Read Poqomchi' San Juan 19 Bible Online

San Juan 19 - Poqomchi' bible

San Juan 19

¹Chiri̱j aj chic i kꞌoric xiban cu̱cꞌ take xcꞌambic cho reh Jesus chiwach, reꞌ Po̱nsyo Pila̱to xitakꞌa̱ꞌ chi naricꞌamaric je Jesus pan che̱ꞌ eh nok wilic chic ar, xitakꞌa̱ꞌ woꞌ rikꞌormojic chi naritzꞌuhumjic.

²Jeꞌ reꞌ kꞌuruꞌ reꞌ take sol chaꞌjem reh Jesus naxquitzꞌuhumej jeꞌ ricab takꞌamaj rikꞌormojic queh ruꞌum i Po̱nsyo Pila̱to, xquipachꞌej eh xquicotej wach jenaj ku̱l qꞌui̱x reh chi naquicojom wach na̱ i Jesus. Chiri̱j chic reꞌ xquicoj chiri̱j i Jesus jenaj cak moyic tzꞌih jeꞌ ricab ncojoric reh jenaj kꞌatal kꞌoric eh jeꞌ reꞌ xcaꞌn chi xa seꞌlbal reh.

³Ruꞌum aj reꞌ, reꞌ take sol reꞌreꞌ xa ta woꞌ jarpech xquikꞌorlom reh Jesus take kꞌoric wili: «Cꞌale̱n, hat quikꞌatal kꞌoric take ra̱ꞌ riꞌsil cho maꞌ Israhel! nqui xa nqui chic take cok reh. Chiri̱j chic rikꞌormojic reh chi jeꞌ reꞌ xa ta woꞌ jarpech xquisecꞌlom cok pan nakꞌ wach.

⁴Nok bano̱j chic reh Jesus chi jeꞌ reꞌ, reꞌ Po̱nsyo Pila̱to xelic woꞌ chic lok chipam i pa̱t xponic wihꞌok cho wi̱ꞌ eh jeꞌ wili xikꞌor queh take xicꞌambic je reh Jesus: «Chacoj tak rehtal i nanikꞌorom wili: Reꞌ hin xniyew chic rikꞌormojic queh take niso̱l chi naquicꞌamam cho Jesus ayuꞌ lok ri̱j pa̱t wili reh chi na̱wilom tak nicꞌ wach xbanaric reh. Jeꞌ woꞌ chic, nwa̱j chi chanaꞌbej tak chi reꞌreꞌ maꞌxta jenoꞌ mahc xnirak chiri̱j eh ruꞌum reꞌ nawokꞌtam je, nqui queh.

⁵Ar ajic naxelic cho Jesus chi cojo̱j chic jenaj cotomaj ku̱l qꞌui̱x wach na̱ eh jeꞌ woꞌ chi cojo̱j chic jenaj cak moyic laj tzꞌih chiri̱j jeꞌ ricab ncojoric reh jenoꞌ kꞌatal kꞌoric, reꞌ Po̱nsyo Pila̱to jeꞌ wili xikꞌor queh: «Chi wi̱n hin, xa coric laj cꞌacharel woꞌ i winak wili, nqui queh.

⁶Reꞌ take cꞌamol quibe̱h take aj kꞌahsem si̱ chꞌi̱l woꞌ take aj chaꞌjanel cꞌamoj take je cuꞌum take cꞌamol be̱h reꞌreꞌ naxquilow chi reꞌ Po̱nsyo Pila̱to ra̱j nak rokꞌtam je i Jesus, xquiqꞌuer quichi̱ꞌ chi jeꞌ wili: «Reꞌ Jesus reꞌreꞌ chacansaj eh til chacansaj wach curu̱s! nqui take. Reꞌ Po̱nsyo Pila̱to jeꞌ wili quicꞌuꞌljic xiban: «Reꞌ hin maꞌxta nirak jenoꞌ mahc quimic ri̱j chiri̱j cꞌacharel wili. Reꞌ cok ruꞌ, wi ricansjic nawa̱j tak hat-tak, chacꞌam tak je eh reꞌ ok hat-tak tiyeꞌbok tak reh wach curu̱s, nqui queh.

