Read Poqomchi' San Juan 20 Bible Online

San Juan 20 - Poqomchi' bible

San Juan 20

¹Naxsakꞌic lok reh Tomincuꞌ kꞌi̱j reꞌ pe̱t kꞌi̱j reh xama̱na, cu wahkꞌek woꞌ ti, reꞌ Mari̱ya aj Majta̱la chꞌi̱l take toco̱m ixok xiꞌo̱j chipam i yeꞌa̱b reꞌ xmuhkic wi̱ꞌ i Jesus eh naxiponic ar xquilow chi cꞌuyuꞌsumaj chic lok i maꞌ laj abaj ntzꞌapbic chi̱ꞌ i mukꞌunbal reꞌreꞌ.

²Chi jeꞌ reꞌ xiꞌo̱j cajim ku̱cꞌ i hoj quib chi aj tahkanel, reꞌ Simon reꞌ ribihnej woꞌ chi Luch, chꞌi̱l i hin reꞌ kꞌe̱ꞌ tiꞌ quiricꞌraj i Jesus eh jeꞌ wili xikꞌor keh: «Reꞌ kAja̱w Jesus xesmejic je pan mukꞌunbal, maꞌ wilic ta chic ar. Reꞌ hoj xojponic cho ilo̱l pa rimukꞌunbal eh maꞌ xkilow ta chic wach ritiꞌjolal ribakil. Maꞌ kehtꞌalim ta haj xyeꞌeric je, nqui xikꞌor.

³Xa chiwach woꞌ ti juncꞌam reꞌreꞌ, reꞌ maꞌ Luch chꞌi̱l i hin reꞌ kich aj tahkanel ki̱b, xoj-o̱j ilo̱l rimukꞌunbal.

⁴Naxoj-elic je i hoj raj tahkanel reꞌreꞌ, xoj-o̱j chi xa kajim chic kacabchel xa reꞌ laꞌ pe̱t xinponic pan mukꞌunbal ruꞌum chi kꞌe̱ꞌ cow quinajamanic chiwach i wich aj tahkanel maꞌ Luch.

⁵To̱b ta woꞌ pe̱t xinponic i hin, maꞌ xinoquic ta ti cok pan mukꞌunbal xa pan ocbal laꞌ ti xincahnic eh cu ar xwilow cok chi xa reꞌ chic wach take tzꞌih botomaj nak wi̱ꞌ ritiꞌjolal ribakil i Jesus wilque̱b ar.

⁶Chiri̱j i wili xponic i Simon reꞌ ribihnej woꞌ chi Luch. Reꞌ cok reꞌ xoquic cok pan mukꞌunbal eh ar chic chipam cok, xilow chi xa chic reꞌ take tzꞌih botomaj nak wi̱ꞌ i ritiꞌjolal ribakil i Jesus wilque̱b ar.

⁷Jeꞌ woꞌ chipam i yeꞌa̱b xyohquic wi̱ꞌ i Jesus xilow chi reꞌ tzꞌih reꞌ xcamanic chi botbal na̱ i Jesus pa reh chic pꞌuslic lok wach eh jeꞌ woꞌ reꞌ i tzꞌih xbotjic wi̱ꞌ ritiꞌjolal ribakil.

⁸Chiri̱j chic reꞌ, reꞌ hin rich tahkanel i maꞌ Luch, reꞌ pe̱t xinponic chi chi̱ꞌ mukꞌunbal xinoquic woꞌ cok chipam eh naxwilow nicꞌ nimal i xilow maꞌ Luch, xnicoj woꞌ wach i kꞌoro̱j cho chiri̱j i ructic i Jesus chi quixilac take camnak

⁹maj cu jaꞌ nkarak ta nak chiri̱j chi manlic take kꞌoric tzꞌihmbimaj cho chipam i Lokꞌ laj Hu̱j tzꞌihmbimaj wi̱ꞌ riCꞌuhbal i Dios, reꞌ rikꞌor wi̱ꞌ chi reꞌ ructic i Jesus chi quixilac take camnak, curman chi xcꞌuluric.

