Read Pohnpeian Sohn 1 Bible Online

Sohn 1 - Pohnpeian bible

Sohn 1

¹Mahseno ketiketier rehn Koht mwohn tepin kawa; pwe Mahseno, iei me Koht.

²Iei ih me ketiketier rehn Koht mwohn tepin kawa.

³Koht ketin kapikekihda mehkoaros Mahseno: oh sohte mwahn mehkot mie me Mahseno sohte ketin kapikada.

⁴Mahseno iei ih poahsoan en mour; oh mour wet, iei me kin kamarainih aramas akan.

⁵Marain wet ahpw kin dakedaker nan rotorot, oh rotoroto ahpw sohte mwahn kasohrehla.

⁶Mie aramas emen me pekederdo sang rehn Koht, me ede Sohn.

⁷Aramas menet pwarodo pwe en wia kadehdepen maraino, pwe aramas koaros en rong Mahseno oh pwosonla.

⁸Kaidehn ih me maraino, ahpw e pwarodo pwe en kadehdehda duwen maraino.

⁹Eri, Mahseno, iei me marain mehlelo me pwarodohng sampah pwe en kamarainih aramas akan koaros.

¹⁰Eri, Mahseno ketier nin sampah, oh iei ih me Koht ketin kapikekihda sampah. Ahpw tohn sampah kan sohte ese ih.

¹¹E ahpw ketidohng sapwellime wasa, a sapwellime kan sohte kasamwo.

¹²Eri soh, ekei kasamwoier oh pwosonlahr. Eri, e ahpw ketikihong irail pwung en wiahla sapwellimen Koht.

¹³Irail pwukat sohte wiahla sapwellimen Koht sang ni elen kaipwidi aramas, pwe pein Koht, iei me ketin sapwellimanikinirailla.

¹⁴Mahseno eri wia-aramasala oh ketiketier rehtail. Kitail kilangehr sapwellime lingan, me diren kalahngan oh mehlel, sapwellime lingan me ih, Iehros en Koht, ale sang rehn Seme.

¹⁵Eri, Sohn kadehdehda duwen ih ni eh liklikwerki, “Iei ih ohlo me I koasoakoasoia duwe ni ei nda, ‘Emen pahn ketido mwuri, me lapalapasang ie, pwe e ketiketier mwohn ei ipwidi.’ ”

¹⁶Sang ni reken sapwellime kalahngan, e ketin kapaiahkin kitail poatopoat soangen kapai koaros.

¹⁷Koht ketikihong Moses audepen Kosonnedo pwe en patohwanohng kitail, a kalahngan oh mehlel sang rehn Sises Krais.

¹⁸Sohte me kin kilangki Koht mese. Sapwellime Iehrosohte, me duwehte Koht, me kin ketiket ni palimaun en Sahmo, iei ih me ketin kasalehiong aramas akan duwen Koht.

¹⁹Lapalap en mehn Suhs ako kadarala sang Serusalem samworo kei oh mehn Lipai kei pwe re en idek rehn Sohn, “Ihs komwi?”

²⁰Sohn sohte kahng sapeng, e ahpw koasoiada ni sansal, “Kaidehn ngehi Mesaia.”

²¹Irail eri kalelapak, “A da? Komwi me Elaisa?” Sohn sapeng irail, nda, “Soh. Kaidehn ngehi ih.” Irail pil kalelapak, “Eri da? Komwi Soukohpo?” A e sapeng, “Soh.”

²²Irail ahpw nda, “A komw padahkihong kiht ihs komwi, pwe se en kak sapengki irail ko me kadarkitodo. Dahme komw pahn mahsanihki duwen pein komwi?”

²³Sohn ahpw sapeng, nda, “Ngehi ‘ngihl ehu me likilikwerseli nan sapwtehn: Kumwail kainenehla elen Kaun-o pwe en ketin keid ie!’ ” nin duwen me soukohp Aiseia mahsaniher.

²⁴Sounkair pwukat me pekederdo sang rehn Parisi ko,

²⁵ahpw idek rehn Sohn, “A dahme kahrehda komw wiewiahki papidais, ma kaidehn komwi Mesaia, de Elaisa, de Soukohpo?”

²⁶Sohn eri sapengkin irail, “Ngehi I kin papidaiski pihl, a mie emen me ketiket nanpwungamwail, me kumwail sehse,

²⁷iei ih me pahn ketido mwuri; oh I sohte warohng I en lapwahda selin sapwellime suht.”

²⁸Mepwukat koaros wiawiher nan Pedani, palio Pillap Sordan, wasa me Sohn kin wiewia ie papidais.

