Read Pohnpeian Sounkopwung Kan 17 Bible Online

Sounkopwung Kan 17 - Pohnpeian bible

Sounkopwung Kan 17

¹Ni ahnsowo mie ohl emen me adaneki Maika me kin koukousoan nan sahpw nahnahn Epraim.

²E ndaiong eh nohno, “Ni ahnsou me noumw mwohni silper 1100 pirapalao ke keriahla aramas me pirapahlao. I rong omw keriao. Eri, iet mwohni ko. Ngehi me kihsang.” Eh nohno ahpw nda, “KAUN-O en ketin kupwuramwahwihiuk, samwa!”

³E ahpw kapwurehiong eh nohno mwohni ko; eh nohno ahpw nda, “I pahn kasarawihong KAUN-O nei mwohni kat, pwe ei keriao de lelohng nei pwutaket. E pahn doadoahkohng ni mehn wiahda mwomwen tuhkehn dikedik en eni me pahn kidikidki silper. Eri, met I pahn kapwurehiong uhk mwohni silper kat.”

⁴E ahpw kapwurehiong mwohni ko rehn eh nohno. Liho eri ale silper riepwiki oh kihong sounwia mete men, me wiahkihda mwomwen dikedik en eni, e parada tuhke oh kidimkihla silper ko. Mwomwen dikedik en eni ko eri kohdiong nan imwen Maika.

⁵Ohl menet Maika mie pein eh wasahn kaudok. E wiahda mwomwen dikedik en eni kei oh ihpod . ehu oh kilelehdi emen nah pwutak ko en wiahla samworo.

⁶Ni ahnsowo sohte nanmwarki nan Israel, emenemen kin pein wiewia nsene.

⁷Ni ahnsowo mie mwahnakapw en Lipai men me kin koukousoan Pedleem en Suda.

⁸E kohkohla sang Pedleem pwehn rapahki wasa tohrohr kis me e kak kousoan ie. Nindokon eh seiseiloak e ahpw lella ni imwen Maika nan sahpw nahnahn Epraim.

⁹Maika eri idek reh, “Komw ketsang ia?” A e sapengki, “Ngehi mehn Lipai, I kin kousoan Pedleem nan Suda. I raparapahki wasa I kak kousoan ie.”

¹⁰Maika eri nda, “Komw kommoaldi rehi. Komw wiahla ei sounkaweid oh ei samworo. I pahn kin kihong komwi mwohni silper eisek nan ehuehu sounpar, iangahki likou oh kisin tungoal.”

¹¹Mehn Lipai pwulopwulo ahpw pwungkihda en mihla rehn Maika oh wiahla duwehte uhdahn nah pwutak.

¹²Maika eri kilelehdi pwehn wiahla nah samworo, e ahpw kin koukousoan ni imweo.

¹³Maika eri patohwan, “Eri, met nan eh mieier nei samworo, I eseier me KAUN-O pahn ketin kupwure ie.”