Read Pohnpeian Sona 2 Bible Online

Sona 2 - Pohnpeian bible

Sona 2

¹Sona ahpw kapakapohng KAUN-O, eh Koht, sang nan kapehd en mwahmwo:

²“Maing KAUN, sang nan ei apwal I likweriong komwi, oh komwi ketin sapeng ie. I likwersang nan wasahn me melahr akan, oh peki sawas, oh komwi ketin karonge ie.

³Komwi ketin keseiehdilahng wasa loal, nan kepin madau, wasa sehd kin kapiliepene, wasa sapwellimomwi iloak laud kan koaduhpwalihiehdi.

⁴I ahpw medemedewe me I pekeussangehr pahn kupwuromwi oh I solahr pahn kak pwurehng kilang Tehnpesomwi Sarawio.

⁵Madau ahpw koaduhpwalihiehdi, oh komwopwiehla; sehdo koadupwalihiehdi mehlel; oh dipwen nansed kan kin pidpene moangeiet.

⁶I pil kohdilahr oh milahr pahn tepin nahna kan, nan sahpw me eh ewen kehl kan kin rit kohkohlahte. Ahpw komwi, Maing KAUN, ei Koht, komwi ketin kapwureiehdahdo sang wasa loal.

⁷Ni ei pepehm me ei mour sosohralahr, ahpw, Maing KAUN, I kapakapohng komwi, oh komwi ketin karonge ie nan Tehnpasomwi Sarawi.

⁸Irail kan me kin pwongih dikedik en eni kan solahr loalopwoatohng komwi.

⁹Ahpw I pahn koulkihong komwi koulen kaping; I pahn wiahiong komwi meirong oh kapwaiada dahme I inoukihong komwi. Komour kin pwilisang rehn KAUN-O!”

¹⁰KAUN-O eri mahseniong mwahmwo, oh mwahmwo ahpw mwusikillahng Sona ni oaroahr.