Read Poqomchi Gen 1 Bible Online

Gen 1 - Poqomchi bible

Gen 1

¹Noq komajaa' chii wilik, re' QaJaaw Dios peet xutz'uhkrisaj i taxaaj ruch'ihil i wach ak'al.

²Eh re' wach ak'al xama' nk'utinik ta naq nik' wach noq wilik, eh ma' xta wo' naq i wilik chupaam. Xa jinaj naq chi runimaal ha', xa jinaj chi runimaal q'equm. Xa re' naq i Ruxlab'al i QaJaaw Dios k'ul inooj chinaah i ha'.

³Re' i QaJaaw Dios je' wili xuq'or: Wih-oq i saqum, inki. Eh xwihik wo' lom i saqum.

⁴Eh xrilow i QaJaaw Dios chi ma' xta reet i saqum. Chi q'atb'al paam, pareh xuyeew i saqum. Pareh xuyeew i q'equm.

⁵Re' saqum, pan q'iij i rub'ihnaal xukoj. Eh re' q'equm chaq'ab' i rub'ihnaal xukoj. Re' taqe wili xub'an pampeet q'iij.

⁶Chi riij i re', je' wili i xuq'or i QaJaaw Dios: Wih-oq chik jino'q i ye'aab' reh chi nee nuch'aq i ha' wilik wach ak'al, inki. Eh xkorjik wo' hoq aha' wilik i xuq'or.

⁷Eh xuyejaa' wo' hoq i ye'aab' re' re', ch'aqb'al reh i ha'. Wilik i xuyeew chi ri'sil i ye'aab' re' re', eh wilik i xuyeew chinaah.

⁸Eh re' i ye'aab' re' re', pan taxaaj i rub'ihnaal xukoj. Eh re' taqe wili xub'an chupaam i rukab' q'iij.

⁹Eh re' QaJaaw Dios je' wo' chik wili i xuq'or: Re' ha' wilik wach ak'al xa jinaj chumol wii' riib', reh chi pareh neenkahnik i chiqiij laj ak'al, inki. Eh xub'an wo' hoq aha' wilik i xuq'or.

¹⁰Re' QaJaaw Dios aha' ma' xta wii' i ha', ak'al i rub'ihnaal xukoj. Eh re' i xumol wii' riib' i ha' palaw i rub'ihnaal xukoj. Eh noq xrilow i QaJaaw Dios chi q'e' holohik taqe i xub'an re' re'.

¹¹Xuq'or chi naa ruwihiik chu'nchel i raxch'ahn chinaah i wach ak'al. Je' wo' taqe i chee' wilik rija'eel, eh chi naa wo' kiwihiik taqe i chee' kiwachinik. Eh xkorjik wo' hoq aha' wilik taqe i xuq'or.

¹²Eh xipoq' wo' hoq chinaah i wach ak'al chu'nchel i rax ch'ahn, je' wo' taqe i chee' wilik kija'eel, je' wo' taqe i chee' kiwachinik. Eh re' QaJaaw Dios xrilow chi q'e' holohik taqe i xuyejaa'.

¹³Re' taqe re' xub'an chupaam i roox q'iij.

¹⁴Chi riij i re', re' QaJaaw Dios je' wili i xuq'or: Wih-oq taqe i saqum pan taxaaj q'atb'al paam i q'iij ruuk' i chaq'ab'. Eh nee wo' kikamanik chi q'atb'al paam siq'jil q'iij, ruuk' i jab' q'iij, je' wo' hoq i ju'jun chi q'iij, je' wo' hoq i ju'jun chi haab',

¹⁵reh wo' chi neekisihq'inik pan taxaaj, eh nee wo' kisihq'inik wach ak'al, inki. Eh je' wo' re' xub'an i QaJaaw Dios.

¹⁶Je' aj re' noq re' i QaJaaw Dios xuyejaa' i kiib' chi saqum, re' i xti nimlaj saqum reh chi nsihq'inik pan q'iij, eh re' i saqum ma' q'e' ta saqum wach reh chi nsihq'inik chaq'ab'. Eh xuyejaa' wo' taqe i ch'umiil.