¹⁰Jeꞌ aj reꞌ, nok kilom ok chic chi maꞌxta chic ar ritiꞌjolal i Jesus chipam i mukꞌunbal, reꞌ hoj quib chi aj tahkanel reꞌreꞌ, xojsoljic woꞌ chic je pan pa̱t reꞌ hoj chalanak wi̱ꞌ. Reꞌ Jesus xicꞌuhtaj woꞌ chic ri̱b reh Mari̱ya aj Majta̱la (Mr. 16.9-11)

¹¹Chiri̱j chic wili reꞌ Mari̱ya aj Majta̱la xponic woꞌ pa rimukꞌunbal i Jesus xa reꞌ laꞌ maꞌ xoquic ta cok chipam, xoquic laꞌ chi okꞌic pan ocbal reh mukꞌunbal reꞌreꞌ. Juncꞌam chic ribanam chi jeꞌ reꞌ, ximucꞌa̱ꞌ cok ri̱b chi riliric pa̱m i mukꞌunbal,

¹²eh ar aj ruꞌ cu reꞌ chic reh xilow i wili: Ar chipam i mukꞌunbal reꞌ xcojoric nak wi̱ꞌ i Jesus tzꞌukulque̱b chic quib chi raj tzꞌeꞌ wa̱ch i Dios chalanak take pan taxa̱j. Reꞌ jenaj queh take aj tzꞌeꞌ wa̱ch reꞌreꞌ ar tzꞌuklic reꞌ xwihꞌic wi̱ꞌ na̱ i Jesus eh reꞌ richꞌi̱l ar tzꞌuklic reꞌ xwihꞌic wi̱ꞌ take ro̱k. Reꞌ Mari̱ya xilow woꞌ chi reꞌ take quib chi raj tzꞌeꞌ wa̱ch i Dios reꞌreꞌ xa saksa̱k chic i quisoꞌ.

¹³Reꞌ take aj tzꞌeꞌ wa̱ch reꞌreꞌ, naxquilow chi okꞌic riban i Mari̱ya, jeꞌ wili xquikꞌor reh: «Tu̱t, chaj waꞌric chi okꞌic naꞌn? nqui take reh. Reꞌ Mari̱ya jeꞌ wili xikꞌor queh: «Okꞌic niban ruꞌum chi reꞌ ritiꞌjolal ajabe̱s reꞌ ncꞌambic nak nibe̱h, xquicꞌam je reh chi naquimukꞌa̱b pan jenoꞌ chic toco̱m yeꞌa̱b, yuꞌna maꞌ wehtꞌalim ta haj xponic quiyew cho, nqui Mari̱ya.

¹⁴Nok rikꞌorom ok chic wili Mari̱ya, xilbic je chiri̱j eh chiri̱j ruꞌ, reꞌ poꞌ nchel i Jesus wilic cho ar xa reꞌ laꞌ Mari̱ya maꞌ xinaꞌbej ta wach. Naxilmijic wach ruꞌum i Mari̱ya, reꞌ Jesus

¹⁵jeꞌ wili xikꞌor reh: «Tu̱t, chaj bih nawokꞌej eh hab wach nasicꞌ ayuꞌ? nqui reh. Naxibiraj i kꞌoric reꞌreꞌ, reꞌ Mari̱ya xicapaj chi reꞌ xkꞌoꞌronic cok reh reꞌ i aj ilol tic chipam yeꞌa̱b reꞌreꞌ. Ruꞌum chi reꞌ winak reꞌreꞌ aj camanom chipam i yeꞌa̱b reꞌreꞌ, reꞌ Mari̱ya xicapaj chi reꞌ winak reꞌreꞌ rehtꞌalim haj xcojoric ritiꞌjolal i Jesus. Ruꞌum aj reꞌ jeꞌ wili xikꞌor reh: «Ha̱w, wi reꞌ hat xatcꞌambic je reh ritiꞌjolal i Jesus chi rimukꞌunjic pan toco̱m chic yeꞌa̱b, chakꞌor wi̱n haj xponic ayew cho, reh chi jeꞌ reꞌ enitakꞌa̱ꞌ ricꞌamjic je chi narimukꞌunjic pan toco̱m chic yeꞌa̱b, nqui Mari̱ya.

¹⁶Chiwach i juncꞌam reꞌ kꞌuruꞌ nok reꞌ Jesus xikꞌoꞌrej cok i Mari̱ya ru̱cꞌ ribihnal, reꞌ Mari̱ya xisolqꞌuij ri̱b chi ilo̱j eh naxinaꞌbej wach chi reꞌ poꞌ Jesus nkꞌoꞌronic cok reh, jeꞌ wili xikꞌor reh pan hewre̱yo reꞌ kakꞌorbal hoj ra̱ꞌ riꞌsil cho maꞌ Israhel: «Rabo̱ni! nqui reh. Reꞌ kꞌoric reꞌreꞌ ra̱j rikꞌorom “aj tijinel”.

