Read Poqomchi' San Juan 10 Bible Online

San Juan 10 - Poqomchi' bible

San Juan 10

¹Chiri̱j chic ruꞌ, reꞌ Jesus xikꞌor woꞌ chic queh nahsil chi jeꞌ wili: «Chabiraj tak chi coric i ricorquil nanikꞌorom wili: Wilic riwi̱ꞌ reh chi narehtꞌaljic hab wach i til aj ilo̱l queh me̱ꞌ. Jeꞌ ricab wi jenoꞌ cꞌacharel maꞌ reꞌ ta chipam ritzꞌahpil i yeꞌa̱b cꞌolbal queh me̱ꞌ noquic, xa haj laꞌ chic risicꞌ cok rocbal, reꞌ cꞌacharel reꞌreꞌ xa aj lekꞌ me̱ꞌ nok wilic.

²Jeꞌ reꞌ nikꞌor maj reꞌ til ilo̱l queh me̱ꞌ xa reꞌ woꞌ i tzꞌahp risicꞌ reh chi naroquic chipam i yeꞌa̱b reꞌ wilque̱b wi̱ꞌ take me̱ꞌ.

³Jeꞌ aj reꞌ, nok ra̱j cok oquic nteheric cho reh i tzꞌahp ruꞌum i xa hab wach wilic cok chipam quiyeꞌa̱b take me̱ꞌ. Jeꞌ woꞌ chic nok raj resam lok take me̱ꞌ, reꞌ take me̱ꞌ quehtꞌalim pa̱m rikꞌorbal i caj ilo̱l wi til reꞌreꞌ nkꞌoꞌronic cok queh maj reꞌreꞌ ntakꞌanic chi quina̱ chi naquelic lok, narikꞌoꞌrej take ru̱cꞌ quibihnal chi quijuꞌjunal.

⁴Ruꞌum aj reꞌ nok reꞌ til caj ilo̱l resaj take lok eh no̱j chi pe̱t chi quiwach, reꞌ take me̱ꞌ nquitahkej je maj quehtꞌalim pa̱m rikꞌorbal i caj ilo̱l.

⁵Reꞌ cok haj wilic maꞌ reꞌ ta i caj ilo̱l nponic cu̱cꞌ maꞌ nquitahkej ta je, quiꞌelic laꞌ je chiwach ruꞌum chi maꞌ quehtꞌalim ta pa̱m rikꞌorbal i cꞌacharel reꞌ xa ritzꞌak ri̱b chi aj ilo̱l queh, nqui Jesus.

⁶Reꞌ Jesus xikꞌor reꞌreꞌ reh nak chi reꞌ take cow laj aj niminel reh Cꞌuhbal Yeꞌo̱j reh Moyses enquirak chiri̱j chi chiqui̱j ruꞌ xkꞌoric i Jesus naxikꞌor chi reꞌ take me̱ꞌ maꞌ nquehtꞌalij ta pa̱m quikꞌorbal take cꞌacharel maꞌ reꞌ ta aj ilo̱l take me̱ꞌ. Xa reꞌ laꞌ ruꞌ, reꞌ take reꞌ maꞌ xquirak ta chiri̱j chaj bih xa̱j rikꞌorom i Jesus ru̱cꞌ i kꞌoric reꞌreꞌ.

⁷Chiri̱j chic reꞌ, reꞌ Jesus xikꞌor woꞌ chic queh take winak reꞌreꞌ chi jeꞌ wili: «Chabiraj tak chi coric i ricorquil nanikꞌorom aweh tak wili: Jeꞌ ricab chi wilic jenaj tzꞌahp reꞌ quiꞌoquic wi̱ꞌ take me̱ꞌ chipam i yeꞌa̱b quicꞌoloric wi̱ꞌ, jeꞌ woꞌ reꞌ i hin ayuꞌ woꞌ wilqui̱n chi quitobjic take cꞌacharel reh chi equiꞌoquic eh equiwihꞌic pa rikꞌab i Dios.

