Read Pohnpeian Nahum 3 Bible Online

Nahum 3 - Pohnpeian bible

Nahum 3

¹Meid suwediong uhk kahnimw likamw, kahnimw en kamarams, me diren dipwisoun kul oh lohdi nan mahwen!

²Rong! Ngilen wowoki, ngilen mehn kadahr kan, ngilen tangatang en oahs kan, ngiringirisek en werennansapw en mahwen kan!

³Soundak oahs akan poar pohn imwintihti, kedlahs kan piripir, ketieu kan linglingaling! Paliweren me mehlahr kan koasoakoasoakdahr ile, oh sohte kak wadawad-% aramas akan dipekelekel pohrail!

⁴Ninipe, lih suwedo aleier lokolok. Lih kaselel oh diren mesehl suwed, e kasahlielihalahr wehi kan oh kaliduwihiraillahr.

⁵KAUN-O, Wasa Lapalap, mahsanih, “Ninipe, I pahn kalokeiuk! I pahn kakilisouwihiukada oh mweidohng wehi kan en kilang uhk, re en kilang omw sarohdier.

⁶I pahn mwamwahlkinuhkala oh kidimkinuhkala samin. Aramas akan pahn masepwehkada kowahlap ni ar pahn kangkakil uhk.

⁷Aramas koaros me pahn kilang uhk pahn pweiekla. Re pahn nda, ‘Ninipe pwupwudier ohla! Ihs me poakehla? Ihs me pahn men kaloalamwahwihala?’ ”

⁸Ninipe, dene ke mwahusang Dihpes, poahsoan kaunen Isip? Pil mie eh pillap pwoat mehn doare, rasehng kehl ehu-Nail me wia doarepe.

⁹E kaunda Sudan oh Isip, sohte irepen eh manaman; Lipia me wia kompoakepah.

¹⁰Ahpw mehn Dihpes kalipilipalahr. Neirail seri kan wowokier oh kamakamalahr ni keimwen ahl koaros. Arail kaun akan selidier wisiklahr oh nehnepeseng nanpwungen me salihraildi kan.

¹¹Ninipe, ke pahn pil sakaula douluhl! Ke pahn pil song en pitsang omw imwintihti kan.

¹²Omw kelen mahwen koaros pahn duwehla tuhke pik me wah kan matehr; itik tuhkeo, oh wah kan pahn pwupwudiong nan ewomw!

¹³Noumw sounpei kan pahn duwehla lih ekei, oh omw wehi pahn uh sohte doarepe mwohn omw imwintihti kan. Kisiniei pahn kamwomwala metehn katenge omw ewen kehl kan.

¹⁴Idipada pihl pwe ke en kaunopada omw imwintihti kan ar pahn kapiluhkpene, oh kakehlahda omw kelen mahwen kan! Tiakpene pwehl weitahta pwehn wiahda lepin takai kan, oh kaunopada koakoan kan mehn wia takai pwukat!

¹⁵Sohte katepen dahnge me ke pahn wiahda, ke uhdahn pahn mehkihla kisiniei de kamakamala nan mahwen. Ke pahn sohrala duwehte wahnsahpw me pelin loukost kin kangala. Ke kaparaparala duwehte loukost kan!

¹⁶Ke kapwarehda sounnetinet me tohtohsang usu kan pahnlahng! Ahpw met re sohralahr, rasehng loukost kan me kin kapapeseng ar pehnpihr oh pipihrla.

¹⁷Noumw lapalap akan rasehng pelin loukost me kin mihmi nan kehl kan ahnsoun kopou. Ahpw ni ahnsou me ketipin kin dakada, re kin pipihrla, oh sohte me kin ese wasa me re kohla ie!

¹⁸Nanmwarki lapalap en Asiria, sapwellimomwi kepina kan melahr, oh sapwellimomwi soupeidi kan wonohnehr pahn pwehl kohkohlahte! Sapwellimomwi aramas akan mwarahkselier pohn nahna kan, oh sohte me pahn kapwureiraildo.

¹⁹Sohte mehn kamwahwihala omwi ohla kan, oh omwi ohla kan sohte kak mwahula. Koaros me pahn rong rongen omwi mwomwlahr pahn lopwolopwki ar peren. Mie me pitsang omwi lemei me soh irepe?