Read Poqomchi Gen 25 Bible Online

Gen 25 - Poqomchi bible

Gen 25

¹Re' Abraham xwihik wo' chik jinaj rehk'een Cetura i rub'ihnaal.

²Eh xwihik taqe rak'uun ruuk', je' wili i kib'ihnaal: Zimram, Jocsán, Medán, Madián, Isbac, Súa.

³Re' Jocsán xi wihik wo' taqe rak'uun, je' wili kib'ihnaal: Seba, Dedán. Eh re' i Dedán xi wihik wo' taqe rak'uun, je' wili kib'ihnaal: Asurim, Letusim, Leumim.

⁴Re' Madián xi wihik wo' taqe rak'uun, je' wili i kib'ihnaal: Efa, Efer, Hanoc, Abida, Elda. Eh re' taqe re' rak'uun, riih rumaam i Abraham ruuk' i Cetura.

⁵Eh chu'nchel i chib'ih jariik i wilik, reh i Abraham, reh i Isaac xukanaa'.

⁶Re' taqe i rak'uun i Abraham kuuk' taqe i xa rukab' ixoq xa xusiij kok' taq chib'ih keh. Eh noq kok'achlik i reh xutaq'aaj taqe reje chupaam i ye'aab' wilik chi rukorkiil i reelb'aal q'iij, xresaj taqe reje i wilik wii' i rak'uun Isaac.

⁷Re' Abraham jinaj siento ruuk' ho'lajuuj rukajwinaq haab' xk'acharik.

⁸Re' Abraham xokik rurijb'iik, eh noq k'isa maam chik chi korik, xa ruum yab'ilaal xkimik. Eh xooj rureq taqe i rumaam rati't.

⁹Re' rak'uun Isaac, i rak'uun Ismael xi ponik muq'anoq reh chupaam i jul k'otooj panab'aj wilik ar Macpela. Ar wilik pareelb'aal q'iij reh i Mamre paruye'aab' i Efrón, rak'uun i Zohar aj heteo riih rumaam i Het.

¹⁰Re' ye'aab' re' re', re' wo' ruloq'om i Abraham kuuk' taqe i riih rumaam i Het. Ar xmuq'ub'jik i Abraham aha' muhqinaq wii' i rehk'een, Sara.

¹¹Eh noq kamnaq chik i Abraham, re' i QaJaaw Dios xuyeew i rotob'il chinaah i Isaac, ar xkahnik chi patinik i wilik wii' i jul ha' k'achlik kirilow i rub'ihnaal.

¹²Re' Abraham xwihik jinaj rak'uun ruuk' i Agar aj Egipto, re' wihinaq cho chi raj pooh i Sara,

¹³eh je' wili kib'ihnaal taqe rak'uun: Re' aasb'ees Nebaiot, re' rukab', Cedar, re' roox Adbeel, re' rukaaj Mibsam

¹⁴Chi riij chik i re', re' chik i Mismá, re' Duma, re' i Massa.

¹⁵Chi riij i re', re' Hadar, re' chik i Tema, re' chik i Jetur, re' chik i Nafis, eh re' chik i Cedema.

¹⁶Re' taqe i wili i kib'ihnaal i kab'laj chi rak'uun i Ismael. Eh je' wo' re' i rub'ihnaal i kitinamiit xkojarik chi kiju'junaal. Je' wo' hoq i ye'aab' xi wihik wii', eh xi kahnik chi reey chikinaah i tinamit chi kiju'junaal.

¹⁷Re' Ismael jinaj siento ruuk' wuqlaj ru ka'winaq haab' i wilik reh noq xkimik, xooj rureq taqe i rumaam rati't.

¹⁸Re' taqe i rak'uun i Ismael ar xkitoq'aa' reje patinik chupaam i ye'aab' Havila, xi ponik ko chupaam i ye'aab' Shur, re' wilik chuwach i Egipto, ar parub'eeh i Asiria. Ar xi okik chi patinik atoob' ta ma' najawjik ta kiwach kuum i kas i kichaaq'.

¹⁹Re' taqe i wili rub'anam chaloq i Isaac i rak'uun i Abraham.

²⁰Re' Isaac ka'winaq haab' i wilik reh noq xub'an kaxáro ruuk' i Rebeca, i rixq'uun i Betuel, ranaab' i Labán. Re' taqe re' aj arameo taqe. Ar xi patinik chupaam i ye'aab' Padan-aram.

