Read Pohnpeian Oseia 11 Bible Online

Oseia 11 - Pohnpeian bible

Oseia 11

¹KAUN-O ketin mahsanih, “Ni ahnsou me Israel wia seri men, iei ahnsou me I poakohng; oh I likwerihodo sang nan Isip oh kahdaneki nei pwutak.

²Ahpw uwen ei wia sahm men ong ih, iei uwen eh sohpeiweisangieier. Nei aramas akan meirongohng Paal; re pil isikohng dikedik en eni kan warpwohmwhu.

³Ahpw ngehi me kaiahnehkihda mehn Israel kan alu. I tupwengeirailda, ahpw re sohte pohnese ei kin apwahpwalih irail.

⁴I kaiahnehkiniraildohng rehi kadek oh limpoak. I pwekirailda oh pwoaleiraildi; I pil keipwekedi oh kamwenge irail.

⁵“Ahpw re kahng sohpeidohng ie, ihme re pahn pwurkilahng Isip, oh Asiria pahn kaunirailda.

⁶Mahwen laud pahn lelohng ar kahnimw kan oh kauwehla ar ewen kehl kan. Nei aramas akan ahpw pahn mwomwkihla arail idawehnla pein nsenarail kan.

⁷Re nannantihongete ar sohpeisang ie. Re ahpw pahn sengiseng pwehki mehn wisik toutou me mi pohrail, sohte emen me pahn pwekadahsang pohrail.

⁸“Mehn Israel kan, ia duwen ei pahn kak keseikumwailla? Ia duwen ei pahn kak likidmelieikumwailla? Ia duwe, I pahn kak kamwomwkumwailla, duwehte me I wiahiong Adma, de wiahiong kumwail soahng me I wiahiong Sepoim? Mohngiongiet sohte pahn mweidohng I en wia soahng wet! Ei poakohng kumwail me inenen laud.

⁹I sohte pahn kalokei kumwail ni ei engieng, I sohte pahn pwurehng kamwomwala Israel. Pwe ngehi me Koht, kaidehn aramas, ngehi, Koht me sarawi, kin ieiang kumwail. I sohte pahn ketido rehmwail nan ei engieng.

¹⁰“Nei aramas akan pahn idawehniehdo ni ei pahn ngiringir rasehng laion men ong ar imwintihti kan. Re pahn mwadangodo rehi sang palikapi.

¹¹Re pahn kohdo sang Isip, marahra duwehte menpihr, oh sang Asiria, marahra duwehte mwuroi. I pahn kapwureiraildo nan uhdakarail. Ngehi, KAUN-O, me mahmahsen.”

¹²KAUN-O ketin mahsanih, “Mehn Israel kan kapilkiniepenehr likamw oh widing, oh mehn Suda nannantihlahte ar kahngohdiong ie, ar Koht loalopwoat oh sarawi.