Read Poqomchi' Efesios 5 Bible Online

Efesios 5 - Poqomchi' bible

Efesios 5

¹Yuꞌna hat-tak racꞌu̱n rixkꞌu̱n i Dios reꞌ kꞌe̱ꞌ tiꞌ tiricꞌraj tak, til nipahkaj aweh tak chi chacꞌam woꞌ tak tzꞌeht reh rinoꞌjbal ruꞌ.

²Jeꞌ reꞌ nok ma̱cana̱ꞌ tak ricꞌaxaric awas acha̱kꞌ tak jeꞌ ricab kacꞌaxmajic xiban i Jesus reꞌ Pahbamaj chi Kꞌatal Kꞌoric, naxikꞌahsaj ri̱b pan quimic chiki̱j i hoj cꞌacharel chi jeꞌ ricab jenoꞌ si̱ nkꞌahsjic johtok chiwach i Dios on jeꞌ ricab quikꞌahsjic take chicop reꞌ naquicꞌataric cho chiwach i Dios, xa nbukunic chic ricꞌohonquil nponic johtok chiwach.

³Jeꞌ woꞌ, ruꞌum chi reꞌ hat-tak, hat-tak chic racꞌu̱n rixkꞌu̱n i Dios, maꞌxta bih aweh tak chi enelic cho abiral tak chi cꞌahchiꞌca̱t tak chi ribanaric take wili: Reꞌ take ribanaric xa chiꞌnchel wach cꞌoyomal chꞌi̱l ribanaric take yibel wach noꞌjbal eh chꞌi̱l woꞌ cꞌaxo̱j tak wach bihomal.

⁴Jeꞌ woꞌ, maꞌ ricꞌul ta chaweh tak chi cu enaꞌn tak ribanaric take wili: Reꞌ take qꞌuixbilal laj kꞌoric, reꞌ horhor laj kꞌoric chꞌi̱l take maꞌ to̱b ta laj balakꞌil. Reꞌ chiꞌnchel reꞌreꞌ maꞌ riwi̱ꞌ ta chaweh tak chi cu enaꞌn tak maj chi hat-tak chic aj niminel, maꞌ ricꞌul ta chaweh tak chi cu jeꞌ reꞌ akꞌorbal tak, reꞌ laꞌ achi̱ꞌ tak camanok aweh tak chi tioxbal johtok i Dios.

⁵Reꞌ riwi̱ꞌ chi xnikꞌor je aweh tak chi ma̱ban tak i cꞌoyomal, on yibel wach noꞌjbal ruꞌum chi reꞌ hat-tak awehtꞌalim woꞌ tak chi xa hab wach cꞌacharel reꞌ riban xa chiꞌnchel wach cꞌoyomal chꞌi̱l woꞌ ribanaric take yibel wach laj noꞌjbal, maꞌxta rehtric wihꞌic chi riꞌsil rajawric i Jesus reꞌ Pahbamaj chi Kꞌatal Kꞌoric, reꞌ til Dios woꞌ nok wilic. Reꞌ aj cꞌaxol wach bihomal jeꞌ woꞌ reꞌ naricꞌulum ruꞌum nok reꞌ paꞌ bih ricꞌax wach, ricoj chiwach chi jeꞌ na chic ritiyo̱x maj reꞌ chic reꞌ richꞌica̱ꞌ wi̱ꞌ ricꞌux.

⁶Xa hab wach jenoꞌ cꞌacharel kꞌuruꞌ ra̱j ca̱t-tak rijotꞌom ru̱cꞌ rikꞌormojic aweh tak chi reꞌ ribanaric take noꞌjbal reꞌreꞌ maꞌxta bih jenoꞌ cꞌaxquilal ericꞌam cho chana̱ tak, til ma̱cana̱ꞌ awi̱b tak chi jotꞌoric. Jeꞌ reꞌ nikꞌor je aweh tak maj riwi̱ꞌ chaweh tak chi na̱wehtꞌalim tak chi reꞌ rijoskꞌil i Dios nchalic chi quina̱ take cꞌacharel maꞌ quibirinic ta kꞌoric chi rinabjic ribanaric take noꞌjbal reꞌreꞌ.

