Read Poqomchi' San Juan 11 Bible Online

San Juan 11 - Poqomchi' bible

San Juan 11

¹Chipam chic jenaj tinamit Weta̱nya ribihnal, reꞌ quitinamital i Mari̱ya chꞌi̱l i Ma̱rta wilic jenaj yowa̱b La̱saro ribihnal quixuba̱l woꞌ i Mari̱ya chꞌi̱l i Ma̱rta.

²Reꞌ Mari̱ya, rana̱b i yowa̱b reꞌreꞌ, reꞌ aj woꞌ reꞌ naribuchꞌbic take reh ro̱k i Lokꞌ laj Ajabe̱s Jesus ru̱cꞌ ncꞌohnic laj ikꞌo̱m pan jenaj kꞌi̱j eh chi ru̱cꞌ woꞌ i rismal na̱ narichiksam woꞌ chic take.

³Jeꞌ reꞌ ajic reꞌ take quib chi anab-be̱s reꞌreꞌ xquitakꞌa̱ꞌ rikꞌormojic reh Jesus chi jeꞌ wili: «K-Aja̱w Jesus chacuy, tichalok ti yuꞌna, reꞌ kaxubal reꞌ kꞌe̱ꞌ tiꞌ nawicꞌraj xchop reh yaꞌbilal, nqui xquitakꞌa̱ꞌ je rikꞌormojic reh.

⁴Naxponic i kꞌoric reꞌreꞌ ru̱cꞌ i Jesus, jeꞌ wili xikꞌor: «Reꞌ yaꞌbilal nbanic reh La̱saro maꞌ reꞌ ta cansbal reh chi junpech, naricamanic laꞌ chi cꞌuhtbal reh rinimal wach rajawric i Dios jeꞌ woꞌ chi reꞌ hin reꞌ rAcꞌu̱n i Dios encꞌutunic chi wilic woꞌ wajawric, nqui Jesus.

⁵Jeꞌ reꞌ kꞌuruꞌ to̱b ta reꞌ Jesus kꞌe̱ꞌ tiꞌ ricꞌraj i Ma̱rta chꞌi̱l i Mari̱ya chꞌi̱l woꞌ i La̱saro,

⁶cu xcahnic woꞌ chic quib kꞌi̱j chipam i yeꞌa̱b wilic wi̱ꞌ naxibiraj chi yowa̱b i La̱saro.

⁷Cu chiri̱j aj chic reꞌ, reꞌ Jesus jeꞌ wili xikꞌor keh hoj raj tahkanel: «Yuꞌna kojsoljok woꞌ tak chic je ar chipam riyukꞌul i Jure̱ya, nqui xikꞌor keh.

⁸Reꞌ hoj jeꞌ wili xkakꞌor reh: «Ajabe̱s aj tijinel keh, reꞌ take nahsil chi kaxilac hoj ra̱ꞌ riꞌsil cho maꞌ Israhel jaꞌ naht ta woꞌ xca̱j nak ca̱t quicansam chi abaj eh yuꞌna nawa̱j woꞌ chic je soljic ar? kojqui reh.

⁹Chalic i Jesus jeꞌ wili kacꞌuꞌljic xiban chi riyeꞌeric jenaj rehtalil keh chi jaꞌ nponic ta rikꞌijil riquimic: «Reꞌ hoj kehtꞌalim chi reꞌ kꞌi̱j wilic cablaj o̱ra risakomal eh chiwach take o̱ra reꞌreꞌ kojbehic chi coric. Ruꞌum aj reꞌ xa hab wach nbehic pan kꞌi̱j maꞌ eta ritohxaj nah ro̱k maj rilow i ribe̱h chi coric ruꞌum wilic cho risakomal i kꞌi̱j china̱.

¹⁰Raj i pan kꞌekom naribe̱h reꞌreꞌ ritohxaj nah ro̱k ruꞌum maꞌxta cho risakomal i kꞌi̱j china̱, nqui xikꞌor.

