Read Pohnpeian Luk 1 Bible Online

Luk 1 - Pohnpeian bible

Luk 1

¹Kompoakepahi Diopwulos: Aramas ngeder song nantihong ntingihedi duwen koasoiepen mehkan me pweidahr rehtail.

²Re ntingihedi dahme se alesangehr rehn irail ko me kilangki masarail kan oh pil padahkihong aramas akan soahng pwukat sang nin tapio kohdo.

³Eri, maing Diopwulos, ni ei medemedewe mwahu duwen mengihtik en mepwukat koaros sang nin tapio, I lemehda me e pahn mwahu mehlel ma I wiahda ehu pwuken poadopoad ong komwi duwen mepwukat.

⁴Eri, I lemedahr met pwe komwi en wehwehkihla mehlel soahng koaros me komw aleier padahkpe.

⁵Ni mwehin Erod, nanmwarkien Sudia, Eh pwoud, me mwarenki Elisapet, pil kisehn kadaudok en samworo ieu.

⁶Ira koaros inenen mour poadidi mwohn silangin Koht, oh ira kin kapwaiada mwahu mahsen oh kosonned koaros en Kaun-o.

⁷Ahpw sohte neira seri, pwe Elisapet lih depwen emen, oh ira koaros likeilapalahr.

⁸Rahn ehu Sekaraia ahpw pweisanki wia doadoahk en samworo nan Tehnpas Sarawio.

⁹Nin duwen me kin wiawi rehn samworo ko, e pilipildahr en wia meirong en isik warpwohmwahu nan Tehnpas en Kaun-o. Ih eri pedolongala wasao,

¹⁰a pokon kalaimwun ehu mihmi liki wie kapakap ni ahnsoun isihso.

¹¹Tohnleng en Kaun-o men ahpw pwarohng Sekaraia, uh ni palimaun en mwoalen meirongo wasa me warpwohmwahu wie edied ie.

¹²Ni Sekaraia eh kilangada tohnlengo, e ahpw luskihda oh masepwehkada kowahlap.

¹³Tohnlengo eri mahsanihong, “Sekaraia, ke dehr masak, pwe omw kapakap pweidahr rehn Koht! Omw pwoud, Elisapet, pahn naitikihada pwutak emen, me ke pahn kihong mware Sohn.

¹⁴E pahn kahrehiong uhk peren laud oh popohl, oh me ngeder pahn perenda ni eh pahn ipwidi!

¹⁵Pwe e pahn lapalap mwohn silangin Koht. E sohte pahn sair wain de sakau kehlail. Mwohn eh pahn ipwidi e pahn direkihla Ngehn Sarawi.

¹⁶E pahn kasapahldohng mehn Israel ngeder rehn Kaun-o, arail Koht.

¹⁷E pahn tieng mwowe nin duwen meninkeder en Koht, ni roson oh manaman duwehte soukohp Elaisa. E pahn kamwahwihla nanpwungen pahpa kan oh nair seri kan; e pahn wekidohng aramas sapeik kan ong ni elen me pwung kan, oh kaunopada sapwellimen Kaun-o aramas ong Kaun-o.”

¹⁸Sekaraia ahpw patohwanohng tohnlengo, “Dahme I pahn esehki me mahsen wet pahn pweida rehi, pwe ngehi oh ei pwoud kiht koaros likeilapalahr?”

¹⁹A tohnlengo sapeng, mahsanih, “Ngehi Kapriel, I kin aririh Koht, oh I pekederdohng kairehkin uhk rohng mwahu pwoatet.

²⁰Ahpw pwehki omw sohte kamehlele ei pakair me pahn pweida ni ahnsawi, ke pahn lohtengla; ke sohla pahn kak lokaia lao lel ni rahn me mepwukat pahn pweida.”

²¹Ni ahnsowo pokono awiawih Sekaraia, ahpw pwonopwonkihda dahme e wereikilahr loaleo.

²²Ni eh pedoisang nan Tehnpas Sarawio e solahr kak lokaiaiong irail. Irail eri esehkihda me e udiahlehr mehkot kapwuriamwei loaleo. E ahpw uh mwohrail oaloahlki eh men lokaia, ahpw sohte kak pwe e lohtenglahr.

²³Kedekedeo, ni eh pwaisen papah nan Tehnpas Sarawio eh erala, e ahpw pwuralahng ni imweo.

²⁴Mwurin ahnsou kis, eh pwoud, Elisapet, ahpw liseianda oh mihmihte ni imweo erein sounpwong limau.

