Read Pohnpeian Apakuk 3 Bible Online

Apakuk 3 - Pohnpeian bible

Apakuk 3

¹En soukohp Apakuk eh kapakap:

²Maing KAUN, I patohwan rongehr duwen wiepen nin limomwi kan, oh e audehkiniehda lemmw kowahlap. Eri, komwi ketin pwurehng wiahda nan at ahnsou manaman lapalap akan me komwi ketin wiadahr mahs. Komw ketin kupwurkalahngan, nan pil sapwellimomwi engieng.

³Koht ketin sapasapahldohsang Edom; Koht me sarawio ketiket kohdo sang pohn dohl akan en Paran. Sapwellime lingan kin kipehdi pahnlahng, oh kapingpe pil kin kadirehla sampah pokon.

⁴E kin ketiket kohdo, rasehng lingaling en lioal; marain kin piripirsang nin lime kan, wasa me sapwellime roson oh manaman kin rirsang aramas.

⁵E kin ketin kadarodo mwowe soumwahu lusulus, oh ketin ruwese mehla en idawehndo.

⁶Ni eh kin ketin uhdi, sampah kin itikekda, oh sampah kin rerrerki ni eh kin ketin kommoalehdi. Nahna poatopoat kan rengkdier; dohl en kawa ko karakarahkala, dohl kan me e kin ketin keid powe keilahn aio.

⁷I kilangehr duwen mehn Kusan kan ar masepwehkadahr oh mehn Midian kan ar rerrer.

⁸Ia duwe, Maing KAUN, pillap akan me kahngiangihkomwidahr? Madau me kahredahr omwi engieng kowahlap? Komwi ketiket kohdo pohn depwek kan; depwek en melimel, iei tehnweromwi, ni omwi ketikihdo manaman en powehdi ong sapwellimomwi aramas akan.

⁹Komw ketin onopadahr en doadoahngki sapwellimomwi ketieu, onopadahr en kadar sapwellimomwi arep kan. Sapwellimomwi lioal pwalangpeseng sampah.

¹⁰Ni nahna kan ar kilangkomwihda, re rerrer; pihl pwilipwildihdo sang pahnlahng. Kepin madau kan ngiringirisek, oh iloak kan lalaudlahr.

¹¹Ketipin oh maram uhdi nan deura, pwehki lingen sapwellimomwi arep me piripirseli, oh pwehki lingen sapwellimomwi ketieu lingaling.

¹²Nan sapwellimomwi engieng komw ketin kotehwei pohn sampah; nan sapwellimomwi engieng komw ketin tiakedi wehi kan.

¹³Komw ketieila pwe komwi en ketin doarehla sapwellimomwi aramas akan, pwe komwi en ketin doarehla sapwellimomwi nanmwarki pilipildahro. Komw ketin kalowedier sounkaweid en me suwed akan, oh pil ketin kamwomwala ienge kan.

¹⁴Sapwellimomwi arep doakoahdi kaunen nah karis ni ar kohkodohn pwakihkitpeseng, rasehng melimel kalaimwun ehu, oh pohnmwahso, duwehte irail kan me kin kahpwalihala me semwehmwe kan ni rir.

¹⁵Sapwellimomwi oahs akan tangatangseli pohn sehd, eri, iloak laud akan pwudopwudkihda.

¹⁶Ni ei kin rongada mepwukat, I kin rerada, kilin ewei kat kin wie rerrerki ei masepwehk. Paliwereiet kin mwoatoredi, oh nehi kat pil dipekelekel. A I pahn meleilei oh kasikasik ahnsou me Koht pahn ketin kaloke irail kan me kin mahweniong kiht.

¹⁷Mehnda ma tuhke pik kan sohte pahn wa, oh sohte wahn wain me pwarada nan mwetin wain kan; mehnda ma tuhke olip kan sohte pahn wa, oh sohte wahnsahpw nan mohs akan; mehnda ma sihpw koaros pahn mehla, oh wasahn kamwenge kou pahn tehnla;

¹⁸ahpw I pahn pereperen oh nsenamwahu, pwehki KAUN-O Koht, iei ei sounkomour.

¹⁹KAUN-O, Wasa Lapalahpie, kin ketin kakehlaiehda. Ihme me pil ketin wiahiong ie I en tang marahra, rasehng tie men, oh I sohte pahn perki mehkot ni ei pahn alialuseli pohn nahna kan.