Read Poqomchi' San Mateo 28 Bible Online

San Mateo 28 - Poqomchi' bible

San Mateo 28

¹Xa reꞌ woꞌ ti xponic waki̱b o̱ra reh xikꞌek reꞌ ncuxꞌic wi̱ꞌ i hiꞌlbal kꞌi̱j eh npꞌuhtic cok i tomincuꞌ kꞌi̱j reꞌ pe̱t kꞌi̱j reh xama̱na chi keh hoj ra̱ꞌ riꞌsil cho maꞌ Israhel, reꞌ Mari̱ya aj Majta̱la chꞌi̱l i jenaj chic Mari̱ya xiꞌo̱j ti chi riliric rimukꞌunbal i Jesus reh chi cu wahkꞌek ti nasakꞌok lok reh Tomincuꞌ kꞌi̱j nacojic woꞌ chi aj buchꞌunel reh ritiꞌjolal.

²Naxiponic aj pan mukꞌunbal reh tomincuꞌ kꞌi̱j, xquicoj rehtal chi xiban peꞌ lok jenaj maꞌ laj hihc eh xquilow woꞌ chi jenaj raj tzꞌeꞌ wa̱ch i Lokꞌ laj Ajabe̱s Dios kajanak cho pan taxa̱j rijilim cok ri̱b chi chi̱ꞌ i mukꞌunbal chi ricꞌuyuꞌsjic lok i maꞌ laj abaj ntzꞌapbic chi̱ꞌ i mukꞌunbal reꞌreꞌ. Reꞌ aj tzꞌeꞌ wa̱ch reꞌreꞌ xitzꞌuka̱ꞌ woꞌ ri̱b china̱ i maꞌ coten laj abaj cꞌuyuꞌsumaj chi lok ruꞌum

³eh reꞌ rilbal xa nchꞌabchꞌatic chic xa jeꞌ chic ricab richꞌa̱b i cohok. Reꞌ risoꞌ xa nrepretic chic risakil, xa jeꞌ chic ricab sak laj su̱tzꞌ.

⁴Ar aj ruꞌ reꞌ take ixok reꞌreꞌ kꞌe̱ꞌ woꞌ chic xiyoꞌjic eh jeꞌ woꞌ reꞌ xquicꞌul take sol quichaꞌjanic reh rimukꞌunbal i Jesus. Jeꞌ reꞌ nikꞌor maj reꞌ take reꞌ maꞌ cu ta chic xicꞌuyuꞌjic ruꞌum yoꞌjic, xicahnic laꞌ chi xa jeꞌ chic take camnak nok cꞌahchiꞌ nak ti que̱b chi chaꞌjanic.

⁵Chi jeꞌ reꞌ kꞌuruꞌ, reꞌ raj tzꞌeꞌ wa̱ch i Dios jeꞌ wili xikꞌor queh take ixok reꞌreꞌ: «Maꞌ tiyoꞌjic tak ruꞌum chi wilqui̱n ayuꞌ. Reꞌ hin wehtꞌalim chi xatcꞌulic tak lok ayuꞌ chi risiqꞌuiric i Jesus reꞌ xcansjic wach curu̱s,

⁶xa reꞌ laꞌ maꞌxta chic ayuꞌ ruꞌum nok xuctic chic chi quixilac take camnak jeꞌ ricab rikꞌorom woꞌ cho aweh tak. Quim tak kꞌuruꞌ, toque̱n tak cho pa rimukꞌunbal eh chawilow tak chi maꞌxta chic ayuꞌ.

⁷Yuꞌna chi xawilow tak chic chi coric reꞌ xnikꞌor aweh tak, hiy chaloqꞌuej awi̱b tak chi ojic cu̱cꞌ take awich aj tahkanel tak eh chakꞌor tak queh chi reꞌ Jesus xuctic chic chi quixilac take camnak. Jeꞌ woꞌ, chakꞌor tak queh chi nachimol ri̱b awichꞌi̱l tak ar pa riyukꞌul i Calile̱ya, reꞌreꞌ pe̱t narojic chawach tak eh ar na̱rakam awi̱b tak richꞌi̱l. Til chacoj tak rehtal chi til coric take kꞌoric xnikꞌor aweh tak wili, nqui raj tzꞌeꞌ wa̱ch i Dios.

