Read Poqomchi Gen 27 Bible Online

Gen 27 - Poqomchi bible

Gen 27

¹Re' Isaac xponik i q'iij chi xrijb'ik chi korik, eh xkahnik chi moywach. Eh pan jinaj q'iij xuyuq'eej ruuk' i Esaú i peet rak'uun, je' wili i xuq'or reh: Wak'uun, inki. Re' Esaú je' wili xuq'or: Chaq'or weh wajaaw chib'ih i naa aq'orom, inki.

²Je' wili xuq'or i Isaac ree Esaú: Re' hat inawilow chi q'e' chik hin riji' winaq, xanik' neekinkimik chupaam taqe q'iij wili.

³Ruum aj re', re' hin inwaaj chi nee tiooj panch'ahn chak'am reje aaflecha reh chi nee nakansaj cho jino'q nu chikoop,

⁴suq ruyejeb'jiik neena a'n je' rukab' imponik chi nuwach neenak'am cho chi k'uxb'al nuwa'. Eh neetinukuxisaj noq komajaa' kinkimik, inki.

⁵Re' Rebeca xrib'iraj i xuq'or i Isaac reh i Esaú, re' i rak'uun. Eh xa kore' wo' xooj i Esaú panch'ahn chuchopariik i chikop xq'orarik reh ruum i rajaaw.

⁶Re' Rebeca je' wili i xuq'or reh i Jacob, re' chaaq'b'ees ak'un: Re' hin xb'iraj i xuq'or awajaaw reh aawas Esaú, je' wili i xuq'or reh:

⁷Hiy cha kansaj jino'q i chikop panch'ahn, reh chi nee nayejaa' weh suq suq rub'aan neena a'n, nee nak'am cho weh reh chi neenuk'ux. Chi je' re', neetinukuxisaj parub'ihnaal i QaJaaw, noq komajaa' kinkimik, inki reh.

⁸Ruum aj re', re' hat wak'uun chab'iraj chi korik i naa nuq'orom aweh wili:

⁹Yu'naak hiy aha' wilkeeb' wii' taqe i qachikoop, chak'am cho weh ki'ib'-oq i k'ijol kaprax, re' ruuk' taqe i xti q'ina', reh chi neenuyejaa' chi neeruk'ux awajaaw suq suq ruyejeb'jiik neenub'an reh. Je' wo' rukab' i q'e' imponik chuwach i reh.

¹⁰Re' hat neetik'amwik reje reh chi neeruk'ux, chi je' re', re' hat neetirukuxisaj chi peet noq komajaa' inkimik, inki reh.

¹¹Re' Jacob je' wili i xuq'or reh i Rebeca i rutuut: Re' was Esaú nujinaq chi pun pun isb' riij, eh re' hin ma' xta isb' chi wiij.

¹²Wila' xirutz'a'j i wajaaw chi ma' xta isb' chi wiij, nee rureq chi riij chi re' hin, neerukapaaj chi xa b'amb'al i nub'an reh. Chi je' re', ma' re' ta chik nukuxeesjiik neerub'an, ti' k'axik la' chik i nee ruyeew chi nunaah, inki Jacob.

¹³Eh je' wili ruchaq'weesjiik xb'aan ruum i rutuut: Wak'uun, re' ti' k'axik re' re' neerub'an chi, chi nunaah i hin neenkahnik. Chak'am la' cho weh i ki'ib' chi k'ijol kaprax, inki.

¹⁴Re' i Jacob xooj wo' chuk'amariik i ki'ib' chi k'ijol kaprax, xuyeew reh i rutuut. Xuyejaa' wo' chi ruk'uxb'aal i Isaac, suq suq rub'aan xub'an, je' wo' rukab' imponik chuwach.

¹⁵Re' Rebeca xresaj chaloq i ruholohaq so' i rumolom naq pampaat i Esaú re' peet ak'un. Xukoj chi riij i Jacob, re' chaaq'b'ees ak'un.

¹⁶Eh re' Rebeca xukoj i kiij i k'ijol kaprax wataq tileb' chi' ruk'ux i Jacob aha' i ma' b'urlik ta ruum i ruso'.

¹⁷Aha' wilik i tiwik ruch'ihil i kaxlanwi'k xuyejaa' i Rebeca xuyeew reje reh i Jacob, i rak'uun.

¹⁸Re' reh xokik i koq i wilik wii' i rajaaw, je' wili i xuq'or reh: Wajaaw, inki reh. Re' i Isaac, je' wili i chaq'wik xub'an: Ayu' wilkiin, ¿awach keh i ki'ib' chi wak'uun i hat? inki.