⁷Reꞌ take ra̱ꞌ riꞌsil cho maꞌ Israhel jeꞌ wili ricꞌuꞌljic xcaꞌn: «Reꞌ cꞌuhbal nchopbic kana̱ i hoj ra̱ꞌ riꞌsil cho maꞌ Israhel riyew rehtal keh haj wilic riwi̱ꞌ chi encansjic jenoꞌ cꞌacharel. Jeꞌ ricab rikꞌor i cꞌuhbal reꞌreꞌ, reꞌ Jesus wili curman chi nariquimic ruꞌum nok xikꞌor chi reꞌreꞌ rAcꞌu̱n i Dios, nqui take.

⁸Naxibiraj i Po̱nsyo Pila̱to chi jeꞌ reꞌ kꞌe̱ꞌ naxoquic cho riyoꞌjic.

⁹Ruꞌum aj reꞌ xoquic woꞌ chic cok chipam i pa̱t cꞌahchiꞌ wi̱ꞌ chi wihꞌic eh jeꞌ wili xikꞌor reh Jesus: «Haj woꞌ tichalic i hat kꞌuruꞌ? nqui reh. Reꞌ Jesus xa ta nak xikꞌor jenoꞌ kꞌoric.

¹⁰Ruꞌum aj reꞌ, reꞌ Po̱nsyo Pila̱to jeꞌ wili xikꞌor reh Jesus: «Maꞌ ticahnic chi me̱m quinacꞌuꞌlej cho. Reꞌ hat awehtꞌalim chi coric chi wilic wajawric chi enitakꞌa̱ꞌ acansjic wach curu̱s eh wilic woꞌ wajawric chi etiwokꞌtaj je, nqui xikꞌor reh.

¹¹Reꞌ Jesus jeꞌ wili kꞌoric xiban: «Reꞌ hat wilic awajawric chi nina̱ ruꞌum nok reꞌ Dios xyeꞌbic aweh awajawric reꞌreꞌ. Ruꞌum aj reꞌ nikꞌor aweh wili: Reꞌ rimahc i cꞌacharel xkꞌahsanic wi̱n chi xincꞌulic tiklijok pan akꞌab, kꞌe̱ꞌ woꞌ chic xiqꞌuic na̱ cꞌahbilal wach mahc xiban chiwach i mahc enaꞌn i hat, nqui reh.

¹²Ribiram chic reꞌreꞌ, reꞌ Po̱nsyo Pila̱to pꞌuht risiqꞌuim ri̱j nicꞌ wach nachokꞌtaj je i Jesus, xa reꞌ laꞌ reꞌ take ra̱ꞌ riꞌsil cho maꞌ Israhel xa cow chic nquiqꞌuer woꞌ chic quichi̱ꞌ chi jeꞌ wili cꞌahchiꞌ quikꞌorom: «Reꞌ hat til awehtꞌalim i wili chi coric: Hab wach reꞌ rikꞌor ri̱b chi kꞌatal kꞌoric, ru̱cꞌ reꞌreꞌ cꞌahchiꞌ rikꞌorom lok chi maꞌ ra̱j ta wach i hab wach wilic chi kꞌatal kꞌoric. Jeꞌ reꞌ kꞌuruꞌ wi reꞌ hat nawokꞌtam je i Jesus wili, ra̱j rikꞌorom chi cꞌahchiꞌ acꞌuhtam lok chi reꞌ kꞌatal kꞌoric aj Ro̱ma maꞌ reꞌ ta chic i kꞌatal kꞌoric, nqui take.

¹³Nok reꞌ Po̱nsyo Pila̱to xibiraj chi jeꞌ reꞌ, xelic je chipam i pa̱t reꞌreꞌ, xicꞌam lok i Jesus chiri̱j eh xtzꞌuhkic chipam i yeꞌa̱b banbal kꞌatoj kꞌoric reꞌ jeꞌ wili ribihnal: “Wach Acꞌal Tzꞌak Tikꞌimaj ru̱cꞌ Abaj” eh “Cawa̱ta” ribihnal pan kꞌoric hewre̱yo reꞌ kakꞌorbal i hoj ra̱ꞌ riꞌsil cho maꞌ Israhel.

