Read Poqomchi' San Lucas 1 Bible Online

San Lucas 1 - Poqomchi' bible

San Lucas 1

¹Ajabe̱s maꞌ Teyo̱pilo, qꞌuih woꞌ take aj tzꞌihminel xquiyew quicꞌux chi ritzꞌihmjic chi chaklic chi̱ꞌ chaj bih xiban i Jesus chi kaxilac i hoj raj tahkanel. Reꞌ xquitzꞌihmbaj take aj tzꞌihmenel reꞌreꞌ, reꞌ hoj kehtꞌalim chi til coric

²maj nicꞌ paꞌ wach xquitzꞌihmbaj ruꞌ jeꞌ woꞌ reꞌ xkabiraj cu̱cꞌ take pahbamaj chi rikꞌormojic nicꞌ wach ricꞌuhtunic i Jesus, reꞌ take xiꞌilbic woꞌ cho reh nicꞌ wach naxipꞌut cho ricamaj.

³Jeꞌ reꞌ kꞌuruꞌ ajabe̱s maꞌ Teyo̱pilo, jeꞌ ricab xcaꞌn nicꞌ nimal take aj tzꞌihminel reh chaj bih xiban i Jesus, reꞌ hin xasjic cho pa nicꞌux chi nanitzꞌihmbam je aweh ribiral i Jesus chi chaklic chi̱ꞌ jeꞌ ricab nicꞌ paꞌ wach xnirak chiri̱j ru̱cꞌ i tijinic xnitokꞌa̱ꞌ cho cu ru̱cꞌ chꞌiquinbal cho reh ricꞌacharic.

⁴Jeꞌ aj reꞌ ruꞌ yuꞌna cꞌahchiꞌ nitzꞌihmbam je aweh reꞌ xnirak chiri̱j, reh chi jeꞌ reꞌ encowjic acꞌux chiri̱j ricorquilal i tijinic cꞌuhtumaj aweh chiri̱j i Jesus. Reꞌ ribiral rasjic i Wa̱n aj Kahsem haꞌ

⁵Pa rikꞌijil cho Hero̱res nok wilic ar pa riyukꞌul i Jure̱ya chi raj toꞌo̱l i kꞌatal kꞌoric aj Ro̱ma, xwihꞌic cho jenaj aj kꞌahsem quisi̱ i tinamit chiwach i Dios Sacari̱yas ribihnal, jeꞌ ru̱cꞌ quicomonil take aj kꞌahsem si̱ Awi̱yas quibihnal. Reꞌ rehqꞌue̱n i Sacari̱yas Elisawet ribihnal eh ra̱ꞌ riꞌsil cho i pe̱t aj kꞌahsem si̱ chiwach i Dios A̱ron ribihnal.

⁶Reꞌ take quib reꞌreꞌ coric wach quicꞌux chiwach i Dios eh maꞌxta bih equikꞌiliric wi̱ꞌ maj nquinimej chi coric riCꞌuhbal i Lokꞌ laj Ajabe̱s Dios yeꞌo̱j reh Moyses.

⁷To̱b ta jeꞌ reꞌ riwi̱ꞌ quinoꞌjbal, maꞌxta nak quihaꞌlacꞌu̱n ruꞌum chi reꞌ Elisawet maꞌ reꞌ ta acꞌunom laj ixok eh yuꞌna xirejbic chic chi maꞌxta quihaꞌlacꞌu̱n.

⁸Junpech ajic nok camanic riban i Sacari̱yas chi kꞌahsanic si̱ chiwach i Dios ruꞌum reꞌ chic i comonil wilic wi̱ꞌ xoquic chi camanic chipam Lokꞌ laj Pa̱t reꞌ nlokꞌonjic wi̱ꞌ wach i Dios,

⁹reꞌ take ricomonil reꞌreꞌ jeꞌ ricab cocsam wi̱ꞌ qui̱b, xiꞌoquic chi rikꞌijiljic ri̱j hab wach naricꞌatbic reh se̱nsa chiwach i Dios eh tzꞌeht xkajic china̱ i Sacari̱yas. Chi jeꞌ aj reꞌ xoquic cok chi camanic chipam lokꞌ laj yeꞌa̱b ncꞌataric wi̱ꞌ i se̱nsa chiwach i Dios.

