Read Pohnpeian Malakai 4 Bible Online

Malakai 4 - Pohnpeian bible

Malakai 4

¹KAUN-O, Wasa Lapalap, ahpw mahsanih, “Rahn ehu pahn kohdo me aramas koaros me pohnmwahso oh suwed pahn isihsla, rasehng mwuten dihpw meng. Ni rahno irail koaros pahn rongala, sohte pahn luhwarail.

²Ahpw ei manaman en komour pahn mihmi pohmwail me kin peikiong ie, rasehng dakadahn ketipin, oh e pahn kamwahwihkumwailla, rasehng lingaling en ketipin. Kumwail ahpw pahn saledekla oh pereperen, rasehng koupwul kan me kapedoisang nan kehl.

³Ni rahn me I pahn mwekid, kumwail pahn powehdi me suwed kan, oh re pahn rasehng pwelpar pahn nehmwail kan.

⁴“Kumwail tamataman padahk en ei ladu Moses, kosonned kan oh koasoandi kan me I ketikihongehr pohn Nahna Sainai pwe mehn Israel koaros en peikiong.

⁵“I pahn kadarowohng kumwail nei soukohp Elaisa mwohn sapwellimen KAUN-O rahn lapalap oh kamasepwehko eh pahn leledo.

⁶E pahn pwurehng kapwurepene sahm akan oh nahi kan. Pwe ma soh, pein ngehi uhdahn pahn pwarowei oh kamwomwala amwail wehi.”