Read Poqomchi' 1 Pedro 3 Bible Online

1 Pedro 3 - Poqomchi' bible

1 Pedro 3

¹Reꞌ chic hat-tak ehqꞌuenbe̱s aj niminel reh Jesus, yuꞌna til nikꞌor aweh tak chi chanimej abahi̱l tak eh reꞌ hat-tak reꞌ wilic abahi̱l tak reꞌ ru̱cꞌ maꞌ reꞌ ta aj niminel reh rikꞌorbal i Dios tiniminok woꞌ tak chi quiwach. Jeꞌ reꞌ nikꞌor aweh tak chi chaꞌn tak maj wi jeꞌ reꞌ naꞌn tak to̱b ta yuꞌna maꞌ nquinimej ta i rikꞌorbal i Dios nakꞌor tak queh, narichꞌukic woꞌ quicꞌux chi rinimjic ruꞌum i holohic laj noꞌjbal naꞌn tak.

²Jeꞌ woꞌ wi jeꞌ reꞌ naꞌn tak, naquilom chi xa sak woꞌ wach cꞌacharic naꞌn tak chi hat-tak aj niminel eh jeꞌ woꞌ chi cꞌahchiꞌ ayeb tak rilokꞌil i Dios.

³Jeꞌ woꞌ chic hat-tak chiꞌnchel ehqꞌuenbe̱s aj niminel reh Jesus til nikꞌor woꞌ aweh tak chi reꞌ axoyba̱l nacoj tak, maꞌ riban nchel chi xa chawi̱j tak wilic lok chi xa xoybal reh atiꞌjolal tak jeꞌ ricab chi xa holohic chic ritikꞌinjic rixihiric wach ana̱ tak, reꞌ ricojoric chawalak tak jeꞌ woꞌ ricojoric chaxiquin tak take kꞌan woric laj chꞌihchꞌ tikꞌimaj chi xoybal eh jeꞌ woꞌ reꞌ ricojoric take holohic laj tzꞌih xa qꞌuih chic quitzꞌakil,

⁴reꞌ laꞌ tare̱t chi reꞌ holohic laj noꞌjbal nelic cho pan awa̱mna tak wihꞌok chi axoyba̱l tak maj reꞌ riholonquilal i xoybal wili maꞌ jaruj ta sahchel wach. Maꞌeta aj nsahchic wach ruꞌ wi reꞌ anoꞌjbal tak chꞌublic wach eh wi wilic woꞌ awu̱cꞌ tak i tuklic wach cꞌuxlis reꞌ til nponic chiwach i Dios.

⁵Jeꞌ reꞌ ajic reꞌ noꞌjbal wilic cho pan awa̱mna tak wihꞌok chi axoyba̱l tak maj jeꞌ woꞌ reꞌ ritikꞌinjic qui̱b xcaꞌn cho najtir kꞌi̱j take lokꞌ laj ixok quiniminic cho reh Dios. Jeꞌ woꞌ chic, reꞌ take ixok reꞌreꞌ jenaj woꞌ cho wach quinoꞌjbal chꞌi̱l quibahi̱l chi rinimjic i Dios eh chi jeꞌ reꞌ xiniminic woꞌ chiwach quibahi̱l.

⁶Reꞌ tiꞌ Sa̱ra jeꞌ reꞌ xiban, reꞌreꞌ xinimej cho maꞌ Awraham reꞌ ribahi̱l eh cꞌuhtbal reh chi rinimej “ajabe̱s” nqui rikꞌor reh. Jeꞌ woꞌ reꞌ chaꞌn hat-tak kꞌuruꞌ maj reꞌ hat-tak xatcahnic tak chi hat-tak rixkꞌu̱n i tiꞌ Sa̱ra. Ho̱ꞌ, wi laꞌ naꞌn tak i coric laj cꞌacharic eh wi maꞌ nayohbalej tak wach ricꞌuluric i tiꞌcꞌaxic reꞌ nacꞌul tak ruꞌum rinimjic i Dios.

⁷Jeꞌ woꞌ reꞌ hat-tak bahilbe̱s, til nikꞌor aweh tak chi chasicꞌ ri̱j anoꞌjbal tak chi rirakmajic chiri̱j ricorquilal i cꞌacharic ra̱j banaric ru̱cꞌ awehqꞌue̱n tak. Coric ruꞌ, to̱b ta nchel reꞌ ricowil quitiꞌjolal quibakil maꞌ jenaj ta wach ru̱cꞌ ricowil atiꞌjolal abakil hat-tak, curman chi chayew tak quilokꞌil maj reꞌ take reꞌ awichꞌi̱l hat-tak awehcham woꞌ tak i xiban i Dios wili ruꞌum chi kojricꞌax: Chi ekojcꞌacharic chi junelic. Jeꞌ reꞌ ajic ticꞌacharok tak chi coric cu̱cꞌ reh chi maꞌ eta npitiric reꞌ xa paꞌ jaric napahkaj tak johtok pan ati̱j tak. Reꞌ noꞌjbal ra̱j banaric cu̱cꞌ take aj ixowonel

⁸Chi cohlsbal wach take xnikꞌor lok, nwa̱j nikꞌorom aweh tak i wili: Tiwihꞌok tak chawunchelal chi xa jenaj wach anoꞌjbal tak, chaquetelej awach chawibil awi̱b tak, chacꞌax take awas acha̱kꞌ tak, chaquetelej tak quiwach i toco̱m chic awich cꞌacharel eh xa chꞌu̱b ok awach tak.