¹⁰Nok reꞌ Sacari̱yas jeꞌ reꞌ cꞌahchiꞌ ribanam cok ar eh reꞌ take riqꞌuihal cꞌacharel ti̱j ncaꞌn lok ar chiri̱j i pa̱t reꞌreꞌ,

¹¹cu reꞌ peꞌ chic reh ruꞌ jenaj raj tzꞌeꞌ wa̱ch i Ajabe̱s Dios ruhmumaj chic cok chiwach ar chipam i yeꞌa̱b reꞌreꞌ eh xpahꞌic je pan secꞌaj reh i lokꞌ laj yeꞌa̱b cꞌatbal se̱nsa.

¹²Naxilow i Sacari̱yas chi jeꞌ reꞌ, yohbal wach naxyoꞌjic

¹³xa reꞌ laꞌ raj tzꞌeꞌ wa̱ch i Dios jeꞌ wili xikꞌor reh: «Maꞌ tiyoꞌjic Sacari̱yas maj reꞌ Dios xtakꞌanic cho wi̱n chi rikꞌormojic aweh chi xibiraj cho ati̱j abanam johtok chiwach. Chi jeꞌ aj reꞌ yuꞌna nikꞌor aweh chi reꞌ awehqꞌue̱n Elisawet nariwihꞌic jenaj rihaꞌlacꞌu̱n eh reꞌ haꞌlacꞌun reꞌreꞌ Wa̱n ribihnal na̱cojom.

¹⁴Jeꞌ woꞌ chic, ru̱cꞌ rasjic ahaꞌlacꞌu̱n reꞌreꞌ yohbal wach tinamit naca̱t quihchꞌilem ru̱cꞌ risukquil acꞌux tak nariwihꞌic.

¹⁵Reꞌ ricamaj naribanam, awacꞌu̱n reꞌreꞌ lo̱kꞌ riwaꞌric naribanam chiwach i Dios ruꞌum reh ricamaj naribanam chiwach. Jeꞌ woꞌ, ruꞌum ricamaj reꞌreꞌ maꞌ neꞌel ikal naruqꞌuem i haꞌ nxohcꞌsonic. Ru̱cꞌ ruꞌ nariwihꞌic i Lokꞌ laj rUxlabal i Dios chi cu jaꞌ ncꞌulic ta woꞌ wach sakom.

¹⁶«Ru̱cꞌ i cꞌuhbalanic naribanam awacꞌu̱n, yohbal wach take ra̱ꞌ riꞌsil cho maꞌ Israhel naquichopom woꞌ chic quicꞌux chiri̱j rinimjic Ajabe̱s Dios reꞌ lokꞌomaj wach cuꞌum take awich ra̱ꞌ riꞌsil cho maꞌ Israhel quibirinic kꞌoric chiwach.

¹⁷Jeꞌ aj wili naribanam i awacꞌu̱n: Jeꞌ ricab nok xyeꞌeric rikꞌorbal i Eli̱yas ruꞌum Lokꞌ laj rUxlabal i Dios, jeꞌ woꞌ reꞌ nariyeꞌeric rajawric rikꞌorbal awacꞌu̱n ruꞌum i Lokꞌ laj Uxlabal. Reꞌreꞌ pe̱t narasjic chiwach i Ajabe̱s reꞌ Dios woꞌ riwi̱ꞌ eh nariyeb rehtal queh take tinamit chi naricꞌulic lok. Chiri̱j reꞌ, ru̱cꞌ ricꞌuhbalanic naribanam reꞌ take cꞌacharel naquijalam wach quinoꞌjbal reh chi tikilque̱b chic take chi ricꞌuluric i Ajabe̱s reꞌ Dios riwi̱ꞌ. Jeꞌ woꞌ chic, ruꞌum reh i cꞌuhbalanic naribanam awacꞌu̱n, reꞌ take tutbe̱s ajabe̱s maꞌ nquicꞌax ta chic cacꞌu̱n quixkꞌu̱n naquicꞌaxam woꞌ chic take eh reꞌ take acꞌun ixkꞌun reꞌ maꞌ nquiyohbalej ta chic wach quitu̱t caja̱w, naquitijem woꞌ chic riyohbaljic quiwach jeꞌ ricab ncaꞌn take quiniminic reh Dios, nqui raj tzꞌeꞌ wa̱ch i Dios.

