Read Poqomchi' 1 Corintios 3 Bible Online

1 Corintios 3 - Poqomchi' bible

1 Corintios 3

¹Yuꞌna was tak nicha̱kꞌ aj niminel reh Jesus, nwa̱j nikꞌorom aweh tak chi naxinwihꞌic cho chaxilac tak chi cꞌuhbalanic maꞌ xniban ta canar kꞌoric awu̱cꞌ tak jeꞌ ricab kꞌoric niban cu̱cꞌ take chopo̱j nah quinoꞌjbal ruꞌum i Lokꞌ laj Uxlabal, xinkꞌoric laꞌ cho ru̱cꞌ xa suk wach kꞌoric jeꞌ ricab nbanjic queh take cꞌacharel jeꞌ ru̱cꞌ jaꞌ quiniminic ta reh i kAja̱w Dios. Xa jeꞌ reꞌ riwi̱ꞌ kꞌoric xniban awu̱cꞌ tak ruꞌum nok reꞌ hat-tak xa jeꞌ acab tak take cꞌacharel maꞌ chopo̱j ta nah chi manlic ruꞌum i Lokꞌ laj Uxlabal. Chi jeꞌ aj reꞌ riwi̱ꞌ anoꞌjbal tak, jaꞌ narak ta nak tak chiri̱j haj wilic i coric on haj wilic i maꞌ coric ta chi cꞌamaric na̱ pa rinimjic i Jesus jeꞌ ricab nok jenoꞌ tꞌuch haꞌlacꞌun jaꞌ rehtꞌalim ta haj wilic i coric on haj wilic i maꞌ coric ta.

²Ruꞌum aj reꞌ jeꞌ ricab nok jenoꞌ haꞌlacꞌun cu chꞌu̱chꞌ ncꞌacharic wi̱ꞌ ruꞌum nok jaꞌ riban ta chi ricꞌux reh i jeꞌ ricab riwaꞌbej jenoꞌ nim laj cꞌacharel, jeꞌ woꞌ reꞌ awu̱cꞌ hat-tak xa reꞌ ti take cꞌuhbal chꞌiquinbal reh rinimjic i Dios xnikꞌor aweh tak eh maꞌ jaꞌ reꞌ ta take cꞌuhbal reꞌ nkꞌormojic queh take aj niminel jeꞌ ru̱cꞌ chopo̱j na̱ chi manlic quinoꞌjbal ruꞌum i Lokꞌ laj Uxlabal. Jeꞌ reꞌ xniban maj reꞌ hat-tak jaꞌ tikilca̱t ta nak tak chi ricꞌulmujic take cow wach cꞌuhbal jeꞌ ricab ricꞌul chi queh take chopo̱j nah quinoꞌjbal chi manlic ruꞌum i Lokꞌ laj Uxlabal eh til pan coric cu yuꞌna chi kꞌi̱j xa cu jeꞌ woꞌ reꞌ riwi̱ꞌ anoꞌjbal tak.

³Jeꞌ reꞌ nikꞌor maj cu jaꞌ cowjonak ta woꞌ acapew-bal tak pan niminic ruꞌum nok cu wilic woꞌ take capew-bal reh najtir kꞌi̱j awu̱cꞌ tak eh cu reꞌ woꞌ reꞌ cow nayew tak chawach. Ruꞌum aj reꞌ cu ncꞌutunic take noꞌjbal wili chaxilac tak: Nawixowej tak wach take toco̱m chic awas acha̱kꞌ aj niminel eh kꞌe̱ꞌ nachoplom awi̱b tak ru̱cꞌ kꞌoric ruꞌum chi maꞌ riban ta jenaj wach anoꞌjbal tak ru̱cꞌ chaj bih nacapaj tak. Nanaꞌn tak chi jeꞌ reꞌ, maꞌ ncꞌutunic ta na chi reꞌ anoꞌjbal tak maꞌ jaꞌ chopo̱j ta nah ruꞌum i Lokꞌ laj Uxlabal eh chi xa jeꞌ chic ricab i quinoꞌjbal take maꞌ quiniminic ta reh i Dios?