⁸Nok jaꞌ quincꞌulic ta lok hin ayuꞌ wach acꞌal, qꞌuihal take xicꞌulic chi cꞌahchiꞌ quikꞌorom chi takꞌamaj take cho ruꞌum i Dios eh chi maꞌ je ta woꞌ reꞌ. Reꞌ take reꞌ xa je quicab aj lekꞌ me̱ꞌ nok wilque̱b. Ruꞌum aj reꞌ jeꞌ ricab xcꞌuluric cu̱cꞌ take me̱ꞌ reꞌreꞌ jeꞌ woꞌ reꞌ xcꞌuluric cu̱cꞌ take cꞌacharel maj jeꞌ ricab nok reꞌ take me̱ꞌ maꞌ nquitahkej ta take aj lekꞌ nanquibiraj chi maꞌ reꞌ ta rikꞌorbal i caj ilo̱l, reꞌ take cꞌacharel naxquibiraj woꞌ nak i cꞌuhbalanic ncaꞌn nahsil aj cꞌuhbalanel, maꞌ xquitahkej ta woꞌ take.

⁹«Reꞌ hin xnikꞌor chic lok, jeꞌ ricab chi wilic jenaj tzꞌahp reꞌ quiꞌoquic wi̱ꞌ take me̱ꞌ chipam i yeꞌa̱b quicꞌoloric wi̱ꞌ jeꞌ woꞌ reꞌ i hin wilqui̱n woꞌ ayuꞌ chi quitobjic take cꞌacharel reh chi equiꞌoquic eh equiwihꞌic pa rikꞌab i Dios. Xa hab wach kꞌuruꞌ wilic pa rikꞌab i Dios naricꞌacharic chi suk jeꞌ ricab nanwihꞌic chi suk jenoꞌ me̱ꞌ nanoquic cok chipam i yeꞌa̱b reꞌ yeꞌo̱j wi̱ꞌ riwarbal on jeꞌ ricab nanwihꞌic chi suk riwaꞌ riha̱ꞌ nanesmejic woꞌ chic lok chipam i yeꞌa̱b reꞌreꞌ reh chi naricꞌamaric je chipam i yeꞌa̱b reꞌ wilic wi̱ꞌ rex laj qꞌuim.

¹⁰Reꞌ hin maꞌ je ta nicab aj lekꞌ me̱ꞌ maj reꞌ aj lekꞌ nanponic reꞌ wilque̱b wi̱ꞌ take me̱ꞌ, xa ra̱j relkꞌam je take on xa ra̱j ricansam take. Raj nchel i hin xincꞌulic ayuꞌ wach acꞌal reh chi reꞌ quicꞌacharic take cꞌacharel holohic ok chic naribanam eh jeꞌ woꞌ chi wilic ok junelic quicꞌacharic.

¹¹Chi jeꞌ reꞌ nichakꞌlamil cu̱cꞌ take cꞌacharel, reꞌ hin jeꞌ nicab i cꞌacharel reꞌ nchaꞌjanic queh take me̱ꞌ chi coric maj reꞌ aj chaꞌjanel queh ruꞌ, riyew pan quimic ricꞌacharic chi ricoꞌljic take rime̱ꞌ wi wilque̱b take pan yohbal chiwach jenoꞌ joskꞌ laj qꞌuiche̱ꞌ tzꞌiꞌ aj cꞌuxul me̱ꞌ,

¹²ra̱j nchaꞌjanic queh me̱ꞌ chi xa ritojbal ricꞌax eh maꞌ reꞌ ta woꞌ reꞌ nehchenic queh, reꞌ cꞌacharel reꞌreꞌ narilow chi ncꞌulic lok i joskꞌ laj qꞌuiche̱ꞌ tzꞌiꞌ, pe̱t nelic je eh ricana̱ꞌ cahnok take me̱ꞌ pan kꞌab i chicop reꞌreꞌ. Chi jeꞌ reꞌ wilic take me̱ꞌ quicꞌuxuric ruꞌum eh reꞌ take juꞌjun chic chi me̱ꞌ quicahnic xa haj nquipuhcaj qui̱b.

