Read Poqomchi' Apocalipsis 18 Bible Online

Apocalipsis 18 - Poqomchi' bible

Apocalipsis 18

¹Chiri̱j take wili, xwilow woꞌ chic jenaj raj tzꞌeꞌ wa̱ch i Dios kꞌe̱ꞌ nimal rajawric, xkajic cho pan taxa̱j eh naxchalic til xa nsakomonic chic i wach acꞌal xiban ru̱cꞌ risakomil.

²Reꞌreꞌ xa cow chic quiqꞌuer quichi̱ꞌ chi jeꞌ wili:«Narisahchic chic wach i maꞌ laj tinamit Wawilo̱nya!Yuꞌna naricahnic chi quipatbal chic take raj toꞌo̱l aj Yahmeh jeꞌ woꞌ quiyeꞌa̱b chic take maꞌ tob laj uxlabal.Ar chipam i tinamit reꞌreꞌ nacaꞌnam woꞌ quike̱s take tzꞌiquin jeꞌ ru̱cꞌ chaweh hat-tak ra̱ꞌ riꞌsil cho maꞌ Israhel yibel quiwacheh maꞌ kꞌoro̱j ta woꞌ quibihnal chi tare̱t chipam Cꞌuhbal Yeꞌo̱j cho reh Moyses.

³Jeꞌ reꞌ naricꞌulum i tinamit reꞌreꞌ ruꞌum chi reꞌreꞌ xcꞌambic quibe̱h take chiꞌnchel nimak tak tinamitchi xquicana̱ꞌ rilokꞌonjic wach i Dios xa jeꞌ na ricab xixohcꞌsaj take tinamit chi quicꞌamaric je take pan cꞌoyomal.Jeꞌ reꞌ ajic reꞌ take kꞌatal kꞌoric ayuꞌ wach acꞌal xcaꞌn i cꞌahbilal jeꞌ ricab chi cꞌahchiꞌ ta nak caꞌnam i cꞌoyomal.Jeꞌ woꞌ, reꞌ take aj yaco̱l chi junsut wach acꞌal xcaꞌn woꞌ i cꞌahbilal ru̱cꞌ ribihomsjic qui̱b xcaꞌn.Jeꞌ reꞌ nikꞌor maj reꞌ take reꞌ xquicꞌoꞌnej quibihomal ru̱cꞌ rilokꞌoric take xa paꞌ bih jaric maꞌ curman ta woꞌ nak chi queh, nqui xikꞌor.

⁴Chiri̱j ruꞌ xnibiraj woꞌ chic chi jenaj xkꞌoric cho ar pan taxa̱j chi jeꞌ wili cꞌahchiꞌ rikꞌorom:«Reꞌ hat-tak nitinami̱t telen tak cho chipam quitinamital take aj Wawilo̱nya.Ma̱ban aweh tak i mahc ncaꞌn ruꞌ reh chi maꞌxta acꞌulum aweh tak take tiꞌcꞌaxic chalic reh chi quina̱.

⁵Reꞌ quimahc i tinamit wili kꞌe̱ꞌ woꞌ chic qꞌuihal chi eta nak ntusuric wach chiꞌnchel,cu enak rirak i rinahtil johtok na̱ taxa̱j.Ruꞌum aj reꞌ chalic reh i tiꞌcꞌaxic chi quina̱maj reꞌ Dios maꞌ iqꞌuinak ta pa ricꞌux nicꞌ paꞌ nimal i maꞌ holohic ta laj bano̱j xcaꞌn, nqui wi̱n.

⁶Ar aj ruꞌ reꞌ take takꞌamaj cho chi riyeꞌeric i tiꞌcꞌaxic chi quina̱, jeꞌ wili xkꞌormojic queh:Chaꞌn tak cho jelow-bal i tiꞌcꞌaxic xiban queh take toco̱m.Reꞌ cok ruꞌ caꞌpech ok chic johtonak wach ransil rijelow-bal i tiꞌcꞌaxic chaꞌn tak queh chiwach xcaꞌn ruꞌ.Chayew tak jenoꞌ rinimal ritiꞌquil ricꞌux xa jeꞌ ricab chi cꞌahchiꞌ ta nak atikꞌa̱b tak jenoꞌ riha̱ꞌ chi caꞌpech iqꞌuinak na̱ ricꞌahil chiwach xiyew queh toco̱m.