¹⁷Re' taqe re' xukoj i QaJaaw Dios pan taxaaj reh chi xisihq'inik cho chinaah i wach ak'al,

¹⁸pan q'iij, eh reh chi xisihq'inik cho chaq'ab', reh chi pareh xkahnik i saqum, pareh xkahnik i q'equm. Re' QaJaaw Dios xrilow chi q'e' holohik taqe i xuyejaa'.

¹⁹Re' taqe re' xub'an chupaam i rukaaj q'iij.

²⁰Chi riij i re', re' QaJaaw Dios je' wili i xuq'or: Wih-oq taqe i chikop chupaam taqe i ha', je' wo' taqe i chikop kirupinik pan taxaaj, inki. Eh xkorjik wo' taqe i xuq'or.

²¹Re' i QaJaaw Dios xutz'uhkrisaj taqe i nimaq taq kar ti yo'joq kuum, je' wo' taqe i xa chib'ih chopkaal wilkeeb' pan palaw. Eh xutz'uhkrisaj wo' taqe i xa chib'ih chopkaal kirupinik pan taxaaj. Eh noq xrilow i QaJaaw Dios chi q'e' holohik taqe i xuyejaa',

²²xukuxisaj ruuk' taqe i q'orik wili i chikop: Wih-oq taq k'ih-oq aha'lak'uun korehtaal taq inanujisaj paam taqe i palaw. Eh korehtaal wo' kik'ihaaxb'iik chi junsuut i wach ak'al taqe i chikop kirupinik.

²³Re' taqe re' xub'an chupaam i roo' q'iij.

²⁴Chi riij i re', re' QaJaaw Dios je' wili i xuq'or: Wih-oq chinaah i wach ak'al chu'nchel i chikop, re' taqe i xa ruuk' paat naa kiwihiik, re' taqe i josq'laj chikop, je' wo' taqe i xa kijukem kiib' noq kib'ehik, inki. Eh xkorjik wo' taqe aha' wilik i xuq'or.

²⁵Re' QaJaaw Dios, je' re' noq xutz'uhkrisaj chaloq chu'nchel i chikop re' re'. Eh xrilow chi q'e' holohik taqe i xuyejaa'.

²⁶Chi riij i re', je' wili i xuq'or i QaJaaw Dios: Yu'naak qayejaa' i winaq chi je' qawii' i hoj, reh chi nee nwihik rajaawriik chikinaah taqe i kar, chikinaah taqe i chikop kirupinik pan taxaaj. Eh je' wo' chikinaah taqe chikop xa ruuk' paat naa kiwihik, chikinaah taqe josq'laj chikop, chikinaah i chikop xa kijukem kiib' noq kib'ehik.

²⁷Eh noq xuyejaa' i winaq i QaJaaw Dios, xuyejaa' chi je' ruwii' i reh, jinaj winaq, eh jinaj ixoq xuyejaa' chaloq.

²⁸Xukuxisaj taqe, je' wili i xuq'or keh: Wih-oq taq k'ih-oq awak'uun awixq'uun, korehtaal taq inanujisaj i wach ak'al. Eh naa wo' taq awihiik chi taaq'anik, naa taq ruwihiik awajaawriik chikinaah kar, chikinaah taqe chikop kijukem kiib' noq kib'ehik, inki.

²⁹Chi riij i re', je' wili i xuq'or keh: Re' hin naa taq nuye'em aweh i ch'ahn inkiyeew kija'eel, je' wo' chu'nchel i chee' kiwachinik. Eh chu'nchel taqe re' naa rukamaniik chi k'uxumb'al taq aweh.

³⁰Eh re' taqe i josq'laj chikop, taqe i chikop kijukem kiib' noq kib'ehik, taqe i xa chib'ih tz'inkaal, re' taqe rax ch'ahn naa nuye'em chi k'uxumb'al keh, inki. Eh je' wo' re' i xub'an.

³¹Re' QaJaaw Dios, xrilow chi chu'nchel i xub'an q'e' holohik. Re' taqe re' xub'an chupaam i ruwaaq q'iij.