¹⁷Nok rikꞌorom chic reꞌreꞌ, reꞌ Mari̱ya xa̱j nak rikꞌahchem i Jesus xa reꞌ laꞌ Jesus jeꞌ wili xikꞌor reh: «Maꞌ quinakꞌahchej, hiy laꞌ pe cu̱cꞌ take xcaꞌn chi was nicha̱kꞌ chic take ru̱cꞌ ninimjic eh chakꞌor queh chi jeꞌ wili: ‹Qꞌuisi̱n maꞌ chic quino̱j johtok ru̱cꞌ i wAja̱w Dios reꞌ awAja̱w woꞌ hat-tak eh nalokꞌej tak wach, tiquirok queh ruꞌum nok reꞌ hin jaꞌ quino̱j ta johtok ru̱cꞌ i wAja̱w, nqui Jesus reh Mari̱ya.

¹⁸Chi jeꞌ aj reꞌ, reꞌ Mari̱ya aj Majta̱la xo̱j chi rikꞌormojic keh hoj aj tahkanel chi xilow chic wach i kAja̱w eh jeꞌ woꞌ chi rikꞌormojic keh chi reꞌ woꞌ Jesus xkꞌoric cho reh take kꞌoric cꞌahchiꞌ rikꞌorom keh. Reꞌ Jesus ricꞌuhtaj ri̱b queh take raj tahkanel nok quimolom qui̱b

¹⁹Naxoquic i chakꞌab reh Tomincuꞌ kꞌi̱j reꞌ xilow wi̱ꞌ wach Jesus i Mari̱ya aj Majta̱la, reꞌ hoj raj tahkanel i Jesus xkamol woꞌ ki̱b chipam jenaj pa̱t eh ruꞌum chi kojyoꞌjic chi ekojrakmajic cuꞌum take cꞌamol quibe̱h take kich ra̱ꞌ riꞌsil cho maꞌ Israhel cow xkachꞌit ri̱j i tzꞌahp. Ar aj chipam i pa̱t reꞌreꞌ xo̱j cꞌolok i Jesus eh jeꞌ wili xikꞌor keh nok ruhmumaj chic cok chi kaxilac chi kacꞌalenjic: «Cꞌale̱n tak, reꞌ Dios cuseꞌsenok aweh tak, nqui keh.

²⁰Nok rikꞌorom chic reꞌreꞌ, reꞌ Jesus xicꞌuhtaj keh rikꞌab chꞌi̱l i rijojol cꞌuhtbal reh chi til reꞌ woꞌ i Lokꞌ laj Ajabe̱s Jesus wilic chi kayejal. Naxkilow chi til reꞌ Jesus wilic ku̱cꞌ, maꞌ qꞌuisi̱n ta naxsukbic kacꞌux i hoj raj tahkanel.

²¹Chiri̱j chic reꞌ, reꞌ Jesus chi chꞌakbal je ri̱b chi kaxilac jeꞌ woꞌ chic wili xikꞌor keh hoj raj tahkanel: «Reꞌ hin tinipahba̱ꞌ tak chi na̱wojic tak chi waj camanom jeꞌ ricab xiban cho wu̱cꞌ i wAja̱w Dios, nqui keh.

²²Nok rikꞌorom chic reꞌreꞌ jeꞌ wili xiban: Xupej je wach kana̱ eh jeꞌ wili xikꞌor keh: «Chacꞌul tak i Lokꞌ laj rUxlabal i Dios.

²³Yuꞌna kꞌuruꞌ wilic chic awajawric tak chi enakꞌor tak queh reꞌ nquipahkaj cuybal quimahc reh Dios, chi reꞌreꞌ ricuy quimahc. Jeꞌ woꞌ wilic chic awajawric tak chi enakꞌor tak queh take maꞌ nquipahkaj ta cuybal quimahc reh Dios, chi reꞌ quimahc ncahnic chi maꞌ cuyu̱j ta ruꞌum i Dios, nqui Jesus keh. Chiri̱j chic reꞌ xelic je chi kaxilac. Reꞌ maꞌ Ma̱x maꞌ xicoj ta wach chi reꞌ Jesus cꞌachlic woꞌ chic

²⁴Chiwach i chakꞌab naxicꞌuhtaj ri̱b i Jesus chi kawach i hoj raj tahkanel, jenaj chic kich aj tahkanel Ma̱x ribihnal reꞌ ribihnej woꞌ chi Lach, maꞌxta nwihꞌic ku̱cꞌ naxponic i Jesus.