¹³Jeꞌ aj reꞌ, reꞌ xa chucul aj ilo̱l queh take me̱ꞌ, nelic je ruꞌum chi xa tojo̱j chiri̱j i ricamaj eh jeꞌ woꞌ ruꞌum chi maꞌ reꞌ ta reh take me̱ꞌ, xa maꞌxta bih raj soꞌ queh to̱b ta paꞌ bih nquicꞌul take me̱ꞌ chiwach.

¹⁴Reꞌ hin nikꞌorom chic aweh tak chi jeꞌ nicab i cꞌacharel reꞌ nchaꞌjanic queh me̱ꞌ chi coric. Jeꞌ ricab nok reꞌ aj chaꞌjanel reꞌreꞌ rehtꞌalim quiwach take rime̱ꞌ chi coric jeꞌ woꞌ reꞌ hin wehtꞌalim woꞌ quinoꞌjbal take cꞌacharel quitahkanic wi̱n. Jeꞌ woꞌ chic jeꞌ ricab nok reꞌ aj chaꞌjanel reꞌreꞌ ehtꞌalamaj wach chi coric cuꞌum take rime̱ꞌ, jeꞌ woꞌ hin ehtꞌalamaj woꞌ ninoꞌjbal cuꞌum take cꞌacharel quitahkanic wi̱n.

¹⁵«Reꞌ niwi̱ꞌ i hin chꞌi̱l take cꞌacharel quitahkanic wi̱n jeꞌ woꞌ ricab niwi̱ꞌ i hin chꞌi̱l i wAja̱w maj reꞌreꞌ rehtꞌalim pa̱m ninoꞌjbal chi coric eh reꞌ hin wehtꞌalim woꞌ pa̱m rinoꞌjbal ruꞌ chi coric eh ruꞌum chi reꞌ ninoꞌjbal jeꞌ ricab i rinoꞌjbal i cꞌacharel nchaꞌjanic queh take me̱ꞌ chi coric, reꞌ hin niyew woꞌ nicꞌacharic pan quimic chi quicoꞌljic take cꞌacharel jeꞌ ricab riban aj chaꞌjem chi riyew ricꞌacharic chiqui̱j take rime̱ꞌ wi wilque̱b pan jenoꞌ yohbal.

¹⁶Reꞌ riqꞌuihal chi cꞌacharel naniyeb nicꞌacharic pan quimic chiqui̱j chi coꞌlbal queh, jaꞌ manlic ta ti quiwach cu̱cꞌ take cꞌahchiꞌ chic quinquitahkem wili, cu wilic laꞌ take toco̱m chic cꞌacharel cu ra̱j chi eniyukꞌej take chi naqui̱nquitahkem. Reꞌ take reꞌ naquicꞌamam woꞌ na̱ i yukꞌunic nanibanam queh eh chi jeꞌ reꞌ nok manlic chic wach i juntuhm chi cꞌacharel naniyeb nicꞌacharic chiqui̱j, maꞌ hab ta chic wach xa reꞌ laꞌ woꞌ hin equinwihꞌic chi Ajabe̱s chi quina̱ jeꞌ ricab ncꞌuluric nok jenaj woꞌ cꞌacharel nchaꞌjanic queh juntuhm ok chi moloj wach me̱ꞌ.

¹⁷«Reꞌ hin kꞌuruꞌ jeꞌ nicab i cꞌacharel reꞌ nchaꞌjanic queh take me̱ꞌ chi coric eh reꞌ wAja̱w Dios kꞌe̱ꞌ tiꞌ quiricꞌraj maj reꞌ hin reh chi nanicꞌacharic woꞌ chic, pe̱t naniyeb nicꞌacharic pan quimic

¹⁸ruꞌum nok jeꞌ reꞌ xitakꞌa̱ꞌ ribanaric wi̱n i wAja̱w Dios. Chi jeꞌ reꞌ i takꞌanic xiyew cho wi̱n i wAja̱w Dios, xa wi̱n woꞌ hin xyeꞌeric ajawric chi enwihꞌic pa nikꞌab i quimic chꞌi̱l i uctic nanibanam reh chi nancꞌacharic woꞌ chic. Ruꞌum aj reꞌ nikꞌor aweh tak chi reꞌ hin naniquimic ruꞌum nwa̱j chi jeꞌ reꞌreꞌ enicꞌul maj maꞌ hab ta wach wilic rajawric chi nicansjic je xa ruꞌum ra̱j ribanam wi̱n, nqui Jesus queh.