¹⁸Chalic i Sacari̱yas jeꞌ wili xikꞌor: «Nicꞌ wach nanwehtꞌalij chi coric i xakꞌor wi̱n? maj ehtꞌalamaj chi reꞌ hin maꞌ eta chic nwihꞌic nihaꞌlacꞌu̱n chꞌi̱l wehqꞌue̱n ruꞌum hin chic rijeb winak eh rijeb ixok woꞌ chic i wehqꞌue̱n, nqui reh raj tzꞌeꞌ wa̱ch i Dios.

¹⁹Chalic raj tzꞌeꞌ wa̱ch i Dios jeꞌ wili xikꞌor reh: «Reꞌ hin, hin Cawriyel lo̱kꞌ nilokꞌil wilqui̱n cok chiwach i Dios chi reꞌ raj tzꞌeꞌ wa̱ch. Jeꞌ reꞌ nok chacoj wach i xnikꞌor aweh maj reꞌ woꞌ i Dios xtakꞌanic cho wi̱n chi rikꞌormojic aweh i ato̱b laj kꞌoric wili

²⁰reꞌ maꞌ nacoj ta pe wach. Ruꞌum aj chi jeꞌ reꞌ xaꞌn, yuꞌna nanibanam chi na̱cahnic me̱m. Cu rehtal chic narasjic ahaꞌlacꞌu̱n cu reꞌ aj chic ruꞌ na̱kꞌoric maj reꞌ xikꞌor i Dios til naribanam naponok wach rikꞌijil, nqui raj tzꞌeꞌ wa̱ch i Dios.

²¹Nok jeꞌ reꞌ cꞌahchiꞌ ricꞌuluric cok chipam i lokꞌ laj yeꞌa̱b ncꞌataric wi̱ꞌ se̱nsa, reꞌ take tinamit uyunic ncaꞌn lok rij pa̱t jeꞌ wili nquikꞌor chi quiwach: «Chaj woꞌ bih richam cho wi̱ꞌ ri̱b aj kꞌahsem si̱ maꞌ Sacari̱yas chipam cok lokꞌ laj yeꞌa̱b reꞌreꞌ? nqui nquikꞌor. Jeꞌ reꞌ nquikꞌor ruꞌum nok cꞌahchiꞌ cuyꞌem chi narelic cho chi quicuseꞌsjic take.

²²Raj laꞌ naxelic cho maꞌ Sacari̱yas memrenak chic, maꞌ xchol ta chic kꞌoric cu̱cꞌ take tinamit uyunic ncaꞌn lok chiwach i juncꞌam reꞌreꞌ, xa ru̱cꞌ laꞌ chic nah kꞌab xicꞌuhtaj queh chaj bih xicꞌul cok ar. Xa chi jeꞌ chic reꞌ naxquirak chiri̱j chi reꞌ Dios wilic xicꞌuhtaj reh Sacari̱yas chipam lokꞌ laj yeꞌa̱b reꞌreꞌ.

²³Chiri̱j aj chic ruꞌ naxicohlaj je wach jarub kꞌi̱j naribanam ricamaj chiwach i Dios, reꞌ Sacari̱yas cu reꞌ chic xo̱j pa ripa̱t. Reꞌ rikꞌormojic ribiral rasjic i Jesus

²⁴Chiri̱j wili, reꞌ Elisawet reꞌ rehqꞌue̱n maꞌ Sacari̱yas xcahnic chi yowa̱b ixok chic eh hoꞌo̱b poh maꞌ xelic ta chic pa ripa̱t chi ricapewjic ri̱j i xiban i Dios ru̱cꞌ. Reꞌ wili rikꞌor pa ricꞌux:

²⁵«Ru̱cꞌ i cꞌaxo̱j xiban wi̱n wili chi riyeꞌeric cho jenaj nihaꞌlacꞌu̱n, reꞌ Dios cꞌahchiꞌqui̱n resam chipam i qꞌuixbilal wilqui̱n nak wi̱ꞌ chi quiwach i tinamit chi maꞌ nwihꞌic ta nihaꞌlacꞌu̱n chꞌi̱l nibahil, nqui pa ricꞌux.

²⁶Nok waki̱b chic poh wilic reh Elisawet chi yowa̱b ixok, reꞌ Ajabe̱s Dios xitakꞌa̱ꞌ woꞌ chic cho raj tzꞌeꞌ wa̱ch Cawriyel pan tinamit Nasaret ribihnal reꞌ wilic pa riyukꞌul Calile̱ya.

