Read Poqomchi Gen 3 Bible Online

Gen 3 - Poqomchi bible

Gen 3

¹Re' aaq', xa re' wo' reh xti q'as wach ruk'ux chi jot'ooj chikiwach chu'nchel i panch'ahn chikop ruyejaam chaloq i QaJaaw Dios. Ruum i re', xupahqaaj reh ixoq chi je' wili: ¿Mi korik chi xuq'or taq aweh i Dios chi ma' jino'q keh i wach i chee' wili naa taq ak'uxum? inki.

²Re' ixoq je' wili ruchaq'weesjiik i aaq' xub'an: Chu'nchel i kiwach taqe i chee' wilkeeb' ayu' nee b'ila' rub'an chi neenqak'ux.

³Xa re' la', re' i QaJaaw Dios je' wili i xuq'or qeh: Maa k'ux taq i wach i chee' wilik panyejaal taqe i tik ni xata nee taq inatz'aj, ruum wi xak'ux taq nee taq tikimik, inki, inki ixoq.

⁴Re' aaq' je' wili ruchaq'weesjiik ixoq xub'an: Re' re' ma' korik taj. Re' taq i hat ma' nee ta taq tikimik.

⁵Re' Dios je' re' xuq'or, ruum reht'al i reh chi wila' xak'ux taq i wach i chee' re' re' nee taq ti kahnik chi je' rukab' i reh. Nee taq inanab'eej aha' wilik i holohik, eh aha' wilik i ma' holohik taj, inki.

⁶Eh re' ixoq xrilow chi q'e' holohik i wach i chee' re' re', eh rootwaaj wo' ruk'uxum reh, xraaj wo' naq chi naa ruwihiik runa'ojb'al. Je' re' noq xuch'uq i wach i chee' re' re' xuk'ux i koq, eh xuyeew wo' reh i rub'ahiil. Eh re' rub'ahiil xuk'ux wo' i koq.

⁷Eh xa chupaam i jumehq' re' re' kikab'cheel xkinab'eej aha' wilik i holohik, eh aha' wilik i ma' holohik taj, xkikoj rehtaal chi t'usulkeeb'. Ruum i re', xkisik' i xaq i chee' higo, xkib'ur kiib' chi reh.

⁸Eh noq qajik chik i rub'an i q'iij, re' noq inchalik i teew, re' QaJaaw Dios b'ehik i rub'an chupaam taqe i tik. Noq xrib'iraj i ruq'oral i Dios i winaq je' wo' ixoq, ma' k'isiin ta xchalik kiyo'jiik kajimam kiib' xooj kikeb'aa' kiib' chi kixilak taqe i tik.

⁹Chalik i QaJaaw Dios xtohq'ik ruyuq'eem i winaq, je' wili xuq'or reh: ¿Aha' wilkaat i hat? inki reh.

¹⁰Re' winaq je' wili i chaq'wik xub'an: Re' hin noq xb'iraj aq'oral chi xilak taqe i tik, ma' k'isiin ta xchalik nuyo'jiik, ruum xwilow chi t'usulkiin, je' re' noq xnukeb'aa' wiib', inki.

¹¹Re' QaJaaw Dios xupahqaaj reh i winaq chi je' wili: ¿Awach xq'orik aweh chi t'usulkaat? ¿Mi xak'ux wo' re' i wach i chee' xnuq'or aweh chi ma' naa taa k'uxum? inki.

¹²Re' winaq je' wili ruchaq'weesjiik xub'an: Re' ixoq xayeew weh chi wehk'een xye'wik weh i wach i chee' re' re'. Eh re' hin xnuk'ux wo' i koq, inki.

¹³Re' QaJaaw Dios xupahqaaj reh ixoq chi je' wili: ¿Chib'ih reet ixa a'n chi je' re'? inki. Re' ixoq je' wili i chaq'wik xub'an: Re' aaq' jot'wik weh, ruum aj re' xnuk'ux i wach i chee' re' re', inki.