¹⁹Re' Jacob je' wili ruchaq'weesjiik i rajaaw xub'an: Re' hin, i Esaú i peet awak'uun, xnuyejaa' chik chaloq aha' wilik i xaq'or weh. Wukteen, ti tzuun johtoq, chak'ux i yej-amaj chikop, xponik nub'an reh panch'ahn reh chi nee kinakuxisaj, inki.

²⁰Re' Isaac je' wili i xuq'or reh i rak'uun: ¿Nik' wach noq xa a'n cho reh chi jumehq'iil i chikop? inki. Re' Jacob je' wili i chaq'wik xub'an: Re' awajaaw aaDios xtoob'inik weh chi xnub'an cho reh chi jumehq'iil, inki.

²¹Re' Isaac je' wili i xuq'or reh: Chajil chaawiib' wuuk', reh chi neetinutz'a'j mi xti korik chi re' hat i wak'uun Esaú, inki.

²²Re' Jacob xujil wo' i koq riib', reh chi xtz'a'jik ruum i rajaaw. Eh noq rutz'a'am chik i rak'uun i Isaac, je' wili i xuq'or reh: Re' aq'oral xti re' inq'orik i Jacob, re' wa taq atileb', re' wataq tileb' i Esaú, inki.

²³Je' re' noq, re' Isaac ma' xunab'eej ta chi re' i Jacob, ruum ma' k'isiin i isb' wataq tileb', je' wo' rukab' i wa taq tileb' i ras Esaú. Eh noq ach naa rukuxisam,

²⁴xupahqaaj wo' chik reh i Jacob chi je' wili: ¿Mi xti korik chi re' hat i wak'uun Esaú? inki. Korik re' hin, i Esaú, inki noq chaq'wik i Jacob.

²⁵Re' rajaaw je' wili i xuq'or: Chak'am cho weh re' i k'uxb'al, reh chi neenuk'ux i chikop xponik achop. Chi je' re', neetinukuxisaj, inki. Re' Jacob xuyeew wo' i koq reh i rajaaw xuyeew wo' ruhaa', xub'an wo' ruwa' ruhaa'.

²⁶Eh je' wili i xuq'or reh i Jacob: Chajil chaawiib' wak'uun, kinatz'ub' junriim-oq, inki.

²⁷Eh noq xujil i koq riib' i Jacob chutz'ub'ariik i rajaaw, re' Isaac xruhtz'eej chi q'e' ink'ohnik i wach i ruso'. Je' re' noq xukuxisaj ruuk' taqe q'orik wili: Re' wak'uun, je' k'ohonkiil taqe i tik mu'uun i wach kuxisamaj ruum i QaJaaw Dios.

²⁸Neeta naq i ruyeew QaJaaw Dios cha naah i jab', chinaah taqe atik amu'uun, eh nee ta naq kiwachinik chi korik, eh nee ta naq inwachinik chi korik atrigo aa-uuva.

²⁹Eh nee ta naq inkikamaneej awach nimaq tinamit, nee ta naq inkiloch' kiib' chawach, eh nee ta naq inwihik awajaawriik chikinaah i ma' tokoom ta ruuk' aatuut. Eh nee ta naq inye'arik ti' k'axik chikinaah i ma' holohik ta kiq'orik chawiij, eh nee ta naq inye'arik i otob'il chikinaah i holohik kiq'orik chawiij, inki.

³⁰Eh noq re' Isaac xukohlaaj rukuxeesjiik i Jacob, eh xa kore' wo' naq xelik chaloq i Jacob ruuk' i Isaac, noq xponik Esaú reh i ruchopariik i chikop.

³¹Eh xuyejaa' wo' hoq i reh i suq laj k'uxb'al ruuk' i chikop xponik ruchop, je' wili i xuq'or reh: Wajaaw chak'ux re' i rutib'kaal i chikop xponik nuchop i hin, hin awak'uun kinakuxisaj, inki.

³²Noq xrib'iraj i Isaac chi je' re' je' wili xuq'or: ¿Awach i hat? inki. Re' hin i Esaú i peet awak'uun, inki noq chaq'wik.

³³Re' Isaac ma' k'isiin ta xsahchik ruk'ux xamb'arb'otik chik noq xuq'or chi je' wili: ¿Awach aj wo' re' i xponik chopwoq reh i chikop chi peet, eh xuk'am chaloq chi nuk'uxb'al. Eh xnuk'ux i hin noq komajaa' tik'ulik i hat? Re' reh xnukuxisaj chik, re' reh naa rutoob'jiik.

