Read Poqomchi Gen 30 Bible Online

Gen 30 - Poqomchi bible

Gen 30

¹Eh noq xrilow i Raquel chi ma' nwihik ta rak'uun i Jacob ruuk', xtohq'ik rixowaam wach i ras Lea je' wili i xuq'or reh i rub'ahiil: Re' hin inwaaj chi nee nayeew taqe wak'uun, wila' ma' xayeew weh, nee kinkimik, inki.

²Re' Jacob xchalik ruk'aah chinaah i Raquel je' wili i xuq'or reh: Hin oon Dios re' hin, re' reh reht'al chihreet noq ma' ruyeew ta taqe awak'uun, inki.

³Re' Raquel je' wili i xuq'or reh i Jacob: Wili i wajpooh Bilha, ti woroq ruuk', reh chi neen wihik taqe awak'uun ruuk', eh wila' xi wihik taqe awak'uun ruuk' i reh, je' wo' naa wuuk' i hin neen wihik taqe awak'uun, inki.

⁴Re' Raquel xuyeew i rajpooh Bilha reh i Jacob, eh xwirik wo' ruuk'.

⁵Re' Bilha xkahnik wach k'acharik x-aasjik wo' jinaj i rak'uun i Jacob ruuk'.

⁶Re' i Raquel je' wili i xuq'or: Re' k'isaak'un wili Dan i rub'ihnaal naa nukojom, ruum re' QaJaaw Dios xrib'iraj i nutiij. Ruum i xuyeew weh i k'isaak'un wili, inki.

⁷Chi riij i re' x-aasjik wo' chik jinaj i rak'uun i Jacob ruuk' i Bilha.

⁸Eh re' i Raquel je' wili xuq'or: Re' k'isa k'un wili Neftalí i rub'ihnaal naa nukojom, ruum re' hin xti nuchop nuk'ux chuq'atariik wach i was Lea, eh yu'naak xnuq'at chik wach, inki.

⁹Eh noq xrilow i Lea chi ma' nwihik ta chik taqe rak'uun i Jacob ruuk' xuyeew reh chi rixoqil i rajpooh Zilpa.

¹⁰Je' re' noq, re' Zilpa x-aasjik wo' rak'uun i Jacob ruuk'.

¹¹Re' Lea je' wili xuq'or: Yu'naak q'e' holohik xinelik, re' k'isa k'un wili Gad i rub'ihnaal naa nukojom, inki.

¹²Chi riij i re', x-aasjik wo' chik jinaj i rak'uun i Jacob ruuk' i Zilpa rajpooh i Lea.

¹³Eh re' Lea je' wili i xuq'or: Jinaj runimaal suq kiil k'uxliis chi weh i hin, eh chu'nchel ixoq naa kiq'oriik weh chi je' wili: Atoob' inchi reh, inko'q taqe, re' k'isa k'un wili Aser i rub'ihnaal naa nukojom, inki.

¹⁴Eh re' Rubén i xooj rusik' i wach i trigo. Eh ar xureq chaloq i taqe i wach chee' mandrágoras, xuk'am cho reh i rutuut. Re' i Raquel, je' wili i xuq'or reh i Lea: Chakuy chayeew weh ki'ib' ixib'-oq i wach i chee' mandrágoras xuk'am chaaweh awak'uun, inki.

¹⁵Re' Lea je' wili i ruchaq'weesjiik i Raquel xub'an: ¿Mi ma' manlik aweh re' chi xaq'uch i nub'ahiil, chib'ih chik jariik inawaaj? ruum yu'naak inawaaj wo' chik aq'uchum i wach i mandrágoras, xuk'am chaloq i wak'uun, inki. Re' Raquel je' wili i ruchaq'weesjiik i Lea xub'an: Wila' xayeew weh taqe i wach i mandrágoras, neenutaq'aaj awuuk' chi wirik i Jacob chaq'ab' ne'eel, inki.

