Read Pohnpeian 2 Sohn 1 Bible Online

2 Sohn 1 - Pohnpeian bible

2 Sohn 1

¹Sang me Maho- Ong lih kompoakepahi, oh ong nah seri kan, me I poakepoake mehlel; ahpw kaidehn ngehite pwe pil irail koaros me ese me mehlelo kin poakohng kumwail;

²pwehki me mehlelo kin mihmi loalatail, oh e pahn mihmi rehtail kohkohlahte.

³Koht Samatail oh Krais Sises, Sapwellimen Sahmo, en ketin kupwurei kitail oh ketkihong kitail kalahngan oh mahk oh popohl, oh mepwukat en mihmihte rehtail ni mehlel oh limpoak.

⁴I perenkihda kowahlap ei diarada me ekei noumw seri kan kin momourki me mehlelo, nin duwen kosonned me Sahmo ketikihong kitail.

⁵Eri, I peki rehmw, lih kompoakepahi, pwe kitail koaros en poakpene. Met kaidehn kosonned kapw ehu, me I ntingkiwohng kumwail, pwe iei kosonnedohte me kitail aleier sang nin tapio.

⁶Limpoak me I kasaleweiet wehwehki me kitail en peikiong kosonned akan en Koht. Pwe iet kosonned me kumwail rongehr nin tapio: kumwail koaros en momourki mouren limpoak.

⁷Sounketewe tohto kohpesengehr nan sampah, irail sohte kin pohnese me Sises Krais ketin wiearamasala. Soangen aramas pwukat, iei irail sounketewe, oh irail me imwintihtien Krais.

⁸Eri, kumwail kaleke pein kumwail, pwe kumwail dehr katihasang pai me kitail koadoahkihadahr, ahpw kumwail en ale ketingpamwail unsek.

⁹Mehmen me daulih padahk en Krais ahpw sohte tengediong, Koht sohte ketiket reh. Ahpw mehmen me tengediong padahk wet, Sahm oh Sapwellimeo ira koaros pahn kin ketiket reh.

¹⁰Eri, ma emen pahn pwarodohng kumwail, ahpw sohte pwarkidohng kumwail padahk wet, kumwail dehr kasamwolong nan imwamwail, oh dehr rahnmwahwih.

¹¹Pwe ma mehmen pahn rahnmwahwih soangen aramas menet, e pahn pil iangala nan soahng suwed me e kin wia.

¹²Koasoi tohto mie me I men koasoiaiong kumwail, ahpw I sohte men ntingiheki ingk oh nan doaropwe; pwe I koapworopworki me I pahn pwarowei oh koasoiaiong kumwail, pwe atail peren en unsekla.

¹³Nein riomw Lih kompoako nah seri kat pil rahnmwahu ong uhk.