Read Pohnpeian Deuderonomi 32 Bible Online

Deuderonomi 32 - Pohnpeian bible

Deuderonomi 32

¹“Nanleng oh sampah, kumwa rong ei pato kat; rong kanahieng dahme I pahn patohwan.

²Ei padahk pahn pwiliwei rasehng dingiding en keteu oh mwerediong pohn sampah rasehng pwoaiken lahng. Ei pato kan pahn mweredi rasehng keteu pohn poadakapw en wahnsahpw. rasehng keteu pohn dihpw kan.

³I pahn kapinga mwaren KAUN-O, oh sapwellime aramas akan pahn lohkiseli sapwellime roson lapalap.

⁴“KAUN-O iei silepamwail me manaman, sapwellime wiewia kan me unsek oh pwung. Amwail Koht me loalopwoat oh mehlel, e kin ketin wiahda dahme pwung oh pahrek.

⁵Ahpw kumwail me soaloalopwoat, sohte warohng wia sapwellime aramas, wehi mwersuwed oh dipan ehu.

⁶Ih duwen amwail pahn dupukohng KAUN-O, kumwail aramas sempoak oh pweipwei? Iei ih me samamwail, ih me ketin kapikkumwailda, e ketin wiahkinkumwailla wehi ehu.

⁷“Tamanda mahsie, ahnsou kei samwalahr, peki rehn samamwail kan en wehkohng kumwail dahme wiawi, pil peki rehn me mah kan en padokada dahme wiawi keilahn ahio.

⁸Wasa Lapalahpie ketin koasoanediong wehi kan sapwarail kan, wasa kan me re en kousoanla ie. E ketin koasoanediong emen tohnleng ong ehuehu wehi,

⁹ahpw e ketin pilada kadaudok en Seikop pwe en ketin sapwellimanikin irail.

¹⁰“E ketin diar irail ni arail sansalongseli nan sapwtehn, sapwtehn me sohte mehkot ie, ihte kisinieng. E ketin sinsile irail oh apwapwalih irail, nin duwen eh kin ketin apwalih pein ih.

¹¹Rasehng ikel men eh kin padapadahkihong wah kan duwen ar pahn pihr, eh kin kihpeseng eh pehnpihr kan pwehn daperkin irail, iei duwen KAUN-O eh kin ketin kolokol Israel pwe en dehr pwupwudi.

¹²KAUN-O kelehpw me kin ketin kahluwa sapwellime aramas akan, sohte koht en liki men me sewese.

¹³“E ketin mweidohng irail en kaunda sahpw ileile kan, oh re tungoale soahng kan me keirda nan sahpw akan. Re diar sukehn loangalap nanpwungen takai kan, arail tuhkehn olip kan pweida mwahu nan pwehl takahin kan.

¹⁴Neirail kou oh kuht kan kin kihda milik laud, re naineki sihpw, kuht, oh kou me keieu kaselel, wahn kohn keieu kaselel, oh wain me keieu iou.

¹⁵“Sapwellimen KAUN-O aramas akan kepwehpwehla, ahpw re kahngohdihla, re medla oh mworouroula. Re keselahr Koht me ketin kapikirailda oh sohpeisang arail sounkomour manamano.

¹⁶KAUN-O ketin luwangkidahr arail dikedik en eni kan, arail wiewia suwed kan kahngiangihadahr.

¹⁷Re meirong ong koht kei me sohte mehlel, koht kapw ekei me arail pahpa kahlap ako sohte ese, koht kei me Israel sohte mwahn kin peikiong.

¹⁸Re manokelahr arail Koht, arail sounkomour manamano, iei ih me ketikihong irail mour.

¹⁹“Ni ahnsou me KAUN-O ketin mahsanih met, e ketin engiengda oh sohpeisang sapwellime pwutak oh serepein kan.

²⁰E ahpw mahsanih, ‘I solahr pahn seweseirail, eri, I pahn kilang dahme pahn wiawihong irail, aramas pwuko me keptakai oh soaloalopwoat.

²¹Arail dikedik en eni kan kahngiangihiedahr, I luwangkidahr arail koht mwahl akan, koht ekei me kaidehn uhdahn koht. Eri, I pahn doadoahngki ehu wehi mwahlen pwe re en lingeringerkihda, I pahn kaliwakakinirailda ehu wehi me pweipwei en.

²²Ei engieng pahn lulluda duwehte kisiniei oh kamwasikahla soahng koaros nin sampah. E pahn leldilahng pahn sampah. . oh pil kamwasikahla poahsoan en nahna kan.

²³“ ‘I pahn kadarodohng irail apwal ekei me sohte pahn maiauda, I pahn kadarohng irail nei arep kan koaros.

²⁴Re pahn mehkihla duhpek oh soumwahu karakar, re pahn mehkihla soumwau suwed kei. I pahn kadarodo mahn lawalo pwehn peiong irail, oh sineik pwoisin pwe en ngalis irail.

²⁵Aramas pahn mehkihla mahwen nanial akan, oh masepwehk pahn kipehdi irail nan ihmw kan. Mwahnakapw akan oh serepein kan pahn mehla, seri pwelel kan oh me mah kan pil sohte pahn pitla.