¹¹Nok rikꞌorom chic take kꞌoric reꞌreꞌ, reꞌ Jesus xikꞌor woꞌ chic keh chi jeꞌ wili: «Reꞌ kich kꞌorom La̱saro, xoquic chi wiric xa reꞌ laꞌ yuꞌna nawojic nicꞌaꞌsam cho wach, nqui keh.

¹²Ar ajic jeꞌ wili xkakꞌor i hoj raj tahkanel: «Ha̱w, wi laꞌ xa wiric xkajic wi̱ꞌ ra̱j rikꞌorom chi naricowjic woꞌ chic, kojqui reh.

¹³Naxkꞌoric i Jesus chi jeꞌ reꞌ, chiri̱j poꞌ nchel riquimic i La̱saro xkꞌoric eh pan kacꞌux i hoj xa chiri̱j laꞌ woꞌ wiric cꞌahchiꞌ rikꞌoric.

¹⁴Chiri̱j aj reꞌ xisakomej wach keh chi coric i kꞌoric reꞌreꞌ eh jeꞌ wili xikꞌor keh: «Reꞌ La̱saro xquimic chic

¹⁵eh kꞌe̱ꞌ nsukbic nicꞌux chi maꞌ wilqui̱n ta ponok ar nok jaꞌ nquimic ta je. Jeꞌ reꞌ nikꞌor aweh tak maj ruꞌum reh i chaj bih na̱wilom tak wu̱cꞌ, kꞌe̱ꞌ naricowjic acꞌux tak chi ninimjic. Jeꞌ reꞌ kꞌuruꞌ tak-tak, kilow tak cho, nqui keh Jesus.

¹⁶Xa reꞌ woꞌ xicohlaj kꞌoric reꞌreꞌ, jenaj keh hoj raj tahkanel Ma̱x ribihnal, reꞌ Lach woꞌ cojo̱j chi ricab bihnal, jeꞌ wili xikꞌor keh: «Tak-tak chiri̱j i Jesus. Wi xquicansaj woꞌ cho ruꞌ kojquimok woꞌ hoj chiri̱j, nqui xikꞌor keh.

¹⁷Jeꞌ reꞌ ajic reꞌ Jesus xichop je ribe̱h ar Weta̱nya kichꞌi̱l woꞌ i hoj raj tahkanel xa reꞌ laꞌ naxojponic nah mukꞌunbal, quejeb laꞌ chic kꞌi̱j muhkunak je i La̱saro.

¹⁸Reꞌ tinamit Weta̱nya maꞌ naht ta wilic je ru̱cꞌ tinamit Jerusalen, xa mahnicꞌ woꞌ na chic maꞌxta jenoꞌ le̱wa.

¹⁹Ruꞌum aj reꞌ, wilic take kich ra̱ꞌ riꞌsil cho maꞌ Israhel aj Jerusalen xiponic ar Weta̱nya chi riyeꞌeric ricowil quicꞌux i Mari̱ya chꞌi̱l i Ma̱rta ruꞌum riquimic je i quixuba̱l.

²⁰Ar chic ponok Weta̱nya, naxibiraj i Ma̱rta chi reꞌ Jesus cꞌahchiꞌ rojic cꞌolok ar xchalic chi ricꞌuluric xa reꞌ laꞌ Mari̱ya xa xcahnic woꞌ cho pan pa̱t.

²¹Jeꞌ reꞌ ajic, naxponic i Ma̱rta ru̱cꞌ Jesus jeꞌ wili xikꞌor reh: «Ajabe̱s Jesus, reꞌ nixubal xquimic chic. Wi ta nak wilca̱t ayuꞌ maꞌ xquimic ta nak, cu cꞌachlic nak cho yuꞌna.

²²Xa reꞌ laꞌ reꞌ hin wehtꞌalim chi reꞌ Dios riyew cho aweh chiꞌnchel nicꞌ paꞌ nimal napahkaj johtok reh, nqui Ma̱rta.

²³Naxibiraj i Jesus chi jeꞌ reꞌ, jeꞌ wili xikꞌor reh Ma̱rta: «Reꞌ axubal La̱saro, naructic woꞌ chic cho, nqui Jesus.

