Read Pohnpeian Deuderonomi 27 Bible Online

Deuderonomi 27 - Pohnpeian bible

Deuderonomi 27

¹Moses iangahki kaunen mehn Israel ko ahpw ndaiong aramas ako, “Kumwail kapwaiada mahsen koaros me I kihong kumwail rahnwet.

²Rahn me kumwail pahn kotehla Pillap Sordan oh pedolong nan sahpw me KAUN-O, amwail Koht, pahn ketikihong kumwail, kumwail pahn kauwada takai kalaimwun kei oh iriski mehnkodi.

³Kumwail eri ntingihedi powe kosonned pwukat koaros oh padahk pwukat. Ni amwail pahn pedolong nan sahpw kaselel oh pwelmwahwo me KAUN-O, Koht en amwail pahpa kahlap ako, inoukihongkumwailehr,

⁴oh ni amwail pahn lelehr palio Sordan, kumwail kauwada pelien takai pwukat pohn Nahna Epal oh iriski mehnkodi duwen me I kehkehlingkihong kumwail rahnwet.

⁵Kumwail eri kauwada wasao ehu pei sarawi me takai wia oh sohte mete pahn doadoahk ie,

⁶pwe pei sarawi koaros me kumwail pahn kauwadahng KAUN-O pahn wiawihkihda takai me sohte perper. Kumwail ahpw pahn wia meirong isihs kan wasao,

⁷oh kumwail pahn pil wia meirong en kaminimin kan me kumwail pahn tungoalepene oh kapingkalahngankihong KAUN-O, amwail Koht.

⁸Kumwail ntingihedi ni sansal mahsen koaros en kosonned en Koht pohn takai me kumwail iriskilahr mehnkodi.”

⁹Moses iangahki samworo mehn Lipai ko eri mahsanihong mehn Israel ko koaros, “Kumwail nennenla, kumwail mehn Israel, oh rong. Rahnwet kumwail wialahr aramas en KAUN-O, amwail Koht;

¹⁰eri kumwail en peikiong oh kapwaiada sapwellime kosonned koaros me I kihong kumwail rahnwet.”

¹¹Moses eri mahsanihong mehn Israel ko,

¹²“Mwurin amwail pahn kotehla Sordan, kadaudok pwukat me pahn wad pah pahn uh pohn Nahna Kerisim ni ahnsou me kasarawi en kupwuramwahu pahn kohieng aramas akan: kadaudok en Simion, Lipai, Suda, Isakar, Sosep oh Pensamin.

¹³Oh me pahn wad met kan, pahn uh pohn Nahna Epal ni ahnsou me keria kan pahn wadawad: kadaudok en Reupen, Kad, Aser, Sepulon, Dan oh Napdali.

¹⁴Mehn Lipai kan ahpw pahn patohwanda mahsen pwukat ni ngihl laud:

¹⁵“ ‘Koht en ketin keriahla aramas me pahn kin wiahkihda dikedik en eni, takai, tuhke de mete oh kaudokiong ni rir; KAUN-O kin ketin kalahdeki kaudok ong dikedik en eni.’ “Koaros pahn sapeng patohwan, ‘Amen!’

¹⁶“ ‘Koht en ketin keriahla aramas emen me sohte kin wauneki eh pahpa de eh nohno.’ “Koaros pahn sapeng patohwan, ‘Amen!’

¹⁷“ ‘Koht en ketin keriahla aramas emen me kin kamwakid pehs en sapwen mehn mpe.’ “Koaros pahn sapeng patohwan, ‘Amen!’

¹⁸“ ‘Koht en ketin keriahla aramas emen me kin kahre me maskun men ni ahl sapwung.’ “Koaros pahn sapeng patohwan, ‘Amen!’

¹⁹“ ‘Koht en ketin keriahla aramas emen me pahn kauwehla oh kihsang en mehn liki kan, en me sepwoupwou kan, en liohdi kan ar pwuhng.’ “Koaros pahn sapeng patohwan, ‘Amen!’

²⁰“ ‘Koht en ketin keriahla aramas emen me pahn kanamenekihala eh pahpa ni eh pahn wiahiong nsenen pwopwoud ong emen en eh pahpa eh pwoud kan.’ “Koaros pahn sapeng patohwan, ‘Amen!’

²¹“ ‘Koht en ketin keriahla aramas emen me pahn wia nsenen pwopwoud ong mahn emen.’ “Koaros pahn patohwan sapeng, ‘Amen!’

²²“ ‘Koht en ketin keriahla aramas emen me pahn wiahiong nsenen pwopwoud ong rie serepein de rehn serepein me ara nohno tehmen de pahpa tehmen.’ “Koaros pahn sapeng patohwan, ‘Amen!’

²³“ ‘Koht en ketin keriahla aramas emen me wiahiong nsenen pwopwoud ong en eh pwoud eh nohno.’ “Koaros pahn sapeng patohwan, ‘Amen!’

²⁴“ ‘Koht en ketin keriahla aramas emen me pahn kemehla aramas emen ni rir.’ “Koaros pahn sapeng patohwan, ‘Amen!’

²⁵“ ‘Koht en ketin keriahla aramas emen me pahn ale mwohni pwehn kemehla aramas emen me sohte dipe.’ “Koaros pahn sapeng patohwan, ‘Amen!’

²⁶“ ‘Koht en ketin keriahla aramas emen me sohte pahn peikiong sapwellimen Koht kosonned oh padahk kan.’ “Koaros pahn sapeng patohwan, ‘Amen!’