²⁷Ar xitakꞌa̱ꞌ cho ru̱cꞌ jenaj kꞌahxok Mari̱ya ribihnal reꞌ maꞌ wihꞌinak ta ru̱cꞌ winak xa reꞌ laꞌ pahkamaj chic chiwach ritu̱t raja̱w ruꞌum jenaj acꞌun reꞌ Chep ribihnal ra̱ꞌ riꞌsil cho kꞌatal kꞌoric maꞌ Tawiy.

²⁸Reꞌ raj tzꞌeꞌ wa̱ch i Dios, naxoquic cok pa ripa̱t i Mari̱ya, xicꞌalenej eh jeꞌ wili xikꞌor reh: «Kꞌe̱ꞌ ato̱b aweh hat Mari̱ya! Jeꞌ reꞌ nikꞌor maj chi quixilac take chiꞌnchel ixok reꞌ hat xatrichih i Ajabe̱s Dios chi na̱cꞌaxmajic. Ruꞌum aj reꞌ, reꞌ Dios xa awu̱cꞌ woꞌ nariwihꞌic chi atobjic, nqui raj tzꞌeꞌ wa̱ch i Dios reh.

²⁹Naxibiraj chi jeꞌ reꞌ, reꞌ Mari̱ya xsahchic ricꞌux eh jeꞌ wili xikꞌor pa ricꞌux: «Chaj waꞌric narikꞌor wi̱n chi jeꞌ reꞌ? nqui pa ricꞌux.

³⁰Chiri̱j reꞌreꞌ, reꞌ raj tzꞌeꞌ wa̱ch i Dios jeꞌ woꞌ chic wili xikꞌor reh: «Mari̱ya, maꞌ ticapewenic chi maꞌ nim ta ti awach maj chiwach i Dios yuꞌna reꞌ hat nim chic awach ruꞌum i camanic na̱banam.

³¹Jeꞌ reꞌ nok reꞌ hat na̱cahnic chi yowa̱b ixok chic eh nariwihꞌic jenaj awacꞌu̱n reꞌ na̱bihnem chi Jesus.

³²Reꞌ awacꞌu̱n wili nim rilokꞌil nariyeꞌeric maj reꞌ Dios reꞌ kꞌe̱ꞌ rinimal rajawric til reꞌ wili wacꞌu̱n nqui narikꞌorom. Ru̱cꞌ reꞌreꞌ, reꞌ Dios nariyeb woꞌ rajawric chi kꞌatal kꞌoric chi quina̱ take ra̱ꞌ riꞌsil cho maꞌ Israhel, jeꞌ ricab naxiyew cho rajawric i aj najtir kꞌi̱j, reꞌ maꞌ Tawiy.

³³Jeꞌ reꞌ ajic, reꞌ awacꞌu̱n nariyeꞌeric rajawric eh reꞌ ricamaj nariyeꞌeric, maꞌ jaruj ta chic naricuxꞌic wach maj reꞌreꞌ narikꞌatam kꞌoric chi junelic chi quina̱ take ra̱ꞌ riꞌsil cho i maꞌ Jacow, nqui raj tzꞌeꞌ wa̱ch i Dios.

³⁴Chalic i Mari̱ya jeꞌ wili xikꞌor reh i raj tzꞌeꞌ wa̱ch i Dios: «Nicꞌ wach naquincahnok chi hin yowa̱b ixok maj reꞌ hin maꞌ hin ta wihꞌinak ru̱cꞌ winak? nqui reh.

³⁵Reꞌ raj tzꞌeꞌ wa̱ch i Dios jeꞌ woꞌ chic wili xikꞌor reh: «Reꞌ Dios reꞌ kꞌe̱ꞌ rinimal rajawric, reꞌreꞌ naribanic chi jeꞌ reꞌ nachiyew cho chana̱ i Lokꞌ laj rUxlabal. Ruꞌum aj reꞌ na̱sjok i acꞌun wili, reꞌ tinamit naquikꞌorom chi jeꞌ wili: “Kꞌe̱ꞌ lo̱kꞌ i rAcꞌu̱n i Dios wili, nqui naquikꞌorom, nqui reh Mari̱ya.