²⁴Reꞌ Ma̱rta jeꞌ woꞌ chic wili xikꞌor: «Coric Ha̱w, reꞌ nixubal naructic woꞌ chic cho maj wilic jenaj kꞌi̱j pan cohlsbal wach acꞌal wili nok chiꞌnchel take camnak nacuctic woꞌ chic cho, nqui reh.

²⁵Reꞌ Jesus jeꞌ wili xikꞌor reh: «Reꞌ hin i quinyeꞌbic quicꞌacharic chiꞌnchel cꞌacharel eh reꞌ woꞌ hin quinucsunic cho queh camnak reh chi naquicꞌacharic woꞌ chic. Ruꞌum aj reꞌ hab wach n-niminic wi̱n to̱b ta quimok je xa na ricꞌacharic woꞌ chic ricaꞌpech.

²⁶Jeꞌ woꞌ reꞌ ncꞌuluric ru̱cꞌ i cꞌacharel reꞌ yeꞌo̱j chic reh chi encꞌacharic chi junelic ruꞌum chi xirinimej chic, reꞌ cꞌacharel reꞌreꞌ maꞌ xa quimic naribanam je chi junpech naquimok je. Nacoj na wach wili i hat Ma̱rta? nqui Jesus reh.

²⁷Reꞌ Ma̱rta jeꞌ wili xikꞌor: «Ho̱ꞌ Ha̱w, nicoj wach chiꞌnchel xakꞌor maj wehtꞌalim chi reꞌ hat i Pahbamaj chi Kꞌatal Kꞌoric takꞌamaj cho ayuꞌ wach acꞌal eh hat woꞌ rAcꞌu̱n, nqui reh.

²⁸Chiri̱j chic reꞌ, reꞌ Ma̱rta nok rikꞌorom chic reꞌreꞌ reh Jesus, xchalic rikꞌoꞌrej i Mari̱ya reꞌ richa̱kꞌ eh jeꞌ wili xikꞌor reh pan kꞌu̱n: «Reꞌ aj Tijinel Jesus wilic chic cho wuluꞌ cꞌahchiꞌca̱t rikꞌoꞌrem cho, nqui reh.

²⁹Xa reꞌ woꞌ xibiraj chi jeꞌ reꞌ i Mari̱ya xa chi yuꞌna ti xuctic cho eh xchalic reꞌ wilic wi̱ꞌ i Jesus

³⁰chipam i yeꞌa̱b reꞌ xrakmajic wi̱ꞌ ruꞌum i Ma̱rta, ruꞌum nok jaꞌ noquic ta nak cok chipam i tinamit reꞌreꞌ. Reꞌ ribiral ricꞌaꞌchsjic woꞌ chic i La̱saro xiban i Jesus

³¹Naxuctic aj cho rajim i Mari̱ya pa ripa̱t, reꞌ take kich ra̱ꞌ riꞌsil cho maꞌ Israhel wilque̱b ponok ru̱cꞌ chi riyeꞌeric ricowil ricꞌux, naxquilow chi jeꞌ reꞌ xiꞌuctic woꞌ chic cho cajim chiri̱j i Mari̱ya maj xquicapaj chi xo̱j riban rokꞌim ar reꞌ wilic wi̱ꞌ rimukꞌunbal rixuba̱l.

³²Naxo̱j cꞌolok i Mari̱ya reꞌ wilic wi̱ꞌ i Jesus xixucꞌa̱ꞌ jok ri̱b juꞌ ro̱k eh jeꞌ wili xikꞌor reh chi okꞌic riban: «Ajabe̱s Jesus, reꞌ nixubal xquimic chic je. Wi ta nak wilca̱t ayuꞌ maꞌ xquimic ta nak, cu cꞌachlic nak yuꞌna, nqui xikꞌor reh.

³³Ar ajic naxilow chi reꞌ Mari̱ya okꞌic riban eh jeꞌ woꞌ take tinamit xitahkanic je reh chi riyeꞌeric nak ricowil ricꞌux, reꞌ Jesus xchalic woꞌ riyotꞌquil i ra̱mna eh tiꞌbic pa ricꞌux chiqui̱j.