³⁴Noq xrib'iraj i Esaú i xuq'or i rajaaw, xutik'aa' jinaj runimaal oq'ik xuk'er chii' chuq'orariik chi je' wili: Wajaaw kinakuxisaj wo' hoq i hin, inki.

³⁵Re' Isaac je' wili i chaq'wik xub'an: Re' aachaaq' xink'ulik rujot', xuq'or weh chi re' reh i Esaú, eh re' chik i reh xnukuxisaj, inki.

³⁶Re' Esaú je' wili i chaq'wik xub'an: Ruum i runa'ojb'al re' re' xkikoj chi Jacob i rub'ihnaal, yu'naak ruka'peech hin rujot'om, peet xuk'am weh i nukooch q'e' looq' xye'arik naq weh ruum chi hin peet ak'un. Eh yu'naak xuk'am wo' chik weh i nukuxeesjiik naq naa rub'aan. ¿Mi ma' nee chik i ruyee riib' re' chi nee kinakuxisaj i hin? inki.

³⁷Re' Isaac je' wili ruchaq'weesjiik i Esaú xub'an: Re' hin xnukanaa' chik chi re' reh naa rutaaq'aniik cha naah i hat, eh nuq'or wo' reh chi naa rukahniik taqe chi rumoso i ma' tokoom ta ruuk'. Eh nukuxisaj wo' hoq chi naa rub'anam wach taqe i rutrigo, i ru-uuva. Eh ¿chib'ih chik neetinukuxisaj wii' i hat wak'uun? inki.

³⁸Re' i Esaú toq' toq' xub'an je' wili xuq'or: ¿Mi ma' neerub'an re' chi nee wo' kinakuxisaj i hin? Wajaaw kinakuxisaj wo' k'isinoq i hin, inki. Eh xuk'er chii' chi oq'ik.

³⁹Re' Isaac je' wili xuq'or reh: Re' hat najt ruuk' i raxpaam ak'al naa awihiik, eh ma' naa ta wo' ruqajiik chee jab' chinaah atik amu'uun.

⁴⁰Re' hat xa ruuk' tii q'as laj ch'ihch' naa ako'leem awiib', eh naa akahniik chi hat rumoso aachaaq' Jacob. Xa re' la', noq naa rukowjiik ak'ux naa awesam reje awiib' chi hat rumoso, i nuchjik.

⁴¹Re' Esaú chupaam i q'iij re' re' xtohq'ik rixowaam wach i Jacob, ruum re' reh xkuxeesjik ruum i rajaaw. Ruum i re', je' wili i xuq'or paruk'ux i Esaú: Xa ilook' inkimik i wajaaw eh naa rutib'iik qak'ux. Chi riij i re', naa nukansam i nuchaaq' Jacob, inki.

⁴²Eh noq xrib'iraj i Rebeca i xuq'or i Esaú, xutaq'aaj ruk'amariik i Jacob je' wili xuq'or reh: Chab'iraj i naa nuq'orom aweh, re' i Esaú aawas ti raaj kaat rukansam chi q'ajb'al wach taqe i xa a'n reh.

⁴³Ruum aj re', wak'uun chab'iraj i naa nuq'orom aweh, yu'naak hiy chupaam i ye'aab' Harán, ar nee ti wihik parupaat i nuxib'aal Labán.

⁴⁴Neerub'an chi nee tiooj wih-oq ar nik'-oq najtiil korehtaal inik'ik i ruk'aah aawas.

⁴⁵Eh sahchoq pee chik paruk'ux ixa a'n reh, kora'j chik neenutaq'aaj ak'amariik re', reh chi nee wo' chik ti sutinik cho ayu', ruum re' hin ma' nwaaj taj chi nee taq inakansaj awiib' akab'cheel, ruum hat taq wak'uun, inki.

⁴⁶Chi riij i re', je' wili i xuq'or i Rebeca reh i Isaac re' rub'ahiil: Re' hin q'e' xinq'uhtik chi kilariik i ki'ib' chi rixoqil i Esaú, re' taqe ixoq aj Het. Eh wila' xub'an wo' chik kaxáro i Jacob ruuk' jino'q ixoq aj Het patim ayu' Canaán, yohb'aal wach k'axkiil chi weeh hin. Chi je' re', i ruk'ul chi nee kinkimik, inki.