³⁶Chiri̱j chic reꞌ, reꞌ raj tzꞌeꞌ wa̱ch i Dios xikꞌor woꞌ chic reh Mari̱ya chi jeꞌ wili: «Chacapaj i Elisawet reꞌ awu̱cꞌ cho, waki̱b chic poh cahnanak cho chi yowa̱b ixok. To̱b ta nak reꞌ tinamit nquikꞌor chi maꞌ n-nacꞌununic ta, nariwihꞌic jenaj rihaꞌlacꞌu̱n pa rirejbil.

³⁷Jeꞌ aj reꞌ naricꞌuluric ru̱cꞌ maj chiwach i Dios maꞌxta bih cꞌaxic chi banaric, nqui raj tzꞌeꞌ wa̱ch i Dios.

³⁸Naxibiraj chi jeꞌ reꞌ, reꞌ Mari̱ya jeꞌ wili xikꞌor: «Quincamanok aj chiwach i Ajabe̱s Dios eh chiban wu̱cꞌ reꞌ xakꞌor i hat, nqui xikꞌor reh. Xa reꞌ woꞌ xicohlaj kꞌoric i Mari̱ya, xo̱j woꞌ chic i raj tzꞌeꞌ wa̱ch i Dios. Reꞌ Mari̱ya xo̱j rikꞌoꞌrej i Elisawet

³⁹Cu jaꞌ naht ta woꞌ pononak cho aj tzꞌeꞌ wa̱ch ru̱cꞌ i Mari̱ya, reꞌreꞌ xitikꞌa̱ꞌ ri̱b eh xo̱j chi xa rajamem chic ri̱b chi rikꞌoꞌrjic i Elisawet chipam jenaj tinamit wilic johtok wach yu̱kꞌ pa riyukꞌul Jure̱ya.

⁴⁰Naxponic chi chi̱ꞌ ripa̱t i Sacari̱yas xoquic cok ar eh xicꞌalenej Elisawet.

⁴¹Xa reꞌ laꞌ woꞌ ti xicꞌalenjic ruꞌ, xipꞌut ti cho cꞌuyuꞌjic rihaꞌlacꞌu̱n. Ar ajic xchalic i Lokꞌ laj rUxlabal i Dios xichop na̱ ricꞌacharic i Elisawet.

⁴²Jeꞌ reꞌ nok xa suk chic pa ricꞌux xikꞌor chi jeꞌ wili: «Reꞌ poꞌ nchel hat Mari̱ya. Nim alokꞌil yeꞌo̱j chi quiwach chiꞌnchel take ixok eh reꞌ ahaꞌlacꞌu̱n awihkam kꞌe̱ꞌ woꞌ nim rilokꞌil yeꞌo̱j!

⁴³Kꞌe̱ꞌ woꞌ chic acꞌaxbal kꞌuruꞌ chi xinchal akꞌoꞌrej i hat ritu̱t i kAjabe̱s Kꞌatal Kꞌoric narasjic, nqui reh.

⁴⁴Chiri̱j wili, xikꞌor woꞌ chic reh: «Ruꞌum xnicoj rehtal xiban i nihaꞌlacꞌu̱n, reꞌ hin xnirak chiri̱j chi hat ritu̱t kAjabe̱s Kꞌatal Kꞌoric narasjic maj reꞌ nihaꞌlacꞌu̱n xipꞌut ti cho cꞌuyuꞌjic ruꞌum risukquil ricꞌux naxibiraj i cꞌalenenic xaꞌn wi̱n.

⁴⁵Jeꞌ aj reꞌ kꞌuruꞌ jeꞌ ricab naxsukbic ricꞌux nihaꞌlacꞌu̱n jeꞌ woꞌ reꞌ sukbok acꞌux i hat Mari̱ya ruꞌum chi xacoj wach chi narimanlajic wach awu̱cꞌ reꞌ xikꞌor aweh i Ajabe̱s Dios, nqui Elisawet reh.

⁴⁶Naxibiraj chi jeꞌ reꞌ i Mari̱ya jeꞌ wili xikꞌor:«Reꞌ hin nanikꞌorom chi reꞌ Dios kꞌe̱ꞌ nimal rajawric

⁴⁷eh kꞌe̱ꞌ woꞌ narisukbic nicꞌux ru̱cꞌ kAja̱w Dios reꞌ waj coꞌlonel.