⁷Jeꞌ woꞌ, maꞌ riban juneht wach anoꞌjbal tak cu̱cꞌ take cꞌacharel jeꞌ reꞌ quinoꞌjbal

⁸maj najtir cho kꞌi̱j nok wilca̱t nak tak cho chipam i cꞌacharic chi maꞌ awehtꞌalim ta tak nicꞌ wach rinoꞌjbal i Dios, xa jeꞌ na pan kꞌekom wilca̱t tak cho, ra̱j laꞌ yuꞌna chi awehtꞌalim tak chic nicꞌ wach rinoꞌjbal ruꞌum chi wilca̱t tak chic pan jenaj wach cꞌuxlis ru̱cꞌ i Jesus, xa jeꞌ na ricab pan sakom chic wilca̱t tak eh chi jeꞌ chic reꞌ awi̱ꞌ tak chacꞌuhtaj woꞌ tak lok chi jeꞌ reꞌ.

⁹Jeꞌ reꞌ nikꞌor aweh tak maj wi jenoꞌ cꞌacharel rehtꞌalim chic nicꞌ wach rinoꞌjbal i Dios, reꞌ woꞌ take noꞌjbal wili quicꞌutunic lok ru̱cꞌ: Reꞌreꞌ nwihꞌic quetelenic wachi̱s ru̱cꞌ, ncꞌacharic chi maꞌxta jotꞌo̱j pa ra̱mna eh xa coric woꞌ wach ricꞌux ru̱cꞌ chiꞌnchel.

¹⁰Maꞌ xa ta reꞌreꞌ, risicꞌ laꞌ woꞌ ribanaric haj wilic noꞌjbal nponic chiwach i kAja̱w.

¹¹Tzꞌa̱b ruꞌ i quibano̱j take cꞌacharel reꞌ maꞌ jaꞌ quehtꞌalim ta nicꞌ wach rinoꞌjbal i Dios, xa maꞌxta camaj. Jeꞌ reꞌ nok maꞌ riban juneht wach abano̱j tak cu̱cꞌ, reꞌ laꞌ chaꞌn tak chasakomej tak wach queh chi reꞌ quibano̱j cꞌahchiꞌ que̱b maꞌ holohic ta.

¹²Jeꞌ reꞌ chaꞌn tak maj til woꞌ chic kꞌe̱ꞌ qꞌuixbilal i cꞌahbilal ncaꞌn xa pan cꞌolic chi xa ta nak ricꞌul chi enkꞌormojic lok ribiral i cꞌahbilal ncaꞌn.

¹³Ruꞌum aj reꞌ, reꞌ hat-tak til chasakomej tak wach queh chi maꞌ holohic ta cꞌacharic ncaꞌn maj reꞌ risakomsjic wach queh reꞌreꞌ, xa jeꞌ na jenaj sakom reꞌ risakomej wach chiꞌnchel nicꞌ wach riwi̱ꞌ i cꞌacharic ncaꞌn. Jeꞌ woꞌ chic, nok sakomomaj chic wach reꞌreꞌ queh chiꞌnchel take cꞌacharel, reꞌ chic take reꞌ equisakomonic lok wach quibano̱j take toco̱m chic cꞌacharel.

¹⁴Ruꞌum aj woꞌ reꞌ, wilic jenaj kꞌoric jeꞌ wili rikꞌor:“Reꞌ hat reꞌ wilca̱t chi jeꞌ na hat suk wira̱l on wilca̱t chi jeꞌ na hat camnak ruꞌum chi maꞌ nacoj ta rehtal i mahc wilca̱t wi̱ꞌ naꞌlajok aweh.Chi jeꞌ reꞌ, reꞌ Jesus reꞌ Pahbamaj chi Kꞌatal Kꞌoric erisakomej pa̱m acꞌacharic, nqui rikꞌor.

¹⁵Jeꞌ reꞌ kꞌuruꞌ til woꞌ chawicꞌraj awi̱b tak chi maꞌ ok cꞌacharic naꞌn tak ru̱cꞌ memil laj noꞌjbal, wilic laꞌ ok anoꞌjbal tak chi cꞌacharic.

¹⁶Chi jeꞌ reꞌ kꞌuruꞌ ma̱sublom tak i kꞌi̱j chi xa maꞌxta ricorquil, camanok laꞌ aweh tak chi risakomsjic wach i cꞌacharic ra̱j i Dios ruꞌum nok chipam take kꞌi̱j wili yohbal wach yibel wach noꞌjbal wilic.