⁷Reꞌ take cꞌacharel wilque̱b chipam i tinamit reꞌreꞌkꞌe̱ꞌ woꞌ chic xquinimsaj qui̱b eh kꞌe̱ꞌ sukquilal i xicꞌacharic wi̱ꞌ.Jeꞌ ricab rinimal wach noꞌjbal xcaꞌn reꞌreꞌ,jeꞌ ok woꞌ reꞌ rinimal wach okꞌic chꞌi̱l rinimal wach tiꞌcꞌaxic chacoj chi quina̱.Jeꞌ woꞌ chic, reꞌ take reꞌ jeꞌ wili nquikꞌor pan quicꞌux: ‘Reꞌ katinamital wilic rajawric chi quina̱ chiꞌnchel tinamit eh jeꞌ ricab chi maꞌxta bih jenoꞌ tiꞌ rilow wach jenoꞌ maꞌ reꞌ ta cahnel ixok, maꞌxta woꞌ kilom wach jenoꞌ tiꞌcꞌaxic, nqui xquikꞌor.

⁸«Chi jeꞌ aj reꞌ xa chiwach ti jenaj kꞌi̱j reꞌ tiꞌcꞌaxic wili narichalic chi quina̱:Reꞌ tiꞌquil cꞌuxlis, reꞌ cꞌahric, reꞌ quimic chꞌi̱l i cꞌahtic pan kꞌa̱kꞌ.Jeꞌ reꞌ ruꞌ naricꞌulum maj reꞌ Dios reꞌ kꞌe̱ꞌ woꞌ chic rinimal wach rajawric narichꞌukum kꞌoric china̱.

⁹«Chi jeꞌ reꞌ kꞌuruꞌ, reꞌ aj wili naricꞌuluric ru̱cꞌ i tinamit Wawilo̱nya reꞌreꞌ: Reꞌ take kꞌatal kꞌoric ayuꞌ wach acꞌal reꞌ xcaꞌn jenaj wach cꞌuxlis ru̱cꞌ aj Wawilo̱nya chi xcaꞌn i cꞌahbilal eh jeꞌ woꞌ chi xcaꞌn i cꞌoyomal, reꞌ take reꞌ nacokꞌic ruꞌum ritiꞌquilal quicꞌux chiri̱j i tinamit reꞌreꞌ naquilow i risibil cꞌahchiꞌ rijohtic ruꞌum reh i cꞌahtic cꞌahchiꞌ ricꞌulum.

¹⁰Nacaꞌn chi jeꞌ reꞌ, xa cu naht woꞌ naquipahba̱b je qui̱b chi rilmijic i cꞌahchiꞌ ricꞌulum i tinamit Wawilo̱nya ruꞌum quiyoꞌjic naroquic cho chi ewoꞌ nquicꞌul queh i tiꞌcꞌaxic xchalic china̱ i tinamit reꞌreꞌ. Chi jeꞌ reꞌ, jeꞌ wili kꞌoric cꞌahchiꞌque̱b:‘Kꞌe̱ꞌ je quetal awach, kꞌe̱ꞌ je quetal awach i hat maꞌ laj tinamit Wawilo̱nya.Coric ruꞌ xa yohbal woꞌ nak chic wach awaꞌric naꞌn awi̱bxa reꞌ laꞌ xa ru̱cꞌ ti juncꞌam xchalic tiꞌcꞌaxic chana̱, nqui naquikꞌorom.

¹¹«Jeꞌ woꞌ, reꞌ take aj yaco̱l quichalic chi junsut yu̱kꞌ qꞌuixca̱b nacokꞌic woꞌ ruꞌum ritiꞌquilal quicꞌux chiri̱j tinamit reꞌreꞌ maj maꞌ hab ta chic wach narilokꞌo̱j reh quicꞌa̱y ar chipam i tinamit Wawilo̱nya. Reꞌ quicꞌa̱y take reꞌ, reꞌ take wili:

¹²Reꞌ kꞌan woric laj chꞌihchꞌ, reꞌ sak laj chꞌihchꞌ, chꞌi̱l take holohak laj abaj qꞌuih quitzꞌakil, chꞌi̱l i holohic laj abaj “Pe̱rla” ribihnal, chꞌi̱l woꞌ take sak laj tzꞌih, cak laj tzꞌih, chꞌi̱l take tzꞌih cꞌul kꞌe̱ꞌ sakom chipam eh chꞌi̱l woꞌ take cak moyic laj tzꞌih jeꞌ ru̱cꞌ kꞌe̱ꞌ qꞌuihal quitzꞌakil. Jeꞌ woꞌ nquicꞌayej take ncꞌohnic laj tzꞌilom eh jeꞌ woꞌ take xa paꞌ bih tikꞌimaj take ru̱cꞌ ba̱k, ru̱cꞌ qꞌuih tzꞌa̱k laj che̱ꞌ, qꞌuih tzꞌa̱k laj chꞌihchꞌ chꞌi̱l woꞌ take paꞌ bih tikꞌimaj ru̱cꞌ sak laj abaj.