¹⁴Ar ajic reꞌ Po̱nsyo Pila̱to jeꞌ wili xikꞌor queh take aj nahsil chi quina̱ take ra̱ꞌ riꞌsil cho maꞌ Israhel quicꞌacharic pa riyukꞌul Jure̱ya: «Ayuꞌ chawach tak yuꞌna wilic akꞌatal kꞌoric tak, nqui queh. Reꞌ take kꞌoric reꞌreꞌ xkꞌormojic nok jeꞌ nak chic cablaj o̱ra reh kꞌi̱j reꞌ nquitikꞌa̱ꞌ wi̱ꞌ qui̱b chi ricꞌsjic i ninkꞌi̱j Pa̱scuwa.

¹⁵Reꞌ aj take cꞌacharel reꞌreꞌ jeꞌ wili xquikꞌor reh Po̱nsyo Pila̱to chi xa cow chic cꞌahchiꞌ quiqꞌuerem quichi̱ꞌ: «Reꞌ winak wili chacansaj eh til woꞌ chacansaj ar wach curu̱s! Chayew kꞌab kꞌuruꞌ chi encansjic! nqui take reh. Reꞌ Po̱nsyo Pila̱to xikꞌor queh chi jeꞌ wili: «Reꞌ hat-tak maꞌ nawa̱j ta tak chi enitakꞌa̱ꞌ ricansjic akꞌatal kꞌoric tak wili wach curu̱s, majeꞌ? nqui queh. Reꞌ take cꞌamol quibe̱h take aj kꞌahsem si̱ chiwach i Dios jeꞌ wili ricꞌuꞌljic xcaꞌn: «Reꞌ hoj maꞌxta chic jenoꞌ toco̱m kꞌatal kꞌoric chi kana̱, xa reꞌ laꞌ wach i kꞌatal kꞌoric aj Ro̱ma, nqui take.

¹⁶Naxibiraj reꞌreꞌ i Po̱nsyo Pila̱to xicꞌuꞌlej na̱ i pahkanic xcaꞌn reh chi nariyeꞌeric i Jesus wach curu̱s eh chi jeꞌ reꞌ xikꞌahsaj woꞌ i Jesus pan quikꞌab take riso̱l. Jeꞌ reꞌ nok reꞌ take reꞌ xquicꞌam je i Jesus reh chi nacaꞌnam tiꞌcꞌaxic reh reꞌ kꞌorel paꞌ bih pahkamaj china̱. Reꞌ Jesus xitehlaj je ro̱k ricuru̱s

¹⁷Naxesmejic je Jesus chiwach i Po̱nsyo Pila̱to, reꞌreꞌ ritehlam chic je ro̱k ricuru̱s naxelic je ar reh chi narojic cansjok china̱ i yu̱kꞌ “Ribakil Na̱ Camnak” ribihnal eh pan kꞌoric hewre̱yo reꞌ jenaj queh kakꞌorbal i hoj ra̱ꞌ riꞌsil cho maꞌ Israhel, “Co̱lcota” nkabihnej.

¹⁸Chipam i yeꞌa̱b reꞌreꞌ xcojoric wach curu̱s i Jesus, pan yejalamaj cuꞌum i quib chic chi cꞌacharel xicojoric woꞌ wach curu̱s. Jenaj xcanabjic je pa risecꞌa̱j eh jenaj chic pa ritzꞌe̱t.

¹⁹Chiwach woꞌ i curu̱s wilic wi̱ꞌ i Jesus, reꞌ Po̱nsyo Pila̱to xitakꞌa̱ꞌ ricojoric jenaj rehtalil ehtꞌalbal reh hab wach i winak wilic wach curu̱s eh chaj bih aj chiri̱j naxjapꞌaric chiwach. Reꞌ rehtalil reꞌreꞌ jeꞌ wili rikꞌor chiwach: “Reꞌ Jesus wili, reꞌ i ribihnej chi aj Nasaret eh quikꞌatal kꞌoric woꞌ take ra̱ꞌ riꞌsil cho maꞌ Israhel, nqui rikꞌor.