¹⁷Jeꞌ woꞌ, reꞌ hat-tak maꞌ chi bih aban tak chi maꞌ bano̱j ta ri̱j chi coric awuꞌum tak, reꞌ laꞌ chatijej tak ribanaric haj wilic ra̱j i kAja̱w Jesus chi na̱banam tak.

¹⁸Jeꞌ woꞌ chic, ma̱xohcꞌsaj awi̱b tak ruꞌum nok reꞌreꞌ etiricꞌam tak je pan rehreh wach cꞌahbilal, reꞌ laꞌ hat-tak chayew awi̱b tak chirehquen rajawric i Lokꞌ laj Uxlabal reh chi reꞌreꞌ enbehsenic reh acꞌacharic tak.

¹⁹Chi hat aj tak chic behsemaj ruꞌum i Lokꞌ laj rUxlabal i Dios, chayew tak ricowil acꞌux tak ru̱cꞌ rikꞌormojic on ribichjic take bi̱ch tzꞌihmbimaj take chipam i hu̱j moloj wach wi̱ꞌ take bi̱ch xibichej wach i kꞌatal kꞌoric maꞌ Tawiy. Jeꞌ woꞌ reꞌ chaꞌn tak ru̱cꞌ take toco̱m chic bi̱ch tzꞌihmbimaj take reh lokꞌonbal wach i Dios eh jeꞌ woꞌ reꞌ ru̱cꞌ take bi̱ch riyew aweh tak i Lokꞌ laj Uxlabal. Ru̱cꞌ aj take bi̱ch reꞌreꞌ chabichej tak wach i Dios eh chalokꞌej woꞌ tak wach pan awa̱mna tak.

²⁰Jeꞌ woꞌ chic xa eli̱c woꞌ chatioxej tak johtok Ajabe̱s Dios ruꞌum chi reꞌ Lokꞌ laj Ajabe̱s Jesus reꞌ Pahbamaj chi Kꞌatal Kꞌoric, xiyew chic awajawric tak chi ritioxjic take paꞌ bih nacꞌul tak ru̱cꞌ.

²¹Jeꞌ reꞌ nok chi hat-tak chic behsemaj ruꞌum i Lokꞌ laj Uxlabal, chabiraj woꞌ tak kꞌoric chawach tak maj nanaꞌn tak chi jeꞌ reꞌ nayew woꞌ tak rilokꞌil i Jesus reꞌ Pahbamaj chi Kꞌatal Kꞌoric. Reꞌ caxa̱ra chic take cꞌul quiyew quilokꞌil chi quibil qui̱b

²²Reꞌ hat-tak ehqꞌuenbe̱s maꞌ tiqꞌuic tak kꞌe̱ꞌ chiwach rajawric abahi̱l tak jeꞌ ricab naꞌn tak chi maꞌ tiqꞌuic ta tak kꞌe̱ꞌ chiwach rajawric i kAja̱w Jesus.

²³Jeꞌ reꞌ nikꞌor aweh tak maj reꞌ bahilbe̱s wilic chi nahsil china̱ i ehqꞌuenbe̱s jeꞌ ricab woꞌ nok reꞌ Jesus reꞌ Pahbamaj chi Kꞌatal Kꞌoric, wilic chi nahsil chi kana̱ i hoj chiꞌnchel aj niminel eh reꞌ woꞌ reꞌ ncoꞌlonic keh hoj reꞌ wilco̱j chi jilow ro̱k rikꞌab ruꞌ.

²⁴Jeꞌ aj ricab nok reꞌ hoj aj niminel maꞌ koj-iqꞌuic ta kꞌe̱ꞌ chiwach rajawric i Jesus reꞌ Pahbamaj chi Kꞌatal Kꞌoric, jeꞌ woꞌ reꞌ hat-tak ehqꞌuenbe̱s maꞌ chi bih tiqꞌuic tak wi̱ꞌ kꞌe̱ꞌ china̱ rajawric abahi̱l tak.

²⁵Yuꞌna reꞌ chic hat-tak bahilbe̱s, til nikꞌor aweh tak chi chacꞌax woꞌ tak awehqꞌue̱n chi coric jeꞌ ricab riwi̱ꞌ riban i Jesus reꞌ Pahbamaj chi Kꞌatal Kꞌoric ku̱cꞌ i hoj aj niminel reh. Jeꞌ reꞌ nikꞌor maj reꞌreꞌ kꞌe̱ꞌ xojricꞌax chi xikꞌahsaj ri̱b pan quimic chiki̱j i hoj nok jaꞌ nkanimej ta nak.