⁴Jeꞌ reꞌ nikꞌor maj ru̱cꞌ i noꞌjbal naꞌn tak reꞌreꞌ til ncꞌutunic lok chi maꞌ chopo̱j ta na̱ anoꞌjbal tak ruꞌum i Lokꞌ laj Uxlabal. Jeꞌ reꞌ nikꞌor maj wilic aweh tak nquichop qui̱b chi jeꞌ wili nquikꞌor chi quiwach: «Reꞌ kꞌorok i hin maj reꞌ maꞌ Lu̱ꞌ nitahkej ru̱cꞌ ricꞌuhbalanic, nqui nquikꞌor. Wilic woꞌ take jeꞌ wili nquikꞌor: «Ha̱ꞌ, reꞌ cok kꞌorok i hin maj reꞌ maꞌ Apo̱los nitahkej ru̱cꞌ i cꞌuhbalanic riban, nqui nquikꞌor.

⁵Ru̱cꞌ i kꞌoric nbanjic reꞌreꞌ, reꞌ hin nwa̱j nibiram aweh tak, chaj bih riwi̱ꞌ chi nacapaj tak chi reꞌ Apo̱los chꞌi̱l i hin maꞌ Lu̱ꞌ nim kawaꞌric? Til pa ricorquil reꞌ hoj xa xojcamanic chi raj tzꞌeꞌ wa̱ch i Dios toꞌbal aweh tak chi rinimjic i kAja̱w Jesus naxojponic awu̱cꞌ tak xa reꞌ laꞌ ruꞌ chi kajuꞌjunal i hoj, xojtakꞌabjic cho ruꞌum i kAja̱w reh chi nakaꞌnam haj wilic i camanic xa̱j ruꞌ chi nakaꞌnam chaxilac tak.

⁶Chi jeꞌ aj reꞌ xa̱j, pan pe̱t cho reꞌ hin reꞌ xinpꞌutbic cho reh cꞌuhbalanic chaxilac tak, xniban jeꞌ na ricab riban jenoꞌ aj tico̱l naritic jok i rabi̱x. Chiri̱j chic ruꞌ, reꞌ chic Apo̱los ru̱cꞌ ricamaj xiban chaxilac tak chi ritikmijic juꞌ rikꞌormojic riCꞌuhbal i Dios, reꞌreꞌ xiban jeꞌ na ricab jenaj winak xa chic reꞌ ritikmijic juꞌ riqꞌuihsjic i tic riban ru̱cꞌ ritꞌaksjic. Jeꞌ aj reꞌ ruꞌ camanic xkaꞌn i hoj xa reꞌ laꞌ reꞌ riyeꞌeric ricowil acꞌux tak maꞌ reꞌ ta hoj xojbanic, til laꞌ reꞌ i Dios cꞌahchiꞌ ribanic jeꞌ ricab woꞌ ncꞌuluric ru̱cꞌ i tic chi reꞌ woꞌ reꞌ nbanic chi reꞌ take reꞌ quicꞌacharic.

⁷Jeꞌ aj reꞌ nikꞌor maj reꞌ cꞌacharel npꞌutbic reh cꞌuhbal chꞌi̱l reꞌ ntikbic juꞌ rikꞌormojic cꞌuhbal maꞌxta cajawric chi equiniminic take cꞌacharel, reꞌ laꞌ nbanic chi reꞌ take cꞌacharel quiniminic, reꞌ i kAja̱w Dios ruꞌum nok reꞌ wilic rajawric chi ribanaric reꞌreꞌ.

