Read Poqomchi' Filipenses 1 Bible Online

Filipenses 1 - Poqomchi' bible

Filipenses 1

¹Reꞌ hin maꞌ Lu̱ꞌ, hin raj camanom i kAja̱w Jesus jeꞌ woꞌ reꞌ i Timote̱yo reꞌ cꞌahchiꞌqui̱n rihchꞌilem. Reꞌ hin cꞌahchiꞌ nitzꞌihmbam je i hu̱j wili aweh hat-tak aj Pili̱pos reꞌ nicꞌ nimal sak chic wach acꞌacharic tak ruꞌum reh rinimjic i Jesus reꞌ Pahbamaj chi Kꞌatal Kꞌoric. Jeꞌ woꞌ, cꞌahchiꞌ nitzꞌihmbam je hu̱j wili reh chi narilmijic wach cuꞌum take cꞌamol abe̱h tak chipam niminic eh jeꞌ woꞌ cuꞌum take aj toꞌbonel queh take cꞌamol be̱h.

²Jeꞌ aj wili cꞌalenenic niban je aweh tak: Reꞌ ta nak ratoꞌbil eh jeꞌ woꞌ i sukquil cꞌuxlis riyew cho kAja̱w Dios chꞌi̱l i Lokꞌ laj Ajabe̱s Jesus reꞌ Pahbamaj chi Kꞌatal Kꞌoric, reꞌ ta nak reꞌ wihꞌok pan acꞌacharic tak. Reꞌ tioxonic riban johtok i maꞌ Lu̱ꞌ chiwach i Dios chiqui̱j take niminel aj Pili̱po

³Reꞌ hat-tak xa eli̱c woꞌ ticꞌulic tak cho pa nicꞌux naniban johtok niti̱j chiwach i kAja̱w Dios eh nitioxej johtok reh ru̱cꞌ i cꞌacharic naꞌn tak chiwach.

⁴Jeꞌ woꞌ, nanipahkaj johtok ratoꞌbil i Dios chana̱ tak, xa nsukbic woꞌ pan wa̱mna chi ti̱j chawi̱j tak

⁵ruꞌum nok xa reꞌ woꞌ apꞌutum tak cho niminic cu yuꞌna chi kꞌi̱j, reꞌ hat-tak xa cꞌahchiꞌ woꞌ akꞌorom tak i ato̱b laj kꞌoric chiri̱j i Jesus. Ru̱cꞌ naꞌn tak reꞌreꞌ, hat woꞌ tak jenaj chipam i camanic wilqui̱n wi̱ꞌ i hin.

⁶Reꞌ holohic laj camanic cꞌahchiꞌca̱t tak reꞌreꞌ, reꞌ hin til chꞌiclic nicꞌux chi reꞌ Dios reꞌ xyeꞌbic anoꞌjbal tak chi ripꞌuturic i camanic cꞌahchiꞌca̱t tak, reꞌ woꞌ reꞌ naritoꞌbonic aweh tak chi ritikiric juꞌ reꞌreꞌ cu rehtal cho i kꞌi̱j nacꞌolok cho ricaꞌpech i Jesus reꞌ Pahbamaj chi Kꞌatal Kꞌoric.

⁷Chi jeꞌ reꞌ richꞌiquinjic nicꞌux niban chiri̱j i Dios, tare̱t chi wi̱n chi naniban johtok niti̱j wilic sukquil cꞌuxlis pan wa̱mna awuꞌum tak eh jeꞌ woꞌ reꞌ, ruꞌum chi kꞌe̱ꞌ tiꞌ tiwicꞌraj tak ruꞌum chi hat woꞌ tak wich cꞌulul reh ratoꞌbil i Dios. Jeꞌ ricab i hin yuꞌna wilqui̱n pan che̱ꞌ jeꞌ ricab woꞌ xnicꞌul cho naxnisakomej wach ricꞌuhbal i Jesus chi quiwach take cꞌacharel nquikꞌihtaj qui̱b.