²⁶Ru̱cꞌ i xiban reꞌreꞌ xojricoj chi hoj chic ritinami̱t aj cꞌamol na̱ i ricꞌuhbal eh ruꞌum reꞌ xisaksaj wach kacꞌacharic jeꞌ ricab nok reꞌ paꞌ bih ntzꞌajaric wach ru̱cꞌ haꞌ ncahnic chi sak chic wach.

²⁷Reꞌreꞌ xiban woꞌ chi jeꞌ reꞌ reh chi reꞌ hoj aj niminel enkaꞌn chi hoj jenaj comonil chi tinamit lo̱kꞌ kawi̱ꞌ eh chi naco̱j rehcham chi jeꞌ hoj jenaj ehqꞌuenbe̱s cok chiwach. Maꞌ xa reꞌ ta reꞌreꞌ, naribanam laꞌ chi pan jenaj kꞌi̱j nakawihꞌic woꞌ chiwach chi jenaj comonil maꞌxta nechꞌ ok chꞌuwaꞌ laj noꞌjbal ku̱cꞌ. Naponok rikꞌijil reꞌreꞌ nakojricꞌam cok chiwach ruꞌ, nakawihꞌic chi til tzꞌiro̱j chic wach kacꞌacharic chi coric.

²⁸Jeꞌ aj reꞌ ruꞌ reꞌ hat-tak bahilbe̱s, tanlic chaweh chi chacꞌax awehqꞌue̱n tak eh chaꞌn tak jeꞌ ricab ricꞌaxaric awi̱b naꞌn tak maj reꞌ bahilbe̱s reꞌ ricꞌax i rehqꞌue̱n til chi ribil woꞌ ri̱b cꞌahchiꞌ ricꞌaxam ri̱b.

²⁹Jeꞌ reꞌ nikꞌor maj maꞌ hab ta wach cꞌacharel maꞌ ta nak ricꞌax ritiꞌjolal ribakil, riyew laꞌ chi suk ru̱cꞌ riwaꞌ riha̱ꞌ. Jeꞌ reꞌ nok nicꞌ paꞌ wach nkacꞌax ki̱b chi kibil ki̱b i hoj cꞌacharel jeꞌ woꞌ reꞌ kacꞌaxmajic i hoj aj niminel riban i Jesus reꞌ Pahbamaj chi Kꞌatal Kꞌoric

³⁰maj wilco̱j chic chi jilow ro̱k rikꞌab ruꞌ.

³¹Reꞌ noꞌjbal wili riban jenaj wach chꞌi̱l i kꞌoric tzꞌihmbimaj cho chipam riCꞌuhbal i Dios reꞌ rikꞌor chi jeꞌ wili:“Ruꞌum aj reꞌ, reꞌ winak nok rirakam chic ricꞌuꞌlil ro̱k kꞌab,naricana̱b wihꞌic chi rehquen rajawric ritu̱t raja̱weh reꞌ chic ricꞌuꞌlil naricꞌuꞌlem pa ricꞌacharic.Jeꞌ reꞌ kꞌuruꞌ nok quicꞌamam chic qui̱b pan caxarahil,reꞌ take quib chi cꞌacharel reꞌreꞌ no̱j riban chi xa jenaj chic quiwi̱ꞌ, nqui tzꞌihmbimaj cho.

³²Chipam take kꞌoric reꞌreꞌ wilic jenaj nim laj ricorquilal laj noꞌjbal cꞌolic cho, xa reꞌ laꞌ nchel, ru̱cꞌ take kꞌoric wili cꞌahchiꞌ nikꞌoric chiri̱j reꞌ xcꞌuluric ku̱cꞌ i hoj chꞌi̱l i Jesus reꞌ Pahbamaj chi Kꞌatal Kꞌoric, chi xa jenaj chic kawi̱ꞌ richꞌi̱l.

³³Jeꞌ woꞌ chic, ru̱cꞌ take kꞌoric wili nwa̱j nikꞌorom chi ajuꞌjunal hat-tak bahilbe̱s chacꞌax awehqꞌue̱n tak jeꞌ ricab ricꞌaxaric awi̱b tak naꞌn hat-tak eh reꞌ hat-tak ehqꞌuenbe̱s chayohlej woꞌ wach i abahi̱l tak.