Read Poqomchi Gen 35 Bible Online

Gen 35 - Poqomchi bible

Gen 35

¹Re' QaJaaw Dios je' wili i xuq'or reh i Jacob: Yu'naak cha yejaa' taqe i chib'ih aweh, eh nee tiooj chi patinik chupaam i ye'aab' Bet-el. Ar neenayejaa' jinaj i artaal chi loq'oomb'al weh i hin, hin aaDios. Re' xnuk'uhtaaj wiib' chawach noq elik ina' a'n chuwach aawas Esaú, inki.

²Eh noq xrib'iraj chi je' re' i Jacob je' wili i xuq'or keh i awach reh wilkeeb' parupaat, je' wo' taqe i wilkeeb' ruuk': Chawesaj taq i tiyoox wilkeeb' taq awuuk', cha a'n taq awitiin, chajal taq aso'.

³Taq taq chi jumehq'iil chupaam i ye'aab' Bet-el, ar naa nuyejaam jino'q i artaal reh chi naa nuloq'em i nuDios xtoob'inik weh noq wilkiin chupaam i ruti'kiil nuk'ux. Re' reh juneliik wilik wuuk' xa aha' kinooj, inki.

⁴Re' taqe i re' xkiq'asaj wo' reh i Jacob chu'nchel i tiyoox wilik kuuk', xkiq'asaj wo' reh chu'nchel i kika'xikin. Eh re' reh xumuq'aa' taqe chi ri'sil i juniwal chi ruche'el tz'inuj, wilik ma' najt ta ar Siquem.

⁵Re' QaJaaw Dios xuyeew q'ab' chi xchalik kiyo'jiik i tinamit wilkeeb' chi junsuut i ye'aab' xelik reje wii' i Jacob ruch'ihil taqe awach reh. Ruum i re', ma' xooj ta b'anroq keh wach b'eeh.

⁶Eh re' Jacob haa' taqe i kitahqinik reh xi ponik chupaam i ye'aab' Luz rub'ihnaal, re' wo' hoq i tinamit Bet-el, wilik ar Canaán.

⁷Re' Jacob ar xuyejaa' jinaj i artaal, re' i ye'aab' re' re' El-bet-el i rub'ihnaal xukoj, ruum ar xuk'uhtaaj riib' i Dios chuwach noq elik i rub'an chuwach i ras Esaú.

⁸Eh ar wo' xkimik ixoq Débora, re' i xcha'jinik reh i Rebeca. Ar xkimuq'aa' chi ri'sil juniwal chi ruche'el tz'inuj ma' najt ta ruuk' i Bet-el. Re' Jacob re' juniwal chi tz'inuj imb'aan wii' oq'ik i xikoj chi rub'ihnaal i ye'aab' re' re'.

⁹Noq xsutinik wo' chik chaloq i Jacob reh i Padan-aram, ar wo' chik Bet-el xuk'uhtaaj riib' i Dios chuwach, eh xkuxeesjik.

¹⁰Je' wili i xq'orarik reh: Re' hat, Jacob ab'ihnaal yu'naak, xa re' la' yu'naak johtoq chi qawach Israel chik i naa ab'ihnaam, i nuchjik. Noq jalooj chik i rub'ihnaal,

¹¹je' wili i xq'orarik reh: Re' hin i Dios nim wajaawriik, re' hin naa nuk'ihaaxb'isam taqe awak'uun awixq'uun, taqe awiih aamaam. Eh korehtaal kiponik chi k'ih ch'uq chi tinamit, eh wilik taqe i naa kokiik chi reyil.

¹²Re' ye'aab' xnuyeew cho reh aamaam Abraham, i xnuyeew reh awajaaw Isaac, naa wo' nuye'em aweh i hat, eh naa wo' nuye'em keh awiih aamaam, na'chub'an.