⁸Jeꞌ reꞌ kꞌuruꞌ jeꞌ ricab nok jenoꞌ cꞌacharel reꞌ nbanic i tic eh chꞌi̱l woꞌ jenoꞌ cꞌacharel reꞌ xa reꞌ chic ritꞌaksjic riban, xa jenaj wach i rehtalil nca̱j quilom wach ru̱cꞌ quicamaj, jeꞌ woꞌ reꞌ hin maꞌ Lu̱ꞌ chꞌi̱l i Apo̱los xa jenaj woꞌ nka̱j kilom wach chiri̱j kacamaj xkaꞌn chaxilac hat-tak eh reꞌ nka̱j kilom wach i hoj, reꞌ chi naricowjic acꞌux tak ru̱cꞌ i cꞌuhbalanic xkaꞌn chaxilac tak. Ru̱cꞌ i kacamaj xkaꞌn chaxilac tak, reꞌ hoj nakacꞌulum woꞌ jenoꞌ kaco̱ch ru̱cꞌ i Dios jeꞌ ricab nok jenoꞌ ajabe̱s riyew quitojbal take raj camanom reꞌ kꞌorel nicꞌ paꞌ wach i camanic xcaꞌn chiwach.

⁹Ru̱cꞌ kacamaj i hoj kꞌuruꞌ reꞌ xojwihꞌic cho chaxilac tak chi cꞌuhbalanic, reꞌ hoj xkaꞌn chi xa hoj raj tzꞌeꞌ wa̱ch i Dios aj banol reh haj wilic rikꞌor keh chi nakaꞌnam eh awu̱cꞌ hat-tak aj Cori̱nto reꞌ Dios cꞌahchiꞌ ricamanic pan awa̱mna tak ru̱cꞌ kacamaj i hoj aj cꞌuhbalanel jeꞌ ricab nok jenoꞌ ajabe̱s cꞌahchiꞌ ricamanem pan riyeꞌa̱b ru̱cꞌ cansil take raj camanom cꞌahchiꞌque̱b chi camanic ru̱cꞌ. Jeꞌ woꞌ chic ru̱cꞌ ritikꞌinjic wach acꞌacharic tak cꞌahchiꞌ ribanam i Dios, reꞌ hat-tak jeꞌ na waꞌric cꞌahchiꞌ abanam jeꞌ ricab jenaj pa̱t cꞌahchiꞌ rijohsjic ruꞌum jenoꞌ ajabe̱s. Reꞌ resmejic lok wach sakom quicamaj take raj camanom i Dios

¹⁰Reꞌ hin ru̱cꞌ nicꞌaxmajic xiban cho Dios chi riyeꞌeric wi̱n jenaj tꞌulic laj noꞌjbal chi nanicamanic chiwach chi hin aj kꞌorol reh riCꞌuhbal, reꞌ hin pe̱t be̱h xintzꞌukunic reh acapew-bal tak chiri̱j rinimjic i Dios ru̱cꞌ atijiljic tak jeꞌ ricab nok jenoꞌ aj tzꞌako̱l nahsil aj tikꞌem pa̱t, reꞌreꞌ ncojbic reh i tzꞌak chꞌiquinbal cho reh riraꞌil jenoꞌ pa̱t. Jeꞌ woꞌ chic, jeꞌ ricab chi toco̱m chic jenoꞌ aj tzꞌako̱l ntikbic juꞌ i camanic chꞌiquimaj cho ruꞌum aj nahsil tikꞌem pa̱t, jeꞌ woꞌ reꞌ xbanjic ru̱cꞌ i nicamaj i hin toco̱m chic xtikbic juꞌ atijiljic tak chiri̱j riCꞌuhbal i Dios. Xa reꞌ laꞌ nwa̱j woꞌ nikꞌorom chi hab wach take cꞌahchiꞌ quitikbic juꞌ ricamaj i Dios quilow ta nak ricorquil nicꞌ wach i camanic cꞌahchiꞌ caꞌnam jeꞌ ricab nok jenoꞌ aj tzꞌako̱l, curman chi narilom ricorquil nicꞌ wach ritikmijic juꞌ i tikꞌinic pa̱t cꞌahchiꞌ ribanam china̱ i tzꞌak chꞌiquimaj cho wi̱ꞌ.