⁸Jeꞌ reꞌ kꞌuruꞌ reꞌ hin kꞌe̱ꞌ tiꞌ tiwicꞌraj tak eh reꞌ kAja̱w Dios til rehtꞌalim chi maꞌ chucuj kꞌoric ta niban nanikꞌor reꞌreꞌ, ruꞌum nok rilow woꞌ cho pan i wa̱mna chi til tiꞌ tiwicꞌraj tak ru̱cꞌ i rinimal ricꞌaxbal ricoj pan wa̱mna i Jesus reꞌ Pahbamaj chi Kꞌatal Kꞌoric.

⁹Ruꞌum aj reh cꞌaxo̱j reꞌreꞌ, reꞌ hin niban niti̱j chawi̱j tak chi ripahkaljic chi enqꞌuihic wach awu̱cꞌ tak i cꞌaxoj i̱b cꞌahchiꞌca̱t tak. Jeꞌ woꞌ niban niti̱j chi enwihꞌic riman anoꞌjbal tak reh chi na̱rakam tak chiri̱j chi coric chaj bih take tare̱t chi banaric

¹⁰eh chi jeꞌ reꞌ, reꞌ hat-tak etichol tak richihiric wach haj wilic take tare̱t chi banaric. Ru̱cꞌ reꞌreꞌ eticꞌacharic tak chi sak wach acꞌacharic tak chiwach i Dios reh chi jeꞌ reꞌ chipam i kꞌi̱j nacꞌolok cho ricaꞌpech i Jesus reꞌ Pahbamaj chi Kꞌatal Kꞌoric, maꞌxta bih etikꞌilmijic tak wi̱ꞌ,

¹¹ru̱cꞌ ta laꞌ nak i toꞌbonic riyew aweh tak, eta nak tirirak tak chi xa cꞌahchiꞌ woꞌ abanam tak ribanaric i holohic laj noꞌjbal ncꞌuhtunic lok wi̱ꞌ chi coric wach acꞌux tak. Chi jeꞌ aj reꞌ ti̱j niban chawi̱j tak, niban woꞌ niti̱j chi ru̱cꞌ anoꞌjbal na̱cꞌuhtam tak lok chi quiwach take tinamit naribanam chi reꞌ take reꞌ enquikꞌor chi reꞌ Dios kꞌe̱ꞌ lo̱kꞌ eh chi nim woꞌ wach i toꞌbonic riban cho. Reꞌ take cꞌaxquilal ricꞌul i maꞌ Lu̱ꞌ ruꞌum rikꞌormojic ribiral i Jesus

¹²Reꞌ chic yuꞌna was tak nicha̱kꞌ aj niminel, reꞌ hin nwa̱j nikꞌorom je aweh tak take kꞌoric wili reh chi na̱naꞌbem tak chi reꞌ nicꞌ paꞌ nimal take tiꞌcꞌaxic xnicꞌul lok, reꞌreꞌ xcamanic reh chi toco̱m chic take cꞌacharel nquichꞌica̱ꞌ quicꞌux chiri̱j i holohic laj cꞌuhbal nkꞌoric chiri̱j i Jesus.

¹³Ruꞌum aj tiꞌcꞌaxic reꞌreꞌ, reꞌ nicꞌ paꞌ qꞌuihal take quichaꞌjanic reh pa̱t nwihꞌic wi̱ꞌ ajabe̱s kꞌatal kꞌoric, chꞌi̱l take toco̱m chic aj chaꞌjanel quehtꞌalim chi reꞌ riwi̱ꞌ chi wilqui̱n pan che̱ꞌ, reꞌ chi reꞌ hin niban i cꞌuhbalanic chiri̱j Jesus.

¹⁴Jeꞌ woꞌ chic, ru̱cꞌ richoporic nicꞌux niban chiri̱j i Jesus to̱b ta pan che̱ꞌ wilqui̱n, yohbal wach take kas kacha̱kꞌ kich aj niminel wilque̱b ayuꞌ pan tinamit Ro̱ma cꞌahchiꞌ woꞌ quichꞌica̱b quicꞌux chiri̱j i toꞌbonic riban i Jesus. Reꞌ take reꞌreꞌ, maꞌ quiyoꞌjic ta chic chi quiwach take aj ixowonel wach kaniminic, til cꞌahchiꞌ laꞌ chic quikꞌorom riCꞌuhbal i Dios chi maꞌxta soꞌ quiyoꞌjic.