⁹Wi nchel paꞌ bih jenoꞌ maꞌ coric ta laj bano̱j xbanaric aweh tak on wi xatsihtjic tak, reꞌ hat-tak ma̱ban tak chic jelow-bal, reꞌ laꞌ chaꞌn tak chapahkaj tak i cuseꞌsbal chi quina̱. Jeꞌ woꞌ, wi laꞌ xat-tzꞌujuric tak ma̱ban tak jenaj wach cu̱cꞌ, tipahkanok laꞌ tak pan ati̱j chiqui̱j take cꞌahchiꞌ quibanic aweh tak, reh chi naquicuseꞌsjic cho maj wi jeꞌ reꞌ naꞌn tak reꞌ woꞌ Dios naricuseꞌsenic aweh hat-tak.

¹⁰Jeꞌ reꞌ ajic reꞌ hat-tak chaꞌn tak i coric maj chipam i Lokꞌ laj Hu̱j reꞌ tzꞌihmbimaj wi̱ꞌ i riCꞌuhbal i Dios jeꞌ wili rikꞌor:“Wi jenoꞌ cꞌacharel ra̱j cꞌacharic chi suk ricꞌux eh ra̱j woꞌ chi enwihꞌic sukquilal pa ricꞌacharic chiwach johtok take kꞌi̱j pa ricꞌacharic,reꞌ cꞌacharel reꞌreꞌ curman chi naricana̱b rikꞌormojic take chuh laj kꞌoric eh jeꞌ woꞌ curman chi maꞌxta chic relic cho xak chi̱ꞌ rikꞌormojic i chucuj laj kꞌoric.

¹¹Jeꞌ woꞌ curman chi naresam lok pa ricapew-bal take maꞌ holohic ta laj noꞌjbal eh reꞌ chic i holohic laj noꞌjbal chiban ribanaric.Jeꞌ woꞌ chic til chiyew ricꞌux chi wihꞌic pan sukquil laj cꞌuxlis cu̱cꞌ chiꞌnchel cꞌacharel.

¹²Til jeꞌ reꞌ chiban maj reꞌ nakꞌ wach i kAja̱w wilic cho chi quina̱ take reꞌ xa coric woꞌ wach quicꞌux.Jeꞌ woꞌ, reꞌ kAja̱w xa tehlic woꞌ cho xiquin chi ribirmijic quiti̱j ncaꞌn johtok.Haj cok wilic maꞌ nponic ta chiwach i kAja̱wreꞌ i quinoꞌjbal take cꞌacharel reꞌ maꞌ coric ta wach quibaniceh reꞌ take reꞌ, chꞌiꞌc rilow take, nqui rikꞌor. Maꞌ riwi̱ꞌ ta chi nakayoꞌjic chi quiwach take aj cojol tiꞌcꞌaxic

¹³Wi reꞌ hat-tak xa reꞌ woꞌ i coric wach noꞌjbal nasicꞌ tak ribanaric, maꞌ hab ta wach naricojbic reh tiꞌcꞌaxic chana̱ tak,

¹⁴raj laꞌ wi paꞌ bih jenoꞌ tiꞌcꞌaxic nacꞌul tak ruꞌum i coric wach cꞌuxlis, kꞌe̱ꞌ je ato̱b aweh tak. Ruꞌum aj reꞌ ma̱yohbalej woꞌ tak quiwach take aj cojol tiꞌcꞌaxic chana̱ tak. Jeꞌ woꞌ maꞌ nchel riban chi xa ntꞌortꞌotic chic awa̱mna tak cuꞌum,

¹⁵reꞌ laꞌ chaꞌn tak chayew tak rilokꞌil i Jesus reꞌ Pahbamaj chi Kꞌatal Kꞌoric. Jeꞌ woꞌ chic, xa eli̱c ok tikilca̱t tak chi kꞌoric cu̱cꞌ take cꞌacharel nquipahkaj quinoꞌjbal aweh tak chiri̱j i niminic reꞌ cꞌahchiꞌca̱t tak eh nachaꞌn tak quicꞌuꞌljic tikꞌorok tak cu̱cꞌ pan chakꞌlamil eh jeꞌ woꞌ pa ricorquilal.

¹⁶Jeꞌ reꞌ ajic chaꞌn tak take holohic laj noꞌjbal reꞌ awehtꞌalim tak chi coric wach bano̱j take, reh chi jeꞌ reꞌ ru̱cꞌ take kꞌoric cꞌahchiꞌ quikꞌorlom lok take quixowonic aweh tak enelic lok quiqꞌuixbilal ruꞌum reh wolic ncaꞌn chiri̱j acꞌacharic tak ruꞌum nok hat-tak chic aj niminel reh Jesus reꞌ Ajabe̱s Pahbamaj chi Kꞌatal Kꞌoric.