¹¹Reꞌ hat-tak awehtꞌalim tak jeꞌ ricab jenoꞌ pa̱t xa jenaj chi tzꞌak wilic chi chꞌiquinbal reh eh xa china̱ woꞌ ruꞌ ntikꞌmijic i pa̱t reꞌreꞌ, jeꞌ woꞌ reꞌ ru̱cꞌ i kaniminic maꞌ hab ta woꞌ chic wach jenoꞌ eriban chi erikꞌor jenoꞌ cꞌuhbal keh chiri̱j nicꞌ wach riwi̱ꞌ nakojcoꞌljok ruꞌum i Dios maj xa jenaj woꞌ riwi̱ꞌ i coꞌlbal wilic eh reꞌreꞌ, xa reꞌ woꞌ reꞌ xnikꞌor aweh tak chi xa ruꞌum i Jesus reꞌ Pahbamaj chi Kꞌatal Kꞌoric ekojcoꞌljic ruꞌum i Dios.

¹²Jeꞌ woꞌ chic, reꞌ hat-tak awehtꞌalim tak chi wilic take cꞌacharel nanquitik juꞌ rijohsjic jenoꞌ pa̱t china̱ jenoꞌ tzꞌak chꞌiquimaj chic cho wi̱ꞌ jenoꞌ pa̱t, wilic take aj tikꞌinel reh nquicoj take holohic laj camanbal jeꞌ ru̱cꞌ maꞌ quicꞌahtic ta jeꞌ ricab take kꞌanworic laj chꞌihchꞌ, sak laj chꞌihchꞌ chꞌi̱l woꞌ take chakꞌwach laj abaj on wilic woꞌ take nquicoj camanbal cꞌahtel take jeꞌ ricab take tzꞌilom, take a̱k on xak aji̱j.

¹³Nicꞌ paꞌ wach ncꞌuluric ru̱cꞌ jenoꞌ pa̱t chi reꞌ kꞌorel nicꞌ paꞌ wach i camanbal ncojoric reh jeꞌ woꞌ reꞌ cowil ncahnic jenoꞌ pa̱t, jeꞌ woꞌ reꞌ naricꞌuluric ru̱cꞌ quicamaj take raj camanom i Dios. Jeꞌ reꞌ nikꞌor maj nariponic woꞌ i kꞌi̱j chi naricꞌutunic lok nicꞌ wach riwi̱ꞌ richakꞌwachquilal i quicamaj xcaꞌn, wi nchel xcaꞌn chi coric on maꞌxta. Jeꞌ aj reꞌ naricꞌuluric ruꞌum nok nasoljok woꞌ chic cho i Jesus naresam lok wach sakom nicꞌ wach quicamaj take aj camanom wi holohic on maꞌ holohic ta. Jeꞌ reꞌ nikꞌor maj reꞌreꞌ narichꞌukum kꞌoric chi quina̱ juꞌjun chi cꞌacharel ilbal reh wi holohic xibanic jeꞌ ricab naquiꞌicꞌsjic pan kꞌa̱kꞌ take quiworwotic laj chꞌihchꞌ ilbal reh wi til reꞌ ru̱cꞌ take chakꞌwach laj chꞌihchꞌ.

¹⁴Jeꞌ aj reꞌ ruꞌ, reꞌ ricamaj jenoꞌ aj camanom narelic lok wach sakom nachichꞌuk kꞌoric i Jesus china̱. Nok chꞌuku̱j chic ri̱j chi holohic ricamaj, nariyeꞌeric jenoꞌ rico̱ch jeꞌ ricab nok jenoꞌ aj tzꞌako̱l nyeꞌeric woꞌ jenoꞌ risi̱ nok ilo̱j chic chi holohic i camanic xiban ru̱cꞌ ritikiric juꞌ ritikꞌinjic jenoꞌ pa̱t.

