Read Pohnpeian Eimwos 9 Bible Online

Eimwos 9 - Pohnpeian bible

Eimwos 9

¹I patohwanehr Kaun-o eh uh limwahn pei sarawio. E ahpw ketin ruwese ie, mahsanih, “Poakih kehlail imwin uhr kan en Tehnpas wet pwe poahsoane en mwekidida. Karangkehdi koaros pwe en pwupwudiong pohn aramas akan. I pahn kemehla luhwen aramas koaros nan mahwen. Sohte emen pahn mourla; sohte emen pahn pitla.

²Ma re pil pahn weirdihla alarail kodilahng pahn sampah nan wasahn me melahr akan, ahpw I pahn koliraildi, ma re pil pahn doudahla nanleng, ahpw I pahn waikiraildi.

³Mehnda ma re pil rukula pohn kumwen Nahna Karmel, ahpw I pahn rapahkin irail wasao oh koliraildi. Mehnda ma re pahn rukula pahn kepin madau, ahpw I pahn mahsanihong mahn kamasepwehk en nansedo en kangirailla.

⁴Mehnda ma re wiahla lidun ar imwintihti kan, ahpw I pahn mahsanih pwe re en kamakamkihla kedlahs. I uhdahn koasoanedier I en kamwomwirailla, oh I sohte pahn sewese irail.”

⁵KAUN-O, Wasa Lapalahpie, kin ketin doahke sampah, a e kin rerrer; koaros me kin kousoan wasao kin mwahmwahiei. Sampah pwon kin kohda oh kohdi, rasehng Pillap Nail.

⁶KAUN-O kin ketin wiahda mwoale nanleng, oh kin ketikihdi pwalang en lahng pohn sampah. E kin ketin malipe pihl akan en kohdo, oh kin ketin kamwerediong pohn sampah. Mware iei KAUN-O!

⁷KAUN-O eri mahsanih, “Kumwail mehn Israel kan, I kin kesempwalki mehn Sudan duwehte ei kesempwalkin kumwail. Ngehi me kahluwahdo mehn Pilisdia kan sang Krihd, oh mehn Siria kan sang Kir, duwehte ei kahluwaikumwaildo sang Isip.

⁸Ngehi, KAUN-O, Wasa Lapalahpie, kin mwasamwasahn wehin Israel dipan wet, oh I pahn kamwomwasang pohn sampah wet. Ahpw I sohte pahn kamwomwala douluhl kadaudok en Seikop kan.

⁹“I pahn ketin ruwes oh itikada mehn Israel kan duwehte weren wihd eh kin koakoahk nan wasahn koakoahk. I pahn itikirailda nanpwungen wehi kan, pwe I en koakoahsang irail koaros me sohte katepe.

¹⁰Me dipan akan nanpwungen nei aramas akan pahn kamakamala nan mahwen-irail koaros me kin nda, ‘Koht sohte pahn ketin mweidohng mehkot suwed en kerendohng kitail.’ ”

¹¹KAUN-O ahpw mahsanih, “Ahnsou ehu kohkohdo me I pahn onehda sapahl wehin Depit, me rasehng ihmw ehu me rengkpeseng. I pahn kamwahwihala dihd kan, oh onehda sapahl. I pahn pwurehng kauwada oh koadoahkihada pwe en duwehla mahs.

¹²Eri, mehn Israel kan ahpw pahn kalowehdi sahpw teikan en Edom oh wehi koaros me mahs kin wia nin limei.” KAUN-O me mahsanih met, iei ih me pahn kupwurehda pwe mepwukat en pweida.

¹³KAUN-O mahsanih, “Rahn ekei pahn kohdo me wahnsahpw pahn keirda mwadangasang eh pahn dundoal oh kreip kan pahn keirda mwadangasang wain eh pahn wiewiawi. Nahna kan pahn kakusada wain iou, oh dohl kan pahn pil kapwilewei wain.

¹⁴I pahn kapwurehdo nei aramas akan nan sapwarail. Re pahn pwurehng onehda ar kahnimw ohla kan oh kousoanla wasao; re pahn padokedi ar mwetin wain oh nim wain; re pahn padokedi wahnsahpw nan arail mwetuwel kan, oh kang audepen sapwarail kan.

¹⁵I pahn padokedi nei aramas akan nan sahpw me I ketikihongirailehr; oh re solahr pahn pwurehng usuhsda sang wasao.” KAUN-O, amwail Koht, me mahmahsen.