¹⁹Xa reꞌ woꞌ xquibiraj take kꞌoric reꞌreꞌ, reꞌ take cow laj aj niminel reh Cꞌuhbal Yeꞌo̱j reh Moyses xiban woꞌ chic rehreh wach quicapew-bal.

²⁰Ruꞌum reꞌ wilic queh xquikꞌor chi jeꞌ wili chiri̱j i Jesus: «Reꞌ winak reꞌreꞌ maꞌ tob laj uxlabal wilic ru̱cꞌ. Chaj waꞌric nananimej tak maj maꞌ naꞌlic ta reh riban? nqui take.

²¹Jeꞌ reꞌ ruꞌ xquikꞌor xa reꞌ laꞌ wilic woꞌ take jeꞌ wili nquikꞌor: «Jenoꞌ winak wilic maꞌ tob laj uxlabal ru̱cꞌ maꞌ eta rikꞌor holohic laj kꞌoric jeꞌ ricab rikꞌor i Jesus eh jeꞌ woꞌ chic, jenoꞌ winak wilic maꞌ tob laj uxlabal ru̱cꞌ maꞌ eta riban chi eriteh nakꞌ wach jenoꞌ sotꞌ, nqui take. Reꞌ Jesus chꞌi̱l i Ajabe̱s xa jenaj quiwi̱ꞌ

²²Pan jenaj chic kꞌi̱j chipam rikꞌijil cꞌuxic nok ar Jerusalen cꞌahchiꞌ ricꞌsjic i ninkꞌi̱j sulu̱j cho wi̱ꞌ i Lokꞌ laj Pa̱t reꞌ nlokꞌonjic wi̱ꞌ wach i Dios

²³reꞌ Jesus xo̱j wihꞌok chi chi̱ꞌ jenaj rimujil pa̱t reꞌ bihnimaj chi Salomon.

²⁴Ar ajic reꞌ take nahsil chi kana̱ hoj ra̱ꞌ riꞌsil cho maꞌ Israhel naxquilow chi jeꞌ reꞌ, xquimol qui̱b ru̱cꞌ i Jesus eh jeꞌ wili xquikꞌor reh: «Chaj waꞌric i hat maꞌ nasakomej ta wach keh hab wach i hat? Wi reꞌ hat i Pahbamaj chi Kꞌatal Kꞌoric kꞌoro̱j cho ribiral chi naricꞌulic lok, chakꞌor woꞌ keh i coric, nqui take reh.

²⁵Chalic Jesus jeꞌ wili xicꞌuꞌlej take wi̱ꞌ: «Ru̱cꞌ i cꞌuhbalanic niban reꞌ hin nikꞌor chic aweh tak chi reꞌ hin, hin i Kꞌatal Kꞌoric Pahbamaj cho ruꞌum i Dios eh reꞌ hat-tak maꞌ nacoj ta tak wach chi jeꞌ reꞌ. Jeꞌ woꞌ chic, ru̱cꞌ take lokꞌ laj nawa̱l niban ru̱cꞌ i wajawric yeꞌo̱j wi̱n ruꞌum i wAja̱w Dios, ncꞌutunic woꞌ lok hab wach i hin

²⁶xa reꞌ laꞌ chic hat-tak maꞌ nachꞌica̱ꞌ ta acꞌux tak chiwi̱j. Jeꞌ reꞌ naꞌn tak ruꞌum chi reꞌ hat-tak maꞌ reꞌ ta hat-tak waj tahkanel reꞌ nikꞌor chi nime̱ꞌ take. Wi ta nak hat-tak waj tahkanel, ncꞌuluric nak awu̱cꞌ tak jeꞌ ricab i wili reꞌ rikꞌor i jalwach kꞌoric nikꞌorom chic cho aweh tak:

²⁷Chi jeꞌ ricab reꞌ aj ilo̱l me̱ꞌ rehtꞌalim quiwach take rime̱ꞌ reꞌ hin wehtꞌal woꞌ quiwach take til nquichꞌica̱ꞌ quicꞌux chiwi̱j. Jeꞌ woꞌ, jeꞌ ricab chi reꞌ take me̱ꞌ quehtꞌal pa̱m rikꞌorbal i aj chaꞌjanel queh eh nquitahkej, jeꞌ woꞌ reꞌ take waj tahkanel i hin, quinquitahkej ruꞌum chi reꞌ take reꞌ quehtꞌal woꞌ hab wach i hin til chi coric.