²⁰Qꞌuih aj ruꞌ take ra̱ꞌ riꞌsil cho maꞌ Israhel quicꞌacharic pan tinamit Jerusalen, xiꞌilbic wach chaj bih rikꞌor i rehtalil reꞌreꞌ ruꞌum nok reꞌ yeꞌa̱b xcojoric wi̱ꞌ i Jesus wach curu̱s, xa maꞌ naht ta ru̱cꞌ Jerusalen wilic. Reꞌ aj reꞌ rehtalil reꞌreꞌ tzꞌihmbimaj pan kꞌoric hewre̱yo reꞌ jenaj queh kakꞌorbal i hoj ra̱ꞌ riꞌsil cho maꞌ Israhel, tzꞌihmbimaj woꞌ pan quikꞌorbal take aj criye̱co eh tzꞌihmbimaj woꞌ pan quikꞌorbal take aj Ro̱ma.

²¹Naxquilow aj chaj bih rikꞌor i rehtalil reꞌreꞌ, reꞌ take cꞌamol quibe̱h take aj kꞌahsem si̱ chiwach i Dios xquikꞌor reh Po̱nsyo Pila̱to chi jeꞌ wili: «Tare̱t chi xatakꞌa̱ꞌ ritzꞌihmjic i ehtalil reꞌreꞌ chiri̱j i Jesus xa reꞌ laꞌ, reꞌ nak til xicꞌul chi xatzꞌihmbaj, reꞌ chi reꞌ Jesus xikꞌor ri̱b chi reꞌreꞌ i kakꞌatal kꞌoric i hoj ra̱ꞌ riꞌsil cho maꞌ Israhel, nqui take reh.

²²Raj laꞌ Po̱nsyo Pila̱to jeꞌ wili xikꞌor: «Reꞌ hin maꞌ eta chic nijal ritzꞌihmjic i takꞌamaj chic ritzꞌihmjic wuꞌum, reꞌ xnitzꞌihmbaj, tzꞌihmbimaj chic lok ta chic bih ra̱j, nqui queh. Reꞌ take sol quisaquej ri̱j risoꞌ i Jesus

²³Nok reꞌ take sol quiyeb chic cho wach curu̱s i Jesus, xquiwek i risoꞌ, cajchꞌak xquesaj reh chi juꞌjun chꞌak naricahnic queh take sol wilque̱b ar. Jeꞌ aj reꞌ xcaꞌn reh risoꞌ xa reꞌ laꞌ maꞌ jeꞌ ta reꞌ xcaꞌn reh i roxlo̱cꞌ risoꞌ reꞌ maꞌxta pꞌojbal reh maj xa junpaꞌlic riquemjic bano̱j. Naxquesaj aj lok i tzꞌih reꞌreꞌ,

²⁴reꞌ take sol xquikꞌor chi quiwach chi jeꞌ wili: «Maꞌ nkachꞌak tak, kayew laꞌ tak pan sa̱c eh chi jeꞌ reꞌ enkilow hab wach enehchenic reh, nqui take. Jeꞌ reꞌ kꞌuruꞌ ru̱cꞌ richꞌakaric risoꞌ i Jesus xcaꞌn take sol reꞌreꞌ, xo̱j elok wach i tzꞌihmbimaj cho chi jeꞌ wili chipam i Lokꞌ laj Hu̱j tzꞌihmbimaj wi̱ꞌ riCꞌuhbal i Dios:“Reꞌ take reꞌ xquipuhcaj chi quiwach i nisoꞌeh xquisaquej woꞌ ri̱j, nqui rikꞌor. Reꞌ rilmijic ritu̱t i Jesus xicana̱ꞌ pan kꞌab i raj tahkanel reꞌ kꞌe̱ꞌ tiꞌ ricꞌraj

²⁵Nok wilic chic wach curu̱s i Jesus, ar woꞌ wilque̱b ponok take ixok wili: Reꞌ ritu̱t i Jesus, reꞌ richa̱kꞌ ritu̱t i Jesus, reꞌ Mari̱ya reꞌ rehqꞌue̱n i Quelyo̱pas eh chꞌi̱l woꞌ i Mari̱ya aj Majta̱la.