²⁵E ahpw kin nda, “Ih duwen Kaun-o me ketin sewesehkin ie met, ni eh ketikihsang ie kanamenekpei rehn aramas akan!”

²⁶Ni en Elisapet eh keweneun sounpwong, Koht ahpw ketin poaronedohng tohnleng Kapriel nan kahnimw en Kalili ehu me ede Nasaret,

²⁷rehn serepein meipwon emen me kisinihniong ohl emen, mware Sosep, kisehn kadaudok en Nanmwarki Depit. Eri, serepein meipwono mwarenki Mery.

²⁸Tohnlengo eri ketila reh oh rahnmwahwih, mahsanih, “Mery, popohl ong komwi! Kaun-o ketiket rehmwi oh ketin kapaikomwidahr!”

²⁹Mery eri salohkihda kowahlap mahsen wet, e ahpw mengimengloalki ia pahn wehwehn mahsen pwoatet.

³⁰Tohnlengo ahpw mahsanihong, “Mery, komw dehr perki mehkot, pwe kalahngan en Koht me uhdahn laud rehmwi.

³¹Komw pahn liseianda oh naitikihada pwutak emen me komw pahn ketikihong mware Sises.

³²E pahn lapalap oh e pahn mwarenki Sapwellimen Koht, Wasa Lapalahpie. Kaun-o Koht pahn ketin kasapwilada en nanmwarki duwehte seme Depit,

³³oh e pahn nanmwarkien kadaudok en Seikop kan kohkohlahte; oh sapwellime wehi sohte pahn imwisekla!”

³⁴Mery ahpw mahsanihong tohnlengo, “A ia duwen met eh kak wiawi, nan ei meipwon?”

³⁵Tohnlengo ahpw sapeng, mahsanih, “Ngehn Sarawi pahn ti pohmwi oh roson en Koht pahn kipeikomwihdi, ihme kahrehda seri sarawio pahn mwarenki Sapwellimen Koht.

³⁶Komw tamataman kisehmwi Elisapet, duwen aramas akan ar wiahki lih depwen emen; a met e liseiandahr oh miher nan eh keweneun sounpwong, mehnda ma e likeilapalahr.

³⁷Pwe sohte mehkot me sohte kak pahn Koht.”

³⁸Mery ahpw mahsanihong tohnlengo, “Eri, iet sapwellimen Kaun-o lidu ngehi; en wiawihiong ie duwen me komwi mahsanih.” Tohnlengo eri ketiketla sang reh.

³⁹Eri, mwurin mepwukat Mery ketin kaunopada mehkoaros oh mwadang mwesellahng nan kahnimw en Sudia ehu me mi ni keilen nahna ieu,

⁴⁰ni imwen Sekaraia pwe en rahnmwahwih Elisapet.

⁴¹Ni Elisapet eh rongada en Mery eh rahnmwahwo, serio pa mwekidida nan kapehde. Elisapet eri direkihla Ngehn Sarawi

⁴²oh ngihl laudida, patohwanohng Mery, “Komw meid pai rehn lih akan! Meid iasenei seri me komw pahn kaipwidi!

⁴³Dahme soahng kapwuriamwei wet wiawihkihong ie, me inen ei Kaun ketin paskidohng rehi?

⁴⁴Pwe ni ahnsowohte me komw rahnmwahwih ie, seri pwelel en nan kapehdiet pa mwekidkihda eh peren.

⁴⁵Komw meid pai pwehki omwi pwoson me mahsen en Kaun-o pahn pweikihda rehmwi!”

⁴⁶Mery ahpw mahsanih, “Ngeniet kin kapinga Kaun-o;

⁴⁷loaleiet kin perenki Koht, ei Sounkomour,

⁴⁸pwehki eh ketin kupwurehla sapwellime lidu tikitik menet! Sang met kohla dih koaros pahn kapikapinga ie

⁴⁹pwehki soahng kapwuriamwei kan me Koht, Wasa Lapalahpie, ketin wiadahr rehi. Mware iei me sarawi;

⁵⁰sapwellime kalahngan kin sansal ong koaros me kin wauneki, sang ehu dih lelohng ehu dih.

⁵¹E ketin kapawehr lime roson, oh ketin kamwomwala kupwur en me aklapalap akan koaros.

⁵²E ketin sikendi nanmwarki lapalap akan sang nan mwoalehr akan, oh uhd kasapwilada me tikitik kan.

