Read Pohnpeian Opadaia 1 Bible Online

Opadaia 1 - Pohnpeian bible

Opadaia 1

¹Met iei en Opadaia eh kokohp-dahme KAUN-O, Wasa Lapalahpie, mahsanih duwen wehin Edom. KAUN-O ketin kadarodo sapwellime meninkeder ong wehi kan, oh kitail rongehr sapwellime mahsano: “Kumwail onopada! Kitail kohla mahweniong Edom!”

²KAUN-O ketin mahsanihong Edom, “I pahn kaluweteiukala; aramas koaros pahn kailongkinuhkala.

³Omw aklapalap pitihiukdier. Omw poahsoan kaun iei kelen paipalap ehu; uhdakomw iei pohn nahna ile kan, ke ahpw mengimengloalki, ‘Ihs me kak keseiediong nanpwel?’

⁴Mehnda ma ke wiahda omw wasahn kousoan wasa ile duwehte wasa me pesen ikel kan mie, pwe en mwomwen mi nanpwungen usu kan, ahpw I pahn apihiukedi.

⁵“Ma sounpirap akan pahn kohdo nipwong, re pahn kihsangete dahme re anahne. Ni aramas ar kin rikpene wahn wain, me re kin kalap luhwehkihdi me malaulau. Ahpw omw imwintihti kan kasohreiukalahr douluhl.

⁶Kumwail kadaudok en Esau kan, amwail dipwisou kesempwal kan kulsangehr.

⁷Iengamwail kan pitihkumwaildier; re kasareikumwailsangehr nan sapwamwail. Aramas akan me kumwail kin ehupene ni meleilei kaloweiukdier met. Kompoakepahmw kan me kin iang uhk mwohdehng nin tepel, wiadahr mehn lidipihiuk; re kin nda, ‘Ia eh loalokong?’

⁸“Ni rahn me I pahn kaloke Edom, I pahn kamwomwala neirail aramas loalokong kan oh kasohrehla ar kupwurokong koaros.

⁹Ohl dingngan kan en Teman pahn masepwehkada, oh sounpei koaros nan Edom pahn kamakamala.

¹⁰“Pwehki amwail pirap oh kemehla riamwail kan, me iei kadaudok en Seikop, kumwail pahn mwomwla oh sohla wahupamwail kohkohlahte.

¹¹Ke mihmi wasao sohte mwekid ni rahn me imwintihti ko kauwehla ar ewen kehl kan. Ke pil inenen suwed duwehte mehn liki pwuko me wahsangehr dipwisou kesempwal kan en Serusalem oh nehkpeseng nanpwungarail.

¹²Ke sohte pahn perenkihda paisuwed me lelohng riomw kan nan Suda. Ke sohte pahn perenda ni rahn me re ohlahro. Ke sohte pahn kouruhrkin irail nan ar pahtoula.

¹³Ke sohte pahn pedolong nan en nei aramas akan ar kahnimwo pwe ke en perenkihda ar lokolok oh kulihasang ar kepwe kan ni rahn me kahpwalo lelohng irail.

¹⁴Ke sohte pahn kesihnenda ni alosop kan pwe ke en saikedi irail kan me songosong en pitla. Ke sohte pahn pangiraillahng rehn ar imwintihti kan ni rahn me re pahtoula.

¹⁵“Rahno kerendohr, me ngehi, KAUN-O, pahn wia kopwung ong wehi koaros. Edom, dahme ke wiadahr pahn pil wiawihong uhk. Ke pahn pwurehng ale dahme ke kilahr.

¹⁶Nei aramas akan nimalahr dahl katik ehu en lokolok pohn ei dohl sarawio. Ahpw wehi koaros me kapilpene pil pahn iang nim dahl katik en lokolok me katiksang met; irail koaros pahn nim oh sohrala.

¹⁷“Ahpw ekei pahn pitla pohn Nahna Saion, oh wasao pahn wia wasa sarawi ehu. Aramas en Seikop kan pahn sapwenikihla sahpw me uhdahn arail pwung mi powe.

¹⁸Aramas en Seikop oh Sosep kan pahn duwehte kisiniei; re pahn kamwomwala aramas en Esau kan duwehte kisiniei eh kin kamwasikahla dihpw meng. Sohte emen kadaudok en Esau pahn pitla. Ngehi, KAUN-O, me mahmahsen.

¹⁹“Aramas akan sang palieir en Suda pahn kousoanla Edom; irail kan sang nin dohl kan en palikapi pahn kalowehdi Pilisdia. Mehn Israel kan pahn sapwenikihla sapwen Epraim oh Sameria; aramas en Pensamin kan pahn sapwenikihla Kilead.

²⁰Karis en aramas me kalipilipasang paliepeng en Israel pahn pwurodo oh kalowehdi Penisia oh lellahng paliepeng en Sarepad. Me kalipilipasang Serusalem kan me mihmi nan Sardis pahn kalowehdi kisin kahnimw kan ni palieir en Suda.

²¹Mehn Serusalem kan me ahneki manaman en powehdi pahn mahweniong Edom oh kaunda. Oh pein KAUN-O pahn wiahla nanmwarki.”