⁸Jeꞌ reꞌ ajic, reꞌ take ixok reꞌreꞌ xiꞌelic je chipam i mukꞌunbal chi xa suk chic quicꞌux eh xa cu yoꞌjonak woꞌ take soꞌ, xiꞌo̱j cajim chi rikꞌororic queh quich aj tahkanel i holohic laj kꞌoric xquibiraj je. Nok xa cajamem aj chic je qui̱b chi ojic,

⁹reꞌ Jesus xelic cho pan quibe̱h eh xicꞌalenej take. Ar aj ruꞌ reꞌ take ixok reꞌreꞌ xquijil cok qui̱b ru̱cꞌ, xquixucꞌa̱ꞌ qui̱b chiwach eh xquitokꞌa̱ꞌ quikꞌahchem chi ro̱k chi yeꞌbal rilokꞌil.

¹⁰Chiri̱j chic ruꞌ reꞌ Jesus jeꞌ wili xikꞌor woꞌ queh: «Hiy tak, maꞌ tiyoꞌjic tak chi rikꞌormojic queh waj tahkanel i holohic laj kꞌoric chi cꞌachalqui̱n woꞌ chic. Jeꞌ woꞌ chic, reh chi reꞌ take reꞌ equiꞌo̱j ar Calile̱ya, chakꞌor tak queh chi ar nakilom kawach quichꞌi̱l, nqui Jesus queh. Reꞌ noꞌjbal xtikꞌinjic wach chi maꞌxta ricojoric wach ructic i Jesus

¹¹Nok cꞌahchiꞌ cojic take ixok chi rikꞌororic reꞌ xkꞌormojic je queh ruꞌum Jesus, wilic woꞌ take sol aj chaꞌjanel reh rimukꞌunbal i Jesus xiꞌoquic cok pan tinamit Jerusalen chi rikꞌormojic queh cꞌamol quibe̱h take aj kꞌahsem si̱ nicꞌ nimal xcꞌulmujic chi quiwach.

¹²Naxquibiraj reꞌ chaj bih xponic kꞌormojok queh, reꞌ take cꞌamol be̱h reꞌreꞌ xquimol ti qui̱b chꞌi̱l take quich nahsil chipam katinami̱t eh xquitikꞌa̱ꞌ ti wach quinoꞌjbal chiri̱j chaj bih nacaꞌnam. Jeꞌ reꞌ nok xquitikꞌa̱ꞌ wach chi xquiyew qꞌuihal tumi̱n queh aj chaꞌjanel reꞌreꞌ reh chi naquicꞌamam na̱ i hunu̱j

¹³xkꞌormojic chi jeꞌ wili: «Wi xquibiraj aweh tak chaj bih xcꞌuluric ru̱cꞌ ritiꞌjolal i Jesus, reꞌ hat-tak jeꞌ wili chakꞌor tak: ‹Naxkajic mahnicꞌ kawiric pan chakꞌab, xicꞌulic lok take raj tahkanel i Jesus eh xquesaj je ritiꞌjolal, tiquirok tak.

¹⁴«Wi nchel xinaꞌbej i Po̱nsyo Pila̱to chi pan awiric tak xcꞌulic esmejok ritiꞌjolal i Jesus, reꞌ chic hoj ekojkꞌoric chawi̱j tak reh chi maꞌ eta riyew tiꞌcꞌaxic chana̱ tak, nqui xkꞌormojic queh.