¹⁵Reꞌ cok ruꞌ til pa ricorquil wilic take aj niminel reꞌ ruꞌum chi til nca̱j nitobjic cꞌahchiꞌ quikꞌorom ricꞌuhbal i Jesus reꞌ Pahbamaj chi Kꞌatal Kꞌoric, xa reꞌ laꞌ wilic woꞌ take toco̱m chic aj niminel reꞌ to̱b ta nak maꞌ quiyoꞌjic ta chi rikꞌormojic cꞌuhbal chiri̱j i Jesus, xa cꞌahchiꞌ quikꞌorom i cꞌuhbal reꞌreꞌ ruꞌum chi tiꞌ quicꞌux chiri̱j nicꞌ wach camanic riban wu̱cꞌ i Dios, on ruꞌum nca̱j chi ru̱cꞌ i cꞌuhbalanic ncaꞌn, eta nak nwihꞌic wolic chi quixilac take aj niminel.

¹⁶Reꞌ take cꞌahchiꞌ quikꞌoric ricꞌuhbal i Jesus xa reh chi wolic nca̱j, reꞌ take reꞌ xa cꞌahbilal wilic cho pan ca̱mna eh ruꞌum reꞌ cꞌahchiꞌ quikꞌorom i cꞌuhbal reh nak chi enwihꞌic i wolic chi quixilac take quich aj niminel. Ru̱cꞌ nak encꞌuluric chi jeꞌ reꞌ, chi queh ruꞌ riman nak chic enoquic cho ritiꞌquilal nicꞌux ayuꞌ pan che̱ꞌ reꞌ tzꞌapalqui̱n wi̱ꞌ.

¹⁷Raj laꞌ take aj niminel jeꞌ ru̱cꞌ cꞌahchiꞌ quikꞌorom ricꞌuhbal i Jesus ruꞌum chi nca̱j nitobjic, reꞌ take reꞌ til wilic cꞌaxoj i̱b pan ca̱mna eh ruꞌum reꞌ cꞌahchiꞌ quikꞌorom ricꞌuhbal i Jesus reꞌ Pahbamaj chi Kꞌatal Kꞌoric to̱b ta chi maꞌ cꞌahchiꞌ ta chic qui̱n chi rikꞌormojic i cꞌuhbal. Jeꞌ aj reꞌ ncaꞌn maj nquirak chiri̱j chi reꞌ riwi̱ꞌ chi reꞌ hin wilqui̱n pan che̱ꞌ ruꞌum chi hin pahbamaj cho chi ricoꞌljic ri̱j i holohic laj cꞌuhbal nkꞌoric chiri̱j i Jesus.

¹⁸Jeꞌ reꞌ kꞌuruꞌ to̱b ta wilic take xa tiꞌquilal cꞌuxlis nca̱j quicojom pan wa̱mna, xa maꞌxta woꞌ bih ra̱j rikꞌorom maj to̱b ta coric queh cꞌuhbalanic ncaꞌn on to̱b ta xa banbal wi̱n ncaꞌn, reꞌ cꞌuhbal chiri̱j i Jesus reꞌ Pahbamaj chi Kꞌatal Kꞌoric cꞌahchiꞌ rikꞌormojic lok eh ruꞌum reꞌ jenaj rinimal risukquil nicꞌux nchalic. Maꞌ xa reꞌ ta yuꞌna nsukbic nicꞌux, xa narisukbic laꞌ woꞌ nicꞌux

¹⁹ruꞌum wehtꞌalim chi ruꞌum reh ati̱j naꞌn tak johtok chiwi̱j, reꞌ Lokꞌ laj Uxlabal takꞌamaj cho wi̱n ruꞌum i Jesus reꞌ Pahbamaj chi Kꞌatal Kꞌoric, naquiritoꞌbem. Chi jeꞌ reꞌ kꞌuruꞌ reꞌ nicꞌaxquilal ncojoric cho naricamanic wi̱n chi nanitobjic ruꞌum i Dios.

