Read Poqomchi Gen 16 Bible Online

Gen 16 - Poqomchi bible

Gen 16

¹Re' Sarai ma' nwihik ta naq ruha'lak'uun ruuk' i rub'ahiil, Abram. Xa re' la' jinaj i rajpooh xwihik Agar rub'ihnaal aj Egipto.

²Re' i Sarai je' wili i xuq'or reh i rub'ahiil: Re' QaJaaw Dios ma' ruyeew ta q'ab' chi nwihik aha'lak'uun wuuk', re' hin i nupahqaaj otob'il aweh chi chak'am chi awixoqil i wajpooh Agar. Nee oon naq inche inwihik aha'lak'uun ruuk' nee naq inkahnik chi weh, inki. Eh re' Abram xuk'ulaa' i xq'orarik reh.

³Eh noq lajeeb' chik haab' kiponiik chi patinik chupaam i ye'aab' Canaán re' Sarai xuk'am chaloq i Agar aj Egipto xuq'asaj chi rixoqil i rub'ahiil.

⁴Eh re' Abram xwirik ruuk' i Agar, eh xkahnik wach k'acharik, noq xrilow i Agar chi wach k'acharik chik wilik. Ma' suq ta chik rilariik i rupatroon ixoq i rub'an.

⁵Re' Sarai je' wili i xuq'or reh i Abram: Amahk i hat k'ahchi' nuk'ulum i ti' k'axik. Re' hin xin ye'wik aweh chawixoqil i wajpooh Agar, eh xa ruum chi naa raasjiik aha'lak'uun ruuk', ma' suq ta chik wilariik i rub'an. Xa re' la', re' QaJaaw Dios naa ruq'oriik awach i wilik ru mahk, mi re' hat, oon re' hin, inki.

⁶Re' Abram je' wili i chaq'wik xub'an: Re' awajpooh panaq'ab' wilik, cha a'n ruuk' nik' wach i ruk'ul cha weh i hat, i nuchjik. Noq xrib'iraj chi je' re' i Sarai, xtohq'ik rub'anam ti' k'axik reh i Agar, korehtaal xelik reje chuwach.

⁷Eh noq xponik i Agar chupaam i ye'aab' chiq yuuq' chi chii' i k'achlik jul ha' chupaam i b'eeh inooj pan tinamit Shur, ar xreqarik ruum jinaj i ruánjel i QaJaaw Dios.

⁸Re' i ánjel xupahqaaj reh chi je' wili: Agar, hat rajpooh i Sarai ¿Aha' xat chalik, eh aha' tiooj? inki reh. Re' hin elik i nub'an chuwach i nupatroon ixoq, inkinoq chaq'wik i Agar.

⁹Re' i ruánjel i QaJaaw Dios, je' wili i xuq'or reh i Agar: Yu'naak ti sutinoq reje ruuk' apatroon ixoq, eh cha nimaj chu'nchel i nee ruq'or aweh, inki reh.

¹⁰Eh re' ruánjel i QaJaaw je' wili i xuq'or reh: Re' hat yohb'aal wach kik'ihaal aawiih aamaam naa ruwihiik, eh ma' awach ta naa rukuywiik rajaljiik.

¹¹Chakoj rehtaal noq yu'naak wach k'acharik chik wilkaat. Naa raasjiik jinaj k'isa awak'uun, eh Ismael i rub'ihnaal naa akojom, ruum re' QaJaaw Dios xrilow chaloq i ti' k'axik k'ahchi' ak'ulum.

¹²Re' awak'uun naa raasjiik je' josq'iil jino'q i josq'laj chikop, chu'nchel aj uuk' naa rupajam riib', eh chu'nchel wo' naakipajam kiib' ruuk'. Eh ma' jaruuj naa reliik parupaat atoob' ta ixoowjoq wach kuum taqe ruchaaq', i nuchjik.

¹³Re' i Agar ruum chi xq'orob'jik ruum i QaJaaw Dios, je' wili i xuq'or: Re' hat i Dios kinawil chaloq, inki. Je' wo' chik wili i xuq'or: Re' QaJaaw Dios xuk'uhtaaj riib' weh, eh ma' xin kimik ta noq xwilow wach, inki.

¹⁴Ruum aj re', re' jul ha' re' re' k'achlik jul ha', eh k'ahchi' kiin rilom rub'ihnaal. Re' jul ha' re' re', ar wilik pankiyejaal i kiib' chi tinamit, re' Cades, re' i Bered.

¹⁵Eh noq x-aasjik i k'isa rak'uun i Abram ruuk' i Agar, re' Abram Ismael wo' rub'ihnaal i k'isaak'un xukoj.

¹⁶Eh re' Abram kajwinaq ruuk' waqiib' haab' i wilik reh noq x-aasjik i k'isa rak'uun re' re'.