Read Pohnpeian Deuderonomi 33 Bible Online

Deuderonomi 33 - Pohnpeian bible

Deuderonomi 33

¹Iet kupwuramwahu kan me Moses, sapwellimen Koht ohl, kupwuramwahwiheki mehn Israel ko mwohn eh sipalla.

²“KAUN-O ketido sang pohn Nahna Sainai; e ketin pwarada rasehng ketipin pohn Edom; oh dakerada sapwellime aramas akan sang pohn Nahna Paran. E ketiket kohdahdo nanpwungen karis en tohnleng, nin lime palimaun e ketiki mpwulen kisiniei.

³KAUN-O ketin loalloale sapwellime kan, oh kin ketin sinsile irail kan me e sapwellimaniki. Eri, se kin poaridi mwohn aluweluwe kan, oh kapwaiada sapwellime mahsen kan.

⁴Se kin kapwaiada Kosonned me Moses patohwanohng kiht, dipwisoun at wehi me keieu kesempwal.

⁵KAUN-O wialahr nanmwarkien Israel, ni ahnsou me kadaudokarail kan pokonepenehr.

⁶Moses ahpw patohwanda duwen kadaudok en Reupen: “Reupen en momourte, e dehr mehla, mehnda ma nah aramas akan me malaulau.”

⁷E ahpw patohwanda met duwen kadaudok en Suda: “Maing KAUN, komw ketin karonge arail peksawas, oh ketikiniraildo rehn kadaudok teiko. Maing KAUN, komw ketin iang irail nan mahwen, oh ketin sewese irail uhwong arail imwintihti kan.”

⁸Duwen kadaudok en Lipai e patohwan: “Maing KAUN, komwi kin ketin kasalehda kupwuromwi ni Urim oh Dumim, rehn sapwellimomwi ladu loalopwoat kan, mehn Lipai. Komwi ketin kasongosongirailehr nan Massa, oh kasalehda ar mehlel limwahn pihl kan en Meripa.

⁹Re kasalehda arail loalopwoatohng komwi, laud sang samarail, riarail, de nair seri kan. Re kapwaiadahr sapwellimomwi mahsen ko, oh loalopwoatohng sapwellimomwi inou.

¹⁰Re pahn padahkihong sapwellimomwi aramas akan pwe re en kapwaiada sapwellimomwi Kosonned. Re pahn wia arail meirong kan pohn sapwellimomwi pei sarawi.

¹¹Maing KAUN, komw ketin kupwuramwahwih arail koahiek, oh ketin kupwurperenki arail doadoahk. Komw ketin kauwehla koaros me kin uhwong irail pwe re en dehr pwurehng uhda.”

¹²Duwen kadaudok en Pensamin e patohwan: “Iei kadaudoko me KAUN-O kin ketin loalloale; e kin ketin sinsile irail ahnsou koaros, oh kin ketiket nanpwungarail.”

¹³Duwen kadaudok en Sosep e patohwan: “KAUN-O en ketin kupwuramwahwihki keteu nan sapwarail kan oh pihl sang pahn sampah.

¹⁴En kupwuramwahwiheki sapwarail ketipin, oh reken soangen wahnsahpw me keieu mwahu.

¹⁵Arail dohl poatopoat akan en direkihla wahnsahpw me keieu kaselel,

¹⁶sapwarail en direkihla soahng mwahu koaros, oh kupwuramwahu sang kalahngan en KAUN-O, me ketin mahsen sang nan kisin tuhke me mpwumwpwulo. Kupwuramwahu pwukat en kohdi pohn kadaudok en Sosep, pwehki ih me pilipildahr sang nanpwungen rie ko.

¹⁷E kehlail rasehng kouwol, rasehng koden kou en nanwel, me e pahn kauwehkihla wehi koaros: pil wehi kan me mi ni irepen sampah: kode kan iei kehlail en kadaudok nen en Epraim, oh iei kehlail en kadaudok kid en Manase.”

¹⁸Duwen kadaudok en Sepulon oh Isakar e patohwan: “Sepulon paiamwahula nan eh doadoahk en netinetseli nan madau kan, oh Isakar en kepwehpwehla nan eh wasa.

¹⁹Irail pahn luke mehn liki kan ong pohn ar nahna kan, oh wia wasao arail meirong pwung. Re kin kepwehpwehla sang nan madau, oh sang ni pihk en ni oaroahr kan.”

²⁰Duwen kadaudok en Kad e patohwan: “Kapinga KAUN-O, me ketin kalaudehla sapwen Kad. Kad wonohn, rasehng laion men, pwehn kangala peh de moangen seikeo.

²¹Re pein aleier sahpw me keieu kaselel, re iangehr ale pwais en wia kaun emen. Re kapwaiada sapwellimen KAUN-O kosonned oh mahsen kan ni ahnsou me kaunen Israel kan pokonpenehr.”

²²Duwen kadaudok en Dan e patohwan: “Dan rasehng kisin laion kis, me kin tangodo sang Pasan.”

²³Duwen kadaudok en Napdali e patohwan: “KAUN-O ketin kupwukupwure oh kupwuramwahwih mehn Napdali, sapwarailo tangasang Lehen Kalili lellahng palieir.”

²⁴Duwen kadaudok en Aser e patohwan: “Aser aleier kupwuramwahu laud sang kadaudok teiko. En pil kenken rehn rie ko, oh sapwe en reken tuhke olip.

²⁵Eh kahnimw kan en kelkipene mete, oh en ahneki mour saledek sang apwal ahnsou koaros.”

²⁶Aramas en Israel kan, sohte Koht emen mie me duwehte amwail Koht, me kin ketin kotekote pahnlahng ni roson lapalap, me kin ketin dakehdo depwek kan pwe en ketin sewesei kumwail.

²⁷Koht iei doarepamwail ahnsou koaros, nin lime poatopoat kan, iei utupomw. E ketin pwakihasang mwohmwail amwail imwintihti kan oh mahsanihong kumwail en kamwomwirailla koaros.

²⁸Eri, kadaudok en Seikop ko ahpw soandi oh meleilei, oh nsensenamwahu nan sahpw me reken kohn oh wain, wasa pwoaiken pahnlahng kin kalamwuri pwehl.

²⁹Israel, ia uwen omw pai! Sohte emen me duwehte kowe, wehi ehu me KAUN-O kin ketin apwahpwalih. Pein KAUN-O me wia omw mehn sansar oh noumw kedlahs, pwe en doareiuk oh kupwurehiong uhk pwe ke en powehdi. Omw imwintihti kan pahn pwarodo rehmw oh pekipeki ke en poakeirailla, eri ke pahn tiakiraildi.