¹³Eh noq xelik reje i Dios chupaam i ye'aab' xq'orob'jik wii' i Jacob,

¹⁴re' reh xuchop chaloq jinaj ab'aj xulamaa' panak'al chi je' jilow pilalix rehtalil chi ar xq'orob'jik ruum i Dios. Eh xukuxisaj, xut'urej i aseite, riis uuva chinaah.

¹⁵Eh Bet-el i rub'ihnaal xukoj i ye'aab' re' re'.

¹⁶Re' taqe re' xi elik wo' chik reje Bet-el, eh noq ach naa je' yejaal i jinaj léwa majaa' kiponik chupaam i ye'aab' Efrata noq xponik i ora reh i ruk'uliik ruk'ux i Raquel, eh q'e' k'axik noq xk'ulik ruk'ux.

¹⁷Noq yijlik i ruti'kiil je' wili i xq'orarik reh ruum i rilool: Maatib'isaj ak'ux re' i k'isa aha'lak'uun x-aasjik k'isa k'un wo' chik, i nuchjik.

¹⁸Eh noq re' Raquel ach k'isiin ma' nkimik noq k'ahchi' chik rub'ehlaam ruxlaab', Benoni rub'ihnaal i k'isa k'un xukoj, eh xkimik. Re' i k'isa k'un Benjamín i rub'ihnaal xkojarik ruum i rajaaw.

¹⁹Je' re' i kimik xuk'ul i Raquel, ar xkimuq'aa' chi chii' i b'eeh inooj chupaam i ye'aab' Efrata, eh yu'naak re' i k'isa tinamit Belén.

²⁰Re' Jacob jinaj i nim rooq ab'aj xulamaa' panak'al chi rehtalil aha' xmuhqik wii' i rehk'een Raquel, eh xa ko wilik wo' ar i rehtalil chupaam taqe q'iij yu'naak.

²¹Re' Israel xelik reje chupaam i ye'aab' re' re'. Ar chik xooj ruyejaa' i ru-itz'ihy naah paat chi juntar i ye'aab' Migdal-edar.

²²Eh noq ruyejaam chik i ru-itz'ihy naah paat ar i Israel, re' Rubén xwirik i koq ruuk' i Bilha, re' rukab' rixoqil i rajaaw. Noq xunab'eej i Israel chi je' re' i xub'an i rak'uun ma' k'isiin ta xchalik ruk'aah.

²³Re' taqe i rak'uun i Jacob xi wihik kab'laj taqe chi kiib', re' taqe i rak'uun xi wihik ruuk' i Lea je' wili i kib'ihnaal: Rubén i peet rak'uun, eh re' i Simeón, Leví, Judá, Isacar, eh Zabulón.

²⁴Re' i rak'uun xi wihik ruuk' i Raquel ki'ib' taqe, José i jinaj, re' chik i jinaj Benjamín.

²⁵Eh re' rak'uun xi wihik ruuk' i Bilha re' rajpooh i Raquel ki'ib' wo' taqe, je' wili i kib'ihnaal: Dan, eh Neftalí.

²⁶Re' taqe i rak'uun xi wihik ruuk' i Zilpa re' i rajpooh i Lea, ki'ib' wo' taqe, je' wili kib'ihnaal: Gad, eh Aser. Re' taqe i re', chu'nchel i rak'uun i Jacob xi-aasjik chupaam i ye'aab' Padan-aram.

²⁷Re' Jacob xooj chi rilariik i rajaaw Isaac chupaam i ye'aab' Mamre, re' wo' hoq i tinamit Arba, eh Hebrón, ar xpatinik i Abraham, ruch'ihil i Isaac.

²⁸Re' i Isaac jinaj siento ruuk' kajwinaq haab' i wilik reh,

²⁹noq xkimik xti maam chik chi korik xponik rureq taqe i rumaam rati't kamnaq taqe chaloq. Eh noq xkimik i Isaac, re' i rak'uun Esaú ruch'ihil i Jacob xmuuq'anik reh.