⁴⁸Jeꞌ reꞌ nikꞌor maj to̱b ta maꞌ nim ta ti niwach, xirichih chi nanicamanic chiwach.Ruꞌum aj reh i nim laj cꞌaxo̱j reꞌreꞌ, yuꞌna johtok chi kawach reꞌ tinamit naquikꞌorom chi kꞌe̱ꞌ woꞌ chic ato̱b wi̱n,

⁴⁹maj naquilom chi reꞌ Dios reꞌ xi̱cꞌ na̱ rajawric kꞌe̱ꞌ nimal atoꞌbil xiban wu̱cꞌ.Jeꞌ woꞌ, naquikꞌorom chi reꞌ Dios kꞌe̱ꞌ lo̱kꞌ ribihnal.

⁵⁰Jeꞌ reꞌ narikꞌormojic chiri̱j maj reꞌreꞌ til riquetelej woꞌ quiwach take nquiyohbalej wach

⁵¹eh ru̱cꞌ rajawric yohbal wach camanic riban,jeꞌ ricab chi reꞌ take nquinimsaj qui̱b reꞌ nquikꞌor pan quicꞌux chi xi̱cꞌ na̱ cajawric, riban chi nsacharic quiwach,

⁵²on chi reꞌ take nimak wach quilokꞌil chi kꞌatal kꞌoric nmakꞌaric cajawriceh queh chic take maꞌxta cajawric nyeꞌeric,

⁵³on jeꞌ ricab chi reꞌ rinimal ricꞌaxbal i Dios maꞌ reꞌ ta chic queh take wilic chiꞌnchel queh nyeꞌeric, queh laꞌ chic take maꞌxta bih wilic queh nyeꞌeric.

⁵⁴Jeꞌ woꞌ ku̱cꞌ i hoj ra̱ꞌ riꞌsil cho maꞌ Israhel, reꞌ Dios xa naco̱j woꞌ ritoꞌbem chi nakacamanic chiwachmaj maꞌ jaꞌ iqꞌuinak ta pa ricꞌux rikꞌorbal chi nariquetelem kawach,

⁵⁵reꞌ rikꞌorom cho queh kama̱m katiꞌt chi jeꞌ wili: “Reꞌ hin xniquetelej wach i Awraham eh xa na woꞌ niquetelem quiwach take ra̱ꞌ riꞌsil, nqui rikꞌorom cho, nqui Mari̱ya.

⁵⁶Chiri̱j chic ruꞌ, reꞌ Mari̱ya xcahnic ru̱cꞌ Elisawet eh xib na poh xiban ar. Cu reꞌ aj chic ruꞌ, xsoljic woꞌ chic cho pa ripa̱t. Reꞌ riyeꞌeric rehtalil rasjic i Wa̱n aj Kahsem Haꞌ

⁵⁷Naxponic rikꞌijil chi narasjic rihaꞌlacꞌu̱n i Elisawet, jenaj woꞌ acꞌun xilow wach.

⁵⁸Reꞌ Elisawet chꞌi̱l i Sacari̱yas kꞌe̱ꞌ naxsukbic quicꞌux ru̱cꞌ quihaꞌlacꞌu̱n eh reꞌ take ricaꞌja̱ chꞌi̱l take paꞌ cho queh Sacari̱yas chꞌi̱l Elisawet kꞌe̱ꞌ woꞌ xsukbic quicꞌux naxquinaꞌbej chi reꞌ Dios kꞌe̱ꞌ rinimal cꞌaxo̱j xiban ru̱cꞌ Elisawet.

⁵⁹Chiri̱j reꞌ, xponic rikꞌijil chi naresmejic lok ritzꞌuhmal na̱ ricꞌachanbal i haꞌlacꞌun jeꞌ ricab ocronak take wi̱ꞌ ra̱ꞌ riꞌsil cho maꞌ Israhel chi ribanaric ru̱cꞌ quihaꞌlacꞌu̱n pa riwahxak kꞌi̱j, xicꞌulic lok take quicaꞌja̱ chꞌi̱l take paꞌ cho queh Sacari̱yas chꞌi̱l Elisawet eh nok wilque̱b chic ar, pꞌuht quikꞌoꞌrem cok i tꞌuch haꞌlacꞌun ru̱cꞌ ribihnal raja̱w. —Sacari̱yas, nqui ncaꞌn cok reh.