²⁸Reꞌ aj take nquichꞌica̱ꞌ quicꞌux chiwi̱j, niyew chic queh chi naquicꞌacharic chi junelic eh ruꞌum reꞌ, naquiquimok je maꞌ eta quicahnic chi camnak take chi junpech maj pa nikꞌab cꞌololque̱b. Nok chi jeꞌ reꞌ wilque̱b wu̱cꞌ, maꞌ hab ta wach jenoꞌ wilic rajawric chi eta nak rimakꞌ take pa nikꞌab.

²⁹Jeꞌ ricab riwi̱ꞌ i wihꞌic ncaꞌn chi niwach i hin jeꞌ woꞌ reꞌ riwi̱ꞌ i wihꞌic ncaꞌn chiwach i wAja̱w chi pa rikꞌab ruꞌ maꞌ hab ta wach wilic rajawric chi erimakꞌ take. Jeꞌ reꞌ ajic reꞌ wAja̱w Dios reꞌ wilic woꞌ rajawric chi nah chiꞌnchel reꞌ aj woꞌ reꞌ xkꞌahsanic pa nikꞌab take cꞌacharel reꞌreꞌ reh chi xnicꞌol take wu̱cꞌ.

³⁰Jeꞌ reꞌ kꞌuruꞌ reꞌ riwi̱ꞌ i wihꞌic ncaꞌn take cꞌacharel reꞌreꞌ, reꞌ aj reꞌ ncꞌuhtunic wi̱ꞌ chi reꞌ hin chꞌi̱l i wAja̱w xa jenaj kawi̱ꞌ wichꞌi̱l, nqui Jesus.

³¹Naxquibiraj chi jeꞌ reꞌ take nahsil chi kaxilac hoj ra̱ꞌ riꞌsil cho maꞌ Israhel, xo̱j woꞌ chic quimolom take abaj chi naquicansam nak i Jesus jeꞌ ricab xcaꞌn nak cho reh pan pe̱t,

³²xa reꞌ laꞌ Jesus jeꞌ wili xikꞌor queh: «Reꞌ hin qꞌuih take holohic laj bano̱j xniban ruꞌum rajawric i wAja̱w, xa reꞌ laꞌ haj ta woꞌ nchel wilic queh take holohic laj bano̱j reꞌreꞌ maꞌ nponic ta chawach tak eh ruꞌum reꞌ nawa̱j quinacansam tak chi abaj? nqui Jesus queh.

³³Reꞌ take nahsil chi kaxilac i hoj ra̱ꞌ riꞌsil cho maꞌ Israhel jeꞌ wili xquikꞌor reh: «Reꞌ hoj naca̱t kayeb chi abaj maꞌ ruꞌum ta take holohic laj bano̱j i naꞌn, naca̱t laꞌ kayeb chi abaj ruꞌum chi reꞌ hat napahba̱ꞌ awi̱b chi hat Dios eh xa hab wach winak riban jeꞌ ricab naꞌn i hat riyakꞌabej pa ro̱k i Dios, nqui take reh.

³⁴Jeꞌ reꞌ kꞌuruꞌ reꞌ Jesus jeꞌ wili xikꞌor queh: «Chipam i cꞌuhbal nchopbic ana̱ hat-tak, rikꞌor chi wilic take kꞌoric rikꞌorom cho i Dios. Reꞌ take kꞌoric reꞌreꞌ jeꞌ wili nquikꞌor: “Reꞌ hin, hin i Dios eh ruꞌum chi reꞌ hat-tak wilca̱t tak chi wacꞌu̱n wixkꞌu̱n, nikꞌor woꞌ chi chiꞌnchel hat-tak jeꞌ woꞌ tak acab i hin, nqui take kꞌoric wilic chipam i cꞌuhbal reꞌreꞌ.