²⁰Jeꞌ woꞌ chic, jeꞌ ricab til wehtꞌalim chi reꞌ tiꞌcꞌaxic ncamanic wi̱n chi quintobjic ruꞌum i Dios, til chꞌiclic woꞌ nicꞌux i hin chi maꞌ ta nak chaj bih enicꞌuhtaj wi̱ꞌ niqꞌuixbilal chi ribanaric i ra̱j maꞌ ra̱j banaric. Ruꞌum aj reꞌ yuꞌna to̱b ta wilqui̱n pan che̱ꞌ, chi maꞌxta soꞌ niyoꞌjic xa nanikꞌorom woꞌ ricꞌuhbal i Jesus reꞌ Pahbamaj chi Kꞌatal Kꞌoric maj ru̱cꞌ rikꞌormojic reꞌreꞌ, til nwa̱j woꞌ chi nkꞌormojic chi kꞌe̱ꞌ nim i rilokꞌil i Jesus yuꞌna chi cu cꞌachalqui̱n on to̱b ta chi hin chic camnak je.

²¹Ruꞌum aj chi maꞌ wehtꞌalim ta wi ayuꞌ pan che̱ꞌ wilqui̱n naquinquimok je, reꞌ wili nikꞌor aweh tak: Chi wi̱n hin, reꞌ nyeꞌbic reh nicꞌacharic reꞌ woꞌ i Jesus reꞌ Pahbamaj chi Kꞌatal Kꞌoric. Jeꞌ reꞌ nok wi xinquimic je, kꞌe̱ꞌ woꞌ chic tare̱t chi wi̱n maj naniwihꞌic ru̱cꞌ i Jesus chi junpech.

²²Til coric, jeꞌ reꞌ capewenic niban eh jeꞌ woꞌ quincapewenic woꞌ chic chiri̱j i wili: Wi cu equincꞌacharic ayuꞌ ra̱j rikꞌorom chi cu equincamanic chaxilac tak chi rikꞌormojic ricꞌuhbal i Jesus. Jeꞌ woꞌ, raj rikꞌorom chi cu wilic take jeꞌ ru̱cꞌ equiniminic reh Jesus. Ruꞌum aj reꞌ maꞌ nirak ta chiri̱j haj wilic i capew-bal tare̱t chi wi̱n, wi reꞌ nchel chi cꞌachalqui̱n on reꞌ chi equinquimic je.

²³Jeꞌ reꞌ nikꞌor maj cꞌul nak ruꞌ nwa̱j i hin xa reꞌ laꞌ cꞌaxic chi wi̱n rirakmajic chiri̱j haj wilic curman chi nanibanam. Nwa̱j nak chi naniquimic reh chi equino̱j wihꞌok ru̱cꞌ i Jesus reꞌ Pahbamaj chi Kꞌatal Kꞌoric ruꞌum nok reꞌ wihꞌic ru̱cꞌ ruꞌ, kꞌe̱ꞌ nponic chi niwach chiwach chi nanicꞌacharic ayuꞌ wach acꞌal.

²⁴Tzꞌa̱b ruꞌ to̱b ta nak jeꞌ reꞌ nwa̱j i hin, curman woꞌ chi cu nanicꞌacharic ayuꞌ wach acꞌal. Reꞌ aj reꞌ ruꞌ til woꞌ ajwal wach chiwach chi equino̱j cꞌacharok ar pan taxa̱j. Jeꞌ aj nak reꞌ ruꞌ nwa̱j chi encꞌuluric wu̱cꞌ reh chi cu equincamanic chaxilac tak ruꞌum nok cu wilic ra̱j chi naca̱t nitoꞌbem tak wi̱ꞌ chipam animinic tak.

²⁵Jeꞌ reꞌ nok reꞌ hin til cow chꞌiclic nicꞌux chi cu wilic nicꞌacharic ayuꞌ wach acꞌal. Jeꞌ reꞌ niban maj wehtꞌalim chi manlic chi reꞌ riwi̱ꞌ nicahnic chꞌi̱l niwihꞌic chaxilac tak, reꞌ chi naca̱t tak nitoꞌbem reh chi reꞌ hat-tak reꞌ wilca̱t tak chipam i niminic xkacꞌuhtaj aweh tak cu enatik tak juꞌ i wihꞌic eh chi jeꞌ reꞌ cu enarak tak risukquil acꞌux tak nchalic ruꞌum i niminic wilca̱t tak wi̱ꞌ.