²⁶Nok reꞌ Jesus xilow je wach i ritu̱t chꞌi̱l i hin raj tahkanel reꞌ kꞌe̱ꞌ tiꞌ quiricꞌraj jeꞌ wili xikꞌor reh ritu̱t reh chi maꞌ eta ntiꞌbic riman ricꞌux: «Mah, yuꞌna reꞌ chic wili i naricahnic cahnok chi nijelow-bal i hin awacꞌu̱n, nqui reh ritu̱t.

²⁷Chiri̱j reꞌreꞌ jeꞌ wili xikꞌor wi̱n hin raj tahkanel reꞌ kꞌe̱ꞌ tiꞌ quiricꞌraj: «Acꞌun, reꞌ nitu̱t wili hat chic na̱wilbic reh jeꞌ ricab woꞌ rilmijic atu̱t naꞌn, nqui xikꞌor wi̱n. Ruꞌum aj reꞌ, reꞌ hin raj tahkanel reꞌ Wa̱n nibihnal, xa chiwach aj woꞌ ti juncꞌam reꞌreꞌ xcahnic pa nikꞌab rilmijic i Mari̱ya jeꞌ ricab chi nitu̱t woꞌ chi niwach. Reꞌ quimic xicꞌul i Jesus

²⁸Chiri̱j chic wili reꞌ Jesus xehtꞌalij chi xinimej chic lok chi manlic i nicꞌ paꞌ nimal tikꞌimaj cho wach ruꞌum i Dios chi naribanaric reh. Ruꞌum aj reꞌ, nok wilic wach curu̱s i Jesus, xmanlajic woꞌ wach i jenaj chic kꞌoric kꞌoro̱j cho chiri̱j najtir kꞌi̱j chipam i Lokꞌ laj Hu̱j tzꞌihmbimaj wi̱ꞌ riCꞌuhbal i Dios. Reꞌ kꞌoric reꞌreꞌ xmanlajic wach naxikꞌor chi jeꞌ wili: «Chiki̱j nichi̱ꞌ, nqui xikꞌor.

²⁹Ruꞌum reh kꞌoric xikꞌor i Jesus, reꞌ take sol naxquilow chi maꞌ naht ta cok cu̱cꞌ wilic jenaj culc nujunak chi chꞌamsamaj laj ri̱s u̱wa, xquimuhba̱ꞌ cho pan haꞌ reꞌreꞌ jenaj potzpotz laj mi̱x, xquicoj chi juꞌ jenaj kꞌab che̱ꞌ jeꞌ caxlan a̱j “iso̱po” ribihnal eh xquiyew cok i mi̱x reꞌreꞌ pan chi̱ꞌ i Jesus.

³⁰Naxitzꞌubej cok i chꞌamsamaj laj ri̱s u̱wa, reꞌ Jesus jeꞌ wili xikꞌor: «Ayuꞌ aj xponic wach chiꞌnchel, nqui xikꞌor. Chiri̱j chic reꞌ, reꞌ Jesus xiquipa̱ꞌ cho na̱ eh xelic ti ruxla̱b. Reꞌ Jesus maꞌ xtokoric ta ritu̱k

