Read Pohnpeian 1 Samuel 3 Bible Online

1 Samuel 3 - Pohnpeian bible

1 Samuel 3

¹Eri, kisin pwutak Samuel ahpw kin wie papah KAUN-O pahn kaweidpen Ilai. Ni ahnsowo mahsen sang rehn KAUN-O me malaulau mehlel, oh pil kaudiahl sang reh sohte kin kalapw wiawi.

²Eri, Ilai, ni eh kereniongehr maskunla, pwohng ehu, e ahpw memeir nan eh pere;

³a Samuel wie memeir nan mwoahl sarawio, wasa sapwellimen Koht Kohpwahn Inowo mihmi ie. Nin sohrahn, nindokon lampo wie ngkingken,

⁴KAUN-O ahpw malipe Samuel, a Samuel patohwan sapeng, “Iet ngehi, maing!”

⁵E ahpw tangala rehn Ilai oh ndaiong, “Komw me eker ieo; eri, iet ngehi, maing.” A Ilai ahpw sapeng, ketihtihki, “I sohte eker uhk, pwurowei meirla.” Samuel eri pwurala meirla.

⁶KAUN-O pil ketin pwurehng malipe Samuel; a kisin pwutako sohte ese me iei KAUN-O mwo, pwe KANU-O sohte kin mahseniong mahs. Ihme e pwourdahte tangala rehn Ilai oh ndaiong, “Komw me eker ieo, iet ngehi, maing.” A Ilai ahpw sapeng, “I sohte eker uhk, samwa; pwurowei meirla.”

⁷KAUN-O pil ketin pwurehng malipe Samuel; a kisin pwutako sohte ese me iei KAUN-O mwo, pwe KANU-O sohte kin mahseniong mahs. Ihme e pwourdahte tangala rehn Ilai oh ndaiong, “Komw me eker ieo, iet ngehi, maing.” A Ilai ahpw sapeng, “I sohte eker uhk, samwa; pwurowei meirla.”

⁸KAUN-O ahpw pil ketin malipe Samuel kesilipak; a e pwourdahte tenge Ilai, oh ndaiong, “Komw me eker ieo, iet ngehi, maing.” Ilai eri tehkada me KAUN-O me ketin malimalipe kisin pwutako;

⁹ih eri ndahng, “Pwurowei meirla; oh ma mehmen pwurehng eker uhk, a ke sapeng, patohwan, ‘Maing KAUN, komw ketin mahsen, pwe sapwellimomwi laduwet patohwan rongorong.’ ” Samuel eri pwurala meirla.

¹⁰KAUN-O eri ketido oh ket limwah, oh pil pwurehng malipe duwehte mahs, “Samuel! Samuel!” A Samuel sapeng patohwan, “Maing, komw ketin mahsen, pwe sapwellimomwi ladu patohwan rongorong.”

¹¹KAUN-O eri ketin mahsanihong, “I pahn wiahiong mehn Israel kan mehkot me inenen kamasepwehk; eri, koaros me pahn rong pahn masepwehkada.

¹²Ni rahno, I pahn kapwaiada soahng suwed koaruhsie me I kehkehlingkihong en Ilai eh peneinei.

¹³I ndaiong me I pahn kaloke eh peneinei kohkohlahte, pwehki nah pwutak ko ara lahlahwe ie. Ilai ese duwen ara wiewia met, ahpw e sohte katokehdi.

¹⁴Eri, I kahukilahr me sohte meirong de kisakis ehu en Ilai oh eh peneinei pahn kak lapwahda dihp lapalap wet.”

¹⁵Samuel eri mihmihte nan dewe lel nimenseng. Eri, nimensengo e ahpw pwourda oh ritingada wenihmw en tehnpas en KAUN-O. Ahpw e masak kasalehiong Ilai audepen kaudiahlo.

¹⁶Ilai ahpw ekerodo, ketihtihki, “Samuel!” A Samuel ahpw sapeng, “Iet ngehi, maing.”

¹⁷Ilai ahpw idek reh, “Dahme KAUN-O mahsanihong uhk? Ke dehr ekihsang ie mehkot. Koht uhdahn pahn ketin kalokeiuk ma ke sohte ndaiong ie mehkoaros me e mahsanihong uhk.”

¹⁸Samuel eri padahkihong Ilai mehkoaros, oh sohte ekihsang mehkot. Ilai eri patohwan, “Iei ih me KAUN-O; e pahn ketin wia mehkoaros me mwahu me e ketin kupwurki.”

¹⁹Samuel eri kekeirda; oh KAUN-O kin ketin ieiang, oh kin ketin kapwaiada mehkoaros me Samuel kin kohpada.

²⁰Eri, sang ni irepen sahpwo lel ni irepe teio, mehn Israel koaros eselahr me Samuel uhdahn sapwellimen KAUN-O soukohp emen.

²¹KAUN-O eri kin ketin pwarohng oh mahseniong Samuel. Eri, ni Samuel eh kin mahsen, mehn Israel koaros kin rong.