Read Poqomchi Gen 13 Bible Online

Gen 13 - Poqomchi bible

Gen 13

¹Eh noq xelik chaloq i Abram ar Egipto, xchalik wo' chik chupaam i ye'aab' Neguev ruch'ihil i rehk'een, Sarai, kuch'ihil i rikaaq' Lot, eh xuk'am wo' taqe chaloq chu'nchel i chib'ih reh.

²Re' Abram yohb'aal wach i rub'ehomal xwihik, chi je' plata, chi je' oro, eh ma' k'isiin wo' taqe i ruchikoop.

³Eh q'uun q'uun wo' chik ruk'uliik iloq chupaam i ye'aab' Neguev korehtaal k'uloq chupaam i tinamit Bet-el. Eh xk'uloq wo' chik aha' xwihik wii' pampeet panyejaal i Bet-el ruuk' i ye'aab' Hai.

⁴Re' wo' hoq i ye'aab' re' re' xuyejaa' cho wii' i Abram jinaj i artaal re' ruuk' tusuj ab'aj, ar xupahqaaj i rotob'il i QaJaaw Dios.

⁵Re' Lot i ruch'ilhil i Abram, ma' k'isiin rutentzuun, rati't wakax, rumoso eh ru-itz'ihy naah paat xwihik i reh.

⁶Re' ye'aab' xi wihik wii' xama' manlojik ta naq chik i ruwa' i kichikoop, ruum xiik' naah kik'ihaal. Je' re' noq, xama' suq ta naq chik inki a'n noq jinaj wilkeeb' wii'.

⁷Eh re' incha'jinik reh taqe i ruchikoop i Abram inkitik'aa' peleto kuuk' taqe incha'jinik reh taqe i ruchikoop i Lot, ruum chi lahtz' paam i ye'aab' re' re'. Ar wo' wilkeeb' taqe aj cananeo, je' wo' taqe i aj ferezeo.

⁸Eh re' Abram je' wili i xuq'or reh i Lot: Re' hat quuk' qiib' awuuk', ma' ruk'ul ta chi neenqatik'aa' peleto chi qawach. Ma' ruk'ul ta wo'-oq chi neenkitoq'aa' peleto incha'jinik keh taqe aachikoop i hat, kuuk' i kicha'jinik keh taqe nu chikoop i hin.

⁹Re' ye'aab' ma' k'isiin nimaal, re' hat inchol asik'im wach aha' nee tiooj. Wila' xat'ooj pantz'eet ree ookb'al q'iij, re' hin nee kinooj pansak'aaj ree rookb'aal q'iij. Eh wila' re' hat xat'ooj pansak'aaj ree rookb'aal q'iij, re' hin neekinooj pantz'eet ree rookb'aal q'iij.

¹⁰Eh re' Lot xrilow reje chu'nchel i k'ixkaab' inik'ik wii' i nim ha' Jordán. Eh xrilow wo' reje wach i k'isa tinamit Zoar, rilow reje ye'aab' chi ma' k'isiin i ha' wilik chupaam, xa je' chik rukab' i ye'aab' tikb'al uhtz'ub', je' wo' rukab' Egipto. Re' QaJaaw Dios majaa' naq i rusach wach i tinamit Sodoma, i Gomorra.

¹¹Eh re' Lot re' k'ixkaab' inik'ik wii' i nim ha' Jordán xusik' wach. Ar xooj pareelb'aal q'iij reh i ye'aab' wilik naq wii'. Je' aj wili noq xuch'aq riib' i Abram ruuk' i rikaaq' Lot.

¹²Re' Abram ar xkahnik chi patinik chupaam i ye'aab' Canaán. Eh re' Lot reh, ar xooj chi patinik wach k'ixkaab', re' wilkeeb' wii' i taqe i tinamit, ma' najt ta ruuk' i Sodoma, ar xkiyejaa' i ki-itz'ihy naah paat aha' xi kahnik wii'.

¹³Re' taqe tinamit wilkeeb' ar, xiik' naah yib'kiil wach i kina'ojb'al, eh yohb'aal wach yib'kiil wach i mahk inki a'n chuwach i QaJaaw Dios.

¹⁴Eh noq ojinaq chik i Lot chi rutkeel, re' QaJaaw Dios je' wili i xuq'or reh i Abram: Chupaam i ye'aab' wilkaat wii' chawilow reje pansak'aaj ree rookb'aal q'iij, pantz'eet ree rookb'aal q'iij, parookb'aal q'iij, panreelb'aal q'iij.

¹⁵Chu'nchel i ye'aab' inawil reje wach naa nuye'em aweh i hat chi juneliik, eh naa wo' nuye'em keh awiih aamaam.

¹⁶Re' hin naa nuk'ihaaxb'isam taqe awiih aamaam korehtaal kiponik chi je' kik'ihaal i saniib' wilkeeb' wach ak'al. Nik' wach noq ma' awach ta neenkuywik rajaljiik i saniib', je' wo' re' noq ma' awach ta naa rukuywiik rajaljiik taqe awiih aamaam.

¹⁷Je' re' noq, hiy chi patinik chupaam chu'nchel i ye'aab' re' re', ruum re' hin naa nuye'em aweh, inki.

¹⁸Re' i Abram xujal wo' ruye'aab' i ru-itz'ihy naah paat. Ar chik xooj chi patinik chinaah i yuuq' wilik wii' taqe i chee' tz'inuj, wilik paruye'aab' i winaq Mamre, ma' najt ta ruuk' Hebrón. Re' Abram ar xuyejaa' jinaj i artaal ye'b'al ruloq'il i QaJaaw Dios.