³¹Chipam i kꞌi̱j reꞌreꞌ nok reꞌ take ra̱ꞌ riꞌsil cho maꞌ Israhel nquitikꞌa̱ꞌ qui̱b chi ricꞌsjic i ninkꞌi̱j Pa̱scuwa, reꞌ take ra̱ꞌ riꞌsil cho maꞌ Israhel reꞌ xicꞌambic je reh Jesus chiwach i Po̱nsyo Pila̱to xquipahkaj woꞌ reh chi naritakꞌa̱b take riso̱l chi ritokoric cabchel quitu̱k take wilque̱b wach curu̱s, reꞌ Jesus chꞌi̱l take quib chic chi cꞌacharel. Jeꞌ reꞌ xquipahkaj reh, reh chi jeꞌ reꞌ equiquimic chi junpech chiwach i kꞌi̱j reꞌreꞌ. Jeꞌ woꞌ chic, ruꞌum chi naripꞌutum chic tok sawatuꞌ kꞌi̱j reꞌ kꞌe̱ꞌ lo̱kꞌ chikawach i hoj ra̱ꞌ riꞌsil cho maꞌ Israhel, xquipahkaj woꞌ reh Po̱nsyo Pila̱to chi naritakꞌa̱b resmejic ritiꞌjolal i Jesus chꞌi̱l take quib chic cꞌacharel reꞌreꞌ, reh chi maꞌ eta quicahnic wach curu̱s chiwach i hiꞌlbal kꞌi̱j chi keh hoj ra̱ꞌ riꞌsil cho maꞌ Israhel.

³²Jeꞌ reꞌ ajic, reꞌ take sol takꞌamaj take je chi rinimjic i pahkanic bano̱j reh Po̱nsyo Pila̱to, xiꞌo̱j eh xquitok ritu̱k i jenaj queh quib cꞌacharel cꞌahchiꞌ quicansjic wach curu̱s. Chiri̱j chic ruꞌ xcaꞌn woꞌ chic reh i jenaj chic,

³³reꞌ cok ruꞌ naxquijil cok qui̱b ru̱cꞌ i Jesus, maꞌ xquitok ta chic take ritu̱k ruꞌum nok xquilow chi camnak chic.

³⁴Jeꞌ aj reꞌ maꞌ xquitok ta chic ritu̱k i Jesus xa reꞌ laꞌ jenaj queh take sol xihop cok pa rijojol i Jesus ru̱cꞌ jenaj kꞌas juꞌ chꞌihchꞌ eh naxiban chi jeꞌ reꞌ, chi juncꞌam ti xelic cho riquiqꞌue̱l chꞌi̱l i rihaꞌquil.

³⁵Reꞌ xcꞌuluric wili ru̱cꞌ i Jesus til xwilow i hin cꞌacharel reꞌ cꞌahchiꞌ nikꞌoric take kꞌoric wili eh ruꞌum reꞌ wehtꞌalim ricorquil ribiral i cꞌahchiꞌ nikꞌorom. Reꞌ cꞌahchiꞌ nikꞌorom i hin, til aj woꞌ coric eh cꞌahchiꞌ nikꞌorom ribiral wili reh chi enachꞌica̱ꞌ acꞌux tak chiri̱j i Jesus,

³⁶maj reꞌ xicꞌul i Jesus wili, xcꞌuluric lok reh chi xo̱j manlajok wach i tzꞌihmbimaj chipam i Lokꞌ laj Hu̱j tzꞌihmbimaj wi̱ꞌ riCꞌuhbal i Dios. Chipam i Lokꞌ laj Hu̱j reꞌreꞌ jeꞌ wili rikꞌor:“Maꞌ jenoꞌ ribakil reh ritiꞌjolal naritokic, nqui rikꞌor.

³⁷Jeꞌ woꞌ chipam i Lokꞌ laj Hu̱j reꞌreꞌ rikꞌor woꞌ chi jeꞌ wili:“Pan jenaj kꞌi̱j narilmijic wach i cꞌacharel hopo̱j ritiꞌjolal chi kꞌas juꞌ chꞌihchꞌ, nqui woꞌ rikꞌor. Reꞌ Chep aj Arimate̱ya chꞌi̱l i Nicore̱mo xquimukꞌa̱ꞌ i Jesus

³⁸Chiri̱j chic ricansjic i Jesus, jenaj ajabe̱s aj Arimate̱ya, Chep ribihnal, xponic ru̱cꞌ Po̱nsyo Pila̱to eh xipahkaj chi nariyeꞌeric kꞌab reh chi naricꞌamam je ritiꞌjolal i Jesus reh chi narimukꞌa̱b. Reꞌ Chep wili aj tahkanel woꞌ reh Jesus xa reꞌ laꞌ maꞌ rikꞌor ta lok chi jeꞌ reꞌ riban ruꞌum nyoꞌjic chi reꞌ take aj cꞌamol quibe̱h take rich ra̱ꞌ riꞌsil cho maꞌ Israhel enquirak chiri̱j chi jeꞌ reꞌ riban. Jeꞌ aj reꞌ naxyeꞌeric kꞌab reh ruꞌum i Po̱nsyo Pila̱to, xo̱j reꞌ xcansjic wi̱ꞌ i Jesus eh xicꞌam je take raj toꞌo̱l chi rimukꞌunjic.