¹⁵Raj wi reꞌ ricamaj xiban jenoꞌ aj camanom narichꞌukuric wach ruꞌum i Jesus chi maꞌ holohic ta, reꞌ aj camanom reꞌreꞌ maꞌxta ricꞌulum jenoꞌ rico̱ch ruꞌum chi naritzꞌajric acꞌal i ricamaj xiban jeꞌ ricab nok jenoꞌ aj tzꞌako̱l ntzꞌajric acꞌal ricamaj nanhaꞌric ruꞌum kꞌa̱kꞌ ruꞌum chi maꞌ chiho̱j ta wach camanbal ricoj chi johsonic pa̱t. Wi jenoꞌ aj camanom jeꞌ reꞌ ricꞌul ru̱cꞌ ricamaj, cu ewoꞌ ncoꞌljic ruꞌum i Dios chiwach i kꞌa̱kꞌ naritojoric wi̱ꞌ wach i mahc jeꞌ ricab nok jenoꞌ cꞌacharel ricoꞌlej ri̱b chiwach i kꞌa̱kꞌ nkop wi̱ꞌ i ripa̱t to̱b ta woꞌ maꞌ ricoꞌlej ta chic ri̱j take paꞌ bih reh. Reꞌ Dios narisacham wach i cꞌacharel reꞌ nyojbic wach quicapew-bal ritinami̱t

¹⁶Yuꞌna reꞌ chic wili nwa̱j nikꞌorom aweh tak: Reꞌ hat-tak awehtꞌalim tak chi reꞌ Lokꞌ laj Pa̱t reꞌ nlokꞌonjic wi̱ꞌ wach i Dios xwihꞌic ar Jerusalen, til ar wihꞌic i Dios naxwihꞌic cho cu̱cꞌ take wich ra̱ꞌ riꞌsil cho maꞌ Israhel eh nicꞌ paꞌ wach i wihꞌic xiban ar, yuꞌna jeꞌ woꞌ reꞌ i wihꞌic riban awu̱cꞌ i hat-tak aj niminel. Jeꞌ reꞌ nikꞌor maj reꞌ Lokꞌ laj rUxlabal til wilic woꞌ pan awa̱mna tak.

¹⁷Ruꞌum aj reꞌ til nikꞌor aweh tak chi xa hab wach aweh tak eriyoj quicapew-bal take ritinami̱t i Dios ru̱cꞌ take noꞌjbal riban jeꞌ ricab riyojoric jenoꞌ pa̱t riban jenoꞌ cꞌacharel, reꞌ nbanic reꞌreꞌ til rinimal tiꞌcꞌaxic nariyeꞌeric china̱ ruꞌum reh ribano̱j. Jeꞌ reꞌ naribanaric reh maj jeꞌ ricab chi reꞌ Lokꞌ laj Pa̱t tikꞌimaj chi nariwihꞌic wi̱ꞌ i Dios, til kꞌe̱ꞌ lo̱kꞌ riwi̱ꞌ, jeꞌ woꞌ reꞌ yuꞌna reꞌ yeꞌa̱b wilic wi̱ꞌ ruꞌ til kꞌe̱ꞌ woꞌ lo̱kꞌ riwaꞌric eh reꞌ yeꞌa̱b reꞌreꞌ, reꞌ hat-tak yuꞌna.

¹⁸Chawicꞌraj awi̱b tak kꞌuruꞌ maꞌ hab wach ajotꞌ tak ricapew-bal on ma̱jotꞌ woꞌ awi̱b chawibil awi̱b tak ru̱cꞌ i nacapaj chawi̱j tak. Jeꞌ reꞌ nikꞌor maj wilic aweh tak ricapaj chi reꞌreꞌ til kꞌe̱ꞌ tꞌulic chi reh xa ruꞌum ti ruꞌ chi jeꞌ nak reꞌ nkꞌormojic reh nok jaꞌ reꞌ ta nak aj niminel. Reꞌ cꞌacharel jeꞌ reꞌ ricapaj til nikꞌor reh chicana̱ꞌ ricapewjic reꞌreꞌ, reꞌ laꞌ chiban chicana̱ꞌ chi reꞌ ok chic i Dios capewenok chiri̱j chi til reꞌreꞌ kꞌe̱ꞌ tꞌulic chi rinimjic i Jesus to̱b ta nchel reꞌ take maꞌ reꞌ ta aj niminel maꞌ jeꞌ ta chic reꞌ nquicapaj chiri̱j.