²⁹Mandahn rahno, Sohn ahpw kilangada Sises eh ketiket kodohng reh, e ahpw patohwan, “Kilang! Ien Sihmpwul en Kohto me kin ketikihsang dipen sampah koaros.

³⁰Iei ih ohlo me I koasoakoasoia duwe ni ei patohwan, ‘Ohl emen pahn ketido mwuri, me lapalapasang ie, pwehki eh ketiketier mwohn ei ipwidi.’

³¹Pein ngehi sohte ese ih. Ahpw iet kahrepen ei pwarodo oh papidaiski pihl, pwehn kasalehda ih ong mehn Israel.”

³²Iet kadehde me Sohn pil kasalehda: “I kilangehr Ngehn Sarawio eh ketidihdo sang nanleng, ni mwomwen mwuroi men; e pihrdi oh ketiket powe.

³³Pein ngehi saikinte ese ih, ahpw Koht, me ketin kadariehdo pwe I en kin papidaiski pihl, e pil mahsanihong ie, ‘Mehmen me ke pahn kilang Ngehno eh pihrdi oh ketiket powe, iei ih me kin papidaiski Ngehn Sarawi.’

³⁴I kilangehr oh I pil kadehdeier me iei ih Sapwellimen Koht.”

³⁵Mandahn rahno, Sohn pil mihmi wasao, iangahki nah tohnpadahk riemen.

³⁶Ni eh kilangada Sises eh ketiket kohla, e ahpw patohwan, “Kumwa kilang! Ien Sihmpwul en Kohto!”

³⁷Tohnpadahk riemeno ahpw rongada eh koasoi; ira eri idawehnla Sises.

³⁸Sises ahpw ketin sohpeido oh mahsanihada ara ideidawehn, e ahpw mahsanihong ira, “Dahme kumwa raparapahki?” Ira eri sapeng, patohwan, “Rapai, (lepin mahsen wet wehwehki “sounpadahk”) ia wasa komw kin ketiket ie?”

³⁹E ahpw ketin sapeng ira, mahsanih, “Kumwa kohdo kilang.” Eri, ira ahpw iangada oh kilangada wasa me e kin ketiket ieo, ira eri patopatohte reh rahno (pwehki eh kereniong kulok pahieu mwurin souwas.)

⁴⁰Emen ira iei Andru, rien Saimon Piter.

⁴¹Andru ahpw mwadang diarada rie Saimon, oh ndaiong, “Se diaradahr Mesaiao!” (Ih wehwehn lepin mahsen pwoatet Krais.)

⁴²E ahpw kahrelahng Piter rehn Sises. Ni Sises eh mahsanihada Piter, e ahpw mahsanihong, “Ih kowe Saimon, me nein Sohn. Ke pahn adanekihla Kepas.” (Met wehwehki Piter, me pil wehwehki ‘Paipalap.’)

⁴³Mandahn rahno, Sises kupwurehda en ketilahng Kalili, e ahpw diarada Pilip, oh mahsanihong, “Idawehniehdo!”

⁴⁴(Eri, Pilip mehn Pedsaida, iei nan kahnimw wet me Andru oh Piter kin kousoan ie.)

⁴⁵Pilip eri tuhwong Nadaniel oh ndaiong, “Se diaradahr ohlo, nin duwen me Moses ntingihedier nan Pwuken Kosonnedo, oh pil soukohp ako. Iei ih Sises nein Sosep, sang Nasaret.”

⁴⁶Nadaniel ahpw idek reh, “Ia duwe, kakete mehkot mwahu en pwarada sang Nasaret?” Pilip ahpw sapengki, “Nna, kohdo kilang.”

⁴⁷Ni Sises eh mahsanihada Nadaniel eh kohkohdo, e ahpw mahsanih, “Iet uhdahn ohl mehlel en Israel men, me sohte kin widing!”

⁴⁸Nadaniel ahpw patohwanohng, “Komw mwahngih ie sang ia?” Sises eri ketin sapeng, mahsanih, “I kilanguhkadahte mwohn Pilip eh ekeruhkodo, ni omw mihmi pahn tuhke piko.”

⁴⁹Nadaniel ahpw sapeng, patohwan, “Maing Sounpadahk, uhdahn Sapwellimen Kohto komwi! Komwi me Nanmwarkien Israel!”

⁵⁰Sises ketin sapeng, mahsanih, “Ia duwe, ke kamehlele pwehki ei ndaiong uhk me I kilanguhkada ni ahnsou me ke mihmi pahn tuhke piko? Ke pahn kilang soahng kei me lapasang mepwukat!”

⁵¹E pil ketin mahsanihong irail, “I ndaiong kumwail ni mehlel, kumwail pahn kilang nanleng eh ritidahr, oh tohnleng en Koht akan ni ar douda oh doudi pohnangin Nein-Aramas.”