³⁹Nok cꞌahchiꞌ chic ritikꞌinjic ritiꞌjolal i Jesus reh chi narimukꞌunjic, xponic woꞌ ar jenaj ajabe̱s wilic ribiral chi xa pan chakꞌab xchalic junpech chi rikꞌoꞌrjic i Jesus. Reꞌ ajabe̱s reꞌreꞌ Nicore̱mo ribihnal, xicꞌam cho jenaj ncꞌohnic laj ikꞌo̱m buchꞌbal reꞌ jeꞌ na hoꞌlajuj cajwinak (75) li̱wra rahlil. Reꞌ ikꞌo̱m reꞌreꞌ tikꞌimaj ru̱cꞌ take xak che̱ꞌ “Mi̱ra” ribihnal chꞌi̱l woꞌ ri̱j i che̱ꞌ “A̱lo” ribihnal. Reꞌ aj reꞌ ikꞌo̱m xicꞌam cho Nicore̱mo reh chi naricojom china̱ ritiꞌjolal i Jesus.

⁴⁰Nok tikꞌimaj ok chic ritiꞌjolal i Jesus, reꞌ take ra̱ꞌ riꞌsil cho maꞌ Israhel reꞌ wilque̱b ponok chi mukꞌunic, xquicoj ncꞌohnic laj ikꞌo̱m chiwach take tzꞌih naquibotem wi̱ꞌ ritiꞌjolal i Jesus eh chiri̱j chic ruꞌ xquibotej ritiꞌjolal chipam i tzꞌih cojo̱j wi̱ꞌ reꞌ ncꞌohnic laj ikꞌo̱m. Jeꞌ aj reꞌ riwi̱ꞌ xcaꞌn reh ritiꞌjolal i Jesus ruꞌum nok jeꞌ reꞌ hoj ocronak wi̱ꞌ i hoj ra̱ꞌ riꞌsil cho maꞌ Israhel nankamukꞌa̱ꞌ je jenoꞌ camnak. Reꞌ Jesus xmukꞌunjic pan jenaj acꞌ laj mukꞌunbal

⁴¹Chipam i yeꞌa̱b reꞌ xquimic wi̱ꞌ i Jesus naxquiyew wach curu̱s, wilic jenaj yeꞌa̱b tic pa̱m eh chipam i yeꞌa̱b reꞌreꞌ wilic jenaj mukꞌunbal maꞌ jaꞌ cojo̱j ta, reꞌ tikꞌimaj ar pan jenaj maꞌ laj abaj.

⁴²Ar aj chipam i mukꞌunbal reꞌreꞌ, xquiyew i ritiꞌjolal i Jesus ruꞌum nok chipam roquic i kꞌi̱j reꞌreꞌ maꞌ manlic ta nak chic chi xquitikꞌa̱ꞌ jenoꞌ toco̱m chic mukꞌunbal reh Jesus maj chipam i roquic kꞌi̱j reꞌreꞌ, riꞌorahil chic chi nquitikꞌa̱ꞌ qui̱b take tinamit chi naquihiꞌlic reh hiꞌlbal kꞌi̱j naripꞌuhtic johtok chiwach i roquic kꞌi̱j reꞌreꞌ. Jeꞌ reꞌ kꞌuruꞌ ruꞌum cajwam wach rimukꞌunjic i Jesus, reꞌ take reꞌ xquimukꞌa̱ꞌ chipam i acꞌ laj mukꞌunbal reꞌreꞌ ruꞌum chi xa maꞌ naht ta ti wilic je ar reꞌ xyeꞌjic wi̱ꞌ i Jesus wach curu̱s.