda neirail mehn sansar kan ni omw dihd kan. Iei irail me kahrehiong omw lingan.

¹²“Ke netikihla omw dipwisou kan ong Spein oh alehki silper, mete, dihn, oh leht.

¹³Ke pesines kihong Krihs, Tupal, oh Mesek omw dipwisou kan oh wiliankihda lidu oh dipwisou prons kan.

¹⁴Ke netikihla omw dipwisou kan mehn pwainda oahs en doadoahk, oahs en mahwen, oh kou sang Ped Dokarma.

¹⁵Mehn Rohdes kawiliali ar dipwisou rehmw; aramas en ni oaroahr tohto kihong uhk aipori oh eponi mehn kawiliankihda omw dipwisou kan.

¹⁶Mehn Siria pwainda omw dipwisou kan oh wahnsahpw tohto. Re kihong uhk emerald, likou poh ntahn mwel, likou deiad, linen kaselel, rahr, oh rupi kan pweinen omw dipwisou kan.

¹⁷Suda oh Israel pwainkihda omw dipwisou kan wihd, sukehn loangalap, lehn olip, oh mehn doal mwenge kan.

¹⁸Mehn Damaskus pwainda omw dipwisou kan oh wahnsahpw akan, re pwainki wain sang Elpon oh likou wunen sihpw sang Sahar. Re wiliankihda omw dipwisou kan mete kehlail oh mehn doal mwenge.

¹⁹Mehn Damaskus pwainda omw dipwisou kan oh wahnsahpw akan, re pwainki wain sang Elpon oh likou wunen sihpw sang Sahar. Re wiliankihda omw dipwisou kan mete kehlail oh mehn doal mwenge.

²⁰Mehn Dedan kawiliankihda omw dipwisou kan pilangkes mehn mwohd pohn oahs.

²¹Mehn Arepia kan oh kaun akan en wehin Kedar pwainkihda omw dipwisou kan sihpw, sihmpwul oh kuht.

²²Sounnetinet kan en Sipa oh Raama kawiliankihda omw dipwisou kan kisin takai kesempwal, kohl, oh mehn doal mwenge keieu kaselel.

²³Kahnimw kan en Aran, Kanne, oh Eden, sounnetinet kan sang Sipa, kahnimw kan en Ahsur oh Kilmad-irail koaros kin kawiliali rehmw.

²⁴Re netikihong uhk likou kaselel, likou poh ntahn mwel, oh likou deiad, lohs poh mwangerenger lingan akan, oh sahl ahlap oh ahtikitik me wiawihda kaselel.

²⁵Omw dipwisou kan kin wisik pohn polohn sohp me kin wa dipwisou laud kan. “Ke rasehng sohp pwoat nan madau Me toutoukihla dipwisou tohto.

²⁶Ni ahnsou me noumw sounpadil kan seikinuhkalahng nan madau, Kisinieng en palimese ehu ahpw kauweiukala wasa me dohsang sahpw.

²⁷Omw dipwisoun netinet kaselel kan, Noumw sehla koaros, Noumw kahpinte kan oh noumw sounnetinet kan, Sounpei koaros me mi pohn sohpo-% Koaros, kihrla nan madau Ni ahnsou me weromw sohpo ohla.

²⁸Ngilen sehla kan ar weriwer Peipeilahng ni oaroahro.

²⁹“Sohp koaros solahr towe, Oh sehla koaros samwalahr nansapw.

³⁰Irail koaros mwahmwahieikin uhk kowahlap, Re kesedahng pehs pohn moangarail oh tapwutapwur nan pehs.

³¹Re sehkasang pitenmoangarail kan pwehki kowe Oh pwuhriong nan likoun nsensuwed. Mohngiongirail kan tihwohla kowahlap ni ar wie sengiseng.

³²Re wia koulen kedepwidepw pwoat ong uhk: ‘Ihs me kak kapahrekiong Dair, Dair me ahnsou wet nennenlahr nan madau?

³³Ni ahnsou me omw dipwisoun netila kan kin wisiklahng nan wehi kan, Ke kin kaitarala anahn en wehi koaros. Nanmwarki kan kin kepwehpwehkihla Omw dipwisou kan.

³⁴Eri, met ke ohlahr nan madau; Ke kihrlahr nan kepin madau. Omw dipwisou oh koaros me doadoahkohng uhk Iang uhk sohrala nan madau.’

³⁵“Aramas koaros me kin kousoan ni oaroahro pwuriamweikihla paisuwed me lelohng uhk. Ar nanmwarki kan pil masepwehkada, oh ar masepwehk sansal ni silengirail kan.

³⁶Ke sohralahr, sohralahr kohkohlahte, oh sounnetinet kan wasa koaros nin sampah masepwehkada, re salohkihda pwe re de iang ale paisuwed me lelohng uhk.”