²¹Re' Isaac xub'an rutiij chi naa ruwihiik ruha'lak'uun i Rebeca i rehk'een, eh x-ib'irjik wo' ruum i Dios. Eh xkahnik wo' wach k'acharik i Rebeca.

²²Eh re' taqe i kok' rak'uun xakow chik kiluhk'anik cho chupaam, xati' chik imb'aan reh. Ruum i re', je' wili i xuq'or i Rebeca: Wila' je' wili i ti' naa nuk'ulum ma' xta chik kamaj chi nee kink'acharik, inki. Eh xupahqaaj reh Dios chib'ih reet noq ti' k'ahchi' rik'iik.

²³Eh je' wili ruchaq'weesjiik xb'aan ruum i QaJaaw Dios: Re' wilkaat wii' laach taqe, re' keh naa kikahniik chi kiib' chi tinamit naakixowaam kiwach. Ruum aj re' k'ahchi' kipajam kiib' noq komajaa' ki-aasjik, re' jinaj q'e' kow riib' chuwach i jinaj, re' chaaq'b'ees naa rutaq'aaniik reh i aasb'ees.

²⁴Eh noq xponik i q'iij chi xk'ulik ruk'ux i Rebeca korik wo' hoq chi laach i xrilow wach.

²⁵Re' i peet x-aasjik xa kaq lumik chik i rismaal i naah, eh nujinaq chi pun pun isb' i riij, eh Esaú i rub'ihnaal xkikoj.

²⁶Eh re' i xam x-aasjik ruchopom i koq i paraa' i Esaú ruuk' i q'ab' juntar. Ruum aj re' Jacob i rub'ihnaal xkikoj. Re' i Isaac oxk'ahl haab' i wilik reh noq xi aasjik taqe i ki'ib' chi rak'uun re' re'.

²⁷Re' taqe i kok' ak'un re' re' xik'ihik johtoq, korehtaal xiwinaqb'ik. Re' Esaú xponik chuwach i kamanik panab'iix, inchol wo' kaansanik taqe chikop. Eh re' Jacob reh xama' teheeh ta wach, xasuq reh i kahnik pampaat.

²⁸Re' Isaac reh q'e' ruk'ax i Esaú, ruum q'e' suq reh i ruk'uxariik taqe i chikop i rukansaj chaloq. Eh re' i Rebeca reh re' i Jacob q'e' ruk'ax.

²⁹Eh pan jinaj q'iij re' Jacob k'ahchi' chiyej-anik k'uxb'al wi'k. Eh re' i Esaú ma' k'isiin taj i ruq'uhtiik noq xsutinik cho panab'iix.

³⁰Eh je' wili i xuq'or reh i Jacob: Chakuy chayeew k'isinoq weh i tiwik re' re' xa kaq chik wach i riis k'ahchi' ayejaam, re' hin xama' nukuy ta chik i nuq'uhtiik, inki. Ruum aj re', re' Esaú Edom[4] wo' chik i b'ih inkiq'or.

³¹Re' Jacob je' wili i chaq'wik xub'an: Ma' xta reet neenuyeew aweh i k'uxb'al wi'k wili, xa re' la' chayeew weh chi jilow aakooch q'e' looq' xak'ul, ruum re' hat i peet ak'un.

³²Re' i Esaú je' wili i xuq'or reh i Jacob: Chak'am wo' re' ruum wi xin kimik ruum nunuhmiik i hin xama' xta wo' chik neen kamanik wii' weh i nukooch q'e' looq' xkiyeew ruum chi hin peet ak'un, inki.

³³Re' Jacob je' wili i xuq'or reh i Esaú: Chaq'or weh i korik parub'ihnaal i QaJaaw Dios mi naa aye'em weh aakooch q'e' looq', inki. Re' Esaú xuq'or wo' korik chi xuyeew reh i Jacob i rukooch q'e' looq'.

³⁴Re' i Jacob xuyeew rukaxlanwi'k i Esaú, xuyeew wo' reh i tiwik xa kaq chik wach i riis xuyejaa', xuyeew wo' reh i xeroj i chaaj. Eh noq xukohlaaj ruwa' ruhaa' i Esaú xwuktik reje xooj, ma' xta xraaj reh i rukooch ye'ooj reh ruum chi re' reh peet ak'un.