¹³«Jeꞌ woꞌ, maꞌ hab ta chic wach narilokꞌo̱j reh quicꞌa̱y take wili: Reꞌ take ri̱j tak che̱ꞌ yeꞌbal ricꞌohonquil haꞌ, reꞌ take ncꞌohnic laj ikꞌo̱m chꞌi̱l woꞌ se̱nsa. Jeꞌ woꞌ take ncꞌohnic laj ikꞌo̱m ncojoric wach tzꞌih, jeꞌ woꞌ take latzbal che̱ꞌ chꞌi̱l i cꞌah laj haꞌ nxohcꞌsonic eh chꞌi̱l woꞌ i yolic laj ikꞌo̱m. Maꞌ xa ta reꞌreꞌ, jeꞌ woꞌ take holohic laj rikꞌoril caxlan wiꞌc chꞌi̱l ixi̱m, jeꞌ woꞌ take aj ihkom laj chicop chꞌi̱l take me̱ꞌ, take cawa̱y, take behsbal, take cꞌacharel quicꞌayjic chipam cow laj camanic eh chꞌi̱l woꞌ take sol cꞌayamaj take chi reh kꞌakꞌanic.

¹⁴Ruꞌum aj reꞌ, reꞌ take cꞌacharel reꞌreꞌ jeꞌ wili naquikꞌorom reh maꞌ laj tinamit Wawilo̱nya:‹Chiꞌnchel i nicꞌ paꞌ nimal xayew wi̱ꞌ acꞌux chi nariwihꞌic aweh maꞌxta chic awilom wach.Ayuꞌ xcahnic suk laj cꞌacharic nponic chawach eh xkꞌehbic woꞌ abihomal chi junpech, nqui naquikꞌorom.

¹⁵«Jeꞌ reꞌ kꞌuruꞌ reꞌ take aj yaco̱l reꞌreꞌ, reꞌ xibihomric ru̱cꞌ i cꞌa̱y ncaꞌn ru̱cꞌ i tinamit Wawilo̱nya nacokꞌic chi xa tiꞌ chic pan quicꞌux eh ruꞌum quiyoꞌjic chi ewoꞌ nchalic tiꞌcꞌaxic chi quina̱ i xchalic chi quina̱ i tinamit reꞌreꞌ xa cu naht chic naquipahꞌic je chi rilmijic reꞌ xicꞌul i tinamit reꞌreꞌ.

¹⁶Jeꞌ aj wili naquikꞌorom naquipahꞌok chi rilmijic:‹Reꞌ maꞌ laj tinamit Wawilo̱nya xa jeꞌ na ricab jenaj ixok reꞌ xa holohic chic risoꞌ ricoj chiri̱jjeꞌ ru̱cꞌ tikꞌimaj ru̱cꞌ sak laj tzꞌih, on cak laj tzꞌih, on ru̱cꞌ tzꞌih cꞌul kꞌe̱ꞌ sakom chipameh rixoyej woꞌ ri̱b ru̱cꞌ kꞌan woric laj chꞌihchꞌ,jeꞌ woꞌ reꞌ ru̱cꞌ holohak laj abaj qꞌuih quitzꞌakil.Coric ruꞌ chi je nak reꞌ ritikꞌinjic ri̱b riban,xa reꞌ laꞌ yuꞌna kꞌe̱ꞌ je quetal wach i maꞌ laj tinamit reꞌreꞌ

¹⁷maj xa ru̱cꞌ ti juncꞌam xsahchic wach i ribihomal nak wilic reh, nqui naquikꞌorom. «Jeꞌ woꞌ, reꞌ take nicꞌ paꞌ nimal quitakꞌanic chipam i nimak tak cano̱wa chꞌi̱l woꞌ take aj behsenel reh, chꞌi̱l woꞌ chiꞌnchel take quicamanic na̱ haꞌ xa cu naht woꞌ naquipahba̱b cho qui̱b

¹⁸naquilow rijohtic risibil i maꞌ laj tinamit Wawilo̱nya chi cꞌahchiꞌ ricꞌahtic eh ru̱cꞌ reꞌreꞌ jeꞌ wili naquikꞌorom: ‹Haj chic enchalic jenoꞌ tinamit jeꞌ ricab rilokꞌil i maꞌ laj tinamit wili, nqui naquikꞌorom.

