Read Pohnpeian Sekaraia 1 Bible Online

Sekaraia 1 - Pohnpeian bible

Sekaraia 1

¹Ni kawaluhn sounpwong en keriaun sounpar me Darius wiewiahki nanmwarkien Persia, KAUN-O ketikihong mahsen wet ong soukohp Sekaraia, nein Perekaia oh e pahpa kahlapki Iddo.

²KAUN-O, Wasa Lapalap, mahsanihong Sekaraia en patohwanohng aramas akan, “Ngehi, KAUN-O, engiengdahr pahn amwail pahpa kahlap ako,

³ahpw met I mahsanihong kumwail, ‘Kumwail pwurodo rehi, oh I pahn sapahlwohng rehmwail.

⁴Kumwail dehr duwehte amwail pahpa kahlap ako. Soukohp ko kihongirailehr ei mahsen kawao; re ndaiong irail en dehr pwurehng nan ar mour suwed oh dipan. Ahpw re sohte men rong ie de peikiong ie.

⁵Amwail pahpa kahlap ako oh soukohp pwuko melahr.

⁶I ketikihong nei ladu soukohp ko ei kosonned oh kehkehlik kan pwe re en padahkihong amwail pahpa kahlap ako, ahpw re soikala oh lokolongki ar soikala. Mwuhr, re ahpw koluhla oh pohnesehla me ngehi, KAUN-O, Wasa Lapalap, ketin kaloke irail nin duwen me konehng irail oh nin duwen me I koasoanedier.’ ”

⁷Ni sounpar keriau me Darius wiewiahki nanmwarki lapalap, ni rahn kerieisek pahieu en sounpwong kaeisek ehu (sounpwong en Sepat), KAUN-O ketikihong ie mahsen ehu ni kaudiahl ehu nipwong.

⁸I kilangada tohnleng en KAUN-O men eh dake oahs weitahta men. E ahpw uhdi limwahn tuhke mirtel kei nan wahu ehu, oh pil mie oahs ekei mwuri, me poh weitahta, pohn pwehl, oh pwetepwet.

⁹I ahpw kalelapak reh, “Maing, ia wehwehn oahs pwukat?” E ahpw sapengkin ie, “I pahn kasalehiong uhk ia wehwe.

¹⁰KAUN-O ketin kadariraillahr pwe re en kohla oh dawih sampah.”

¹¹Re ahpw pakairkihong tohnlengo, “Se pwarekehr wasa koaros nin sampah oh diaradahr me sampah pwon sohte sawasepe oh meleilei.”

¹²Tohnlengo ahpw patohwan, “Maing, KAUN, Wasa Lapalap, komwi engiengdahr pahn Serusalem oh pahn kahnimw kan en Suda erein sounparehr isihsek met. Ia erein omwi pahn wie engieng pahrail sohte kasalehiong irail omwi kupwurkalahngan?”

¹³KAUN-O eri ketin sapengki tohnlengo mahsen en koaloalamwahu kei,

¹⁴oh tohnlengo ahpw patohwanohng ie I en kalohkihda dahme KAUN-O ketin mahsanih: “I loalloale mehlel Serusalem, ei kahnimw sarawio,

¹⁵oh I inenen engieng pahn wehi kan me nsensenamwahuki meleilei oh onepek mwahu. Kisin ahnsou kis me I pahn kanengamahiong ei engieng pahn nei aramas akan, wehi pwuko kalaudehla lokolok en nei aramas akan.

¹⁶Eri, I sapahldohr Serusalem pwe I en kasalehda ei kupwurkalahngan ong kahnimwo. Ei Tehnpas Sarawio oh kahnimwo pahn onohnda sapahl.”

¹⁷Tohnlengo pil patohwanohng ie I en kalohkihda: “KAUN-O, Wasa Lapalap, ketin mahsanih me sapwellime kahnimw kan pahn pwurehng ar pai oh e pahn ketin pwurehng sewese Serusalem oh wiahkihla kahnimwo uhdahn sapwellime.”

¹⁸Nan ehu kaudiahlo I kilang koden kou pahieu.

¹⁹Ngehi eri kalelapak rehn tohnlengo me koasoakoasoiong ie, “Ia wehwehn kohd pwukat?” E ahpw sapengki, “Re wehwehki manaman en wehi kan me kamwarakpeseng tohn Suda, Israel, oh Serusalem.”

²⁰KAUN-O eri kasalehiong ie tohndoadoahk pahmen me wisik amma.

²¹I ahpw kalelapak, “Dahme ohl pwukat kodohn wia?” E ahpw sapengki, “Re kodohn kamasak oh kauwehla wehi kan me kauwehla douluhl wehin Suda oh kamwarakpeseng towe kan.”