¹⁹Jeꞌ reꞌ nikꞌor maj to̱b ta wilic take maꞌ reꞌ ta aj niminel kꞌe̱ꞌ tꞌulic take ru̱cꞌ noꞌjbal reh na̱ acꞌal wili xa reꞌ laꞌ chiwach i Dios xa hamoj memil laj noꞌjbal wilic cu̱cꞌ. Til coric rikꞌor i Lokꞌ laj Hu̱j wilic wi̱ꞌ i riCꞌuhbal i Dios, reꞌ rikꞌor chi jeꞌ wili:“Nok reꞌ take tinamit til xa ncaꞌn chic qui̱b chi til kꞌe̱ꞌ wilic quinoꞌjbal,reꞌ Dios ricꞌuhtaj queh chi maꞌ jeꞌ ta soꞌ reꞌ narisolqꞌuij pa ri̱j i quinoꞌjbalmaj reꞌ nak nquitikꞌa̱ꞌ wach ribanaric maꞌ nelic ta chi coric chi quiwach, nqui rikꞌor.

²⁰Maꞌ xa reꞌ ta reꞌ rikꞌor jeꞌ laꞌ woꞌ rikꞌor chi jeꞌ wili:“Wilic take cꞌacharel nquikꞌor chi til kꞌe̱ꞌ quiwaꞌric ru̱cꞌ quinoꞌjbalxa reꞌ laꞌ chiwach i kAja̱w Dios maꞌ reꞌ ta soꞌ noꞌjbal reꞌreꞌ, nqui rikꞌor.

²¹Jeꞌ aj reꞌ kꞌuruꞌ reꞌ hin nikꞌor aweh tak chi maꞌ hab wach aweh tak rinimsaj ri̱b xa ruꞌum chi cꞌahchiꞌ ritahkem rinoꞌjbal jenoꞌ aj tijinel eh ru̱cꞌ reꞌreꞌ, reꞌ chic aj tijinel reꞌreꞌ cꞌahchiꞌ riyeb rilokꞌil. Jeꞌ reꞌ nikꞌor maj reꞌ riwi̱ꞌ chi reꞌ Dios xiyew chic aweh tak chiꞌnchel take aj tijinel reꞌreꞌ reh chi naca̱t quitoꞌbem tak.

²²Jeꞌ ricab i hin maꞌ Lu̱ꞌ chꞌi̱l i maꞌ Apo̱los eh chꞌi̱l woꞌ i maꞌ Luch reꞌ ribihnej woꞌ chi Se̱pas, wilco̱j chi aj toꞌbonel aweh hat-tak ritinami̱t i Dios. Jeꞌ aj woꞌ reꞌ riwi̱ꞌ i nicꞌ nimal xyeꞌeric keh hoj aj niminel china̱ acꞌal wili. Reꞌ Dios xiyew jenaj acꞌ chic kacꞌacharic chi junelic eh ruꞌum reꞌ to̱b ta kojquimok je xa naco̱j woꞌ chic ricꞌaꞌchsam reh chi nakacꞌacharic ru̱cꞌ chi junelic. Chꞌi̱l xnikꞌor lok wili nikꞌor woꞌ chi xa paꞌ bih jaric nkacꞌul chiwach rikꞌijil kacꞌacharic yuꞌna eh jeꞌ woꞌ chꞌi̱l take chaj bih nakacꞌulum johtok chi kawach pan junkꞌat chic cꞌacharic, chiꞌnchel take reꞌ camanel take keh.

²³Jeꞌ aj reꞌ kꞌuruꞌ reꞌ hat-tak, hat-tak chic reh i Jesus reꞌ Pahbamaj chi Kꞌatal Kꞌoric eh jeꞌ ricab chi reꞌreꞌ wilic rajawric chana̱ tak, china̱ ruꞌ reꞌ woꞌ Dios wilic cho rajawric.