²⁶Jeꞌ woꞌ wilic woꞌ chic jenaj riwi̱ꞌ chi nanicahnic ayuꞌ wach acꞌal, reꞌ aj i wili riwi̱ꞌ: Chi reꞌ hin eta nak quinelic je pan che̱ꞌ, enak ti tiyoxonic tak johtok ru̱cꞌ i Dios nachawilow tak chi wilqui̱n woꞌ chic chaxilac tak. Curman chi pa ricorquil naribanjic i cꞌacharic to̱b ta nchel wilic tiꞌcꞌaxic

²⁷Was tak nicha̱kꞌ aj niminel, chalok pe chi nina̱ paꞌ bih narichalic, xa maꞌxta bih nwa̱j reh, reꞌ laꞌ curman chi reꞌ hat-tak na̱cꞌacharic tak pa ricorquilal jeꞌ ricab ricꞌul chi queh take aj niminel reh lokꞌ laj holohic laj cꞌuhbal nkꞌoric chiri̱j i Jesus reꞌ Pahbamaj chi Kꞌatal Kꞌoric. Wi jeꞌ reꞌ naꞌn tak to̱b ta equino̱j on maꞌ equino̱j cꞌolok chi awiliric tak, reꞌ hin xa nanibiram woꞌ abiral tak chi reꞌ hat-tak xa cꞌahchiꞌ woꞌ ayeb acꞌux tak chi wihꞌic pan jenaj wach cꞌuxlis chi rikꞌormojic i holohic laj tijinic hoj tijimaj wi̱ꞌ. Jeꞌ woꞌ, xa nanibiram ok woꞌ chi reꞌ hat-tak cꞌahchiꞌ woꞌ atoꞌbem awi̱b tak chipam i cow laj camanic wilco̱j wi̱ꞌ jeꞌ ricab ncaꞌn take sol chi nquitoꞌbej qui̱b naquiꞌoquic chi kꞌakꞌanic.

²⁸Reꞌ hat-tak kꞌuruꞌ cꞌul chatoꞌbej awi̱b tak eh ma̱yohbalej tak take quikꞌetbic pa̱m abe̱h tak maj reꞌ tiꞌcꞌaxic ncojoric cho chana̱ tak ncamanic xa cꞌuhtbal reh chi reꞌ Dios narisacham quiwach take cꞌacharel reꞌreꞌ wi maꞌ nquijal wach quinoꞌjbal. Maꞌ xa reꞌ ta reꞌ, reꞌ laꞌ woꞌ tiꞌcꞌaxic ncojoric chana̱ tak ncamanic chi cꞌuhtbal reh chi reꞌ hat-tak na̱coꞌljic tak eh reꞌ acoꞌlbal tak reꞌreꞌ til woꞌ reꞌ Dios nariyeꞌbic aweh tak.

²⁹Jeꞌ reꞌ kꞌuruꞌ to̱b ta nak etiquicoj tak pan tiꞌcꞌaxic take quiꞌoquic chi rikꞌeteric pan abe̱h tak, maꞌ tiyoꞌjic tak chi quiwach. Cꞌolok pan acꞌux tak chi ruꞌum reh ritoꞌbal xiyew aweh tak i Dios chi na̱camanic tak chiwach i Jesus reꞌ Pahbamaj chi Kꞌatal Kꞌoric, curman chi na̱chꞌica̱b acꞌux tak chiri̱j i Jesus chi junelic, jeꞌ woꞌ chi na̱cꞌulum tak i tiꞌcꞌaxic ruꞌum reh ritahkaljic ruꞌ

³⁰jeꞌ ricab xcꞌuluric wu̱cꞌ ru̱cꞌ i tiꞌcꞌaxic xawilow tak cho chi xnicꞌul najtir on jeꞌ ricab ru̱cꞌ i tiꞌcꞌaxic nabiraj tak chi wilqui̱n wi̱ꞌ hin yuꞌna.