³⁵«Wi pa riCꞌuhbal aj i Dios wilic take kꞌoric reꞌreꞌ, kehtꞌalim chi maꞌ riyew ta ri̱b chi narijalaric wach i ricorquil laj kꞌoric reꞌreꞌ. Ruꞌum aj reꞌ nikꞌor aweh tak wili: ‹Wi pa riCꞌuhbal i Dios rikꞌor chi naxkꞌoric cho cu̱cꞌ take kich ra̱ꞌ riꞌsil cho maꞌ Israhel ar Sinayih, xikꞌor queh chi reꞌ take reꞌ jeꞌ woꞌ quicab i Dios,

³⁶maꞌ eta riban chi enakꞌor tak wi̱n chi cꞌahchiꞌ niyakꞌabem pan wo̱k i Dios xa ruꞌum chi reꞌ hin ru̱cꞌ i nipahbabjic wi̱b niban chi til hin rAcꞌu̱n i Dios nipahba̱ꞌ wi̱b jeꞌ ricab ripahba̱bjic ri̱b riban i Dios. Reꞌ riwi̱ꞌ chi jeꞌ reꞌ niban reꞌ woꞌ i wili: Chi reꞌ hin til hin richiho̱j cho chi xintakꞌabjic cho ayuꞌ wach acꞌal.

³⁷Jeꞌ reꞌ kꞌuruꞌ wi reꞌ hin maꞌ cꞌahchiꞌ ta nibanam haj wilic take bano̱j reꞌ ncꞌuhtunic lok wi̱ꞌ chi reꞌ woꞌ reꞌ take bano̱j riban i wAja̱w Dios, ricꞌul nak chi maꞌ eta nacoj tak wach i haj wilic nikꞌor aweh tak.

³⁸Raj wili reꞌ woꞌ take bano̱j ra̱j ruꞌ cꞌahchiꞌ nibanam. Ruꞌum reꞌ chacoj tak wach i nawilow tak ru̱cꞌ take bano̱j niban to̱b woꞌ ma̱coj tak wach haj wilic take nikꞌor aweh tak. Jeꞌ reꞌ nikꞌor maj reꞌ hin niban take bano̱j ra̱j i wAja̱w reh chi ru̱cꞌ reꞌreꞌ enanaꞌbej tak eh enacoj tak wach chi pan kacabchelal nkaꞌn take reꞌreꞌ. Ru̱cꞌ reꞌreꞌ ncꞌuhtunic wach chi reꞌ wAja̱w Dios wilic wu̱cꞌ hin eh reꞌ hin wilqui̱n woꞌ ru̱cꞌ ruꞌ, nqui Jesus queh nahsil reꞌreꞌ.

³⁹Ruꞌum take kꞌoric xikꞌor i Jesus, reꞌ take nahsil reꞌreꞌ xa xca̱j nak chic quichopom xa reꞌ laꞌ maꞌ xcaꞌn ta canar ruꞌum xelic je chi quiwach.

⁴⁰Chiri̱j chic reꞌ, reꞌ Jesus kꞌahxic woꞌ chic je chi juntar haꞌ Jortan reꞌ xiban cho wi̱ꞌ take pe̱t kahsanic haꞌ i Wa̱n. Naxcahnic aj ar i Jesus,

⁴¹qꞌuihal take tinamit xiponic ru̱cꞌ chi rilmijic eh jeꞌ wili nquikꞌor: «Reꞌ Wa̱n aj kahsem haꞌ maꞌxta jenoꞌ lokꞌ laj nawa̱l nim wach xicꞌuhtaj chi kaxilac, xa reꞌ laꞌ nicꞌ nimal take kꞌoric xikꞌor chiri̱j i winak wili, til coric xikꞌor, nqui take.

⁴²Chi jeꞌ reꞌ qꞌuihal take tinamit xquinimej i Jesus chipam i yeꞌa̱b reꞌreꞌ.