¹⁴Re' i QaJaaw Dios je' wili i xuq'or reh i aaq': Ruum ixa a'n re' re' xa re' wo' hat xaq'eb' awiib' chi kixilak chu'nchel i chikop. Yu'naak johtoq chi qawach ajukem awiib' chi' ak'ux noq naa ab'eeh, eh nik' najtiil naa aak'achariik, ak'al naa ak'uxum.

¹⁵Re' hin naa kaat nukojom panixowaal ruuk' ixoq, je' wo' i riih rumaam ixoq ruuk' awiih aamaam i hat. Re' i riih rumaam ixoq naa ruq'ojom paam i naah awiih aamaam i hat, eh re' awiih aamaam i hat xa re' i ruyuhb' i rooq i riih rumaam ixoq naa ruti'im, inki.

¹⁶Re' QaJaaw Dios je' wili i xuq'or reh ixoq: Re' hin naa kaat wik'sam chi ti', jarpech, eh nik' najtiil naa awihiik wach k'acharik. Eh noq naa kaasjiik taqe aha'lak'uun, xiik' naah ti'kiil naa awik'iik wii'. Naa awaajwaam chi naa ruwihiik awuuk' ab'ahiil, eh re' reh naa ruwihiik chi taaq'anik cha naah.

¹⁷Eh je' wili i xuq'or reh i winaq: Ruum chi xanimaj awehk'een, eh xak'ux i wach i chee' xuyeew aweh, re' i nuq'orom aweh chi ma' naa ta ak'uxum. Yu'naak re' wach ak'al xq'ehb'ik panti' awuum. Ruum aj re', chu'nchel q'iij aak'achariik ruuk' ti' naa akamaneem wach noq naa reliik awa' chuwach.

¹⁸Eh k'iix, ch'ahn naakipoq'iik cho chinaah i wach ak'al, eh naa ak'uxum ichaaj naa rupoq'iik cho chuwach.

¹⁹Kow naa akamaniik ruuk' aab'ahx aatz'a'uub' naa a'nam awa' ahaa' chuwach. Je' re' naa a'nam chu'nchel q'iij aak'achariik, korehtaal wo' chik ti sutinik chi pooq ak'al, ruum hat wo' pooq ak'al pampeet, eh naa wo' chik asutiniik chi pooq ak'al, inki.

²⁰Re' Adán, Eva i xukoj chi rub'ihnaal rehk'een. Ruum re' ixoq re' re' peet kituut chaloq chu'nchel i k'achareel.

²¹Re' QaJaaw Dios xukoj ruso' i winaq ruch'ihil i rehk'een, eh riij taqe chikop i xuyejaa' chi kiso'.

²²Re' QaJaaw Dios je' wili i xuq'or: Re' winaq xkahnik chi je' qakab' i hoj reht'al chik i holohik, je' wo' hoq i ma' holohik taj. Ruum aj re', ma' ruk'ul taj chi neenkahnik chupaam taqe i tik, maa ruk'ux inchel i wach i chee' inye'wik k'acharik, ruum wi xuk'ux neen wihik ruk'achariik chi juneliik, inki.

²³Ruum aj re', re' QaJaaw Dios xresaj chaloq i winaq ruch'ihil i rehk'een, xukoj taqe chi rab'ixjiik wach aak'al xkorjik wii'.

²⁴Eh noq resam chik cho ar i winaq i Dios, eh chi korkiil ireelb'aalq'iij re' wilik wii' taqe i tik, eh wilik taqe i k'achaach wilik kixiik' xukoj chucha'jaljiik i ookb'al. Eh xukoj wo' jinaj i ch'ihch' qoplik ruq'aq'al xak'ul chik inooj chi q'ataj b'eeh, reh chi ma' awach ta neenooj sik' woq reh i wach i chee' inye'wik k'acharik.