¹⁹«Chi rehtalil aj chi wilic jenaj rinimal tiꞌquil cꞌuxlis cu̱cꞌ take cꞌacharel reꞌreꞌ, naquipokem poklaj pan quina̱ eh nacoquic chi okꞌic chi xa jeꞌ chic wili naquikꞌorom:‹Kꞌe̱ꞌ je quetal wach i maꞌ laj tinamit wilimaj to̱b ta xa ru̱cꞌ ribihomal xibihomric take aj ehcham nimak tak cano̱wa china̱ rinimal haꞌ,xa chi juncꞌam woꞌ ti xsahchic wach ribihomal, nqui naquikꞌorom.

²⁰«Jeꞌ reꞌ nok reꞌ hat-tak wilca̱t tak ar pan taxa̱j sukbok acꞌux tak chi reꞌ tinamit reꞌreꞌ xicꞌul chic ritiꞌcꞌaxic.Sukbok woꞌ acꞌux hat-tak lokꞌ laj ritinami̱t i Dios,jeꞌ woꞌ hat-tak pahbamaj chi nahsil cꞌamol quibe̱h aj tahkanel reh Dios, chꞌi̱l woꞌ hat-tak aj kꞌorol riCꞌuhbalmaj reꞌ tiꞌcꞌaxic xchalic china̱ tinamit reꞌreꞌ xchalic chi yeꞌbal jelow-bal i tiꞌcꞌaxic ribanam cho aweh tak,nqui xkꞌormojic queh take takꞌamaj chi nariyeb i tiꞌcꞌaxic chi quina̱ take aj Wawilo̱nya.

²¹Chiri̱j chic ruꞌ, cꞌuhtbal reh chi reꞌ tiꞌcꞌaxic narichalic china̱ i maꞌ laj tinamit Wawilo̱nya, ar aj ruꞌ jenaj raj tzꞌeꞌ wa̱ch i Dios reꞌ kꞌe̱ꞌ nimal wach rajawric xichop cho jenaj maꞌ laj abaj jeꞌ ricab nimal jenaj maꞌ laj queꞌbal ixi̱m eh xicut jok chipam rinimal haꞌ chi jeꞌ wili cꞌahchiꞌ rikꞌorom:«Jeꞌ ricab sahchic wach xiban abaj wili jeꞌ woꞌ reꞌ narisahchic awach i hat-tak cꞌacharel reh maꞌ laj tinamit Wawilo̱nya.Nachacꞌul tak jeꞌ reꞌ, maꞌ jaruj ta chic narilmijic awach tak

²²eh maꞌ woꞌ jaruj ta chic naribirmijic chipam atinami̱t taktake bi̱ch nbanjic ru̱cꞌ a̱rpa, nbanjic ru̱cꞌ su̱b, jeꞌ woꞌ reꞌ ru̱cꞌ take caxlan su̱b.Jeꞌ woꞌ, maꞌ jenoꞌ chic camanom naricamanic awu̱cꞌ takeh maꞌ woꞌ eta chic nbirmijic i ahnic riban i abaj queꞌbal wach ixi̱m.

²³Jeꞌ woꞌ chic, maꞌ jenoꞌ chic sakombal narikopic chipam ayeꞌa̱b takeh maꞌxta woꞌ chic quiyeb quikꞌorbal take aj caxa̱ra chipam take ninkꞌi̱j reh caxarahil.Nicꞌ paꞌ nimal kꞌoro̱j wili til naricꞌuluricmaj reꞌ take awaj yaco̱l tak xquinimsaj qui̱b ruꞌum chi kꞌe̱ꞌ woꞌ chic quiwaꞌricchiwach take toco̱m chic cꞌacharel ayuꞌ wach acꞌaleh jeꞌ woꞌ ruꞌum chi xajotꞌ tak quicapew-bal take tinamit wach acꞌal naxacꞌuhtaj tak queh i waranic i naꞌn tak, nqui raj tzꞌeꞌ wa̱ch i Dios.

²⁴Jeꞌ aj reꞌ riwi̱ꞌ kꞌuruꞌ, xinwilow i hin nok china̱ i maꞌ laj tinamit Wawilo̱nya til chalic reh i rinimal tiꞌcꞌaxic eh jeꞌ reꞌ naricꞌuluric ru̱cꞌ maj chipam ruꞌ wilque̱b take cꞌacharel reꞌ xicansanic queh take aj kꞌorol riCꞌuhbal i Dios eh queh take aj niminel reh Dios reꞌ take lokꞌ laj ritinami̱t. Jeꞌ woꞌ chic ruꞌum reh take aj Wawilo̱nya wili xicansjic take riqꞌuihal cꞌacharel reh toco̱m chik yu̱kꞌ qꞌuixca̱b ayuꞌ wach acꞌal.