¹⁵Jeꞌ reꞌ ajic reꞌ take sol reꞌreꞌ xquicꞌam je tumi̱n reꞌreꞌ, xiꞌoquic woꞌ lok chi rikꞌororic reꞌ xkꞌormojic cho queh. Ruꞌum aj reꞌ cu chiwach take kꞌi̱j reꞌ cꞌahchiꞌ nitzꞌihmbam wi̱ꞌ i hu̱j wili, xa cu cꞌahchiꞌ woꞌ relic lok ribiral chi kaxilac hoj ra̱ꞌ riꞌsil cho maꞌ Israhel chi reꞌ ritiꞌjolal i Jesus xa xponic esmejok cho cuꞌum take raj tahkanel. Reꞌ nim wach takꞌanic xiyew cahnok i Jesus (Mr. 16.14-18; <a href='B:490 24:36'>Lc. 24.36-49; <a href='B:500 20:19'>Jn. 20.19-23)

¹⁶Chiri̱j chic take kꞌi̱j reh ructic i Jesus, reꞌ hoj junlaj pahbamaj chi quinahsil take aj tahkanel chꞌi̱l woꞌ take quitahkanic reh Jesus xoj-o̱j pa riyukꞌul i Calile̱ya chipam i jenaj yu̱kꞌ xitakꞌa̱ꞌ rikꞌormojic keh Jesus chi nakarakam wi̱ꞌ ki̱b richꞌi̱l.

¹⁷Naxojponic ajic chipam i yu̱kꞌ reꞌreꞌ, reꞌ hoj nahsil raj tahkanel xkalokꞌej wach i Jesus naxkilow wach, xa reꞌ laꞌ maꞌ chi kunchelal ta xcaꞌn chi jeꞌ reꞌ, maj wilic juꞌjun wilque̱b chi kaxilac maꞌ til ta xquicoj wach chi til reꞌ Jesus wilic chi kaxilac.

¹⁸Chi jeꞌ reꞌ, reꞌ Jesus xijil cok ri̱b ku̱cꞌ eh jeꞌ wili xikꞌor keh: «Ruꞌum nok reꞌ wAja̱w Dios xiyew chic wi̱n i wajawric wilic chi quina̱ take nicꞌ nimal wilque̱b pan taxa̱j jeꞌ woꞌ chi quina̱ take nicꞌ nimal wilque̱b wach acꞌal,

¹⁹reꞌ hin tinitakꞌa̱ꞌ tak je chi rikꞌormojic niCꞌuhbal queh chiꞌnchel i tinamit chi junsut wach acꞌal. Jeꞌ reꞌ na̱banam tak reh chi naquichꞌica̱ꞌ quicꞌux chiwi̱j take tinamit, ewoꞌ ncaꞌn chi waj tahkanel chic take. Reꞌ take naquicꞌambic na̱ niCꞌuhbal, chakahsaj tak quiha̱ꞌ chi cꞌahchiꞌ akꞌorom tak johtok ribihnal i Ajabe̱s Dios, chꞌi̱l hin Acꞌunbe̱s chꞌi̱l woꞌ Lokꞌ laj Uxlabal.

²⁰Jeꞌ woꞌ, pan acꞌuhbalanic tak chakꞌor tak queh chi riwi̱ꞌ chi queh chi enquinimej i takꞌanic cꞌahchiꞌ nibanam aweh tak wili maj riwi̱ꞌ chaweh hat-tak chiꞌnchel waj tahkanel chi enakꞌor tak niCꞌuhbal. Jeꞌ reꞌ kꞌuruꞌ, hiy tak chi ribanaric xnikꞌor aweh tak eh maꞌ tiyoꞌjic tak maj reꞌ hin xa eli̱c woꞌ naniwihꞌic awu̱cꞌ tak chi atobjic tak pan uxlabal cu rehtal ncuxꞌic wach acꞌal wili, nqui Jesus keh. Reꞌ aj i wili ricorquilal xnitzꞌihmbaj i hin maꞌ Tiyoh chiri̱j ricꞌacharic i Jesus.