Read Poqomchi Gen 23 Bible Online

Gen 23 - Poqomchi bible

Gen 23

¹Re' Sara jinaj siento ruuk' wuquub' ru ka'winaq haab' i wilik reh noq xkimik.

²Re' reh ar xkimik chupaam i ye'aab' Quiriat-arba, re' wo' hoq i tinamit Hebrón, re' wilik ar Canaán. Re' Abraham xtib'ik ruk'ux xoq'ik chi riij i rukimiik i Sara i rehk'een.

³Re' Abraham xelik chaloq aha' tuch'lik wii' i ruti'jolal i Sara, xooj chi kiq'orob'jiik taqe i riih rumaam i Het wilkeeb' ar.

⁴Je' wili i xuq'or keh: Atoob' ta xa hin tokoom tinamit taq chaxilak inwaaj chi nee taq i na a'n otob'il weh chak'ayej tii taq jino'q weh ajuul muq'umb'al kamnaq, reh chi neenumuq'aa' ar i wehk'een, inki.

⁵Re' taqe i riih rumaam i Het je' wili ruchaq'weesjiik xkian i Abraham:

⁶Qajaaw Abraham, re' hat, hat k'amal rub'eeh i rukamaj i Dios chi qaxilak. Re' awehk'een i ruk'ul chi chupaam jino'q i holohik laj muq'umb'al neenamuq'aa'. Eh ma' awach ta jino'q chi qaxilak nee nq'orik reh chi ma' nee ta inye'arik aweh i muq'uumb'al reh awehk'een.

⁷Eh noq xrib'iraj chi je' re' i Abraham xpa'lojik johtoq xuk'utzaa' qohoq i naah wach ak'al chi loch'b'al riib' chikiwach i riih rumaam i Het.

⁸Je' wili i xuq'or keh: Wila' xti korik chi ruk'ul taq ak'ux chi ayu' naa numuq'aam i wehk'een, cha kuy cha q'or taq weh reh i Efrón re' rak'uun i Zohar,

⁹chi chuk'ayej weh i jul muq'umb'al kamnaq k'otooj panab'aj chupaam i ye'aab' Macpela. Re' i wilik pank'ula't reh i rak'aal, nee wo' nutoj reh jarub' pa' tz'aaq. Chi je' re', nee kikahnik chi hin ehchan reh jinaj i muq'umb'al ayu' taq chaxilak.

¹⁰Eh re' Efrón tzunlik wo' ar chi kixilak i riih rumaam i Het kow xq'orik chaloq re' xraaj chi x-ib'irjik kuum taqe i ras ruchaaq' wilkeeb' ar. Je' wo' kuum taqe i kiokik i koq panookb'al reh i tinamit je' wili i xuq'or:

¹¹Ma' chih taj qajaaw Abraham, re' ye'aab' inaq'or xa neenusiij aweh, je' wo' hoq i muq'umb'al k'otooj panab'aj wilik chupaam xa nee wo' nusiij aweh chikiwach i nutinamiit nuq'or chi xa neenusiij aweh, neerub'an chi nee namuq'aa' ar awehk'een, inki.

¹²Noq xrib'iraj chi je' re' i Abraham xuk'utzaa' qohoq i naah wach ak'al chikiwach i tinamit chi loch'b'al riib'.

¹³Re' Abraham je' wili ruchaq'weesjiik Efrón xub'an chikiwach i ruk'ihaal: Chab'iraj i naa nuq'orom aweh cha kuy chak'ul tii weh i tz'aaq aaye'aab' kore' neenumuq'aa' ar i wehk'een, inki.

¹⁴Re' Efrón je' wili ruchaq'weesjiik i Abraham xub'an:

¹⁵Jaaw chab'iraj i nuq'or aweh, re' tz'aaq i ye'aab' re' re' xa kijib' siento chi tumiin re' ruuk' i plata, ma' ruk'ul ta chi neenqawech'uj qiib' ruum. Je' re' noq re' hat chamuq'aa' ar awehk'een, inki.

¹⁶Noq xrib'iraj i Abraham nik' k'ihaal i tz'aaq i ye'aab' xtohq'ik rupajam i kijib' siento chi tumiin re' ruuk' i plata. Re' pajb'al re' re', re' ruuk' inkikoj taqe i yakool, eh re' taqe i aj Het xi ilwik reh chi xuq'asaj reh i Efrón.

¹⁷Eh re' i Efrón xuq'asaj wo' ye'aab' re' re' reh i Abraham, re' i wilik ar Macpela, i wilik chi juntar i ye'aab' Mamre. Xuq'asaj wo' reh i Abraham i muq'uumb'al k'otooj panab'aj, je' wo' chu'nchel i wilik chupaam i ye'aab' re' re'.

¹⁸Re' chik i Abraham xkahnik chi ehchan reh chu'nchel re'. Eh re' taqe i riih rumaam i Het xi-ilwik reh chi korik chi je' re' i xb'aan, xkilow wo' taqe ik'ik inki a'n panookb'al reh i tinamit.

¹⁹Eh xumuq'aa' wo' rehk'een i Abraham chupaam i jul k'otooj panab'aj wilik chupaam i ye'aab' Macpela, re' wilik pareelb'aal reje q'iij re' i ye'aab' Mamre. Re' ye'aab' re' re' Hebrón wo' b'ih inkiq'or, eh ar wilik paruyuq'ul i Canaán.

²⁰Re' chik i Abraham xkahnik chi ehchan reh i ye'aab' re' re', je' wo' hoq i jul k'otooj panab'aj muq'uumb'al kamnaq xkik'ayej wo' hoq i riih rumaam i Het reh i Abraham xumuq'aa' wo' ar i rehk'een.