²⁶I kak kamwomwirailla douluhl, pwe sohte emen en kak tamanirailda.

²⁷Ahpw I perki ar imwintihti kan de suweiki me re kalowedier nei aramas akan, pwehki pein ngehi me kauweirailla.

²⁸“Israel iei wehi ehu me sohte audepe; wehi ehu me uhdahn soaloalokong.

²⁹Re sohte ese dahme re lohkihdi; re sohte kak dehdehki dahme wiawihong irail.

³⁰Dahme aramas tehmen kak kalowehkihdi aramas kid, oh aramas riemente kak kalowehdi aramas nen? KAUN-O, arail Koht, ketin keseirailahr; arail Koht manaman ketin sohpeisangirailehr.

³¹Arail imwintihti kan ese me pein arail koht akan me luwet, sohte manaman duwehte Koht en Israel.

³²Arail imwintihti kan suwed duwehte Sodom oh Komora, re duwehte wahn wain katik oh pwoisin,

³³re duwehte wain me wiawihdasang pwoisin en sineik kan.

³⁴“KAUN-O ketin tamataman dahme arail imwintihti kan wiadahr, e ketin awiawih ahnsou mwahu en kaloke irail.

³⁵KAUN-O pahn ketin ikih oh kaloke irail, ahnsowo pahn leledo me irail pahn pwupwudi; pwe rahnen ar lokolok kerendohr.

³⁶KAUN-O pahn ketin kapitala sapwellime aramas akan ni eh pahn mahsanihada me ar kehl sohralahr. E pahn kupwurkalahngan ong irail kan me kin papah ih, ni eh pahn mahsanihada me solahr sawasaparail.

³⁷Eri, KAUN-O ahpw pahn keinemwe rehn sapwellime aramas akan, ‘Ia koht manaman ako me kumwail kin likih?

³⁸Kumwail katungoalehkinirailla wih en amwail meirong ko, oh kihong irail amwail meirong en wain pwe re en nim. Re en kohdo oh sewesei kumwail met, re en tangodo doareikumwailla.

³⁹“ ‘Ngehi, ngehi kelehpw me Koht, sohte emen koht me mehlel. Ngehi me kin kemehla oh ngehi me kin kihong mour, ngehi me kin kauwehla oh ngehi me kin kamwahwihala, oh sohte emen kak uhwong ie.

⁴⁰Nin duwen ngehi Koht ieiaso, I pwekada pehi kat oh kahukihla

⁴¹me I pahn edehda nei kedlahs kisiniei, oh wia ei kadeik. I pahn ikihong ei imwintihti kan oh kaloke irail kan me kin kailongkin ie.

⁴²Ntahrail pahn dingiding sang nin nei arep kan, oh nei kedlahs pahn kemehla koaros me kin uhwong ie. Sohte emen me kin uhwong ie pahn mourla, me ohla oh selidi kan pil pahn iang mehla.’

⁴³“Kumwail wehi kan, kumwail en kapinga sapwellimen KAUN-O aramas akan-% pwe e kin ketin kaloke me kin kemeirailla kan. E pahn ketin ikihong sapwellime imwintihti kan oh ketin makikihong dipen sapwellime aramas akan.”

⁴⁴Moses oh Sosua, nein Nun, me wadekohng mehn Israel ko mahsen koaros en koul pwoatet, pwe mehn Israel kan en kak rong.

⁴⁵Ni Moses eh kaimwisekla eh patopatohwanohng mehn Israel ko duwen sapwellimen Koht padahk kan,

⁴⁶e ahpw patohwanohng irail, “Kumwail rong kanahieng mehkoaros me I kehkehlingkihong kumwail rahnwet. Kumwail koangngoangehki noumwail seri kan, pwe re en loalopwoatohng kapwaiada sapwellimen Koht padahk pwukat.

⁴⁷Kaidehk padahk me sohte audepe kei met. Ih amwail mour unsek met. Kumwail peikiong padahk pwukat, kumwail ahpw pahn mour werei nan sahpw me kumwail pahn sapwenikihla mwurin amwail pahn kotehla Pillap Sordan.”

⁴⁸Eri, rahnohte KAUN-O ahpw mahsanihong Moses,

⁴⁹“Kohdahwei pohn Nahna Aparim kan nan wehin Mohap sallahng Seriko. Ke ahpw doudahla pohn Nahna Nepo oh irongewei wehin Kenan me I pahn kihong mehn Israel kan pwe re en sapwenikihla.

⁵⁰Ke pahn mehla pohn nahnao, duwehte riomw Aaron eh mehla pohn Nahna Or,

⁵¹pwehki amwa soaloalopwoatohng ie mwohn mesen mehn Israel ko. Ni ahnsou me kumwa mihmi ni pihl kan en Meripa, limwahn kahnimw Kades nan sapwtehn en Sin, kumwa kauwehla ei wahu nanpwungen mehn Israel ko.

⁵²Ke pahn ireirowohngete sahpwo sang wasa doh, ahpw ke sohte pahn iang pelodong nan sahpw me I pahn kihong mehn Israel kan.”