Read Pohnpeian Kaudiahl 4 Bible Online

Kaudiahl 4 - Pohnpeian bible

Kaudiahl 4

¹I ahpw pil kilangada kaudiahl ehu ni ahnsowo: mwohn meseiet wenihmw ehu ritida nanleng. Oh ngihl ehu, likamwete ngilen sowio me I rongehr ngkapwan, me peidohng ie, mahsanih, “Kohdahdo mahs met, pwe I pahn kasalehiong uhk mehkan me pahn wiawi ni ahnsou me pahn kohdo.”

²Ni ahnsowohte Ngehn Sarawi ahpw tiada pohi. Ngehi eri kilangada mwoahl ehu nanleng, oh mehmen me ketiket powe.

³Silangi lingaling duwehte kisin takai kesempwal me adaneki sasper oh karnelian; oh ahia ehu me pohe duwehte pohn takai kesempwal me adaneki emerald kapilpene mwoahlo.

⁴Mwoahl rieisek pahieu pil kapilpene mwoahl wet, oh lapalap riehk pahmen me ket powe; irail koaros likou pwetepwet oh elin kapwar kohl mi pohn moangarail ko.

⁵Lioal kin pirsang ni mwoahl me mi nanwerengeo; ngirisek kei kin peisang ie, oh nansapwe kin posopossang ie. Mehnser isuh mie me kin lullul mwohn mwoahlo; eri, iei irail ngehn isuhwen Koht.

⁶Oh mwohn mwoahlo mie mehkot me duwehte sehd mwakelekel ehu, rasehng kilahs. Pil pali koaros en mwoahlo, menmour pahmen mie, me diren pwoaren mas mwohrail oh pohnsekirail.

⁷Keieun menmouro rasehng laion emen; keriemeno rasehng kouwol emen; oh kesilimen en menmouro mese rasehng mesen aramas; a kapahmeno rasehng ikel men me wie pipihr.

⁸Pehnpihr weneu mie rehn emenemen menmour pahmeno; oh pohn pehrail oh pahn pehrail ko diren pwoaren mas. Re ahpw sohte kin tokedihsang ar kin kokoulki ni rahn nipwong koul pwoatet: “Sarawi, sarawi, sarawi, iei komwi at Kaun, Koht, Wasa Lapalahpie, me ketin mieier mahs, me ketin mie met, oh me pahn ketido.”

⁹Nindokon menmour pahmeno kin wiewia ar koulen kalingan, wahu, oh kapingkalahngan ong me ketin ieias poatopoat me ketiket pohn mwoale,

¹⁰lapalap riehk pahmeno kin poaridi mwohn mwoalen me ieias poatopoato oh pwongih. Re ahpw kin patohwandiong mwohn mwoahlo arail elin kapwat akan, oh kin kokoulki,

¹¹“Maing at Kaun oh at Koht! Komwi me uhdahn warohng sapwellimaniki lingan, wahu, oh roson. Pwe komwi me ketin wiadahr mehkoaros, oh pwehki kupwuromwien, me mehkoaros mihmiehki oh momourki.”