¹⁶Eh noq xokik i q'iij, re' noq sutinik chaloq i Jacob reh i panab'iix, xooj k'ularoq ruum i Lea je' wili i xq'orarik reh: Chupaam aq'ab' wili naa awiriik wuuk', ruum xatye'arik chik weh chi kemeel chi riij taqe i wach i chee' mandrágoras, xuk'am cho weh i wak'uun, inki. Re' Jacob xwirik wo' ruuk' i Lea chupaam aq'ab' re' re'.

¹⁷Je' re' noq, re' i Lea xwihik roo' rak'uun i Jacob ruuk', ruum x-ib'irjik chee rutiij ruum i QaJaaw Dios.

¹⁸Chi riij i re', re' Lea je' wili i xuq'or: Re' k'isaak'un wili Isacar i rub'ihnaal naa nukojom, ruum re' Dios xuyeew chaloq i nukooch, ruum xnuyeew reh i nub'ahiil chi rixoqil i wajpooh, inki.

¹⁹Chi riij i re', re' Lea x-aasjik wo' ruwaaq i rak'uun i Jacob ruuk'.

²⁰Re' Lea je' wili i xuq'or: Re' QaJaaw Dios jinaj i nunim laj kooch xuyeew weh. Re' nub'ahiil naa ruwihiik wuuk' pansuqkiil k'uxliis, ruum waqiib' chik i rak'uun xwihik wuuk'. Ruum aj re', re' k'isa wak'uun wili Zabulón i rub'ihnaal naa nukojom, inki.

²¹Eh pantz'apaab' wach, re' Lea x-aasjik jinaj i rixq'uun, Dina i rub'ihnaal xukoj.

²²Re' Dios xponik i q'iij noq xuketelaaj wach i Raquel. Xrib'iraj i rutiij. Ruum aj re' xuyeew taqe rak'uun.

²³Eh re' Raquel noq x-aasjik i peet rak'uun je' wili xuq'or: Yu'naak xresaj i nuk'ixb'ilaal i QaJaaw Dios, ruum xuyeew jinaj wak'uun.

²⁴Konee ta naq i ruyeew cho jino'q wak'uun chi riij i wili, inki. Ruum aj re', re' k'isa rak'uun José i rub'ihnaal xukoj.

²⁵Eh noq aasjinaq chik i rak'uun i Raquel José i rub'ihnaal, re' Jacob je' wili i xuq'or reh i Labán, re' rajaaw i rehk'een: Yu'naak chayeew q'ab' weh chi nee wo' chik kinsutinik reje panutinamiit.

²⁶Chayeew q'ab' chi neenuk'am taqe reje i wehk'een, je' wo' taqe i wak'uun, re' hin xnub'an chik i kamanik chikiij, chayeew q'ab' weh chi nee kinooj. Re' hat aweht'al chi xnub'an chik akamaj, inki.

²⁷Eh re' Labán je' wili i chaq'wik xub'an: Chakuy tikahnoq tii wuuk' chi jumpech, ruum re' hin xkiq'or chik weh chi awuum i hat kirutob'eej i QaJaaw Dios.

²⁸Xa re' cha q'or weh jarub' atojb'aal inawaaj, re' hin nee wo' i nuyeew aweh, inki.

²⁹Noq xrib'iraj chi je' re' i Jacob, je' wili xuq'or: Re' hat aweht'al chi ma' k'isa kamanik i nub'anam awuuk', eh chi xnuyeew nuk'ux chi kicha'jaljiik taqe aachikoop.

³⁰Re' taqe aachikoop noq xink'u'loq awuuk' xama' k'ih ta taqe, eh yu'naak yohb'aal wach axik'ihaaxb'ik, noq xink'uloq awuuk' xat tohq'ik rutoob'eem i QaJaaw Dios. Wila' xin kahnik awuuk'. ¿Jaruuj aj wo' nutoq'aa' kamanik pan weh re' hin, k'uxumb'al keh taqe i awach weh? inki.

³¹Re' Labán je' wili i xuq'or reh i Jacob: ¿Xti jarub' aj wo' inawaaj chi neetinutoj, cha q'or weh? inki. Re' Jacob je' wili chaq'wik xub'an: Re' hin ma' nwaaj ta wo' chi nee kinatoj, konee nucha'jeej taqe atentzuun, wila' xak'ulaa' taqe naa nuq'orom aweh, inki.