³⁴Ruꞌum aj reꞌ xibiraj queh chi jeꞌ wili: «Haj xmuhkic i La̱saro? nqui queh. Reꞌ take reꞌ jeꞌ wili xquikꞌor reh: «Tak chiki̱j Ha̱w, enkacꞌuhtaj aweh haj xmuhkic, nqui take reh.

³⁵Ar ajic reꞌ Jesus xiban rokꞌim ruꞌum xtiꞌbic woꞌ ricꞌux chiri̱j riquimic i La̱saro.

³⁶Jeꞌ reꞌ ajic reꞌ take kich ra̱ꞌ riꞌsil cho maꞌ Israhel naxquilow chi xokꞌic i Jesus jeꞌ wili xquikꞌor: «Chawilow tak, reꞌ Jesus xokꞌic chiri̱j i La̱saro. Til cꞌulwach chi kꞌe̱ꞌ tiꞌ ricꞌraj, nqui take.

³⁷To̱b ta woꞌ wilic jeꞌ reꞌ xquikꞌor, wilic woꞌ take jeꞌ wili xquikꞌor chi quiwach: «Reꞌ Jesus wili wi xicꞌuhtaj chi wilic rajawric naxiteh i nakꞌ wach i jenaj sotꞌ, maꞌ ta woꞌ nak xiban chi xesaj lok riyaꞌbilal i La̱saro reh chi maꞌ xquimic ta nak? nqui take.

³⁸Chiri̱j wili ar chic chi chi̱ꞌ rimukꞌunbal i La̱saro, reꞌ Jesus xchalic riman ritiꞌquil pa ricꞌux. Ar aj ruꞌ ruꞌum chi reꞌ mukꞌunbal reꞌreꞌ pan abaj tikꞌimaj cok eh chi jenaj maꞌ laj abaj ntzꞌapbic wi̱ꞌ chi̱ꞌ,

³⁹reꞌ Jesus jeꞌ wili xikꞌor: «Chawesaj tak lok i maꞌ laj abaj tzꞌapbal chi̱ꞌ i mukꞌunbal reꞌreꞌ, nqui. Reꞌ Ma̱rta reꞌ rana̱b i La̱saro jeꞌ wili xikꞌor reh: «Ajabe̱s Jesus, reꞌ nixubal quejeb chic kꞌi̱j muhkunak cho, yuꞌna chuh chic cho ritiꞌjolal reꞌ, nqui reh.

⁴⁰Ar aj ruꞌ reꞌ Jesus jeꞌ wili xikꞌor reh Ma̱rta: «Reꞌ hin xnikꞌor chic aweh wi reꞌ hat enachꞌica̱ꞌ acꞌux chiwi̱j enawilow nicꞌ wach riban rajawric i Dios, nqui reh.

⁴¹Jeꞌ reꞌ kꞌuruꞌ xquesaj woꞌ lok abaj tzꞌapbal chi̱ꞌ i mukꞌunbal reꞌreꞌ eh chiri̱j chic ruꞌ reꞌ Jesus xilbic johtok pan taxa̱j, jeꞌ wili xikꞌor: «Ajabe̱s Dios, reꞌ hin kꞌe̱ꞌ nitioxej aweh ruꞌum nok xabiraj chic cho nipahkanic niban chiri̱j i La̱saro.

⁴²Ha̱w, reꞌ hin xa wehtꞌalim woꞌ chi xa quinabiraj woꞌ cho xa reꞌ laꞌ cuꞌum take tinamit wilque̱b ayuꞌ xnikꞌor i kꞌoric reꞌreꞌ reh chi enquirak chiri̱j chi reꞌ hat xat-takꞌanic cho wi̱n china̱ acꞌal wili, nqui xikꞌor.

⁴³Nok rikꞌorom chic kꞌoric reꞌreꞌ, reꞌ Jesus jeꞌ wili kꞌoric xiban chi cow: «La̱saro, telok cho wach sakom, nqui xikꞌor.