⁵³E kin ketin kamadkihla kisin tungoal mwahu me duhpeklahr akan, oh ketin kadarpeseng me kepwehpwe kan kahiep.

⁵⁴E ketin tamatamante sapwellime inou ong samatail ko, oh ketidohn sewese sapwellime ladu Israel;

⁵⁵E sohte ketin meliehla kalahngan me e ketin wiahiong Eipraam oh kadaudoke ko koaros kohkohlahte!”

⁵⁶Mery eri ketikette rehn Elisapet sounpwong siluh; mwuhr, e ahpw ketin sapahllahng ni tehnpese.

⁵⁷Eri, e lelehr ahnsoun en Elisapet eh pahn neitik; e ahpw naitikihada kisin pwutak kis.

⁵⁸Ni mehn mpe ko oh sawi ko ar rongada duwen kalahngan en Koht eh pweidahr reh, irail koaros ahpw iang perenkihda kowahlap.

⁵⁹Ni kawaluhn rahn mwurin serio eh ipwidi, re ahpw patohwanla pwe re en sirkumsaisihala oh kihong mwaren semeo, Sekaraia.

⁶⁰Ineo ahpw sapeng irail, patohwan, “Soh! Kaidehk Sekaraia me e pahn mwarenki, pwe Sohn.”

⁶¹Irail ahpw ndahng, “A ia duwe? Sohte soumw men mwarenki Sohn!”

⁶²Irail eri oalehki semen serio oh kalelapak mwar da me e men kihong serio.

⁶³Sekaraia eri pekihda sileit ehu oh ntingihedi powe, “E pahn mwarenki Sohn.” Irail koaros eri pwuriamweikihla mehlel!

⁶⁴Ni ahnsowohte Sekaraia pa pwurehng lokaiahda, oh tapihada kapikapinga Koht.

⁶⁵Tohn wasa koaros ahpw masakada kowahlap, oh rongen mepwukat ahpw lelpeseng wasa koaros pohn sahpw nahnahn Sudia.

⁶⁶Oh koaros me iang rong mepwukat ahpw kin medemedewe oh mengimengloalki, “Dahme pahn pweisen seri menet?” Pwe me uhdahn dehde duwen nin limen Koht eh ketin ieiang serio.

⁶⁷Eri, semen Sohn, Sekaraia, ahpw direkihla Ngehn Sarawi oh kohpada nin duwe met:

⁶⁸“Kitail kapinga Kaun-o, Koht en Israel! Pwehki eh ketidohr pwe en sewese sapwellime kan oh komourirailla.

⁶⁹E ketin kasapwiladahng kitail Sounkomour manaman emen, sang ni kadaudok en Depit, sapwellime ladu.

⁷⁰E ketin inoukidahr rehn sapwellime soukohp sarawien kawa ko

⁷¹me e pahn ketin doarehsang kitail atail imwintihti kan, oh sang ni manaman en irail koaros me kin kailongkin kitail.

⁷²E mahsanih me e pahn ketin kalahngan ong samatail ko, oh kupwukupwurehte sapwellime inou lap sarawio.

⁷³E ketin kahukihong samatail Eipraam, oh inoukihong me e pahn ketin kapitkitailsang atail imwintihti kan, oh ketin mweidohng pwe kitail en kin papah ih oh dehr perki mehkot;

⁷⁴E ketin kahukihong samatail Eipraam, oh inoukihong me e pahn ketin kapitkitailsang atail imwintihti kan, oh ketin mweidohng pwe kitail en kin papah ih oh dehr perki mehkot;

⁷⁵pwe kitail en kin mwakelekel oh pwung mwohn silangi rahn koaros en atail mour.

⁷⁶“A kowe, nei kisin seri, ke pahn mwarenki soukohp en Koht, Wasa Lapalahpie. Ke pahn tiengla mwohn Kaun-o, pwe ke en kaunopada mwowe sapwellime ahl akan;

⁷⁷pwe ke en padahkihong sapwellime kan duwen ar pahn mourla ni ar pahn ale lapwepen diparail kan.

⁷⁸Pwe atail Koht me kupwurkalahngan oh kadek. E pahn ketin kamarainihkin kitail marain en komour,

⁷⁹oh serehki marain sang nanleng irail koaros me kin mihmi nan rotorot en mehla, pwe en kahkahluwei kitail nan elen popohl.”

⁸⁰Serio eri keirda oh ngene koahiekla mehlel; e kin koukousoan nan sapwtehn lao lel rahn me e pwarada ni pokon sansal mwohn aramas en wehin Israel.