Read Poqomchi Gen 40 Bible Online

Gen 40 - Poqomchi bible

Gen 40

¹Eh chi riij taqe re', re' i winaq inye'wik ruhaa' pan kulk i reey, je' wo' hoq i k'amal kib'eeh kiyej-anik rukaxlanwi'k i reey, wilik i ma' holohik taj xkian chuwach i kipatroon re' reey ar Egipto.

²Re' i reey xchalik ruk'aah kuuk' i ki'ib' chi winaq re' re' jinaj i k'amal kib'eeh inye'wik ruhaa' i reey, re' i k'amal kib'eeh i kiyej-anik rukaxlanwi'k i reey.

³Xuq'asaj taqe pan q'ab' ink'amwik kib'eeh i soldado, re' incha'jinik keh i aj tz'ilom. Eh xuyeew taqe prexo, re' wo' wilik wii' chi prexohjik i José.

⁴Re' i k'amal kib'eeh i soldado incha'jinik keh i prexo xuq'or reh i José chi re' reh naa rilwiik keh i ki'ib' chi raj kamanoom i reey, wilkeeb' pantz'ilom. Eh re' taqe re' xama' k'ih ta laj q'iij xi wihik pantz'ilom.

⁵Eh pan jinaj q'iij, re' taqe i ki'ib' chi winaq wilkeeb' prexo, re' inye'wik ruhaa' i reey re' i aj yej-an kaxlanwi'k, wilik i xkilow wach pan kiwiriik chi kiju'junaal chupaam i jinaj chi aq'ab', eh reh reh wach i ruq'or i xkil pan kiwiriik.

⁶Noq xooj k'oloq i José wahq'eq ma' k'isiin ta ntz'irik kiwach taqe i ki'ib' chi prexo re' re' noq xponik taqe rureq.

⁷Je' re' noq xupahqaaj keh chi je' wili: ¿Chib'ih reet noq q'e' taq intz'irik awach yu'naak? inki.

⁸Re' hoj intz'irik qawach ruum wilik i xqil pan qawiriik, eh ma' awach ta inch'ob'wik rub'ehel qeh chib'ih i ruq'or, inki taqe. ¿Mi ma' aweht'al taq re' hat chi re' Dios neench'ob'wik rub'ehel chib'ih i ruq'or taq inaxohk'reej? Neerub'an chi nee taq inaq'or weh nik' wach taq inaxohk'reej, inki José.

⁹Re' k'amal kib'eeh i kiye'wik ruhaa' i reey xuk'utjaaj reh i José aha' wilik i xrilow wach paruwiriik, je' wili i xuq'or: Re' hin juniwal chik inchel i uuva xwilow wach.

¹⁰Ixib' i q'ab', eh xtoxlinik b'ila', eh xuyeew ruhtz'ub'aal. Re' taqe i ruhtz'ub'aal xsutinik chi wach i uuva xa q'an chik noq xwilow.

¹¹Eh re' hin wilik b'ila' chik panuq'ab' i kulk i nuyeew wii' ruhaa' i reey inuyitz' chik i riis uuva chupaam, eh xnuq'asaj chik i kulk pan q'ab' i reey noq xwil, inki.

¹²Re' José je' wili i xuq'or: Re' xawil i hat panawiriik je' wili i ruq'or: Re' ixib' chi q'ab' i uuva iraaj ruq'orom chi re' ixib' q'iij.

¹³Eh panixib' q'iij naa kaat resam i reey pantz'ilom, eh naa wo' chik kaat rukojom panakamaj, eh naa wo' chik aye'em ruhaa' pan kulk i reey, je' wo' rukab' i na a'n cho pampeet.

¹⁴Re' i hin i nupahqaaj otob'il aweh noq naa wo' chik awihiik ruuk' i reey k'oloq panak'ux i otob'il xnub'an aweh, tiq'oroq i koq chi wiij, reh chi nee ruketelaaj nuwach, eh nee wo' kiresaj pantz'ilom i hin.

¹⁵Re' hin xa xinkelq'aaj wo' chaloq najtir pan kixilak i aj hebreo, eh noq wilkiin ayu' pantz'ilom, xama' xta wo' numahk, inki i José.

¹⁶Eh noq xrilow i k'amal kib'eeh i yej-an kaxlanwi'k chi re' José xuch'ob' rub'ehel chi holohik i ruq'or i xixohk'reej i aj tz'ilom jinaj, je' wili i xuq'or reh i José: Re' hin je' wili i xwil panuwiriik ixib' b'ila' chik i nukok' chakaach wilik wach nunaah eh nujinaq taqe chi saq kaxlanwi'k.

¹⁷Re' i k'isa chakach wilik kochinaah taqe chakach nutehlaam, reh reh wach i suq laj kaxlanwi'k wilik chupaam reh chik inche reey. Eh kirupik chik i kok' tz'ikin inkik'ux chik keh i kaxlanwi'k wilik chupaam i k'isa chakach nutehlaam, inki.

¹⁸Re' reh je' wili i chaq'wik xub'an: Re' xawil i hat panawiriik je' wili i ruq'or, re' ixib' chi kok' chakach iraaj ruq'orom chi re' ixib' q'iij.

¹⁹Pan ixib' q'iij re' reey naa kaat ruk'uliik resam pantz'ilom, eh naa kaat rut'uyaam nah q'ab' chee', re' aati'jolal re' k'uch naakik'uxwiik reh, i nuchjik ruum i José.

²⁰Eh paroox q'iij xuninq'ijeej ruhab'ul i reey, jinaj i runimaal ninq'iij xub'an, xuyuq'eej taqe ruuk' chu'nchel i kikamanik ruuk'. Eh chuwach taqe i rulaa' xutaq'aaj rehtesjiik pantz'ilom ink'amwik kib'eeh i kiye'wik ruhaa' pan kulk i reey ruch'ihil i k'amal kib'eeh i kiyej-anik kaxlanwi'k.

²¹Re' inye'wik ruhaa', i reey xukoj wo' chik parukamaj aha' naq wilik wii', xkahnik wo' chik chi ye'el ruhaa' i reey, je' wo' rukab' i rub'an cho pampeet.

²²Eh re' i k'amal kib'eeh i kiyej-anik kaxlanwi'k xutaq'aaj rut'uyub'jiik nah chee', xujihk'aaj chi ralaq je' wo' rukab' i xq'orarik reh ruum i José.

²³Re' i k'amal kib'eeh i kiye'wik ruhaa' pan kulk i reey, ma' xk'ulik ta chik paruk'ux otob'il xpahqaljik reh ruum i José.