²⁵Jeꞌ reꞌ nok naxponic chi kaxilac i hoj rich aj tahkanel, xkakꞌor reh chi jeꞌ wili: «Yuꞌna xkilow wach i kAja̱w Jesus chi cꞌachlic woꞌ chic, kojqui reh. Chalic i Ma̱x jeꞌ wili xikꞌor: «Wi laꞌ maꞌ xwilow take ho̱p xquicana̱ꞌ take juꞌ chꞌihchꞌ chi ralak kꞌab eh wi maꞌ xnimin i nah nikꞌab chipam take ho̱p reꞌreꞌ, maꞌ eta nicoj wach chi reꞌ Jesus xawilow tak wach. Jeꞌ woꞌ maꞌ eta nicoj wach i xakꞌor tak wi̱n wi maꞌ xnicoj i nah nikꞌab chipam i rijojol xquihop, nqui Ma̱x.

²⁶Wahxaki̱b ok chic kꞌi̱j chiri̱j i wili, reꞌ hoj raj tahkanel i Jesus xkamol woꞌ chic ki̱b chipam jenaj pa̱t reꞌ til woꞌ cow xkalutzꞌ ri̱j i tzꞌahp eh chi kaxilac wilic woꞌ i Ma̱x. Ar ajic reꞌ Jesus junpech woꞌ chic xponic wihꞌok chi kaxilac eh jeꞌ wili xikꞌor keh: «Sukquil cꞌuxlis chaweh tak, nqui keh.

²⁷Chiri̱j reꞌ jeꞌ wili xikꞌor reh Ma̱x: «Chacoj take nah akꞌab chipam rihopil nikꞌab nawilow take cho wili. Jeꞌ woꞌ, chajil cho akꞌab eh chacoj take nah akꞌab pa nijojol. Ru̱cꞌ i cꞌahchiꞌ nicꞌuhtam aweh wili nipahkaj aweh chi ma̱ban juneht wach acapew-bal quichꞌi̱l take cꞌacharel maꞌ nquicoj ta wach i wuctic chi quixilac take camnak, reꞌ laꞌ hat chacoj wach i chaj bih xquikꞌor aweh take awich aj tahkanel, nqui Jesus reh.

²⁸Reꞌ Ma̱x jeꞌ wili xicꞌuꞌlej wi̱ꞌ i Jesus naxibiraj reꞌreꞌ: «Ha̱w, reꞌ hat til hat i ajabe̱s nchopbic nina̱. Jeꞌ woꞌ til hat niDios reꞌ nilokꞌej awach i hin, nqui Ma̱x.

²⁹Reꞌ Jesus jeꞌ wili xikꞌor reh: «Kꞌe̱ꞌ ato̱b queh cꞌacharel reꞌ to̱b ta maꞌ nquilow i cꞌahchiꞌ awilom i hat, nquicoj wach chi reꞌ hin xinuctic chi quixilac take camnak. Reꞌ hat kꞌuruꞌ Ma̱x, chaj bih riwi̱ꞌ chi cu rehtal xawilow niwach cu reꞌ xacoj wach reꞌ xquikꞌor aweh, nqui Jesus. Maꞌ chiꞌnchel ta take lokꞌ laj nawa̱l xiban i Jesus tzꞌihmbimaj ruꞌum i Wa̱n

³⁰Wilic toco̱m chic take riqꞌuihal lokꞌ laj nawa̱l xiban i Jesus chi kawach i hoj raj tahkanel xa reꞌ laꞌ chipam i hu̱j wili maꞌ chiꞌnchel ta tzꞌihmbimaj ribiral wuꞌum.

³¹Jeꞌ reꞌ ajic reꞌ nicꞌ paꞌ nimal xnitzꞌihmbaj chiri̱j i Jesus, xniban chi jeꞌ reꞌ ruꞌum nok nwa̱j chi ru̱cꞌ reꞌreꞌ enacoj tak wach chi reꞌ Jesus, reꞌ i Pahbamaj chi Kꞌatal Kꞌoric eh jeꞌ woꞌ chi reꞌreꞌ i rAcꞌu̱n i Dios. Wi xacoj tak wach reꞌreꞌ, reꞌ Jesus eriyew aweh tak chi eticꞌacharic tak chi junelic kꞌi̱j sakom.