⁶⁰—Maꞌ jeꞌ ta reꞌ ribihnal. Wa̱n ruꞌ ribihnal, nqui Elisawet queh.

⁶¹—Nicꞌ wach nachiban chi jeꞌ reꞌ, maꞌ hab ta jenoꞌ wach Wa̱n ribihnal chaxilac tak? nqui take reh.

⁶²Jeꞌ reꞌ nok reꞌ take cꞌacharel reꞌreꞌ pꞌuht quibiram cok reh i Sacari̱yas ru̱cꞌ nah quikꞌab chaj bih naribihnem i racꞌu̱n.

⁶³Reꞌ Sacari̱yas xipahkaj queh jenaj tzꞌihmbal eh jeꞌ wili xitzꞌihmbaj chiwach: «Wa̱n ribihnal, nqui xitzꞌihmbaj. Naxquilow chi jeꞌ reꞌ ribihnal, chiꞌnchel cahtzic quiwach.

⁶⁴Xa chipam aj woꞌ ti juncꞌam reꞌ, xteh woꞌ chic rikꞌorbal i Sacari̱yas eh xa reꞌ woꞌ ti xteh rikꞌorbal, xilokꞌej ti johtok i Dios chi pe̱t.

⁶⁵Chiri̱j aj chic reꞌ naxisoljic woꞌ chic je pan quitinami̱t, reꞌ take wilque̱b ponok ru̱cꞌ i Sacari̱yas, xquesaj lok ribiral cu̱cꞌ quicaꞌja̱ chipam riyukꞌul i Jure̱ya chiri̱j i chaj bih xicꞌul i Sacari̱yas. Chiꞌnchel take caꞌja̱ xibirinic reh xsahchic quicꞌux

⁶⁶eh ruꞌum naxquirak chiri̱j chi reꞌ rihaꞌlacꞌu̱n i Sacari̱yas pan kꞌab i Ajabe̱s Dios wilic, jeꞌ wili pꞌuht quikꞌorom pan quicꞌux: «Chaj woꞌ jaric ricamaj naribanam i haꞌlacꞌun reꞌreꞌ? nqui take.

⁶⁷Jeꞌ reꞌ kꞌuruꞌ naxteh woꞌ rikꞌorbal i Sacari̱yas, jeꞌ wili i tioxonic xiban nok reꞌ Lokꞌ laj rUxlabal i Dios xichop na̱ ricꞌacharic:

⁶⁸«Hoj ra̱ꞌ riꞌsil cho maꞌ Israhel kayew tak rilokꞌil i kAja̱w Dios maj yuꞌna wilic woꞌ chic ku̱cꞌeh chi coꞌlbal keh hoj ritinami̱t,

⁶⁹cꞌahchiꞌ riyeb chi asjic jenaj Ajabe̱s yohbal wach rajawric.Reꞌ Ajabe̱s wili ra̱ꞌ riꞌsil cho i kꞌatal kꞌoric maꞌ Tawiy, reꞌreꞌ naricoꞌlonic keh chi quiwach take quixowonic kawach,

⁷⁰jeꞌ ricab xikꞌor cho i Dios chi naribanam. Reꞌ rikꞌorom cho Dios, reꞌ i quikꞌorom cho take lokꞌ laj raj kꞌorol cꞌuhbal najtir kꞌi̱j naxquikꞌor cho chi jeꞌ wili:

⁷¹“Reꞌ Dios naco̱j ricoꞌlem pan quikꞌab take kaj ixowonel reꞌ take xa chajaric nca̱j caꞌnam keh, nqui take cho.

⁷²«Reꞌ Dios kꞌuruꞌ cꞌahchiꞌ riyeb cho keh jenaj ajabe̱s yohbal wach rajawric reh chi narimanlajic wach i kꞌoric rikꞌorom cho queh kama̱m katiꞌt chi jeꞌ wili: “Reꞌ hin naniquetelem awach tak, nqui cho queh.«Jeꞌ woꞌ, reꞌ Dios cꞌahchiꞌ riyeb cho keh i Ajabe̱s reꞌreꞌ reh chi narimanlajic wach i lokꞌ laj tikꞌinic ribanam cho ru̱cꞌ Awraham, naxiyew cho rikꞌorbal chi jeꞌ wili: “Reꞌ hin maꞌ jaruj ta nariqꞌuic pa nicꞌux quicoꞌljic take awa̱ꞌ awiꞌsil chiwach caj ixowonel,

⁷³nqui cho queh naxiyew cho rikꞌorbal reh maꞌ Awraham.«Jeꞌ reꞌ ajic ru̱cꞌ riyeꞌeric cho kꞌab chi kana̱

⁷⁴chi kacoꞌljic chiwach take kaj ixowonel,reꞌ Dios cꞌahchiꞌ ribanam chi reꞌ hoj maꞌ eta chic kojyoꞌjic chi quiwach take kaj ixowonel chi rilokꞌonjic wach kAja̱w Dios.