³²Re' hin naawik'iik reje chi kixilak aatentzuun, pareh taqe naa nuye'em i aakok' tentzuun rep rep paam kiij, je' wo' taqe i tz'ihtz'ib' paam kiij, je' wo' taqe i q'eqlumik kiij. Je' wo' taqe ixoq kaprax rep rep paam kiij, je' wo' taqe i tz'ihtz'ib' paam kiij, re' taqe re' nee nayeew chi nutojb'aal, inki.

³³Eh noq neenooj awil taqe i nu chikoop, nee nakoj rehtaal chi ruuk' nukamaj xnureq taqe. Wila' xareq chi kixilak i nukapraax i ma' rep rep ta paam i kiij oon ma' tz'ihtz'ib' ta paam i kiij. Eh wila' xareq chi kixilak i nutentzuun ma' q'eq ta kiij, ar neenareq chi riij chi xa xwelq'aaj awuuk', inki.

³⁴Ma' xta reet neenuk'ulaa' aha' wilik xaq'or, inki noq chaq'wik i Labán.

³⁵Eh re' Labán xa chupaam wo' q'iij re' re' xresaj taqe iloq chi kixilak i ru imas kaprax, je' wo' chi kixilak taqe ixoq kaprax i rep rep paam kiij, je' wo' taqe i tz'ihtz'ib' paam kiij, je' wo' saq paam kiij. Xresaj wo' taqe iloq chi kixilak i rutentzuun i q'eq kiij, xuq'asaj reh taqe i rak'uun, reh chi re' keh naa kicha'jiniik keh.

³⁶Re' Labán xooj rukanaa' reh i Jacob chu'nchel i chikop re' re', je' naa ixib' q'iij xb'ehik reje aha' wilik wii' i Jacob. Eh re' Jacob xama' xukanaa' ta wo' rucha'jaljiik taqe i ruk'u'liil i rutentzuun i Labán.

³⁷Re' Jacob oxb'uhr wach i chee' xusik', álamo, avellano, castaño, kib'ihnaal, xuyok' i q'ab' taqe i chee' re' re', xuch'ol riij rep rep paam i riij xukanaa' taqe.

³⁸Eh xukoj taqe i ch'olooj riij chee' re' re' chi chii' i ha' ink'ulik kian wii' kihaa' i tentzun, eh noq inkilow wach taqe i ch'olooj riij chee' re' re', inkitoq'aa' kik'o'neem kiib'.

³⁹Eh chuwach taqe i chee' re' re', inaasjik i koq i kak'uun taqe i tentzun, wilik taqe i b'alon paam kiij, wilik taqe i tz'ihtz'ib' paam kiij, wilik taqe ch'umiil paam kiij, wilik taqe q'eqlumik paam kiij.

⁴⁰Re' Jacob pareh taqe xuyeew i kok' tentzun ki-aasjik, xuyeew taqe chi xilak i rutentzuun i reh. Je' re' noq xi k'ihaaxb'ik taqe rutentzuun i Jacob, ruum xresaj taqe chi xilak i reh i Labán.

⁴¹Eh re' Jacob noq i rilow chi xa nkaaj chik k'o'nik taqe i tentzun q'e' taqe q'ina', i rukoj wo' chik i ch'olooj riij chee' chi chii' i ha', reh chi chuwach taqe i ch'olooj kiij chee', re' re' inaasjik i koq kak'uun taqe i tentzun.

⁴²Eh re' Jacob noq kik'u'loq taqe i tentzun ma' q'ina' ta taqe, ma' rukoj ta taqe i ch'olooj riij chee' chi chii' i jul ha'. Je' re' noq re' taqe i b'aaq laj tentzun inkahnik chi reh i Labán, eh re' taqe i q'ina' inkahnik chi reh i Jacob.

⁴³Eh noq re' Jacob yohb'aal wach xb'ehoomrik, ma' k'isiin i rutentzuun, ma' k'isiin i rucameyo, ma' k'isiin i rub'uuruux, ma' k'isiin i rumoso winaq, i rumoso ixoq xi wihik.