Read Poqomchi Gen 4 Bible Online

Gen 4 - Poqomchi bible

Gen 4

¹Re' Adán xwirik ruuk' i Eva re' i rehk'een, eh xkahnik wach k'acharik x-aasjik jinaj i k'isa rak'uun, Caín i rub'ihnaal xukoj. Eh re' Eva je' wili i xuq'or: Re' QaJaaw Dios xraaj chi xuyeew jinaj k'isa wak'uun, inki.

²Chi riij i re', x-aasjik wo' chik jinaj k'isa rak'uun ruchaaq' i Caín, eh Abel i rub'ihnaal xukoj. Re' rukamaj i Abel k'isanik taqe tentzun, eh re' i Caín aj ab'ixoom.

³Eh xponik i q'iij noq re' i Caín xuk'am reje i wach i rutik, xuyeew chi rumayiij chuwach i QaJaaw Dios.

⁴Je' wo' Abel reh, xuk'am taqe reje i peet rak'uun i rutentzuun, xiik' naah kiq'ina'iil, xuyeew chi rumayiij chuwach i QaJaaw Dios. Eh re' i QaJaaw Dios xponik chuwach i rumayiij i Abel je' wo' hoq i runa'ojb'al.

⁵Eh re' rumayiij i Caín reh ma' xponik ta chuwach QaJaaw Dios, ni xata re' i runa'ojb'al xponik chuwach. Xrilow chi je' re' i Caín xuyoj i wach, eh ma' k'isiin ta xchalik ruk'aah.

⁶Xrilow chi je' re' i QaJaaw Dios je' wili i xuq'or reh i Caín: ¿Chib'ih reet noq xayoj aawach, eh ma' k'isiin ta xchalik ak'aah?

⁷Wila' re' holohik k'ahchi' kaat neemponik chi nuwach, eh wila' ma' holohik i k'ahchi' kaat, re' mahk ma' najt ta wilik, xa re' wo' yu' neetiq'ehb'ik chupaam. Re' hat wilik awajaawriik chi ma' nee ta ti q'ehb'ik pamahk, i nuchjik.

⁸Chalik i Caín xuk'am reje i ruchaaq' panab'iix. Eh noq wilkeeb' chik ar, re' Caín ma' k'isiin ta noq xchalik ruk'aah, eh xukansaj i ruchaaq', Abel.

⁹Eh noq xsutinik reje i Caín xpahqaljik reh chi je' wili ruum i QaJaaw Dios: ¿Aha' xakanaa' chaloq i Abel aachaaq'? i nuchjik. Re' Caín je' wili i chaq'wik xub'an: ¿Chib'ih naa nunaab'eem i hin, hin ta' nche cha'jen reh i nuchaaq'? inki.

¹⁰Je' wili i xq'orarik reh ruum i QaJaaw Dios: ¿Chib'ih reet noq xakansaj aachaaq'? Re' rukik'eel aachaaq' xachihkaaj chinaah i wach ak'al xwilow chik ruum i re' naa nuq'atam i q'orik cha naah.

¹¹Yu'naak aj re' xaq'eb' awiib' chuwach aak'al x-uk'inik reh i rukik'eel aachaaq' noq xakansaj.

¹²Eh noq naa chik aawab'ixeem wach aak'al, ma' naa ta chik kiwachiniik taqe atik, xak'ul naa awojiik chinaah i wach ak'al xama' naa ta chik ahi'liik, inki.

¹³Eh re' Caín je' wili i ruchaq'weesjiik i QaJaaw Dios xub'an: Xti q'e' wo' chik ti' i tojb'al numahk xayeew, ti ma' kuyuuj ta wo' chik.

¹⁴Yu'naak xinawesaj chupaam i ye'aab' wili, eh xa aha' chik nawojiik chi b'ehik reh chi ma' nee ta chik inawil nuwach, xa je' chik hin tokoom tinamit, eh xa awach pa' naa rureqwiik weh naa kiin rukansam, inki.

¹⁵Eh re' i QaJaaw Dios je' wili i xuq'or reh i Caín: Wila' awach xkansanik aweh wuquub' pech naa ruye'ariik chutojariik i ru mahk, inki. Re' QaJaaw Dios xukoj rehtalil i Caín reh chi awach naa rureqwiik reh ma' naa ta rukanteesjiik ruum.

¹⁶Chi riij i re', xelik reje i Caín aha' xuq'oreej wii' i QaJaaw Dios, xooj chi patinik paruyuq'ul i Nod, re' i wilik reje pareelb'aal q'iij reh i Edén.

¹⁷Re' i Caín xukanaa' wach k'acharik i rehk'een, eh x-aasjik jinaj k'isa rak'uun, Enoc i rub'ihnaal xukoj. Chi riij i re', xuyejaa' i junseht chi tinamit, Enoc i rub'ihnaal xukoj, re' i rub'ihnaal i rak'uun.

¹⁸Eh re' Enoc xwihik chaloq jinaj rak'uun Irad rub'ihnaal. Re' Irad rajaaw chaloq i Mehujael, re' i Mehujael, rajaaw i Metusael, re' Metusael rajaaw i Lamec.

¹⁹Re' Lamec ki'ib' i rixoqil xwihik, re' jinaj, Ada rub'ihnaal, eh re' chik i jinaj Zila rub'ihnaal.

²⁰Re' Ada jinaj i rak'uun xwihik, Jabal i rub'ihnaal xukoj, re' kimaam kati't, taqe i xi patinik xa pan itz'ihy naah paat, re' taqe i xik'isanik cho chikop.

²¹Re' Jabal jinaj i ruchaaq' xwihik Jubal i rub'ihnaal, re' i kimaam kati't chu'nchel i xiq'ojinik cho arpa, je' wo' taqe i xixulinik cho reh i xuul q'ooj.

²²Re' ixoq Zila x-aasjik jinaj rak'uun Tubal-caín i rub'ihnaal xukoj. Re' reh aj ch'eyel reh chu'nchel i q'an ch'ihch', taqe i raxch'ihch'. Re' i Tubal-caín jinaj i ranaab' xwihik Naama rub'ihnaal.

²³Eh pan jinaj q'iij, re' Lamec je' wili i xuq'or keh kab'chel i rixoqil: re' Ada, eh re' i Zila: Hat taq wixoqil akab'cheel chab'iraj taq i naa nuq'orom: Re' hin jinaj i winaq xnukansaj ruum i nuyok'ariik xub'an, eh jinaj wo' aak'un xnukansaj ruum i nuq'ojariik xub'an.

²⁴Eh wila' wuquub' pech naa rutojom i ru mahk i naa rukansaniik reh i Caín. Re' naa rukansaniik wee hin lajeeb' rukajwinaq pech chi wuquub' pech naa rutojom i ru mahk, inki.

²⁵Re' Adán xukanaa' wo' chik wach k'acharik i rehk'een, eh x-aasjik wo' chik jinaj rak'uun, Set i rub'ihnaal xukoj. Re' Eva je' wili xuq'or: Re' QaJaaw Dios xuyeew wo' chik jilow weh i wak'uun Abel, re' i xukansaj i Caín, inki.

²⁶Eh re' Set reh xwihik wo' jinaj rak'uun, Enós rub'ihnaal xukoj. Ar aj xtohq'ik chaloq re' i rulooq'jiik QaJaaw Dios.