Read Pohnpeian Esekiel 4 Bible Online

Esekiel 4 - Pohnpeian bible

Esekiel 4

¹Koht ketin mahsanih, “Kowe, nein aramas, ale ehu takai pweht, kihdiong mwohmw, oh elehda lain powe pwehn wia kelel en kahnimw en Serusalem.

²Eri, pwe en uhd mwomwehda duwen imwintihti eh pahn kalowehdi kahnimwo, ke pahn wiahda warawar, doadoahk en koasoakehda pwehl kan, impwal kan, oh wiahda lepin tuhke mehn kauwehla ewen kehl kan.

³Ale ehu pan mete oh kauwada duwehte kehl ehu nanpwungen kowe oh kahnimwo. Eri, ke ahpw sohpeiong kahnimwo. Mwekid en kalowehdi kahnimwo tepier oh kowe me mahmahweniong. Met pahn wia kilel ehu ong wehin Israel.

⁴“Mwuhr ke pahn wendi keingihngla palimeingomw, I ahpw pahn kihdiong pohmw dihp me wehin Israel wiadahr. Ke pahn mihmi wasao wie lokolok erein rahn 390 pwehki diparailo. I kileledionguhkehr me rahn ehu pahn wehwehki ehu sounpar me arail lokoloko pahn reireiki.

⁵“Mwuhr ke pahn wendi keingihngla palimeingomw, I ahpw pahn kihdiong pohmw dihp me wehin Israel wiadahr. Ke pahn mihmi wasao wie lokolok erein rahn 390 pwehki diparailo. I kileledionguhkehr me rahn ehu pahn wehwehki ehu sounpar me arail lokoloko pahn reireiki.

⁶Ni omw pahn kanekehla met, ke pahn wekidekla palimaunomw oh uhd ale kalokepen dipen Suda erein rahn pahisek-rahn ehu pahn wehwehki sounpar ehu ong ni kalokepen diparailo.

⁷“Mesomw en pahn uhlahngete Serusalem mwasamwasahn kahpwal me wiewiawihong, rok kumwut ong kahnimwo oh wiahiong kokohp me pahn uhwong.

⁸I pahn pireiukpene pwe ke en sohte kak mwekidseli lao kahpwalo pahn imwisekla.

⁹“Ke pahn ale ekei wahn wihd, parli, pihn, pihs, millet, oh spelt. Ke ahpw doaloairailpene oh wiahkihda pilawa. Ihme ke pahn kangkang erein rahn 390 me ke pahn wonohnki ni palimeingomwo.

¹⁰Ke pahn mweimweiong en kang ouns waluh en pilawa nan rahn ehu, oh e pahn nekila mandahsang rahno.

¹¹Pil nimomw pihl pahn itaitete, kepte riau nan rahn ehu.

¹²Ke pahn saunkihda kisiniei pwisehn aramas me madekenglahr, umwunda pilawa pohn mwoalus ko, oh kang wasa me aramas kak kilang uhk ie.”

¹³KAUN-O ahpw mahsanih, “Met iei duwen mehn Israel ar pahn kang mwenge me Kosonnedo keinapwih, ni ei pahn kamwarakirailpeseng nan wehin liki kan.

¹⁴I ahpw sapeng, patohwan, “Soh, Maing KAUN, Wasa Lapalahpie! I sohte mwahn kasaminehla pein ngehi. Sang ni ei tikitik I soh mwahn tungoalehda uduk en mahn emen me mehkihla soumwahu de me mahn lawalo kan kemehla. I sohte mwahn tungoalehda mahn emen me aramas kin wiahki me samin.”

¹⁵Koht eri mahsanih, “Eri, me mwahu. I pahn mweidohng uhk ke en saunkihda kisinieio pwisehn kou, oh ke kak umwunda konomw pilawa pohn mwoalus ko.”

¹⁶E ahpw ketin usehla mahsanih, “Kowe, nein aramas, I pahn ketikihsang pilawa nan Serusalem. Aramas akan wasao pahn pahtoula oh pwunod ni ar pahn kin teneki uwen mwenge me re pahn kang oh pihl me re pahn nim.

¹⁷E pahn sohla kanarail mwenge oh nimarail pihl; re pahn pahtoula, tihtihla oh mehla pwehki diparail kan.”