Read Pohnpeian 1 Samuel 30 Bible Online

1 Samuel 30 - Pohnpeian bible

1 Samuel 30

¹Mwurin rahn riau Depit oh nah sounpei ko lel Siklak. Mehn Amalek ko mahweniongehr palieir en Suda oh Siklak. Re isikala kahnimwo

²oh koledi lih koaros; re sohte kemeirailla, pwe re aleirailte wahda ni ar mweselsang mwo.

³Ahnsou me Depit oh nah sounpei ko lel mwo, re diarada duwen kahnimwo eh isihslahr oh ar pwoud kan, nair pwutak kan oh serepein kan ar wisiksangehr.

⁴Depit oh nah sounpei ko ahpw tapihada sengiseng oh sohte tokedi lao re ngirala.

⁵En Depit eh pwoud riemeno, Ahinoam oh Apikail, pil iang wisiksang.

⁶Depit milahr nan apwal laud, pwehki nah aramas ako ar lingeringerkidahr nair seri ko ar solahr mie, re koasoakoasoaneier re en katehki takai; KAUN-O eri ketin kakehlahda nan kapehde.

⁷Depit eri patohwanohng samworo Apaiadar nein Ahimelek, “Komw patohwando mahs likou ihpodo.”

⁸Depit eri kalelapak rehn KAUN-O, “Maing, I en pwakihala irail ko me kauwehla kahnimwo? I pahn kak koanoairaildi?” KAUN-O ketin sapeng, “Ei, pwakihiralla; ke pahn koanoairaildi oh kapitala me lohdi kan.”

⁹Depit oh nah sounpei wenepwikio ahpw mweselda oh ni ar lel ni Piletik Pesor, ekei sounpei ko mwohndi wasao.

¹⁰Depit eri douluhlla iangahki sounpei pahpwiki; me riepwikio inenen pwangada mehlel oh sohla kak iang kotehla pihlo; irail ahpw mwohndi wasao.

¹¹Sounpei ko me iang Depit ahpw diarada kisin pwutak en Isip men nansapwo oh wadohng Depit. Re ahpw kihong kisin mwenge, pihl,

¹²iangahki pik madekeng oh dunen wahn wain riau. Mwurin kisin pwutako eh mwengeier, e ahpw kehlailda; pwe rahn siluh me e sohte mwenge oh nimpil.

¹³Depit ahpw idek reh, “Ihs omw soumas, oh ke kohsang ia?” A kisin pwutako sapeng, patohwan, “Ngehi men Isip, lidun mehn Amalek men. Ei soumaso keseiehla rahn siluh douwer powe pwehki ei soumwahuda.

¹⁴Se patohwan mahweniong sapwen mehn Kered kan ni palieir en Suda oh sapwen peneineien Kalep, kiht eri isikala kahnimw Siklak.”

¹⁵Depit ahpw idek reh, “Ke kak kahreielahng rehn irail ko me isikala kahnimwo?” A kisin pwutako sapeng, patohwan, “I pahn kahreikomwihla, ma komw pahn inoukihong ie ni mwaren Koht me komw sohte pahn kemeiehla de kapwureielahng rehn ei soumas.”

¹⁶Kisin pwutako eri karehla Depit rehrail. Aramas suwed ko mwomwohdseli wasao, mwengemwenge, niminim sakau, oh kamakamadipw pwehki uwen laud en dipwisou me lohdi sang mehn Pilisdia oh Suda.

¹⁷Nin sohrahn en mandasang rahno Depit oh nah sounpei ko eri mahweniong irail lao lel nin soutik. Sohte emen irail pitla, likin mwahnakapw pahpwiki me dake kamel oh tangdoaui.

¹⁸Depit eri kapitala aramas koaros oh mehkoaros me mehn Amalek ko wahsang, e pil kapitala eh pwoud riemeno;

¹⁹sohte mehkot me re sohte kapwurehdo. E kapwurehdo nein nah ohl ako koaros neirail pwutak kan oh serepein kan oh mehkoaros me mehn Amalek ko wahsang.

²⁰E pil kapwurehdo nair pelinmen kan koaros; ohl ako ahpw kahkahre pelinmen ko mwohrail oh koasoakoasoia, “Mepwukat koaros sapwellimen Depit.”

²¹Depit eri pwurala rehn sounpei riepwikio me luwetala sohla kak iang ih oh mwohndi ni Piletik Pesor. Irail eri kohdo kasamwo Depit oh nah sounpei ko, Depit eri keilahng mparail oh rahnmwahwih irail ni nsenamwahu.

²²Ahpw ohl lemei oh soh katepe kei me iang Depit ahpw nda, “Re sohte iang kitail kohla mahwen, eri kitail sohte pahn kihong irail mehkot sang nan dipwisou lohdi kan. Re kak ale arail pwoud oh neirail seri kan oh kohkohla.”

²³Ahpw Depit sapeng irail, ketihtihki, “Riei ko, kitail sohte kak wia soahnget ong dahme KAUN-O ketikihong kitail. E ketin doareikitailla oh ketikihong kitail pwe kitail en powehdi aramas suwed pwuko.

²⁴Sohte me kak pwungki dahme kumwail koasoakoasoane. Koaruhsie pahn iang ahneki mehkot: me mwohndi ko me sohte iang mahwen pahn iang ahneki mehkot duwehte me kohla iang mahwen.”

²⁵Depit wiahkihla met kosonned ehu, oh mehn Israel koaros kin idawehn kosonned wet sang ahnsowo kohdo lel rahnwet.

²⁶Ahnsou me Depit pwurala Siklak, e kadaralahng kompoakepah ko, kaunen Suda ko, ekei kepwe sang ni kepwe lohdi ko, iangahki pato pwukat, “Iet kisakis ong kumwail sang ni dipwisou kan me lohdi sang sapwellimen KAUN-O imwintihti kan.”

²⁷E kadaralahng aramas en Pedel, ong mehn Rama ni palieir en Suda, ong aramas en kahnimw kan en Sattir,

²⁸Aroer, Sipmod, Estemoa,

²⁹oh Rakal; ong peneineien Serameel, ong mehn Ken

³⁰oh ong mehn kahnimw kan en Orma, Porasan, Adak,

³¹oh Epron. E kadaralahng wasa koaros me ih oh nah sounpei ko mihmihseli ie.