⁴⁴Xa ru̱cꞌ kꞌoric reꞌreꞌ, reꞌ La̱saro reꞌ camnak nak chic, xelic cho wach sakom chi botomaj ri̱j pan tzꞌih eh chi poylic woꞌ i na̱. Ruꞌum aj reꞌ, reꞌ Jesus jeꞌ wili xikꞌor: «Chatoꞌbej tak chi richejeric lok i tzꞌih botomaj wi̱ꞌ ri̱j reh chi suk chic behic eriban, nqui Jesus.

⁴⁵Chi jeꞌ reꞌ kꞌuruꞌ qꞌuihal take kich ra̱ꞌ riꞌsil cho maꞌ Israhel jeꞌ ru̱cꞌ wilque̱b ponok ru̱cꞌ i Mari̱ya chi riyeꞌeric ricowil ricꞌux, xquinimej woꞌ i Jesus ru̱cꞌ xquilow chi xcꞌuluric ru̱cꞌ i La̱saro,

⁴⁶xa reꞌ laꞌ wilic woꞌ take toco̱m chic xiꞌo̱j cu̱cꞌ take cow laj aj niminel reh Cꞌuhbal Yeꞌo̱j reh Moyses eh xponic quikꞌor chaj bih xiban i Jesus ru̱cꞌ i La̱saro.

⁴⁷Ruꞌum reꞌreꞌ, reꞌ take cow laj aj niminel reh Cꞌuhbal Yeꞌo̱j reh Moyses chꞌi̱l take cꞌamol quibe̱h take aj kꞌahsem si̱ chiwach i Dios xquimol qui̱b chꞌi̱l take quicomonil toco̱m chic cꞌacharel wilic woꞌ cajawric chi kana̱ i hoj ra̱ꞌ riꞌsil cho maꞌ Israhel eh naxquimol qui̱b jeꞌ wili xquikꞌor chi quiwach: «Chaj woꞌ bih nakaꞌnam chi ripitiric i winak reꞌreꞌ? maj yohbal wach take lokꞌ laj nawa̱l ricꞌuhtaj chi narinimjic cuꞌum take tinamit.

⁴⁸Wi xkacana̱ꞌ chi naritikim juꞌ ribanaric take lokꞌ laj nawa̱l, chiꞌnchel tinamit nacoquic chi rinimjic eh chi jeꞌ reꞌ kꞌi̱j woꞌ enca̱j ricojoric chi kꞌatal kꞌoric chi quina̱. Wi xquibiraj reꞌreꞌ take nahsil aj Ro̱ma jeꞌ ru̱cꞌ wilic cajawric chi kana̱, enchalic quicꞌa̱ ku̱cꞌ eh chi jeꞌ reꞌ maꞌ xa reꞌ ta i lokꞌ laj Pa̱t reꞌ nkalokꞌej wi̱ꞌ wach i kaDios encꞌulic quisach wach jeꞌ laꞌ woꞌ i hoj jeꞌ ru̱cꞌ kojcꞌacharic chipam i tinamit wili ekojchal quicansaj, nqui take.

⁴⁹Chi quixilac take reꞌ, xkꞌoric cho jenaj winak Caypas ribihnal reꞌ nahsil aj cꞌamol quibe̱h take aj kꞌahsem si̱ chiwach cho take kꞌi̱j reꞌreꞌ eh jeꞌ wili xikꞌor queh: «Reꞌ hat-tak maꞌxta soꞌ bih nacapaj tak

⁵⁰eh ruꞌum reꞌ maꞌ nacoj ta tak rehtal i wili: Sakbih chi keh hoj chi xa reꞌ wach i jenaj chi cꞌacharel reꞌreꞌ enquimic je, chiwach chi ekojquimic je chiꞌnchel i hoj cꞌacharel jeꞌ ru̱cꞌ kojcꞌacharic chipam i tinamit wili, nqui xikꞌor queh.