⁷⁵Reꞌreꞌ cꞌahchiꞌ woꞌ ribanam chi echic nkalokꞌej wach chi junelic ru̱cꞌ coric laj noꞌjbal, nqui Sacari̱yas.

⁷⁶Chiri̱j reꞌ jeꞌ wili i kꞌoric xikꞌor reh tꞌuch racꞌu̱n:«Reꞌ chic i hat wacꞌu̱n, reh chi reꞌ ritinami̱t i Ajabe̱s Kꞌatal Kꞌoric asjic reh tikilque̱b ok chi ricꞌulic,reꞌ hat pe̱t na̱wojic ayeb rehtal queh ricꞌulic.Ruꞌum aj reꞌ, reꞌ Dios reꞌ kꞌe̱ꞌ nimal rajawric jeꞌ wili narikꞌorom chawi̱j: ‹Reꞌ wili aj kꞌorol niCꞌuhbal i hin, nqui narikꞌorom i Dios.

⁷⁷«Natiwihꞌok cu̱cꞌ take tinamit, reꞌ take reꞌ naquinaꞌbem woꞌ riwi̱ꞌ nicꞌ wach naquicoꞌljok chiwach caj ixowonel,maj reh chi equicoꞌljic chi wach caj ixowonel, reꞌ hat na̱kꞌorom queh chi riwi̱ꞌ chi queh chi enquicana̱ꞌ i cꞌahbilal reh chi reꞌ Dios naricuyum quimahc, nqui reh tꞌuch racꞌu̱n.

⁷⁸Chiri̱j reꞌreꞌ, jeꞌ woꞌ chic wili xikꞌor:«Yuꞌna kꞌuruꞌ hoj tak chiꞌnchel ra̱ꞌ riꞌsil cho maꞌ Israhel,kalokꞌej tak wach kaDios ru̱cꞌ rinimal ricꞌaxbal wilic cho chi kana̱.Reꞌreꞌ kꞌe̱ꞌ woꞌ chic kojricꞌax chi ru̱cꞌ ricꞌulic lok acꞌun wili,cꞌahchiꞌ woꞌ ritakꞌa̱b cho i kajcoꞌlonel reꞌ xa jeꞌ na ricab risakomil i sakꞌic, naricꞌulic woꞌ lok ku̱cꞌ chi kasakomjic.

⁷⁹Reꞌ kasakomjic naribanam xa jeꞌ ricab naquisakomjic take behel ruꞌum i kꞌi̱j naquicahnic pan kꞌekom akꞌab chi xa yoꞌjic chic wilque̱b chi equicansjic.Ru̱cꞌ ricꞌulic lok i kajcoꞌlonel wili kꞌuruꞌ, reꞌ Dios cꞌahchiꞌ ribanam chi nakawihꞌic woꞌ chic pan sukquil cꞌuxlisjeꞌ ricab ncꞌuluric cu̱cꞌ take behel chi nok pan sakom chic wilque̱b naquiꞌesmejic cho pan kꞌekom,nquitik juꞌ quibe̱h chi suk chic quicꞌux, nqui Sacari̱yas.

⁸⁰Reꞌ racꞌu̱n i Sacari̱yas kꞌuruꞌ, rehreh xipꞌut johtok qꞌuihic eh rehreh woꞌ xcꞌulic lok rinoꞌjbal. Nok yohbal chic wach rinoꞌjbal naxwinakbic, ar xwihꞌic pan tak yeꞌa̱b chik yu̱kꞌ reꞌ maꞌxta wi̱ꞌ patanel cu rehtal xponic kꞌi̱j chi xicꞌuhtaj ri̱b ru̱cꞌ ricamaj queh take rich ra̱ꞌ riꞌsil cho maꞌ Israhel.