¹⁷Wi nchel reꞌ Dios ra̱j chi enacꞌul tak i tiꞌcꞌaxic ruꞌum i kꞌoric naꞌn tak chiri̱j rikꞌorbal i Dios, chacꞌul woꞌ tak i tiꞌcꞌaxic nyeꞌeric chana̱ tak ruꞌum nok kꞌe̱ꞌ woꞌ chic ato̱b ricꞌulmujic i tiꞌcꞌaxic ruꞌum ribanaric take coric laj noꞌjbal, chiwach chi enacꞌul tak i tiꞌcꞌaxic ruꞌum ribanaric i cꞌahbilal.

¹⁸Jeꞌ aj reꞌ nikꞌor maj jeꞌ woꞌ reꞌ xcꞌuluric ru̱cꞌ i Jesus reꞌ Ajabe̱s reꞌ Pahbamaj chi Kꞌatal Kꞌoric chi xicꞌul i tiꞌcꞌaxic naxquimic je to̱b ta nak til woꞌ coric wach ricꞌux. Reꞌ aj riquimic reꞌ xa junpech woꞌ xicꞌul ruꞌum reh kamahc, reꞌreꞌ xcamanic chi chiꞌnchel i hoj cꞌacharel reꞌ maꞌ coric ta nak wach kacꞌux ekojwihꞌic chic ar chiwach i Dios. To̱b ta woꞌ xcansjic i Jesus, reꞌ Lokꞌ laj Uxlabal xiban chi xa cu xcꞌacharic woꞌ

¹⁹eh chi jeꞌ aj reꞌ chi xa cꞌachlic woꞌ i Jesus ruꞌum i Lok laj Uxlabal, reꞌreꞌ xo̱j cu̱cꞌ take tzꞌahpel laj uxlabal eh xicana̱ꞌ cu̱cꞌ ribiral jenaj cꞌuhbal.

²⁰Reꞌ take uxlabal wili reꞌ aj woꞌ ru̱cꞌ take cho aj najtir kꞌi̱j reꞌ maꞌ xiniminic ta cho reh rikꞌorbal i Dios chiwach take rikꞌijil cho ricꞌacharic i maꞌ Noheh. Chiwach take kꞌi̱j reꞌreꞌ nok reꞌ maꞌ Noheh cꞌahchiꞌ ritikꞌa̱b i maꞌ laj cano̱wa pa̱t riwi̱ꞌ, reꞌ Dios xuyꞌej chi reꞌ take cꞌacharel xquinimej nak rikꞌorbal xa reꞌ laꞌ maꞌ xcaꞌn ta chi jeꞌ reꞌ. Ruꞌum aj reꞌ xa maꞌ qꞌuih ta take cꞌacharel xicoꞌljic chiwach i tiꞌcꞌaxic, xa reꞌ laꞌ ti wach i wahxaki̱b chi cꞌacharel xiꞌoquic chipam i cano̱wa pa̱t riwi̱ꞌ. Reꞌ take reꞌ xicoꞌljic chiwach i buht haꞌ chiwach take kꞌi̱j naxkajic cho rinimal jab china̱ acꞌal.

²¹Reꞌ xcꞌuluric cu̱cꞌ reꞌreꞌ ncamanic keh yuꞌna chi rehtalil reꞌ ncꞌuluric wili chiri̱j i coꞌlbal i̱b cu̱cꞌ take nkahsjic quiha̱ꞌ: Nok wilque̱b pan haꞌ, reꞌ take reꞌ maꞌ reꞌ ta ritzꞌajnil quitiꞌjolal quibakil nelic lok reꞌ laꞌ ncaꞌn take reꞌ nquiyew quikꞌorbal chiwach i Dios chi nacaꞌnam i holohic laj noꞌjbal reꞌ quehtꞌalim chi coric laj bano̱j take. Jeꞌ aj woꞌ reꞌ ncaꞌn xa ruꞌum ructic woꞌ chic cho Jesus chi cꞌacharic, reꞌ Ajabe̱s Pahbamaj chi Kꞌatal Kꞌoric.

²²Reꞌreꞌ xuctic woꞌ chic chi quixilac take camnak eh chiri̱j chic ruꞌ xo̱j woꞌ chic johtok pan taxa̱j eh jeꞌ ricab i lokꞌil ricꞌul jenoꞌ cꞌacharel ntzꞌuhkic cok chi riche̱l jenoꞌ kꞌatal kꞌoric, reꞌ Jesus naxwihꞌic woꞌ chic cok ru̱cꞌ i Dios, xicꞌul woꞌ rinimal rilokꞌil chi nariwihꞌic rajawric chi quina̱ take raj tzꞌeꞌ wa̱ch i Dios ar pan taxa̱j eh jeꞌ woꞌ chi quina̱ take toco̱m chic wilic quiwaꞌric on quitakꞌanic ar pan taxa̱j.