⁵¹Reꞌ kꞌoric xikꞌor i Caypas maꞌ xa ta xchalic pa ricꞌux, xikꞌor laꞌ reꞌreꞌ ruꞌum xyeꞌeric rikꞌorbal ruꞌum i Dios maj reꞌ Caypas wilic nak chi aj nahsil cꞌamol quibe̱h take aj kꞌahsem si̱ chiwach take kꞌi̱j reꞌreꞌ. Jeꞌ aj reꞌ rikꞌorbal xyeꞌeric chi rikꞌormojic chi reꞌ Jesus nariquimic chiki̱j chiꞌnchel i hoj ra̱ꞌ riꞌsil cho maꞌ Israhel.

⁵²Maꞌ xa reꞌ ta chiki̱j i hoj ra̱ꞌ riꞌsil cho maꞌ Israhel nariquimic, jeꞌ laꞌ woꞌ chiqui̱j take toco̱m chic cꞌacharel quipuhcam qui̱b xa haj yu̱kꞌ qꞌuixca̱b reh chi nok cahnanak chic take chi xa jenaj kawi̱ꞌ kichꞌi̱l i hoj ra̱ꞌ riꞌsil cho maꞌ Israhel, equiꞌoquic woꞌ chi racꞌu̱n rixkꞌu̱n i Dios chic take.

⁵³Jeꞌ reꞌ ajic xa chiwach woꞌ cho i kꞌi̱j reꞌreꞌ, reꞌ chiꞌnchel take nahsil reꞌreꞌ xquimol wach quinoꞌjbal chi naquicansam i Jesus.

⁵⁴Ruꞌum reꞌreꞌ, reꞌ Jesus maꞌ xicꞌuhtaj ta chic ri̱b chi quiwach take winak reꞌreꞌ, xelic laꞌ je chipam riyukꞌul i Jure̱ya eh ar chic xo̱j chipam jenaj tinamit Ewrayin ribihnal reꞌ wilic je maꞌ naht ta ru̱cꞌ jenaj chik yu̱kꞌ. Ar chic chipam i tinamit reꞌreꞌ, nok reꞌ hoj raj tahkanel wilco̱j chic ru̱cꞌ Jesus xojcahnic woꞌ ar.

⁵⁵Nok wilco̱j chic chipam i tinamit reꞌreꞌ, pꞌuht quiponic ar Jerusalen yohbal wach take kich ra̱ꞌ riꞌsil cho maꞌ Israhel jeꞌ ru̱cꞌ quicꞌacharic pan tak tinamit wilque̱b chipam i yukꞌul reꞌ wilic wi̱ꞌ i tinamit Jerusalen. Jeꞌ reꞌ xcaꞌn ruꞌum reh ninkꞌi̱j Pa̱scuwa ribihnal. To̱b ta jaꞌ rirak ta nak rikꞌijil chi naripꞌuhtic i ninkꞌi̱j reꞌreꞌ, reꞌ riqꞌuihal take cꞌacharel reꞌreꞌ cu nok soꞌ xiꞌo̱j cꞌolok chipam i ninkꞌi̱j reh chi naquinimem i noꞌjbal tzꞌihmbimaj chipam i Cꞌuhbal Yeꞌo̱j reh Moyses chiri̱j ritzꞌajaric qui̱b.

⁵⁶Reꞌ take cꞌacharel reꞌreꞌ, pꞌuht quisiqꞌuim i Jesus eh ar chi chi̱ꞌ i Lokꞌ laj Pa̱t reꞌ nlokꞌonjic wi̱ꞌ wach i Dios nquibiraj chi quiwach chi jeꞌ wili: «Chaj bih nakꞌor hat-tak? Eta woꞌ ti nchalic i Jesus ayuꞌ? nqui take chi quiwach xa pan kꞌu̱n.

⁵⁷Jeꞌ reꞌ nkabiraj chikawach maj reꞌ take cꞌamol quibe̱h take aj kꞌahsem si̱ chꞌi̱l take cow laj aj niminel reh Cꞌuhbal Yeꞌo̱j reh Moyses xquesaj lok rikꞌormojic chi xa hab wach cꞌacharel rehtꞌalim haj wilic i Jesus chiyew rikꞌormojic, reh chi reꞌ take reꞌ enquitakꞌa̱ꞌ je richoporic.